ပစ်သတ်ခံရ

February 2, 2023

ပေါင်မြို့နယ် ကြံ့ခိုင်ရေးပါတီ ကိုယ်စားလှယ်လောင်း ၁ ဦး ပစ်သတ်ခံရ

မွန်ပြည်နယ်၊ ပေါင်မြို့နယ် ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီ ကိုယ်စားလှယ်လောင်းဖြစ်ခဲ့ဖူးတဲ့ ဦးကိုကိုလေးဟာ ဖေဖော်ဝါရီ ၁ ရက် ည ၆ နာရီလောက်မှာ သေနတ်နဲ့ ပစ်ခတ်ခံရတာကြောင့် သေဆုံးသွားတယ်လို့ ဒေသခံတွေနဲ့ ပါတီဝင်တွေက ဒီဗွီဘီကို ပြောပါတယ်။

ပေါင်မြို့၊ ပေါင်းရပ်ကွက်၊ ဘူတာလမ်းမှာ နေထိုင်တဲ့ ဦးကိုကိုလေးကို အမည်မသိလူငယ် နှစ်ဦးက ဆိုင်ကယ်နဲ့ လာရောက်ပြီး နေအိမ်မှာပဲ သေနတ်နဲ့ ၇ ချက် ပစ်ခတ်ခဲ့တာပါ။

သေနတ်နဲ့ ပစ်ခတ်ခံရတာကြောင့် ဦးကိုကိုလေးဟာ ရင်ဘတ်နဲ့ နောက်ကျောတွေမှာ သေနတ်ဒဏ်ရာတွေ ရရှိပြီးနောက် မော်လမြိုင်ဆေးရုံသို့ ပို့ဆောင်စဉ် လမ်းမှာပဲ သေဆုံးသွားတယ်လို့ ဆိုပါတယ်။

ဦးကိုကိုလေးဟာ စစ်တပ် အာဏာသိမ်းပြီးနောက် အပြစ်မဲ့ပြည်သူတွေကို မတရားဖမ်းဆီးစေတာ၊ ပျူစောထီးအဖွဲ့တွေကို ငွေကြေးထောက်ပံ့တာ၊ စစ်ကောင်စီ ရွေးကောက်ပွဲ ဖြစ်မြောက်ဖို့ ကြိုးပမ်းနေတာကြောင့် နန်းထိုက်အောင် စစ်ဆင်ရေးအဖြစ် ပစ်ခတ်ရှင်းလင်းလိုက်တာလို့ အထူးစစ်ဆင်ရေးတပ်ဖွဲ့ (S.O.F)က ထုတ်ပြန်ထားပါတယ်။

သေနတ်နဲ့ ပစ်ခတ်ခံခဲ့ရတဲ့ ဦးကိုကိုလေးဟာ ပေါင်မြို့နယ် ကြံ့ခိုင်ရေးပါတီ အလုပ်မှုဆောင်အဖွဲ့ဝင် တစ်ဦး ဖြစ်သလို ၂၀၂၀ အထွေထွေရွေးကောက်ပွဲမှာ ပေါင်မြို့နယ်မဲဆန္ဒနယ်အမှတ်(၂) ပြည်နယ်လွှတ်တော်ကိုယ်စားလှယ်အဖြစ် ဝင်ရောက်ယှဉ်ပြိုင်ခဲ့ပေမယ့် ရှုံးနိမ့်ခဲ့ပါတယ်။

ပြီးခဲ့တဲ့နှစ် အောက်တိုဘာလတုန်းကလည်း ပေါင်မြို့နယ်၊ ပေါင်းရပ်ကွက်နေ ပေါင်မြို့နယ် ကြံ့ခိုင်ရေးပါတီ ဥက္ကဋ္ဌ ဦးကျော်လင်းဦး နေအိမ် ဗုံးခွဲတိုက်ခိုက်ခံခဲ့ရပြီး အဲဒီတိုက်ခိုက်မှုမှာ လူထိခိုက်ဒဏ်ရာတာ မရှိပေမယ့် အဆောက်အဦးတချို့ ထိခိုက်ပျက်စီးခဲ့ပါတယ်။

