ရှမ်းပြည်မြောက်ပိုင်း၊ မူဆယ်ခရိုင်၊ နမ့်ခမ်းမြို့မဈေးကြီးထဲမှာ ဇန်နဝါရီ ၄ ရက် ဒီကနေ့ မွန်းလွဲပိုင်းက ဆက်ကြေးလာကောက်တဲ့  TNLA တအာင်းလက်နက်ကိုင်အဖွဲ့က ၂ ယောက် ပစ်သတ်ခံရတယ်လို့  ဈေးသူဈေးသားတွေက ပြောပါတယ်။

အပစ်ခံရတဲ့နေရာဟာ မန့်နောင်တန်းလို့ခေါ်တဲ့ လူသုံးကုန်ပစ္စည်းအမျိုးမျိုးရောင်းချတဲ့ ဈေးတန်းမှာဖြစ်ပြီး အပစ်ခံရသူ ၂ ဦးဟာ ဒီမတိုင်ခင်က ဆက်ကြေးလာကောက်ခဲ့တယ်လို့ နမ့်ခမ်းဈေးရောက် ဒေသခံတယောက်က ဒီဗွီဘီကို ပြောပါတယ်။ 

“သူတို့ နှစ်ယောက်က မနေ့ တနေ့ကတည်းကလည်း ဆက်ကြေးလာကောက်သွားတယ်လို့ ကြားတယ်။ ဒီနေ့လည်းလာကောက်တယ်တဲ့။ မန့်နောင်တန်းနားရောက်တော့ အပစ်ခံရတယ်။ အဲတုန်းက ကျနော်ကပစ္စည်းဝယ်ပြီးပြန်လာတာ အိမ်ရောက်ခါနီးပြီ။ ဈေးထဲကသူငယ်ချင်းက ပစ္စည်းလာသိမ်းကူဦးဆိုပြီး ဖုံးဆက်တော့ ပြန်သွားတာ ရဲနဲ့ တာဝန်ရှိသူတွေရောက်နေပြီ။ ပြီးတော့ နာရေးကူညီမှုအသင်းက ကားနဲ့လာသယ်သွားတယ်။ ဈေးတော့မပိတ်သေးဘူး။ ဒါပေမဲ့ အကုန် ထိတ်လန့်ပြီး ပစ္စည်းသိမ်းကြ၊ ဆိုင်ပိတ်ကြနဲ့ ရှုပ်ယှက်ခတ်ကုန်တယ်။”

သူတို့ဘယ်လိုလုပ်ပြီးအပစ်ခံရတယ်ဆိုတာတော့ မသိရကြောင်း၊ ဈေးထဲရောက်နေသူတွေက သေနတ်သံ ၁၀ ချက်လောက်ကြားတယ်လို့ပြောပြီး အနီးကပ်တေ့ပစ်တယ်လို့ ယူဆကြောင်း၊   ဈေးထဲမှာလည်း လူစည်ကားနေတာကြောင့် အဝေးကနေပစ်ရင် တခြားသူတွေပါထိ မှန်နိုင်တယ်လို့ နမ့်ခမ်းဒေသခံကပြောပါတယ်။ 

သေဆုံးသူတွေကို နမ့်ခမ်းဆေးရုံက ဆေးစစ်ဆေးပြီး နာရေးကူညီမှုအဖွဲ့က သင်္ချိုင်းကုန်းကို‌သယ်ဆောင်ကာ မီးသင်္ဂြိုလ်ဖို့ပြင်နေချိန် TNLA လက်နက်ကိုင်အဖွဲ့ကလူ တွေရောက်လာပြီး နာကူအဖွဲ့ကို သေနတ်နဲ့ချိန်ကာ အလောင်း ၂ လောင်းလုံး ပြန်လုသွားတယ်လို့ နောက်ထပ်နမ့်ခမ်းဒေသခံတစ်ဦးကလည်း ပြောပါတယ်။ 

သေနတ်ပစ်ခံရသူနဲ့ အလောင်းပြန်လုသွားသူတွေဟာ TNLA အဖွဲ့ဝင်တွေဟုတ်မဟုတ် အတည်ပြုဖို့အတွက် PSLF/TNLA ပြောရေးဆိုခွင့်ရှိသူတွေကို ဒီဗွီဘီကဆက်သွယ်မေးမြန်းလို့ မရသေးပါဘူး ၊ သူတို့ပြန်ကြားရေးဌာနကတော့ မသိရကြောင်း၊ ပြောခွင့်ရပုဂ္ဂိုလ်သာဖြေခွင့်ရှိ ကြောင်း ပြောပါတယ်။

