ပစ်ခတ်ဖြိုခွင်း

October 18, 2021

မန္တလေး လူငယ်များ သပိတ်စစ်ကြောင်း ပစ်ခတ်ဖြိုခွင်းခံရ

မန္တလေးမြို့မှာ စစ်အာဏာရှင်စနစ်ပြုတ်ကျရေး ဆန္ဒပြနေတဲ့ မန္တလေး လူငယ်များ သပိတ်စစ်ကြောင်း အောက်တိုဘာ ၁၈ ရက် မနက် ၈ နာရီဝန်းကျင်က ပစ်ခတ်ဖြိုခွင်းခံခဲ့ရပါတယ်။

၆၉ လမ်း၊ ၃၇ လမ်းနဲ့ ၃၈ လမ်းကြားမှာ သပိတ်စစ်ကြောင်း မထွက်ခင် ဖြိုခွင်းခံရတာဖြစ်ပြီး သပိတ်စစ်ကြောင်းက လူငယ် ၃ ဦး ဖမ်းဆီးခံရတယ်လို့ ကနဦး သိရပါတယ်။

“အခုဟာက အဆက်အသွယ်မရသေးဘူး။ ကနဦး သိရတာတော့ သုံးယောက်လောက် ဖမ်းခံရတယ်လို့ သိရသေးတယ်။ ချီတက်ဖို့ လုပ်နေတဲ့အချိန်မှာ ဖြိုခွင်းခံလိုက်ရတာ။ သေနတ်နဲ့လည်း ပစ်ခတ်တာတွေရှိတယ်” လို့ စစ်ကြောင်းမှာ ပါဝင်သူတစ်ဦးက ပြောပါတယ်။

မန္တလေး လူငယ်များသပိတ်စစ်ကြောင်း ချီတက်ဖို့ ပြင်ဆင်နေချိန်မှာ အိမ်စီးကားနဲ့တိုက်ပြီး ဖြိုခွင်းတာဖြစ်တဲ့အတွက် ဆန္ဒပြလူငယ်တွေမှာ ပွန်းပဲ့ဒဏ်ရာရတာတွေလည်း ရှိတယ်လို့ သိရပါတယ်။

အောက်တိုဘာ ၁၁ ရက် ညနေပိုင်းကလည်း ၆၂ လမ်း၊ သိပ္ပံလမ်းအနီးမှာ မန္တလေးလူငယ်များ သပိတ်စစ်ကြောင်း ပစ်ခတ်ဖြိုခွဲခံရပြီး အမျိုးသမီး ၂ ဦး ဖမ်းဆီးခံခဲ့ရပါတယ်။ 

1 year Ago

September 19, 2021

လောင်းလုံးမြို့နယ် သပိတ်စစ်ကြောင်း ပစ်ခတ်ဖြိုခွင်းခံရ

ထားဝယ်ခရိုင်၊ လောင်းလုံးမြို့နယ်အတွင်း စစ်အာဏာရှင်စနစ်ဆန့်ကျင်ရေး နေ့စဥ်ချီတက်ဆန္ဒထုတ်ဖော်နေတဲ့ သပိတ်စစ်ကြောင်းဟာ စက်တင်ဘာ ၁၉ ရက် မနက် ၉ နာရီခွဲအချိန်က အင်းဇောက်ကျေးရွာ သပိတ်စထွက်မယ့်နေရာမှာ ပစ်ခတ်ဖြိုခွင်းခံရတယ်လို့ သိရပါတယ်။

အကြမ်းဖက်စစ်ကောင်စီတပ်သား ၅ ဦးလောက် အရပ်ဝတ်၊ အိမ်စီးကားနဲ့ လာရောက်ပစ်ခတ်ဖြိုခွင်းခဲ့တာဖြစ်ပြီး လက်ရှိအချိန်ထိ ကျည်ထိမှန်သူ၊ အဖမ်းခံရသူများ ရှိ/မရှိ အတည်မပြုနိုင်သေးဘူးလို့ ဒီမိုကရေစီအရေး လှုပ်ရှားမှု  သပိတ်ကော်မတီ(ထားဝယ်ခရိုင်) က ထုတ်ပြန်ထားပါတယ်။

သပိတ်စထွက်မယ့်နေရာမှာ ကျန်ခဲ့တဲ့ ဆန္ဒပြသူတွေရဲ့ ဆိုင်ကယ် အစီး ၂၀ လောက်ကိုလည်း အကြမ်းဖက်စစ်ကောင်စီတပ်တွေက လာရောက်သိမ်းယူဖို့ လုပ်နေတယ်လို့ သိရပါတယ်။

စက်တင်ဘာ ၁၇ ရက်နေ့ မနက်ပိုင်းကလည်း အောက်ရေဖြူကျေးရွာအုပ်စုမှာ အကြမ်းဖက်စစ်ကောင်စီတပ်က အသက်မပြည့်သေးတဲ့ အမျိုးသမီးငယ် အပါအဝင် ဒေသခံပြည်သူ ၁၂ ယောက်လောက်ကို ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

မနေ့ညနေ ၆ နာရီခွဲလောက်ကလည်း အကြမ်းဖက်စစ်ကောင်စီ တပ်သားတွေရဲ့ ပစ်ခတ်မှုကြောင့်‌ အောက်ရေဖြူကျေးရွာအုပ်စု ကဒက်ငယ်ထိန်ကျေးရွာက ၁၅ နှစ်အရွယ် လူငယ် ၁ ဦး သေဆုံးခဲ့ပါတယ်။

တနင်္သာရီတိုင်း ထားဝယ်ခရိုင် လောင်းလုံးမြို့နယ်မှာ စစ်အာဏာရှင်ဆန့်ကျင်ရေး နေ့စဉ်ဆိုသလို ဆန္ဒပြနေကြတာလည်း ဖြစ်ပါတယ်။

1 year Ago
More News
Up