ပခုက္ကူ

January 27, 2023

ပခုက္ကူ လ.ဝ.ကရုံး လက်ပစ်ဗုံးဖြင့် တိုက်ခိုက်ခံရ၊ မြိုင်မြို့နယ်၌ စစ်ကောင်စီတပ် မိုင်းဆွဲတိုက်ခိုက်ခံရ

မကွေးတိုင်း၊ ပခုက္ကူမြို့မှာ ဇန်နဝါရီ ၂၆ ရက် ညနေက မြို့နယ် လ.ဝ.က ရုံး လက်ပစ်ဗုံးနဲ့ တိုက်ခိုက်ခံရပြီး စစ်ကောင်စီဘက်က ၇ ယောက် အပြင်းထန်ဒဏ်ရာရရှိခဲ့တယ်လို့ ပခုက္ကူမြေအောက်တော်လှန်ရေးတပ်ဖွဲ့ (PKU UG) ကနေ သိရပါတယ်။

ပခုက္ကူမြို့ လ.ဝ.က ရုံးကို မနေ့ညနေ ၄ နာရီကျော်လောက်မှာ စစ်ကောင်စီရဲ့ တရားမဝင်ရွေးကောက်ပွဲ ကျင်းပဖို့ လူဦးရေစာရင်းပြုစုနေတာကြောင့် လက်ပစ်းဗုံနဲ့ ပစ်ခတ်တိုက်ခိုက်ခဲ့တာလို့ PKU UG တပ်ဖွဲ့ရဲ့ ပြန်ကြားရေးတာဝန်ခံ ကိုကံကောင်းက ဒီဗွီဘီကို ပြောပါတယ်။

“စစ်ကောင်စီရဲ့ တရားမဝင်ရွေးကောက်ပွဲကျင်းပဖို့ ပြင်ဆင်နေတာကို တိုက်ခိုက်ဖို့ အစီစဥ်ဆွဲခဲ့တာ ၃ ပတ်လောက်တော့ရှိပြီဗျ။ သူတို့ဘက်က ​ကံဆိုးချင်တော့ မနေ့က ဖြစ်စဥ်မှာ အဲဒီ လ.ဝ.က ရုံးက ဝန်ထမ်းတွေဟာ စစ်ကောင်စီတပ်သားနဲ့ ရဲ ၅ ယောက်အပါအဝင် ပျူစောထီးတွေနဲ့ မြို့ပေါ်ရပ်ကွက်တွေကို လူဦးရေစာရင်းကောက်ပြီး ရုံးကို ပြန်ရောက်တဲ့အချိန်မှာ တိုက်ခိုက်ခဲ့လို့ ရဲနဲ့ပျူစောထီး ၇ ယောက်လောက် အပြင်းထန်ဒဏ်ရာရရှိခဲ့တယ်။” 

အကြမ်းဖက်စစ်ကောင်စီဟာ ပြည်သူလူထုစီကနေ မတရားအာဏာသိမ်းပြီး သူတို့ရဲ့ထွက်ပေါက်တခုဖြစ်တဲ့ အတုအယောင်ရွေးကောင်ပွဲ ပြုလုပ်ဖို့ ပြင်ဆင်နေတာကို လုံးဝ လက်မခံနိုင်လို့ "လက်တုံ့ပြန်" စစ်ဆင်ရေးပြုလုပ်လိုက်တာလို့ ကိုကံကောင်းက ပြောပါတယ်။

အဲဒီ တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မ တွေ့ရသေးပါဘူး။

ပခုက္ကူခရိုင်အတွင်း မြိုင်မြို့နယ်နဲ့ ရေစကြို မြို့နယ်တွေမှာလည်း ဇန်နဝါရီ ၃ ရက်နဲ့ ၁၂ ရက်နေ့တွေမှာ စစ်ကောင်စီရဲ့အတုအယောင်ရွေးကောက်ပွဲအတွက် လူဦးရေစာရင်းကောက်ခံနေတဲ့ မြို့နယ် လ.ဝ.က ရုံးတွေကို ပြည်သူ့ကာကွယ်ရေးတပ်ဖွဲ့တွေက မီးရှို့ဖျက်ဆီးခဲ့ကြပါတယ်။