အဆိုပါဈေးကြီးဟာ ဆိုင်ခန်းပေါင်း ၂၀၀၀ လောက်ရှိပြီး ပြီးခဲ့တဲ့ ဒီဇင်ဘာလက PSLF/TNLA အဖွဲ့က အဖွဲ့အစည်းရံပုံငွေအတွက်လို့ဆိုကာ ဆက်ကြေးတွေကျပ်သိန်းနဲ့ချီ ကောက်ခံနေတာကြောင့် ဈေးသူဈေးသားတွေက  ၅ ရက်တာ ဈေးပိတ်ပြီးဆန္ဒပြခဲ့ကြပါတယ်။ 

PSLA/TNLA  ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော်ကတော့ သူတို့ဟာ TNLA တပ်စဖွဲ့ကတည်းက လှုပ်ရှားနယ်မြေတွေမှာ အခွန်ကောက်ခဲ့ကြောင်း၊ ကိုဗစ်-၁၉ ကာလမှာ ပြည်သူတွေအခက်အခဲကိုနားလည်လို့ အခွန်အခလျော့ပေးတာတွေရှိကြောင်း၊ နှစ်နဲ့ချီ အခွန်ကောက်လာပြီး ခုမှဆန္ဒပြခံရတာတော့ သွေးထိုးသူတွေရဲ့ပယောဂကြောင့်သာ ဖြစ်ပြီး ဆန္ဒပြခံ ရပေမဲ့ အခွန်ကတော့ ဆက်ကောက်သွားမယ်လို့ ဒီဗွီဘီကို အရင်လက ပြောထားပါတယ်။ 

အခုလို သူတို့တပ်ဖွဲ့ဝင်တွေအပစ်ခံရတာကြောင့် ဈေးထဲလာပြီးဒုက္ခပေးမှာကိုလည်း ကြောက်ရွံ့နေကြတယ်လို့ နမ့်ခမ်းမြို့ခံက ပြောပါတယ်။

Photo- CJ

မကွေးတိုင်း၊ တောင်တွင်းကြီးမြို့၊ မောင်းတိုင် ၁ ရပ်ကွက်၊ ရေစက်လမ်းမှာနေထိုင်ပြီး ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ မြို့နယ်အတွင်းရေးမှူး ဦးဇော်ဇော်အောင်ဟာ ဒီဇင်ဘာ ၃၁ ရက် ညနေ ၅ ခွဲဝန်းကျင်က ပစ်သတ်ခံလိုက်ရတယ်လို့ သိရပါတယ်။

မျက်မြင်ဒေသခံတဦးက “စစ်သားတွေစောင့်နေတဲ့ ဂိတ်တွေ နှစ်ခုကြားမှာ ပစ်ခံရတာ။ ဆိုင်ကယ်စီးလာရင်း သူ့အိမ်လမ်းထိပ်နားမှာ သေနတ် ၃ ချက်မှန်ပြီး ဆိုင်ကယ်လဲသွားတယ်။ အရေးပေါ်ကားနဲ့ စစ်သားတွေရောက်လာပြီး ဆေးရုံခေါ်သွားတာမြင်လိုက်တယ်” ပြောပါတယ်။

ဦးဇော်ဇော်အောင်ဟာ တောင်တွင်းကြီးမြို့နယ်၊ ကြံ့ခိုင်ရေးပါတီရဲ့ ပြည်သူ့လွှတ်တော်ကိုယ်စားလှယ်ဟောင်း ဦးသန်းဝင်းရဲ့ တူအရင်းတစ်ယောက်ဖြစ်ပြီး ဖခင်ဖြစ်သူဟာလည်း ရပ်ကွက်အုပ်ချုပ်ရေးမှူးဟောင်းတဦးဖြစ်ကာ မောင်းတိုင် ၁ ရပ်ကွက်၊ အုပ်ချုပ်ရေးမှူးရုံးဟာလည်း ပြီးခဲ့တဲ့ဧပြီလဆန်းပိုင်းက မီးလောင်ကျွမ်းပျက်စီးခဲ့သေးတယ်လို့ ဒေသခံတွေက ပြောပါတယ်။

