ပစ်ခတ်မှု

November 23, 2021

ထိုင်း-မြန်မာနယ်စပ်တွင် မူးယစ်ဆေးသယ်ဆောင်သူများနှင့် ထိုင်းစစ်တပ် ပစ်ခတ်မှုဖြစ် ၆ ဦး သေဆုံး၊ စိတ်ကြွဆေးပြား ၂ သန်းဖမ်းမိ

ထိုင်း-မြန်မာနယ်စပ် ချင်းရိုင်းခရိုင်မှာ နိုဝင်ဘာ ၂၃ ရက် ဒီမနက်က မူးယစ်ဆေးသယ်ဆောင်သူတွေနဲ့ ထိုင်းစစ်တပ် ပစ်ခတ်မှုဖြစ်ပြီး   မူးယစ်သယ်တဲ့အဖွဲ့က ၆ ဦးသေဆုံးကာ စိတ်ကြွဆေးပြား ၂ သန်းနီးပါးဖမ်းမိခဲ့သလို ချင်းမိုင်ခရိုင် မြန်မာနယ်စပ်မှာလည်း နောက်ထပ် စိတ်ကြွဆေးပြား ၂ သိန်းဖမ်းမိခဲ့တယ်လို့  Maesai Press  သတင်းအရ သိရပါတယ်။ 

ထိုင်းကွန်မန်ဒိုအမှတ် (၂) တပ်ဖွဲ့ဝင်နဲ့ စစ်တိုင်းဒေသ (၃) လက်အောက်ခံ အထူး တိုက်ခိုက်ရေး တပ်ဖွဲ့ဝင်တွေဟာ ဒီမနက် ၄ နာရီလောက်က ချင်းရိုင်ခရိုင် မယ်ဖှာ့လုံမြို့နယ် မယ်ဖှာ့လုံ ကျေးရွာ အုပ်စုတွင်း လုံခြုံရေးယူနေစဉ် မြန်မာနယ်စပ်နဲ့ မီတာ ၁၀၀ လောက်အကွာ ဖာခေါင်ဘွန်တောင် အနီးကနေ လူ ၁၀ ဦးခန့် အထုပ်အပိုးတွေနဲ့ ဝင်ရောက်လာတာတွေ့တယ်လို့  ထိုင်းစစ်တပ် တာဝန်ရှိသူမှ သတင်းထောက်ကို ပြောပါတယ်။ 

သူတို့ကို စစ်ဆေးဖို့အတွက် ရပ်တန့်ခိုင်းရာမှာ တဘက်ကနေ သေနတ်နဲ့စတင်ပစ်ခတ်ခဲ့ကြောင်း ၊ ဒါကြောင့် တာဝန်ရှိသူဘက်က ပြန်ပစ်ရာမှာ ၁၅ မိနစ်လောက်  အပြန်အလှန်ပစ်ခတ်မှု ဖြစ်ခဲ့တယ်လို့ ဆိုပါတယ်။ 

ပစ်ခတ်မှုအပြီးမှာ သေနတ်ဒဏ်ရာနဲ့သေဆုံး သူ ၆ ဦး၊ အနီးနားမှာ ၉၉၉ အမှတ်တံဆိပ် စိတ်ကြွဆေးပြား တစ်အိတ်ကို ၂ သိန်းစီထည့်ထားတဲ့ အိတ်ပေါင်း ၉ လုံး (စုစုပေါင်း စိတ်ကြွဆေးပြား ၁၈၀၀၀၀၀) ၁ သန်း ၈ သိန်းကို သိမ်းဆည်းရမိတယ်လို့ ဆိုပါတယ်။ 

သေဆုံးသူတွေရဲ့အလောင်းကို လိုအပ်သလိုစစ်ဆေးဖို့ ဆေးရုံခေါ်ဆောင်သွားပြီး နောက်ထပ်ကွင်း ဆက်တွေဖမ်းမိဖို့ ဆက်လက်စုံစမ်းနေတယ်လို့ ဆိုပါတယ်။ 

အလားတူ ချင်းမိုင်ခရိုင် မယ့်အိုင်းမြို့နယ် ထာ့ဒွန်းအုပ်စု ထာ့ဒွန်း‌ကျေးရွာအနီးမှာလည်း ပိုင်ရှင်မဲ့ စိတ်ကြွဆေးပြား ၂ သိန်းဖမ်းမိတယ်လို့  Maesai Press သတင်းမှာ ဖော်ပြပါတယ်။ 