မကွေးတိုင်း၊ မြိုင်မြို့နယ်မှာလည်း ဇန်နဝါရီ ၂၆ ရက် မနက်ပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး ၃ ယောက်သေဆုံးကာ ၅ ယောက် ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

မြိုင်မြို့နယ် ကျောက်ခွက်ရေနံမြေ Well-2 ကျောက်ခွက်ရေနံမြေကနေ တဲကြီးရွာဘက်ကို ခြေလျင် ရှေ့ပြေးစစ်ကြောင်းထွက်လာတဲ့ စစ်ကောင်စီတပ်သား ၁၅ ယောက်ကို ဒေသကာကွယ်ရေး ပူးပေါင်းတပ်ဖွဲ့တွေက မိုင်းပွိုင့် အကြီးအသေး ၇ လုံးနဲ့ ဖောက်ခွဲတိုက်ခိုက်ခဲ့တာလို့ မြိုင်ပ.က.ဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

အဲဒီတိုက်ခိုက်မှုကို ပေါက်မြို့နယ် ကျေးရွာကာကွယ်ရေးတပ်ဖွဲ့နဲ့ ပူပေါင်းတိုက်ခိုက်ခဲ့တာ ဖြစ်ပြီး စစ်သား ၂ ယောက်နဲ့ ပျူ ၁ ယောက် နေရာမှာတင် ပွဲချင်းပြီးသေဆုံးကာ စစ်သား ၃ ယောက်၊ ပျူ ၂ ယောက် ဒဏ်ရာရရှိသွားပြီး လူနေတဲ ၂ လုံးကို မီးရှို့ဖျက်ဆီးသွားတယ်လို့ ဆိုပါတယ်။

“ဖောကား ၄ စီးနဲ့ နောက်ချန်စစ်ကြောင်း အင်အား ၅၀ လောက်ဟာ တဲကြီးရွာ ဘုန်းကြီးကျောင်းမှာ တပ်စွဲထားပြီး ရွာအနီးပတ်ဝန်းကျင်မှာလည်း စစ်ကောင်စီ တပ်သားတွေနဲ့ ပျူစောထီး ၂၀ လောက်ကို ရှေ့ပြေးကင်းထောက်အဖြစ် စေလွှတ်ထားလို့ ကျနော်တို့တပ်ဖွဲ့က ဒရုန်းတွေနဲ့ အီနာဂါဗုံးသီး အများအပြားဖြုတ်ချပြီး တိုက်ခိုက်ခဲ့သလို လက်နက်ငယ်တွေနဲ့ပါ ပစ်ခတ်တိုက်ခိုက်ခဲ့တယ်” လို့ ဗိုလ်လက်ယာက ပြောပါတယ်။

အဲဒီ စစ်ကောင်စီစစ်ကြောင်းက လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ပေမဲ့ ကာကွယ်ရေးတပ်ဖွဲ့က ရဲဘော်တွေ ထိခိုက်မှုမရှိဘဲ စစ်ကြောင်းကလည်း ရှေ့မတိုးရဲလို့ တဲကြီးရွာမှာပဲ တပ်စွဲထားရတယ်လို့ ဆိုပါတယ်။

မြိုင်မြို့နယ်မှာ ဇန်နဝါရီ ၂၅ ရက် မနက်ပိုင်းကလည်း စစ်ကောင်စီစစ်ကြောင်းနဲ့ ရိက္ခာပို့တဲ့ ကားတန်း တိုက်ခိုက်ခံရပြီး စစ်ကောင်စီဘက်က ၅ ယောက်ထက်မနည်း ဒဏ်ရာရရှိခဲ့တယ်လို့ မြိုင် ပ.က.ဖ ကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

4 days Ago

January 13, 2023

ပခုက္ကူတွင် စစ်တပ်က ပြည်သူ ၂ ဦးကိုပစ်သတ်၊ ပျူစောထီးခေါင်းဆောင် တိုက်ခိုက်ခံရပြီး သေဆုံး