1 day Ago

January 28, 2023

မြင်းခြံတွင် စစ်ကောင်စီတပ်က ဗိုလ်ကြီးလင်မယား ပစ်သတ်ခံရ

မန္တလေးတိုင်း၊ မြင်းခြံမြို့နယ်မှာ စစ်ကောင်စီတပ် လကတ (၂၀၃၁)မှ  ဗိုလ်ကြီးအဆင့်ရှိသူ ခင်မောင်ထွန်းနဲ့ဇနီးဖြစ်သူတို့ကို ဇန်နဝါရီ ၂၆ ရက် မနက်ပိုင်းက မြင်းခြံအခြေစိုက် “လူကြမ်းကြီး အထူးပြောက်ကျားတပ်ဖွဲ့”က သွားရောက် ပစ်ခတ်ရှင်းလင်းခဲ့တယ်လို့ ထုတ်ပြန်ထားပါတယ်။ 

အဆိုပါဗိုလ်ကြီးလင်မယားဟာ ပျော်ဘွယ်စံပြကျေးရွာက “ရတနာထွန်း “သစ်ဝါး အိမ်ဆောက်ပစ္စည်းဆိုင်ပိုင်ရှင်ဖြစ်ပြီး စစ်ကောင်စီတပ်တွေထဲ မကြာခဏ အဝင်အထွက် ရှိတဲ့သူတွေဖြစ်လို့ ထိထိရောက်ရောက်အရေးယူတာလို့ ဆိုပါတယ်။ 

ဒါ့အပြင် အဲဒီဗိုလ်ကြီးပိုင်ဆိုင်တဲ့ ဖုန်းဆိုင်လည်းရှိပေမယ့် ဘာပစ္စည်းမှ သိမ်းယူခဲ့ခြင်းမရှိဘဲ အဲဒီနားက ပျူစောထီးအဖွဲ့ကသာ ဖြစ်စဥ်ပြီးလို့ မကြာခင် ရောက်လာပြီး ဗိုလ်ကြီးရဲ့ကားတွေ သိမ်းယူသွားတာလို့ ဒေသတွင်း သတင်းအရင်းမြစ်တွေက ဖော်ပြပါတယ်။

နောက်နောင်တွေမှာလည်း စစ်ကောင်စီနဲ့ပူးပေါင်းပြီး သတင်းပို့သတင်းယူလုပ်တဲ့ သူမှန်သမျှ အချိန်နဲ့ တပြေးညီ အရေးယူရှင်းလင်းသွားမယ်လို့ လူကြမ်းကြီး အထူးပြောက်ကျားတပ်ဖွဲ့က ကြေညာထားပါတယ်။

6 days Ago

ဘားအံမြို့ သာမညတောင်နယ်မြေတွင် စစ်ကောင်စီခန့် အုပ်ချုပ်ရေးမှူး ပစ်သတ်ခံရ

ကရင်ပြည်နယ်၊ ဘားအံမြို့နယ်၊ သာမည(ဘေးမဲ့သာသနာ့နယ်မြေ)ကျေးရွာမှာ  ဇန်နဝါရီ ၂၇ ရက် ည ၇ နာရီလောက်က စစ်ကောင်စီခန့် အုပ်ချုပ်ရေးမှူး ဦးအောင်မြင့်မြတ်ကို အမည်မသိလက်နက်ကိုင် ၃ ဦးက နေအိမ်ရှေ့မှာ သေနတ်နဲ့ပစ်သတ်ခဲ့တယ်လို့ ဒေသခံက ပြောပါတယ်။

သေဆုံးသူ ဦးအောင်မြင့်မြတ်ဟာ မိသားစုနဲ့အတူ  ကော့ကဒါကျေးရွာကနေ ထမင်းစားပြီးကားနဲ့အပြန် နေအိမ်ရှေ့အရောက် ကားပေါ်ကအဆင်း အမည်မသိသေနတ်သမား ၃ ဦးက သေနတ်နဲ့အနီးကပ် ၆ ချက်ပစ်ခတ်ခံလိုက်ရတာပါ။