ထာ့ဒွန်းကျေးရွာအနီး ပါကွီတောလမ်းတနေရာမှာ ဒီမနက်စောစောက ရွာသားအသွင် ဝတ်ဆင်ထားတဲ့ လူတချို့ကို  အဝေးကလှမ်းမြင်ရကြောင်း၊ ထိုင်းစစ်တပ် တပ်ဖွဲ့ဝင်တွေက စစ်ဆေးဖို့သွားရာမှာ လူကိုမတွေ့ရတော့ဘဲ တောထဲမှာပစ်ထားတဲ့ အထုပ်တွေ ၊ ဝါးခြင်းကျားထဲ ထည့်ထားတဲ့ အထုပ်တွေ ပစ်ထားတာတွေ့ရပြီး အထဲမှာ စိတ်ကြွဆေးစုစုပေါင်း ၂ သိန်းဖမ်းဆီးရမိတယ်လို့ ဆိုပါတယ် ။ 

တာဝန်ရှိသူတွေမှ အနီးအနားတဝိုက် ပိုက်စိပ်တိုက်ရှာဖွေရာမှာ ရွာစွန်က အိမ်တစ်လုံးထဲမှာ မသင်္ကာဖွယ် လူ ၃ ယောက်ရောက်ရှိနေလို့ ခေါ်ယူစစ်ဆေးနေတယ်လို့ သတင်းမှာ ဖော်ပြပါတယ်။

Ref- Maesai Press

2 weeks Ago

ဘရာဇီးနိုင်ငံ၊ ရီယိုဒီဂျနေရိုမြို့စွန်တွင် ပစ်ခတ်မှုဖြစ်ပြီး အနည်းဆုံး လူ ၇ ဦးသေဆုံး

ဘရာဇီးနိုင်ငံ၊ ရီယိုဒီဂျနေရိုမြို့စွန်မှာ ဒေသခံတွေနဲ့ နယ်ခံရဲတွေအကြား သေနတ်နဲ့ ပစ်ခတ်တိုက်ခိုက်မှုတွေ အပြီး နိုဝင်ဘာ ၂၂ ရက်က ဒီရေတောထဲကနေ အလောင်း ၇ လောင်းထက်မနည်းကို ရှာတွေ့ခဲ့ပါတယ်။

အလောင်းတွေကို ဆောင်ဂွန်ကာလိုမြို့ စယ်လ်ဂွေရို ဆင်းရဲသား ရပ်ကွက်နားမှာ တွေ့ခဲ့တာပါ။ ဒီဒေသဟာ ရီယိုမြို့အစိတ်အပိုင်း ဖြစ်ပေမယ့် ဆင်းရဲပြီး အကြမ်းဖက်မှုပေါတဲ့ ဒေသလည်း ဖြစ်ပါတယ်။

တခြားအလောင်းတွေ ထပ်တွေ့ဦးမယ်လို့ ယုံထားတယ်လို့ ဒေသခံတွေက မီဒီယာတွေကို ပြောပါတယ်။

“အလောင်းတွေအားလုံးမှာ အနှိပ်စက်ခံထားရတဲ့ လက္ခဏာတွေ ရှိတယ်၊ အလောင်းတွေ တယောက်ပေါ် တယောက် ထပ်နေအောင် လွှင့်ပစ်ထားတယ်ဆိုတော့ အစုလိုက် အပြုံလိုက် လူသတ်မှုဆိုတာ ရှင်းနေတယ်”လို့ ဒေသခံ တယောက်က TV ဂလိုဘို ရုပ်သံဌာနကို ပြောပါတယ်။

သီတင်းပတ်ကုန်ရက်  စစ်ဆင်ရေးအပြီး အလောင်းတွေကို တွေ့ခဲ့တာဖြစ်ပြီး စနေနေ့က နယ်မြေခံ ရဲအရာရှိ တယောက် ကင်းလှည့်နေချိန်မှာ သေဆုံးခဲ့ပါတယ်။

