ပင်စင်လစာ

March 15, 2019

ပင်စင်လစာများ Wave Money ဖြင့် ထုတ်ယူနိုင်ပြီ

အငြိမ်းစားဝန်ထမ်းတွေအနေနဲ့ ပင်စင်လစာတွေကို Wave Money ကတဆင့် ထုတ်ယူနိုင်ဖို့ စတင်ဆောင်ရွက်ပေးနေပြီလို့ စီမံကိန်းနှင့် ဘဏ္ဍာရေး ဒုဝန်ကြီး ဦးမောင်မောင်ဝင်းက ပြောပါတယ်။ မတ်လ ၁၄ ရက်က နေပြည်တော်မှာ မြန်မာ့စီးပွားရေးဘဏ်နဲ့ Digital Money Myanmar ကုမ္ပဏီတို့အကြား မိုဘိုင်းဖုန်းစနစ်နဲ့ အငြိမ်းစားလစာ ထုတ်ပေးနိုင်တဲ့ ဝန်ဆောင်မှု လုပ်ငန်းသဘောတူစာချုပ် ချုပ်ဆိုတဲ့ အခမ်းအနားမှာ ပြောသွားတာပါ။ မိုဘိုင်းဖုန်းစနစ်နဲ့ လစာငွေထုတ်ပေးဖို့ ကနဦးစမ်းသပ်မှုကို ရန်ကုန်တိုင်း ဒဂုံမြို့သစ် မြောက်ပိုင်းမြို့နယ်မှာ ပြုလုပ်ခဲ့ပြီး MPT၊ Telenor၊ Ooredoo၊ Mytel ဘယ်ဆင်းကတ် အသုံးပြုသူမဆို ပင်စင်လစာ ထုတ်ယူနိုင်မှာ ဖြစ်ပါတယ်။ ပင်စင်စားတွေအနေနဲ့ လစာငွေကို Wave Money ကနေ တကြိမ်တည်းဖြစ်စေ နှစ်ကြိမ်ခွဲပြီးဖြစ်စေ ထုတ်ယူနိုင်မှာဖြစ်ပြီး သုံးကြိမ်မြောက် ခွဲထုတ်ရင်တော့ သတ်မှတ်နှုန်းထားအတိုင်း ဝန်ဆောင်ခ ပေးဆောင်ရမှာဖြစ်ပါတယ်။ နိုင်ငံတဝန်း ပင်စင်စားဦးရေ ၇၃၀,၀၀၀ ကျော်လောက်ရှိပြီး ဒီအထဲက သုံးပုံတပုံကျော်လောက်က ရန်ကုန်တိုင်းဒေသကြီးထဲမှာ နေထိုင်ကြပါတယ်။ ပင်စင်စားတွေ ဒုတိယအများဆုံး ရှိတာကတော့ မန္တလေးတိုင်းဒေသကြီးနဲ့ ပဲခူးတိုင်းဒေသကြီးဖြစ်ပြီး ဧရာဝတီတိုင်းမှာတော့ တတိယအများဆုံး နေထိုင်ကြတယ်လို့  သိရပါတယ်။
3 years Ago

