ပညာသင်ယူခြင်း

A d v e r t i s e m e n t With Us

September 22, 2015

ပညာသင်ယူခြင်း နည်းလမ်းနှစ်သွယ်

လူတဦးတယောက်ရဲ့အတွေးအခေါ်နဲ့ ပညာသင်ယူနိုင်မှုအရည်အချင်းတွေကို လေ့လာဆန်းစစ်တဲ့အခါမှာ သက်ဆိုင်သူ အသုံးပြုတဲ့ပညာသင်ယူခြင်း နည်းလမ်းကို ကြည့်ရှု အကဲဖြတ်နိုင်တယ်လို့ ပညာသင်ကြားရေးနဲ့ သင်ယူရေးသုတေသနနယ်ပယ်က ပညာရှင်တွေကအဆိုပြုထားခဲ့ကြပါတယ်။ ပညာရပ်တခုကို လေ့လာ သင်ယူတဲ့အခါမှာ လူတယောက်ဟာ ဒီပညာရပ်ကို အပေါ်ယံ လေ့လာသင်ယူခြင်းနည်းလမ်း (Surface approach to learning)ကို အသုံးပြုသလား၊ နက်ရှိုင်းစွာလေ့လာသင်ယူခြင်းနည်းလမ်း(Deep approach to learning)ကို အသုံးပြုသလားဆိုတာကို သိရင် ဒီလူရဲ့ အတွေးအခေါ်နဲ့ အရည်အချင်းကို လေ့လာအကဲဖြတ်လို့ ရနိုင်ပါတယ်။ အပေါ်ယံလေ့လာသင်ယူခြင်း ပညာရပ်တခုကို လေ့လာတဲ့အခါ အပေါ်ယံလေ့လာသင်ယူခြင်းနည်းလမ်းကို အသုံးပြုတတ်သူများဟာ အဓိကအားဖြင့် စာမေးပွဲအောင်ရေး၊ ဘွဲ့လက်မှတ်ရရှိရေး၊ ပညာရပ်တပိုင်းတစကို ရေတိုမှာလိုသလို ဆွဲသုံးနိုင်ရေး စတဲ့ ရည်ရွယ်ချက်ရှိသူများ ဖြစ်ပါတယ်။ သူတို့ဟာ အလုပ်တခုကို ရေဆုံးရေဖျား ထိထိရောက်ရောက် ဖြစ်အောင်လုပ်နိုင်သူများ မဟုတ်ပဲ၊ ရေသာခို လှေကြုံစီးတတ်သူများဖြစ်လာလေ့ ရှိပါတယ်။ သူတို့အတွက် လေ့လာသင်ယူခြင်းဆိုတာ အလွတ်မှတ်မိခြင်းနဲ့ မှတ်ထားတာတွေကို မှတ်ထားတဲ့အတိုင်း ပြန်ပြောနိုင်ခြင်း ဖြစ်ပါတယ်။ အပေါ်ယံလေ့လာသင်ယူတတ်သူများရဲ့လေ့လာသင်ယူခြင်းဆိုင်ရာဗျူဟာတွေကတော့ လေ့လာရမယ့် စာအုပ်စာပေထဲက ကောင်းနိုးရာရာအချက်အလက်တွေကို ဆွဲထုတ်ပြီး အလွတ်မှတ်မိနေအောင် ကျက်မှတ် ထားခြင်း ဖြစ်ပါတယ်။ လေ့လာနေတဲ့ ပညာရပ်ကို ကျွမ်းကျွမ်းကျင်ကျင်နားလည်အောင် ပြုလုပ်လေ့မရှိပါဘူး။ အလွတ်ကျက်မှတ်ခြင်းကိုပဲ ပြုလုပ်တတ်ကြပါတယ်။ ပညာရပ်ဆိုင်ရာသဘောတရားတွေကို ဆက်စပ် တွေးခေါ်ခြင်း မရှိပဲ ဦးနှောက်ထဲမှာ ပညာတွေ ကျန်ဖို့ထက် စာမေးပွဲအဖြေလွှာပေါ်မှာ ရေးချလိုက်နိုင်ဖို့ကိုသာ အာရုံစိုက်လေ့ ရှိကြပါတယ်။ ပညာရေးဆိုင်ရာလေ့လာသူ Entwistleနဲ့ Martonတို့ကတော့ ပညာလေ့လာသင်ယူခြင်းဆိုတာ အလွတ်မှတ်မိခြင်းလို့ ရှုမြင်တတ်တဲ့ ကျောင်းသားတွေဟာ ပညာရပ်တွေကို အပေါ်ယံပဲ လေ့လာတတ်လေ့ ရှိတာကြောင့် သက်ဆိုင်ရာပညာရပ်ကို နက်နက်နဲနဲ သိနားလည်ခြင်းမရှိကြဘူးလို့ ဆိုထားခဲ့ပါတယ်။ အပေါ်ယံ လေ့လာသင်ယူတတ်သူများဟာ ပညာရပ်ရဲ့ အခြေခံသဘောတရားတွေကို လေ့လာတာထက် စာမေးပွဲမှာ ပါနိုင်မယ့် မေးခွန်းတွေမှာ အဖြေဘယ်လိုပေးရမလဲဆိုတာကိုပဲ ကြိုပြီး တွေးလေ့ရှိကြပါတယ်။ စာမေးပွဲနဲ့ အခြား စစ်ဆေးချက်တွေမှာ ကျရှုံးမှာကို အလွန်ပဲ စိုးရိမ်ပူပန်တတ်ကြပါတယ်။ ပညာ လေ့လာ သင်ယူနေချိန်တွေမှာလဲ ပျင်းရိခြင်းတွေ၊ စိတ်ဓာတ်ကျခြင်းတွေ ဖြစ်နေတတ်ပါတယ်။ နက်ရှိုင်းစွာလေ့လာသင်ယူခြင်း နက်ရှိုင်းစွာ လေ့လာသင်ယူခြင်းနည်းလမ်းကို အသုံးပြုတဲ့ ပညာလေ့လာသင်ယူသူများကတော့ ပညာရပ်တခုကို လေ့လာတဲ့အခါမှာ ဒီပညာရပ်နဲ့ ပတ်သက်တဲ့စာမေးပွဲတွေ အောင်ဖို့နဲ့ ရေတိုအသုံးချနိုင်ရေးကိုပဲ အာရုံထားလေ့ မရှိကြပါဘူး။ ဒီပညာရပ်ကို အသေးစိတ်၊ နက်နက်ရှိုင်းရှိုင်းနားလည်အောင် ကြိုးပမ်း လေ့လာကြပါတယ်။ ဒီပညာကို အသုံးပြုပြီး လက်တွေ့မှာ ဖြစ်ပေါ်နေတဲ့အဖြစ်အပျက်တွေ၊ ပြဿနာတွေကို အဖြေရှာနိုင်ဖို့ဆက်စပ်တွေးတောလေ့ရှိကြပါတယ်။ ပညာသင်ယူခြင်းအပေါ်မှာ ပျင်းရိငြီးငွေ့ခြင်း မရှိပဲ ပညာရပ်တွေကို တဆင့်ချင်းစနစ်တကျ လေ့လာသင်ယူကြပါတယ်။ ဖြတ်လမ်းလိုက်လေ့ မရှိကြပါဘူး။ ပညာလေ့လာသင်ယူခြင်းမှာ ဖြတ်လမ်းလိုက်တတ်တဲ့အကျင့်ဆိုးဟာ မိမိကိုယ်တိုင်ကိုသာမကအများကိုပါ ဒုက္ခရောက်စေတတ်ပါတယ်။ ဥပမာ- နိုင်ငံတွေရဲ့ စီးပွားရေးဖွံ့ဖြိုးတိုးတက်မှု indicators တွေပေါ်မှာ အခြေခံပြီး Multivariateanalysis လုပ်တယ်ဆိုပါစို့။ ပညာလေ့လာသင်ယူမှုမှာ ဖြတ်လမ်းလိုက်တတ်သူဟာ ဒီလို ဆန်းစစ်ချက်စာတမ်းတချို့ကို ဖတ်မှတ်၊ အရေးပါတဲ့အချက်တွေကို ဆွဲနုတ်ပြီး ဒီအကြောင်းကို သိသယောင်ယောင်နဲ့ တတ်ယောင်ကား လုပ်လေ့ရှိပါတယ်။ ဒါပေမယ့် ဒီလို လေ့လာဆန်းစစ်ချက် လုပ်နိုင်မယ့်အခြေခံသဘောတရားတွေဖြစ်တဲ့ variableapproximations, dimension reductions, linear combinations forseparation, Higher-dimensional approximations, allocation rules,misclassification စတာတွေကို သဘောမပေါက်တဲ့ အခါကျတော့ လက်တွေ့ ပြုလုပ်ရတဲ့ အခါမှာ ကိုးရို့ကိုးယားတွေ ထွက်လာတတ်ပါတယ်။ သိပ္ပံပညာရပ်မှာပဲဖြစ်ဖြစ်၊ ၀ိဇ္ဇာ ပညာရပ်မှာပဲ ဖြစ်ဖြစ် အခြေခံသဘောတရားတွေကို ကျွမ်းကျင်ပိုင်နိုင်မှု မရှိပဲ ဖြတ်လမ်းလိုက် ဆရာလုပ်လိုသူတွေ များလာတဲ့အခါ သက်ဆိုင်ရာပညာရပ်နယ်ပယ်မှာသာမက ပညာရပ်နဲ့ လက်တွေ့ ဆက်စပ်နေတဲ့အသုံးချမှုနယ်ပယ်တွေမှာပါ ကသောင်းကနင်း ဖြစ်နေတတ်ပါတယ်။ ဖြတ်လမ်း လိုက်ခြင်းဟာ လူတဦးတည်းအတွက်သာမက အများပြည်သူကိုပါ ဒုက္ခရောက်စေတတ်ပါတယ်။ ဒါကြောင့် နက်ရှိုင်းစွာလေ့လာသင်ယူခြင်း နည်းလမ်းကို ပညာလေ့လာသူအများက အသုံးပြုကြဖို့အလွန်ပဲ အရေးကြီးလှပါတယ်။ နက်ရှိုင်းစွာ လေ့လာသင်ယူခြင်းဟာ လူအဖွဲ့အစည်းဖွံ့ဖြိုးတိုးတက်မှုအတွက် လိုအပ်ချက်တရပ်ဖြစ်တဲ့ higher-orderthinking (အတွေးအခေါ်အဆင့်အတန်း မြင့်မားမှု)ကိုလဲ ထောက်ကူပေးနိုင်ပါတယ်။ အတွေးအခေါ် အဆင့်အတန်း မြင့်မားသူတွေဟာ လူ့အဖွဲ့အစည်းအတွင်းမှာ ရှိနေတဲ့ အိုင်ဒီယာတွေကို အစဉ်အလာ ဓလေ့ထုံးစံကြောင့်ဆိုပြီးတော့လဲ လက်ခံလေ့ မရှိပါဘူး။ ဘယ်သူပြောတဲ့ အဆိုအမိန့်စကားဆိုပြီးတော့လဲ မျက်စိမှိတ် ယုံကြည်လေ့ မရှိပါဘူး။ အိုင်ဒီယာသဘောတရားတွေကို စနစ်တကျ လေ့လာပြီးမှ လက်ခံကျင့်သုံးလေ့ရှိကြပါတယ်။ လက်တွေ့ နယ်ပယ်နဲ့ ကိုက်ညီမှုရှိ၊ မရှိ ပြန်လှန်သုံးသပ်လေ့ရှိကြပါတယ်။ ပြဿနာတွေရဲ့ အရင်းအမြစ်တွေကို ရှာဖွေပြီး ဖြေရှင်းနိုင်ဖို့ ကြိုးစားလေ့ရှိကြပါတယ်။ အတွေးအခေါ်သစ်တွေကိုြံကံဆရှာဖွေလေ့ရှိကြပါတယ်။ ဝေဖန် ဆန်းစစ်ခြင်း (Criticalthinking)ကို ကျင့်သုံးလေ့ရှိကြပါတယ်။ နိဂုံး နိဂုံးချုပ်ဆိုရရင် နက်ရှိုင်းစွာ သင်ယူလေ့လာခြင်းကို အသုံးပြုသူတွေရဲ့ အရည်အချင်းဟာ အပေါ်ယံ သင်ယူလေ့လာခြင်းကို အသုံးပြုသူတွေရဲ့ အရည်အချင်းတွေထက် ရေရှည်မှာ ပိုမိုတိုးတက် ကောင်းမွန်တတ်တာကြောင့် နက်ရှိုင်းစွာ သင်ယူလေ့လာသူတွေ များပြားတဲ့ လူအဖွဲ့အစည်းဟာ အာဂုံဆောင် အလွတ်ကျက်ပြီး အပေါ်ယံသင်ယူလေ့လာသူတွေ များပြားတဲ့ လူ့အဖွဲ့အစည်းထက်ပိုပြီး ဖွံ့ဖြိုးတိုးတက်လေ့ ရှိပါတယ်။ ဒါကြောင့် ပညာသင်ယူခြင်းနည်းလမ်း ၂ သွယ် ခွဲခြားမှုကို အသုံးပြုပြီး လူတဦးချင်းစီရဲ့ အရည်အချင်းတွေကို လေ့လာသုံးသပ်နိုင်ရုံ သာမက လူ့အဖွဲ့အစည်းရဲ့ အနာဂတ်ကိုပါ ခန့်မှန်းတွက်ချက်လို့ ရနိုင်ပါကြောင်း ရေးသားတင်ပြအပ်ပါတယ်။ "ပညာရပ်များကို နက်ရှိုင်းစွာ လေ့လာသင်ယူခြင်းမှသည် တိုးတက်သော လူ့ဘောင်ဆီသို့" ခင်မမမျိုး (မှတ်ချက်-စာရေးသူ၏ အင်တာနက်စာမျက်နှာမှ ခွင့်ပြုချက်ဖြင့် ကူးယူဖော်ပြသည်)
5 years Ago
Up