ပစ်ခတ်မှု

January 29, 2023

လော့စ်အိန်ဂျလိစ်မြို့ ပစ်ခတ်မှု ၃ ဦး သေဆုံး

အမေရိကန်နိုင်ငံ လော့စ်အိန်ဂျလိစ်မြို့ ဘီဗာလီခရက်စ် ရပ်ကွက်က ပစ်ခတ်မှုတခုအတွင်း အနည်းဆုံးလူ ၃ ဦး သေဆုံးကာ လူ ၄ ဦး ထိခိုက်ဒဏ်ရာရခဲ့တယ်လို့ ရဲတပ်ဖွဲ့က အတည်ပြုပါတယ်။  

ဇန်နဝါရီ ၂၈ ရက် အစောပိုင်း မနက် ၂ နာရီခွဲလောက်မှာ ဒီပစ်ခတ်မှုဖြစ်ပွားခဲ့တာ ဖြစ်ပြီး ပစ်ခတ်ခံ ခဲ့ရသူတွေကို ကားတစီးထဲမှာ ရှာဖွေတွေ့ရှိခဲ့တယ်လို့ ရဲတပ်ဖွဲ့က အေဘီစီသတင်းဌာနကို ဖြေဆိုပါတယ်။ 

ဒဏ်ရာရရှိခဲ့သူတွေထဲက နှစ်ဦးကတော့ စိုးရိမ်ရတဲ့ အခြေအနေမှာရှိပြီး နောက်ထပ်နှစ်ဦးကတော့ အခြေအနေတည်ငြိမ်နေပြီလို့ အာဏာပိုင်တွေက ပြောပါတယ်။ 

ဒီဘီဗာလီခရက်စ် ပစ်ခတ်မှုအတွက် သံသယရှိသူ (ဒါမှမဟုတ်) အခုလိုလုပ်ဆောင်ရတဲ့ အကြောင်းရင်းနဲ့ ပတ်သက်လို့တော့ အာဏာပိုင်တွေဘက်က အချက်အလက်ထုတ်ပြန်တာမျိုး မရှိသေးပါဘူး။ 

လော့စ်အိန်ဂျလိစ်ရဲဌာနက တပ်ကြပ်ကြီး ဘရုစ်ဘော်ရီဟန်ကတော့ ဒီသေဆုံးသွားသူတွေရဲ့ အသက်အရွယ်နဲ့ လိင်အမျိုးအစားကို သေမှုသေခင်းအရာရှိက စီစစ်ဆုံးဖြတ်ပေးတဲ့အပေါ် ရဲတပ်ဖွဲ့ အနေနဲ့ စောင့်ဆိုင်းနေတာဖြစ်ပြီး ပြည်သူလူထုအနေနဲ့ကလည်း နောက်ထပ်အန္တရာယ် မရှိ နိုင်တော့ဘူးလို့ မယုံကြည်ကြတော့ကြောင်း မှတ်ချက်ပေးပါတယ်။ 

မကြာသေးမီကမှ ကယ်လီဖိုးနီယားပြည်နယ်မှာ အစုလိုက်အပြုံလိုက်ပစ်ခတ်မှုတွေ ဆက်တိုက် ဖြစ်ပွားခဲ့ပြီးနောက် ဒီပစ်ခတ်မှု ဖြစ်ရပ် ပေါ်ပေါက်လာခဲ့တာပါ။

ပြီးခဲ့တဲ့ ဇန်နဝါရီ ၂၁ ရက်မှာ လေ့ာစ်အိန်ဂျလိစ်မြို့အနီးက မွန်တာရေးပါ့ခ်မြို့ရှိ အကခန်းမအတွင်း သေနတ်သမားတဦးက ၀င်ရောက်ပစ်ခတ်ခဲ့တာကြောင့် လူ ၁၁ ဦး သေဆုံးပြီး နှစ်ရက် အကြာမှာပဲ ကယ်လီဖိုးနီးယားမြောက်ပိုင်း ကမ်းရိုးတန်းမြို့တခုဖြစ်တဲ့ ဟက်ဖ်မွန်းဘေမှာလည်း နောက်ထပ်ပစ်ခတ်မှုဖြစ်ပွားခဲ့တဲ့အတွက် လူ ၇ ဦး သေဆုံးခဲ့ပါတယ်။ 

1 day Ago

January 21, 2023

ဂျော်ဂျီယာစစ်သားဟောင်း၏ ပစ်ခတ်မှုကြောင့် လူ ၅ ဦး သေဆုံး

ဂျော်ဂျီယာနိုင်ငံမှာ စစ်မှုထမ်းဟောင်း အမျိုးသားတယောက်က လူနေအဆောက်အအုံ တခုရဲ့ လသာဆောင်ကနေ သေနတ်နဲ့ပစ်ခတ်ခဲ့တာကြောင့် ရဲအရာရှိ တစ်ဦး အပါအဝင် လူ ၅ ဦး သေဆုံးခဲ့ရပြီးနောက် သူ့ကိုယ်သူလည်း ပြန်ပစ်ခတ်ခဲ့တယ်လို့ ပြည်ထဲရေးဝန်ကြီးဌာနက ဇန်နဝါရီ ၂၀ ရက်မှာ ပြောပါတယ်။ 

ဂျော်ဂျီယာမြို့တော် တက်ဘလီစီအရှေ့ပိုင်းရှိ ဆာဂရီဟိုမြို့မှာ ပစ်ခတ်မှုဖြစ်ပွားခဲ့ပြီး ပစ်ခတ်ရတဲ့ အကြောင်းရင်းကိုတော့ ရှင်းရှင်းလင်းလင်း မသိရသေးပါဘူး။

ဂျော်ဂျီယာပြည်ထဲရေးဝန်ကြီးဖြစ်သူ ဗက်ခ်ထန်း ဂိုမယ်လော်ရီက “ဒီ သေနတ်သမားနဲ့ ပတ်သက်ပြီး ပြောနိုင်တာကတော့ သူဟာ ၂၀၀၆ ခုနှစ်မှာ လက်နက်ကိုင်တပ်ဖွဲ့အတွက် တာဝန် ထမ်းဆောင်ခဲ့သူပါ၊ ၂၀၂၁ ခုနှစ်မှာတော့ စစ်တပ်ရာထူးကနေ သူနုတ်ထွက်ခဲ့ပြီး အာဖဂန်နစ္စတန် နိုင်ငံမှာလည်း တာဝန် ထမ်းဆောင်ခဲ့ဖူးပါတယ်။ ဘာတွေဖြစ်ခဲ့သလဲ ဆိုတာ ဘယ်သူမှမသိသလို ကျနော်တို့လည်း မသိရသေးပါဘူး”လို့ မှတ်ချက်ပေး ပြောဆိုပါတယ်။ 

"အခင်းဖြစ်ရာနေရာကို နောက်ထပ်ရဲတပ်ဖွဲ့တွေနဲ့အတူ ပြည်ထဲရေးဝန်ကြီးဌာနက အထူးတပ်ဖွဲ့ တဖွဲ့လည်း ရောက်လာခဲ့ကြကြောင်းနဲ့ သူတို့ရောက်ရှိလာချိန်မှာပဲ တရားခံဖြစ်သူဟာ သေနတ် တလက် နဲ့ သူ့ကိုယ်သူ အဆုံးစီရင်ခဲ့တာ" ဖြစ်ကြောင်း ဝန်ကြီးဌာနက ဆိုပါတယ်။

ဂျော်ဂျီယာမီဒီယာတွေကတော့ သေနတ်သမားဟာ အာဖဂန်နစ္စတန်မှာ တာဝန်ထမ်းဆောင်ခဲ့ဖူးတဲ့ ဂျော်ဂျီယာစစ်သားဟောင်း တဦးဖြစ်ကြောင်း အတည်ပြု ဖော်ပြထားပါတယ်။

1 week Ago
More News
Up