မကွေးတိုင်း၊ ပခုက္ကူ​မြို့ စက်မှုဇုန်နဲ့ မြို့သစ်ကြားက ကာနီပယ် ကေတီဗီအနီးမှာ ဇန်နဝါရီ ၁၂ ရက် မွန်းလွဲ ၂ နာရီလောက်က ဆိုင်ကယ်တစီးနဲ့လာတဲ့ လူငယ်နှစ်ယောက်ကို စစ်တပ်က ပစ်ခတ်ခဲ့တယ်လို့ ဒေသခံတွေဆီက သိရပါတယ်။

PDF သတင်းရတာကြောင့် ကြိုတင်စောင့်ဆိုင်းနေတဲ့ စစ်သား၊ ရဲနဲ့ ပျူစောထီးတွေ ပစ်ခတ်မှုကြောင့် ဆိုင်ကယ်စီးလူငယ်နှစ်ယောက် နေရာတင် သေဆုံးခဲ့တယ်လို့ မြို့ခံတဦးက ပြောပါတယ်။

“ရဲတွေ အလောင်းလာကောက်သွားတယ်။ သေနတ်ဒဏ်ရာ ၁၂ ချက်လောက် ပစ်ခံရတယ်။ အခုတော့ အလောင်းက ရင်ခွဲရုံမှာ၊ ရဲဘက်က သတင်းမထွက်အောင် ဖုံးထားတယ်။”

ပစ်သတ်ခံရသူနှစ်ယောက်ဟာ  ပခုက္ကူမြို့သစ်က ကိုရဲလင်းထက် (၂၇ နှစ်) နဲ့ ကိုမြတ်လင်းအောင် (၄၂ နှစ်) ဖြစ်တယ်လို့ ပြီး PDF တွေ ဟုတ်မဟုတ်ဆိုတာကိုတော့ အတည်ပြုနိုင်ခြင်း မရှိပါဘူး။

ပခုက္ကူမြို့ပေါ်မှာ ဆိုင်ကယ်တစီး နှစ်ယောက်စီးခွင့်နဲ့ ည ၆ နာရီကနေ မနက် ၈ နာရီအတွင်း ဆိုင်ကယ်မစီးရဆိုပြီး စစ်တပ်က နိုဝင်ဘာလအတွင်းမှာ ထုတ်ပြန်ထားပါတယ်။

စစ်တပ်ထုတ်ပြန်​ပြီးနောက် သတ်မှတ်ချိန်အတွင်း ဆိုင်ကယ်စီးတာကြောင့် ပစ်ခတ်ဖမ်းဆီးခံရသူ သုံးယောက်ထက်မနည်းရှိပြီး ဆိုင်ကယ်သိမ်းခံရသူတွေလည်း ရှိတယ်လို့ သိရပါတယ်။

ပခုက္ကူမြို့မှာပဲ ဇန်နဝါရီ ၁၂ ရက် မွန်းလွဲပိုင်းက ခရီးသွားပြည်သူတယောက်ကို မမှန်သတင်း ရေးသားဖြန့်ဝေသူလို့ စွပ်စွဲပြီး စစ်ကောင်စီတပ်က ဖမ်းဆီးခဲ့ပါတယ်။

ပခုက္ကူမြို့ ဧရာဝတီတံတားပေါ်မှာ ဇန်နဝါရီ ၁၂ ရက်က ညောင်ဦးမြို့ဘက်ကနေ ပခုက္ကူမြို့ဘက်ကို ထွက်လာတဲ့ ကားတစီးကို စစ်အုပ်စုတွေက ရပ်တန့်ပြီး လက်ကိုင်ဖုန်းတွေကို စစ်ဆေးကာ ခရီးသွားပြည်သူတယောက်ဖြစ်တဲ့ ကိုညိုထွေးကို မမှန်သတင်း ရေးသားဖြန့်ဝေတယ်လို့ စွပ်စွဲပြီး ဖမ်းဆီးသွားကြတယ်လို့ ပုက္ကူမြို့ ဒေသခံတယောက်က ပြောပါတယ်။

ကိုညိုထွေးရဲ့ လက်ကိုင်ဖုန်းကို သိမ်းဆည်းကာ ပခုက္ကူမြို့မရဲစခန်း စစ်ကြောရေးကို ခေါ်ဆောင်သွားပြီး ရိုက်နှက်စစ်ဆေးခဲ့တယ်လို့ ဒေသခံက ပြောပါတယ်။

