ပန်ကာ

May 17, 2019

ပူလွန်းလို့ ပန်ကာဖွင့်အိပ်တာ အန္တရာယ်ရှိလား

ပြင်းလွန်းတဲ့အပူရှိန်ကို အံတုပြီး လှုပ်ရှားသွားလာနေရတာ အတော်ပင်ပန်းပါတယ်။ ခုချိန်မှာ အရိပ်ထဲနေရင်တောင် ပူလောင်နေရတဲ့ နွေအပူဒဏ်ကို ဘယ်လိုသက်သာအောင် နေရမလဲပဲ တွေးနေကြမှာပါ။ အင်္ကျီဆိုင်ရှေ့ ဖြတ်ရင်တောင် အသားအေးမယ့် အဝတ်အစားကိုပဲ မျက်လုံးထဲ မြင်တော့တယ်။ အပူသက်သာဖို့ အိမ်တိုင်းမှာ အမြဲသုံးလေ့ရှိတာက လျှပ်စစ်ပန်ကာနဲ့ လေအေးပေးစက်ပါ။ လေအေးပေးစက်မရှိတဲ့ သူတွေတော့ ပန်ကာသုံးပါတယ်။ ပန်ကာက လိုသလို နေရာရွှေ့ပြောင်းလို့ရတာလည်း ပါတာပေါ့။ ပန်ကာကို နေ့ဘက်အပြင် ညအိပ်တဲ့အခါ ဖွင့်ထားပြီး အိပ်တတ်ကြပါတယ်။ ညကျ အိပ်ရာထဲဝင်တာနဲ့ တအားပူအိုက်တာကိုး။ ချွေးတွေတလုံးလုံးနဲ့ လူးရင်းလှိမ့်ရင်း မိုးလင်းသွားမှာ စိုးရတယ်လေ။ ပန်ကာကို ဟိုးအရင်တည်းက အသုံးပြုလာခဲ့ကြတာဖြစ်ပြီး အန္တရာယ်ကြီးကြီးမားမားလည်း မဖြစ်လောက်ဘူးလို့ ယူဆထားကြပါတယ်။ ဒါပေမယ့် တညလုံး ပန်ကာရှေ့ အိပ်စက်ကြတာဟာ စိုးရိမ်စရာရှိလားလို့ မေးခွန်းထုတ်စရာ ရှိလာပါတယ်။ သုတေသန ဆန်းစစ်ချက် တခုကြောင့်ပါ။ လေအေးပေးစက်မသုံးဘဲ ပန်ကာသုံးသူတွေမှာ ကျန်းမာရေးထိခိုက်မှုတွေ ရှိတယ်လို့ ဆက်နွှယ်မှု အထောက်အထားတချို့ကို သူက ဖော်ပြလာတာဖြစ်ပါတယ်။ ဒီဆန်းစစ်ချက်အရ အပူပြင်းထန်ချိန်အတွင်း ပန်ကာအသုံးပြုမှုရဲ့ ကောင်းကျိုးဆိုးပြစ်တွေအကြောင်း မရေရာမှုတွေကို သေချာဆက်လက်လေ့လာပြီး ခိုင်မာတဲ့ အထောက်အထား ဆက်ရှာဖွေဖို့ လိုပါတယ်လို့ ဗြိတိန် ကျန်းမာရေး ကာကွယ်စောင့်ရှောက်မှုဌာနမှ Katie Carmichael ကပြောပါတယ်။