ဆောင်ဂွန်နာကာလိုဒေသကို အမှတ်၇ ခြေလျင်တပ်ရင်းက ကြီးကြပ်နေပြီး ဒီနယ်မြေဟာ ရီယိုပြည်နယ်မှာ လူအသေအပျောက် အများဆုံးလည်း ဖြစ်ပါတယ်။

မူးယစ်ဂိုဏ်းတွေ အကြမ်းဖက်နေလို့ ဒေသတွင်းတည်ငြိမ်အောင် ဝင်လာခဲ့တာလို့ ရဲတွေက ပြောပါတယ်။ အရပ်ဘက် ရဲအရာရှိတွေကို အမှု စုံစမ်းစစ်ဆေးခွင့် ပေးသွားမယ်လို့လည်း  သူတို့က ပြောပါတယ်။

ဒီနှစ်ထဲမှာ အမှတ် ၇ တပ်ရင်းဟာ လူ ၁၀၉၆ ယောက်ကို သတ်ခဲ့ပြီး ပြည်နယ်အတွင်း တပ်ရင်းအားလုံးထဲမှာ လူသတ်နှုန်းအမြင့်ဆုံး ဖြစ်လာခဲ့ပါတယ်။ ဒါဟာ မနှစ်က ပထမ ၉ လအတွင်း သေဆုံးသူဦးရေထက် ၁၇ ရာခိုင်နှုန်းတိုးလာတာလို့ ရိုက်တာသတင်းဌာနမှာ ရေးပါတယ်။

2 weeks Ago

November 21, 2021

မဟာအောင်မြေမြို့နယ်က ရပ်ကွက်ရုံး ပစ်ခတ်ခံရ၊ စစ်ကောင်စီတပ်သားတစ်ဦး ကျည်ထိမှန်

မန္တလေးမြို့ မဟာအောင်မြေမြို့နယ် ၈၂ လမ်း ၊ ၃၇ လမ်း အနီး၊ ရတနာဘုမ္မိအရှေ့ရပ်ကွက် အုပ်ချုပ်ရေးမှူးရုံးမှာ နိုဝင်ဘာ ၂၁ ရက် မနက် ၈ နာရီဝန်းကျင်က သေနတ်နဲ့ ပစ်ခတ်ခံရတဲ့ဖြစ်စဉ် ဖြစ်ခဲ့ပါတယ်။

ရပ်ကွက်ရုံးမှာ အကြမ်းဖက် စစ်ကောင်စီတပ်သားတွေ တပ်စွဲထားပြီး သေနတ်နဲ့ ပစ်ခံရတဲ့အတွက် တပ်သားတစ်ဦး ကျည်ထိမှန်ခဲ့တယ်လို့ သိရပါတယ်။

“ရပ်ကွက်ရုံးမှာ တပ်စွဲထားတာရှိတယ်။ ပစ်တာ သုံးချက်လောက်ရှိမယ်။ စစ်ကောင်စီတပ်ဘက်ကလည်း ပြန်ပစ်တာရှိတယ်။ လုံခြုံရေးတပ်သားတစ်ဦး ပေါင်မှာ ကျည်မှန် ဒဏ်ရာရတာတော့ရှိတယ်” လို့ အနီးပတ်ဝန်းကျင်ရှိပြည်သူတစ်ဦးက ပြောပါတယ်။

ဒါ့အပြင် အကြမ်းဖက်စစ်ကောင်စီက ခန့်ထားတဲ့ ရတနာဘုမ္မိအရှေ့ရပ်ကွက် အုပ်ချုပ်ရေးမှူးဟာ စစ်အာဏာရှင်ဆန့်ကျင်ရေးလှုပ်ရှားမှုတွေနဲ့ပတ်သက်လို့ စစ်ကောင်စီကို သတင်းပေးတာတွေ လုပ်နေတယ်လို့ သိရပါတယ်။

နိုဝင်ဘာ ၉ ရက်နေ့ကလည်း ရတနာဘုမ္မိအရှေ့ရပ်ကွက် အုပ်ချုပ်ရေးမှူးရုံးကို သေနတ်နဲ့ (၅) ချက်လောက် ပစ်သွားတာရှိပေမယ့် ထိခိုက်ဒဏ်ရာရတာတော့မရှိခဲ့ပါဘူး။

2 weeks Ago
More News
Up