“ပခုက္ကူမြို့မှာ စစ်(...)၊ ရဲ(...)တွေက ဒေသခံပြည်သူတွေနဲ့ ခရီးသွားပြည်သူတွေကို နေ့စဥ်ဖမ်းဆီးပြီး ငွေညှစ်ပြီး ပြန်လွှတ်တာတွေ ပြုလုပ်နေသလို ငွေကြေးတတ်နိုင်တဲ့ သူတွေကို ဆိုရင်လည်း PDF ထောက်ပံ့သူလို့ စွပ်စွဲဖမ်းဆီးကာ သိန်းရာနဲ့ချီငွေညှစ်ပြီး ပြန်လွှတ်ပေးတယ်။”

ပခုက္ကူမြို့ အမှတ် ၁၁ ရပ်ကွက် ၁၇ လမ်းမှာလည်း ဇန်နဝါရီ ၁၁ ရက် မနက်ပိုင်းကလည်း ဒေသခံ အမျိုးသားတယောက်နဲ့ အမျိုးသမီးတယောက်ကို မနက် ၈ နာရီမထိုးခင် ဆိုင်ကယ်စီးလို့ဆိုပြီး အရပ်ဝတ်နဲ့ရဲတွေက ဖမ်းသွားကာ ၁၇ လမ်းထောင့် ကုန်စုံဆိုင်ရှေ့မှာ ရပ်ထားတဲ့ ဆိုင်ကယ်တစီးကိုပါ သိမ်းဆည်းသွားတယ်လို့ ဆိုပါတယ်။

ပခုက္ကူမြို့နယ်မှာပဲ ဇန်နဝါရီ ၁၂ ရက် မွန်းလွဲပိုင်းက ထန်းမြစ်သွားတူးတဲ့ စစ်ကောင်စီလက်အောက်ခံ ပျူစောထီးတွေ တိုက်ခိုက်ခံရပြီး ပျူစောထီးခေါင်းဆောင် သေဆုံးခဲ့တယ်လို့ Royal Defence Force ကနေ သိရပါတယ်။

ကုန်းတက်ကန်ရွာနဲ့ အင်ပင်ရွာကြားမှာ မနေ့ ဇန်နဝါရီ ၁၂ ရက် မွန်းလွဲ ၁ နာရီလောက်က အင်ပင်ရွာ ပျူစောထီးခေါင်းဆောင် အပါအဝင် ၃ ယောက် ထန်းမြစ်တူးဖို့ ဆိုင်ကယ်တွေနဲ့ ထွက်လာတယ်လို့ သတင်းကြိုရတဲ့အတွက် စောင့်ကြို ပစ်ခတ်တိုက်ခိုက်ခဲ့တာလို့ RDF တပ်ဖွဲ့ရဲ့ တာဝန်ခံ ဗိုလ်ဘခက်က ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ ပျူစောထီးခေါင်းဆောင် စိုးမင်းနိုင်ဟာ သေနတ်မှန်ကာ ဆိုင်ကယ်နဲ့ တမာပင်ကို ဝင်တိုက်မိပြီး သေဆုံးခဲ့ကာ နောက်လိုက်တယောက် ပေါင်ကိုထိမှန်ကာ တယောက်က ထွက်ပြေးလွတ်မြောက်သွားတယ်လို့ ဆိုပါတယ်။

“အင်ပင်ကျေးရွာမှာ စစ်ကောင်စီတပ်သား ၃၅ ယောက်လောက် အထိုင်ချ တပ်စွဲထားတာကြောင့် သူတို့တပ်စွဲတဲ့နေရာနဲ့ အနီးနားဖြစ်လို့ ၅ မိနစ်လောက်သာ ပစ်ခတ်တိုက်ခိုက်ခဲ့ပြီး ကျနော်တို့ဘက်က ထိခိုက်ကျဆုံးမရှိဘဲ ဆုတ်ခွာခဲ့ကြတယ်” လို့ ဗိုလ်ဘခက်က ပြောပါတယ်။

အဲဒီတိုက်ခိုက်ခံရတဲ့ဖြစ်စဥ်မှာ စစ်ကောင်စီဘက်က ပျူစောထီးတွေ ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

3 weeks Ago
More News
Up