နှိုးဆော်

September 20, 2021

အကြမ်းဖက်စစ်တပ်ပိုင်ထုတ်ကုန်များကို ထိထိရောက်ရောက် သပိတ်မှောက်ကြရန် ထပ်မံနှိုးဆော်

စစ်အာဏာရှင်ယန္တရားကြီးကို အပြီးတိုင် ရပ်ဆိုင်းပစ်ဖို့အတွက် အကြမ်းဖက်စစ်တပ်ပိုင် ထုတ်ကုန်တွေကို ပြည်သူတွေအနေနဲ့ ထိထိရောက်ရောက် သပိတ်မှောက်ကြဖို့ ထပ်မံနှိုးဆော် တိုက်တွန်းထားပါတယ်။

အာဏာသိမ်းခါစတုန်းကတော့ ဖက်ဆစ်ထုတ်ကုန်တွေကို ပြည်သူတွေ သပိတ်မှောက်ခဲ့ကြပြီး လက်ရှိတချို့ပြည်သူတွေဟာ မေ့မေ့လျော့လျော့နဲ့ ပြန်လည်သုံးစွဲနေကြတာကို တွေ့ရတယ်လို့ ဆိုပါတယ်။

တောခိုနေတဲ့ ရဲဘော်ရဲဘက်တွေက သူတို့တတ်စွမ်းသမျှ လုပ်ပေးနေတုန်းမှာ တောမခိုနိုင်တဲ့ မြို့ပေါ်နေ ပြည်သူတွေကလည်း ကိုယ်တတ်နိုင်တာကို ကြိုးစားလုပ်ပေးဖို့ လိုအပ်ပါတယ်။ တောခိုနေသူတို့အတွက် လိုအပ်တာ လှူဒါန်းပေးတဲ့ နည်းတူ တစ်ဘက်က  စစ်ကောင်စီဆီကို ငွေဝင်မယ့် လမ်းကြောင်းတွေကိုဖျက်ဆီးနိုင်ဖို့အတွက် စစ်တပ်ပိုင်ထုတ် ကုန်တွေကို သပိတ်မှောက်ဖို့ လိုအပ်ပါတယ်။

အခုအချိန်မှာတော့ မြန်မာဘီယာတို့ Ruby တို့လို စစ်တပ်ပိုင်ပစ္စည်းတွေကို ပြန်ပြီးသုံးနေတာတွေ ရှိလာတာကြောင့် စီးကရက်၊ ဘီယာစတဲ့ လူသုံးများတဲ့ ထုတ်ကုန်နဲ့ ပတ်သက်ပြီး သပိတ်မှောက်ရမယ့် ထုတ်ကုန်တွေကို ဖော်ပြပေးထားတာပါ။

ဘီယာမှာဆိုရင် Myanmar Beer, Myanmar Premium Beer, Adaman Gold, Dagon Beer, Mandalay Beer နဲ့ Black Shield တို့ဖြစ်ပြီး စီးကရက်ထုတ်ကုန်တွေက Red Ruby နဲ့ Premium Gold တို့ ဖြစ်ပါတယ်။

ဒါ့အပြင် သပိတ်မှောက်တာကို ပိုထိရောက်အောင် ဈေးကွက်ကွန်ရက်ကို  ကွင်းဆက် ဖြတ်ဖို့အတွက် အဓိကအခြေခံအနေနဲ့ တပ်ပိုင်ထုတ်ကုန်မှန်သမျှ မဝယ်ယူ၊ အားမပေးဘဲ နေဖို့ ဝယ်သူတွေကစပြီး ဖြတ်ပစ်ကြရမှာဖြစ်ပြီး ရောင်းသူတွေကလည်း ဆိုင်ပေါ်မတင်၊ မရောင်းချဘဲ နေကြရမယ်လို့ တိုက်တွန်းထားပါတယ်။

မြန်မာနိုင်ငံမှာ အကြမ်းဖက်စစ်ကောင်စီက မတရားအာဏာသိမ်းယူထားခဲ့တာ ၇ လခွဲ ကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ပြည်သူ့ကျန်းမာရေးစောင့်ရှောက်မှုတွေမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူ တွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