ပန်ကာကြောင့် ပိုပူနိုင်

ဒီလေ့လာဆန်းစစ်ချက်ကို အကျိုးအမြတ်မယူ သုတေသနအဖွဲ့ The Cochrane Collaboration က ကျန်းမာရေးအာဏာပိုင်တွေအတွက် စုစည်းလေ့လာခဲ့တာ ဖြစ်ပါတယ်။ အပူချိန် အရမ်းပြင်းနေတဲ့ အချိန်မှာ ပန်ကာအသုံးပြုခြင်းက ခန္ဓာကိုယ်ကို အေးစေတဲ့အစား ပိုပူစေနိုင်ပြီး ထိခိုက်မှုတွေ ရှိစေနိုင်တယ်လို့ စိုးရိမ်ကြတာပါ။ အပူချိန်မြင့်လွန်းတဲ့အခါ ပန်ကာတွေကြောင့် ချွေးပိုထွက်စေနိုင်ပြီး (ပန်ကာနဲ့ ချွေးခဏတိတ်သလို ဖြစ်စေပေမယ့် အသားတွေပူလာတာ ခံစားဖူးမှာပေါ့) ရေဓာတ်ခန်းခြောက်တာနဲ့ ဓာတ်ဆားမမျှတာတွေ ဖြစ်စေနိုင်တယ်။ အဲဒီကနေ နှလုံးကအစ အာရုံကြောတွေအထိ ခန္ဓာကိုယ်ရဲ့ လုပ်ဆောင်ချက်တွေကို ကမောက်ကမ ဖြစ်စေနိုင်တယ်။ ဒီအခြေအနေမျိုးဆို သက်ကြီးပိုင်းအရွယ်တွေ၊ သိပ်ငယ်သေးတဲ့ ကလေးတွေနဲ့ ရောဂါအခံရှိသူတွေ အပါအဝင် ထိခိုက်လွယ်တဲ့သူတွေမှာ အထူးသဖြင့် ပိုဂရုစိုက်သင့်ပါတယ်။ သုတေသနများစွာကို လေ့လာဆန်းစစ်ခဲ့တဲ့အခါ ပန်ကာက အပူနဲ့ပတ်သက်တဲ့ ထိခိုက်မှုအန္တရာယ် လျော့နည်းစေတယ်ဆိုတဲ့ ရလဒ်တွေရယ်၊ ပန်ကာကြောင့် အပူနဲ့ပတ်သက်တဲ့ ကျန်းမာရေးအန္တရာယ်တွေ ပိုဆိုးစေတယ် ဆိုတာတွေရယ် ရောထွေးနေပါတယ်။ သုတေသန အထောက်အထားတွေကို အခြေခံတဲ့ ပညာရှင်တွေရဲ့ နောက်ဆုံးကောက်ချက်ကတော့ အပူချိန် 95ံ F ရောက်နေပြီဆိုရင် လျှပ်စစ်ပန်ကာတွေက အခန့်မသင့်ရင် ကျန်းမာရေးပြဿနာတွေ ရှိနိုင်တယ် ဆိုတာပါပဲ။

အပူဒဏ်အောက် ဘယ်လိုနေထိုင်ကြမလဲ

ပန်ကာနဲ့ အဲယားကွန်းကို အားကိုးနေတာထက် တခြားနည်းလမ်းတွေနဲ့ရော အပူဒဏ်အောက်က အန္တရာယ်တွေ ရှောင်လို့ရပါတယ်။ အရိပ်ထဲမှာနေဖို့တော့ လိုတာပေါ့။ အမေရိကန် ကြက်ခြေနီအသင်းရဲ့ အကြံပြုချက်တွေက –
  • ရေများများသောက်ပါ။ ရေမဆာရင်တောင် ပုံမှန်ဝင်အောင်သောက်ပါ။ ကဖင်းနဲ့ အယ်လ်ကိုဟောကို လျှော့ပါ။
  • နေ့ရဲ့ အပူဆုံးအချိန်တွေမှာ ဖြည်းဖြည်းလှုပ်ရှားပါ။ အားစိုက်ပြီး မြန်မြန်လှုပ်ရှားတာတွေ မလုပ်ပါနဲ့ (အားကစားလုပ်တာမျိုး)။
  • အပူချိန်အပြောင်းအလဲကို သတိထားပါ။ သိပ်ပူနေရာက အေးတဲ့နေရာကို ရုတ်တရက် အဝင်အထွက်လုပ်တဲ့အခါ ခန္ဓာကိုယ် အပူချိန်မှာ ကမောက်ကမဖြစ်ပြီး ဦးနှောက်သွေးကြော ပြတ်နိုင်ပါတယ်။
  • ချောင်ချောင်ချိချိ၊ အသားအေးတဲ့ အဝတ်အစားကို ဝတ်ပါ။ အရောင်ဖျော့တာ ပိုကောင်းပါတယ်။ အရောင်ရင့်လေ နေရောင်ခြည်အပူကို ပိုစုပ်ယူထားလေ ဖြစ်လို့ပါ။
  • မဖြစ်မနေ အပြင်သွားရတယ်ဆို အရိပ်အောက် ခဏတော့ ဝင်ဝင်နားပေးပါ။
  • ပန်ကာဖွင့်ပြီး အိပ်မယ်ဆိုရင်တော့ လူပေါ်ကို လေတိုက်ရိုက်မကျစေဘူး ဆိုရပါတယ်။ ပန်ကာလေလမ်းကြောင်းကို ဘေးဘက်လွှဲထားရင် အနီးတဝိုက်မှာ အေးမြစေမှာပါ။
ရေးသားသူ - Yun Sandi Nan Mon ဆေးပညာပိုင်းဆိုင်ရာတည်းဖြတ်သူ - Dr. Thurein Hlaing Win
ဤဆောင်းပါးကို DVB ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။
2 years Ago
Up