ဦးအောင်မြင့်မြတ်ဟာ ကျူရှင်ဆရာတယောက်ဖြစ်ပြီး နှင်းဆီပါတီကိုယ်စားလောင်းအဖြစ် ၂၀၂၀ ခုနှစ်က ဝင်ရောက်အရွေးခံခဲ့ဖူးတဲ့အပြင် စစ်ကောင်စီကပြုလုပ်မယ့် ရွေးကောက်ပွဲအတွက် လူဦးရေစာရင်းကောက်ခံတာတွေ လုပ်ဆောင်နေသူဖြစ်ပါတယ်။

ဒေသခံပြည်သူတဦးက "သူက စစ်ကောင်စီခန့် အုပ်ချုပ်ရေးမှူး။ နောက် စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင်တွေကို နိုင်ငံရေးတက်ကြွလုပ်ရှားတဲ့ လူငယ်တွေရဲ့သတင်းတွေကိုပေးနေတာ။ သူကြောင့် လူငယ်တွေထွက်ပြေးတိမ်းရှောင်နေရတယ်။ နောက်လုပ်မယ့် စကစခန့်အုပ်ချုပ်ရေးမှူးတွေနောက်ကျောလုံဖို့လိုတယ်" လို့ ပြောပါတယ်။

ပြီးခဲ့တဲ့ နိုဝင်ဘေ ၂ ရက် ည ၈ နာရီလောက်ကလည်း သာမညကျေးရွာအုပ်ချုပ်ရေးမှူးရုံးမှာ လုံခြုံရေးယူနေတဲ့ စစ်ကောင်စီတပ်ဖွဲ့ဝင်တွေကို အမည်မသိလူ ၂ ယောက်က ဆိုင်ကယ်ပေါ်ကနေ ဗုံးပစ်ခဲ့တဲ့အတွက် ဗုံးပေါက်ကွဲမှုဖြစ်ပွားခဲ့ပါတယ်။

ဗုံးပေါက်ကွဲမှုကြောင့် နယ်ခြားစောင့်(BGF)တပ်ဖွဲ့ဝင်တွေနဲ့ ရဲတပ်ဖွဲ့ဝင် ၂ ဦး ထိမှန်ဒဏ်ရာရှိပြီးနောက် စစ်ကောင်စီပူးပေါင်းတပ်ဖွဲ့ဝင်တွေက လမ်းမတန်းတလျှောက် အော်ဟစ်ဆဲဆိုပြီး သေနတ်နဲ့လိုက်လံပစ်ခတ်ခဲ့ပါတယ်။

အောက်တိုဘာ ၂၅ ရက် ညကလည်း စစ်ကောင်စီခန့် သာမည‌ကျေးရွာအုပ်ချုပ်ရေးမှူး စောသိန်းနိုင်အိမ်မှာ ဗုံးပေါက်ကွဲမှုဖြစ်ပွားခဲ့သလို အောက်တိုဘာ ၁၃ မနက် ၇ နာရီလောက်က ဘားအံ-မြဝတီ(သာမညအတွင်း)လမ်းမတန်းအနီးမှာနေထိုင်တဲ့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဘားအံခရိုင်ဥက္ကဋ္ဌ  ဦးခွန်အောင်ကျော်မိုးဟာ နေအိမ်မှာ အမည်မသိ လက်နက်ကိုင်တွေရဲ့ သေနတ်နဲ့ပစ်သတ်ခံခဲ့ရပါတယ်။

သာမညကျေးရွာဟာ သာမညတောင်ဆရာတော်ကြီး ရှိစဉ်တည်းက သက်သက်လွတ်ဘေးမဲ့တောင်အဖြစ် သတ်မှတ်ထားပေမယ့် ကျေးရွာအတွင်းမှာ စစ်ကောင်စီတပ်ဖွဲ့ဝင်တွေ၊ BGF၊ DKBA ၊ KNU/KNLA(PC) နဲ့ ရဲတပ်ဖွဲ့ဝင်တွေက ဝင်ရောက်လှုပ်ရှားနေတဲ့အပြင် နေထိုင်သူတွေလည်းရှိနေပါတယ်။

6 days Ago
More News
Up