3 months Ago

July 23, 2021

“ထောင်တွင်းတိုက်ပွဲ ငါတို့ တိုက်ပွဲ” သံပုံးတီးသပိတ် အားလုံးပါဝင်ကြရန် နှိုးဆော်

       ဒီကနေ့ မနက်ပိုင်းက ရန်ကုန်မြို့ အင်းစိန်အကျဉ်းထောင်ထဲက အကျဉ်းသားတွေ ရဲ့ ထောင်တွင်းဆန္ဒပြပွဲစတင်ခဲ့ပြီးတဲ့နောက်မှာ နိုင်ငံတဝန်း မြို့ရွာအနှံ့က ပြည်သူတွေအနေနဲ့ သံပုံးတီးသပိတ်ကို ပြန်လည်စတင်ကြဖို့ နှိုးဆော်ထားပါတယ်။

အင်းစိန်အကျဉ်းထောင်တွင်းမှာ စစ်အာဏာရှင်စနစ် ပြုတ်ကျရေးနဲ့ ပတ်သက်တဲ့ ကြွေးကြော်သံတွေ ဟစ်ကြွေးကာ ထောင်တွင်းဆန္ဒပြပွဲ ဖြစ်ပေါ်ခဲ့ပြီးနောက် တပြိုင်တည်းမှာပဲ အင်းစိန်ထောင်အတွင်း စစ်အာဏာရှင် ကျဆုံးရေး တောင်းဆိုဆန္ဒပြခဲ့ကြတဲ့ သူရဲကောင်းတွေနဲ့အတူ ရပ်တည်ကြောင်း ရန်ကုန်မြို့က လူငယ်အချို့ ဆန္ဒထုတ်ဖော် ကြတာတွေ၊ မြို့နယ်တချို့မှာ သံပုံးတီးဆန့်ကျင်မှုတွေ လုပ်ဆောင်နေကြတာကို တွေ့ရပါတယ်။

       “ထောင်တွင်းတိုက်ပွဲ ငါတို့တိုက်ပွဲ” ကြွေးကြော်သံနဲ့အတူ “အင်းစိန်လည်းထောင် တိုင်းပြည်လည်းထောင်၊ ငါတို့မှာငါတို့ပဲရှိတယ်၊ ငါတို့အတူတူ ရုန်းကြမယ်”စတဲ့ မြို့တော် ရန်ကုန်ရဲ့ စစ်အာဏာရှင်ဆန့်ကျင် မကောင်းဆိုးဝါးနှင် သံပုံးတီးဆန့်ကျင်မှုတွေနဲ့အတူ ဒီက‌နေ့ည ၈ နာရီမှာတော့ အားလုံးအတူတကွ ပါဝင်နိုင်မှာ ဖြစ်ပါတယ်။

မြန်မာနိုင်ငံမှာ မတရားစစ်အာဏာသိမ်းကာလဟာ ၆ လနီးပါး ကြာမြင့်ခဲ့ပြီ ဖြစ်ကာ အာဏာသိမ်း စစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၉၃၁ ယောက်ထိ ရှိလာခဲ့ပြီး ၆၈၇၁ ယောက် ဖမ်းဆီးခံခဲ့ရကာ ၅၃၃၃ ယောက်ကတော့ လက်ရှိချုပ်နှောင်ခံထားရဆဲ ဖြစ်ပါတယ်။

လတ်တလောမှာတော့ မြန်မာနိုင်ငံအတွင်း အကျဉ်းထောင်တွေမှာ ဖမ်းဆီးထိန်း သိမ်းခံထားရသူအားလုံးအတွက် ကောင်းမွန်တဲ့ ကျန်းမာရေးစောင့်ရှောက်မှု နည်းလမ်းတကျ ရရှိရေးအတွက် အခြေခံလူ့အခွင့်အရေးတွေကို လေးစားလိုက်နာဖို့ အာဏာပိုင်တွေကို မြန်မာနိုင်ငံအခြေစိုက် နိုင်ငံခြားသံရုံးတွေက ဒီကနေ့မှာ ပူးပေါင်းတောင်းဆိုလိုက်ပါတယ်။

5 months Ago
Up