“နောက်ကျောကို ကျည် ၃ ချက်မှန်တယ်။ ဆေးရုံရောက်လာတဲ့အချိန်ထိတော့ အသက်ပါသေးတယ်။ နောက်ပြီးမှ ဆုံးသွားတာ။ ရဲလုပ်ငန်းစဉ်တွေ ဆက်လုပ်ဖို့ အလောင်းကို ရင်ခွဲရုံပို့လိုက်ပါပြီ” လို့ တောင်တွင်းကြီးပြည်သူ့ဆေးရုံတာဝန်ကျဆရာမတဦးက ပြောဆိုပါတယ်။

ပစ်ခတ်ခံရပြီး ဆိုင်ကယ်လဲသွားချိန် အရေးပေါ်ကားပေါ်ကို တင်ဆောင်ချိန်မှာ ဦးဇော်ဇော်အောင်ရဲ့ အင်္ကျီကြားထဲကနေ ပစ္စတိုသေနတ် ၁ လက်ထွက်ကျလာပြီး စစ်တပ်ကသိမ်းဆည်းသွားတယ်လို့ သိရပါတယ်။

သေဆုံးသွားတဲ့ ဦးဇော်ဇော်အောင်ဟာ စစ်ကောင်စီတပ်ဖွဲ့တွေနဲ့ ပလဲပနံသင့်သူတဦးဖြစ်ပြီး စစ်တပ်က အာဏာသိမ်းပြီးနောက်ပိုင်း ကိုဗစ်ကာကွယ်ဆေးထိုးနှံတဲ့အဖွဲ့မှာ ပါဝင်လုပ်ဆောင်ခဲ့သေးတယ်လို့လည်း သိရပါတယ်။

မိသားစုဝင်တဦးက “အလွန်အမင်းခံပြင်းရတယ်။ သူ နေမကောင်းလို့ ဘယ်မှမသွားတာ ကြာပြီ။ ညနေခင်းကမှ ကွမ်းယာနဲ့အရက် သွားဝယ်မယ်ဆိုပြီး အိမ်ကထွက်သွားတာ အပြန်မှာ အခုလိုဖြစ်ရတာပဲ။ မိသားစုဝင်တယောက် အသက်ဆုံးရှုံးရတော့ အရမ်းပူဆွေးသောကရောက်ရတယ်။ သူ့မိန်းမနဲ့ ကလေးတွေလည်း ငိုလို့။ သူ့အဖေလည်း သွေးတွေ အရမ်းတိုးနေတယ်” လို့ ပြောပါတယ်။

ဦးဇော်ဇော်အောင် ပစ်ခတ်ခံရတာနဲ့ပတ်သက်ပြီး အသေးစိတ်သိရှိနိုင်ဖို့ တောင်တွင်းကြီး မြို့မရဲစခန်းကို အကြိမ်ကြိမ်ဆက်သွယ်ခဲ့ပေမယ့် လက်ခံဖြေဆိုခြင်းမရှိတဲ့အပြင် ပစ်ခတ်မှုကို မည်သည့်အဖွဲ့အစည်းက ပြုလုပ်ခဲ့တယ်ဆိုတာလည်း ထုတ်ပြန်ထားတာ မတွေ့ရှိရသေးပါဘူး။

ဒေသခံတဦးက “ဇော်ဇော်အောင် မိသားစုက ပြည်ခိုင်ဖြိုးအသင်းကတည်းကတကယ့်အမာခံတွေ။ ကိုယ့်မြို့သားတယောက်အခုလိုဖြစ်တာတော့ စိတ်မကောင်းဘူး။ ဒါပေမဲ့ သူ့သမိုင်းသူရေးတာလေ။ မြို့အတွက် New Year လက်ဆောင်ဟာ ဒီလိုအကောင်ကြီးကြီး အမြီးရှည်ရှည်ထဲက ဖြစ်လိမ့်မယ်လို့ထင်မထားမိကြဘူး” လို့ ပြောပါတယ်။

ပစ်ခတ်မှုဖြစ်ပြီးနောက်ပိုင်း စစ်ကောင်စီတပ်သားတွေဟာ မြို့ပေါ်နေရာအနှံ့မှာ ဖြန့်ကြက် နေရာယူထားပြီး ညပိုင်းမှာလည်း ဆိုင်ကယ်တွေ၊ ကားတွေနဲ့ပါ လှည့်ပတ်နေတာတွေအပြင် ရပ်ကွက်အချို့ကလူနေအိမ်တွေကို စစ်သားအင်အားအလုံးအရင်းနဲ့ ဧည့်စာရင်းစစ်ဆေးနေတယ်လို့ ဒေသခံတွေဆီက သိရပါတယ်။