February 2, 2019

တိုးမြှင့်ထားသည့် ပင်စင်လစာများ တွက်ချက်ပေးပို့မှု သုံးပုံနှစ်ပုံ ပြီးစီး

ပင်စင်စားတွေကို ပင်စင်လစာတိုးမြှင့်ပေးပြီးတဲ့နောက် ငွေပေးမိန့်တွေကို တွက်ချက်ပေးပို့နေရာမှာ ဇန်နဝါရီလကုန်အထိ သုံးပုံနှစ်ပုံပြီးစီးသွားပြီလို့ အစိုးရ သတင်းစဉ်မှာ ဖော်ပြထားပါတယ်။ ပင်စင်စားတယောက်ချင်းစီအတွက် တိုးမြှင့်ပင်စင်လစာတွေကို ပင်စင်ဦးစီးဌာနက တွက်ချက်ပြီး သက်ဆိုင်ရာ မြန်မာ့စီးပွားရေးဘဏ်ခွဲတွေကို နေ့စဉ်ပေးပို့နေတယ်လို့ ဆိုပါတယ်။ ပင်စင်စားတွေရဲ့ ပင်စင်အမျိုးအစား တွက်ချက်ရာမှာ လိုအပ်တဲ့ နောက်ဆုံးထုတ်လစာအပါအဝင် တချို့အချက်အလက်တွေ မပြည့်စုံတာကြောင့် ခက်ခဲတာ၊ ကြန့်ကြာတာတွေ ရှိနေတယ်လို့လည်း ဆိုပါတယ်။ ပင်စင်တွေ တွက်ချက်ပေးရာမှာ ကိုယ်တိုင်ပင်စင်စား၊ ဇနီး/ခင်ပွန်း မိသားစု ပင်စင်စား၊ တခြား မိသားစု ပင်စင်စားနဲ့ တလုံးတည်း ပင်စင် လဲလှယ်ထားတဲ့ ပင်စင်စား စတဲ့ အစီအစဉ်အတိုင်း တွက်ချက်ပေးနေပြီး ၂၀၁၉ ခုနှစ် ဇန်နဝါရီလကစလို့ ခံစားရရှိမှာ ဖြစ်ပါတယ်။ ပင်စင်ဦးစီးဌာနက တာဝန်ယူဆောင်ရွက်ပေးနေတာက မြို့ပြပင်စင်စားတွေနဲ့ နိုင်ငံရေး ပင်စင်စားတွေ ဖြစ်ပါတယ်။ ဌာနရဲ့ အချက်အလက်တွေအရ ၂၀၁၇-၁၈ ခုနှစ်မှာ မြို့ပြ ပင်စင်စားဦးရေ ၃ သိန်းကျော်၊ နိုင်ငံရေးပင်စင်စားက အယောက် ၃၂၀၀၀ ကျော်ရှိပါတယ်။ ပြီးစီးသွားတဲ့ ဦးရေအလိုက် ရန်ကုန်တိုင်းက လူပေါင်း ၆၂၀၀၀ ကျော်နဲ့ အများဆုံး ဖြစ်ပြီး ပဲခူးတိုင်းက ၂၂၀၀၀ ကျော်၊ မကွေးတိုင်းက ၂၀၀၀၀ ကျော်၊ ဧရာဝတီတိုင်းမှာ ၁၈၀၀၀ လောက်၊ မန္တလေးတိုင်းက ၁၄၀၀၀ ကျော်၊ ရှမ်းပြည်နယ်မှာ ၁၂၀၀၀ ကျော်၊ စစ်ကိုင်းတိုင်းက ၁၀၀၀၀ ကျော် ပြီးစီးသွားပြီ ဖြစ်ပါတယ်။ ပင်စင်လစာတွေကို ၁၉၈၉ ခုနှစ်မှာ ပင်စင်လစာပေါ် ထပ်ဆောင်းခွင့်ပြုတဲ့ ယာယီဆောင်းငွေနဲ့ အပိုထောက်ပံ့ကြေးတို့ကို ပေါင်းပြီး ပင်စင်လစာအဖြစ် သတ်မှတ်ခဲ့သလို ၁၉၉၃ ခုနှစ်မှာတော့ အငြိမ်းစားတွေ ထုတ်ယူနေတဲ့ ပင်စင်လစာရဲ့ ၂၅ ရာခိုင်နှုန်း တိုးမြှင့်ပေးခဲ့ပါတယ်။ ၁၉၉၄ ခုနှစ်မှာမိသားစုပင်စင်ခံစားနေတဲ့ ဇနီး/ခင်ပွန်းတို့အတွက် အငြိမ်းစားရရှိခဲ့တဲ့ ပင်စင်လစာရဲ့ ထက်ဝက်ကနေ လေးပုံသုံးပုံအထိ တိုးမြှင့်ခွင့်ပြုခဲ့ပါတယ်။ ၂၀၀၀ ပြည့်နှစ်မှာတော့ အငြိမ်းစားတွေ ထုတ်ယူနေတဲ့ ပင်စင်လစာရဲ့ ၂ ဆ တိုးမြှင့်ခဲ့ပြီး ၂၀၁၁ ခုနှစ်မှာတော့ ၂၀၁၀ မှာ ခွင့်ပြုတဲ့ ဝန်ထမ်းလစာနှုန်းနဲ့ ပြင်ဆင်တွက်ချက် တိုးမြှင့်ခဲ့ပါတယ်။ ၂၀၁၃ ခုနှစ်မှာတော့ အငြိမ်းစားတွေရဲ့ ပင်စင်လစာမှာ  ကျပ် ၂၀၀၀၀ ကို အခြေခံပြီး လုပ်သက်နှစ်အလိုက် ထပ်ဆောင်းပင်စင်လစာ တိုးမြှင့်ခဲ့သလို ၂၀၁၄ ခုနှစ်မှာလည်း အဲဒီလိုပဲ တိုးမြှင့်ခဲ့ပါတယ်။ ၂၀၁၅ ခုနှစ်မှာတော့ အငြိမ်းစားတွေရ့ ပင်စင်လစာကို လက်ရှိလစာအပြင် ထပ်မံတိုးမြှင့် သတ်မှတ်တဲ့ ကျပ် ၄၅၀၀၀ ကို အခြေခံပြီး လုပ်သက်နှစ်အလိုက်  ထပ်ဆောင်း ပင်စင်လစာငွေတွေ တိုးမြှင့်ပေးခဲ့ပါတယ်။ ၂၀၁၈ ခုနှစ် ဒီဇင်ဘာလမှာတော့ ပင်စင်စားရဲ့ အငြိမ်းစားယူခဲ့တဲ့ နောက်ဆုံးရာထူးချိန်လစာနှုန်းနဲ့ ကိုက်ညီတဲ့ နောက်ဆုံးတိုးမြှင့်ထားတဲ့ လစာနှုန်းတွေအပေါ် တွက်ချက် ခွင့်ပြုပေးခဲ့ပါတယ်။
3 years Ago
Up