နှစ်နိုင်ငံ

March 1, 2020

ကိုရိုနာဗိုင်းရပ်စ် ကူးစက်မှု မရှိရေး ကိုရီးယားနှစ်နိုင်ငံ ပူးပေါင်းကာကွယ်မည်

တောင်ကိုရီးယားသမ္မတ မွန်ဂျေအင်းက သူ့ရဲ့အိမ်နီးချင်းနိုင်ငံမှာ ကိုရိုနာဗိုင်းရပ်စ် ကပ်ရောဂါ ကူးစက်မှုကို တားဆီးကာကွယ်နိုင်ဖို့နဲ့ ကျန်းမာရေးစောင့်ရှောက်မှု တိုးမြှင့်နိုင်ဖို့ မြောက်ကိုရီးယားနိုင်ငံနဲ့အတူ ပူးတွဲဆောင်ရွက်သွားမယ်လို့ မတ် ၁ ရက်မှာ အဆိုပြုလိုက်ပါတယ်။  ဒီနှစ် မတ် ၁ ရက်ဟာ ဂျပန်နိုင်ငံရဲ့ ကိုလိုနီအုပ်ချုပ်မှုကနေ နိုင်ငံ့လွတ်လပ်ရေး ပြန်လည်ရရှိခဲ့တာ ၁၀၁ နှစ် ပြည့်မြောက်တဲ့ အထိမ်းအမှတ်နေ့ပါ။ သမ္မတမွန်ဂျေအင်းရဲ့ မိန့်ခွန်းထဲမှာ မြောက်ကိုရီးယားအစိုးရနဲ့အတူ ကျန်းမာရေး စောင့်ရှောက်မှု ပူးတွဲလုပ်ဆောင်နိုင်ဖို့ မျှော်လင့်ထားတယ်လို့ ပြောသွားပါတယ်။   ကူးစက်ရောဂါတွေဟာ လူနာတွေနဲ့ တိရစ္ဆာန်တွေကြား ကူးစက်ပျံ့နှံ့လာတဲ့အခါ ကိုရီးယား နှစ်နိုင်ငံက အတူတုံ့ပြန် ဆောင်ရွက်ပြီးတော့ နယ်စပ်ဒေသတွေက ရောဂါဘေးအန္တရာယ်တွေနဲ့ ရုတ်တရက် ပေါ်ပေါက်လာတဲ့ ကပ်ဘေးတွေ၊ ကိုရီးယားကျွန်းဆွယ်ပေါ်က ရာသီဥတု အပြောင်းအလဲတွေကို ပူးတွဲကိုင်တွယ် ဖြေရှင်းမယ်ဆိုရင် ကိုရီးယားပြည်သူတွေရဲ့ အသက်တွေ၊ ဘဝတွေ ပိုပြီးလုံခြုံပါလိမ့်မယ်လို့ သမ္မတမွန်းက ပြောပါတယ်။ မြောက်ကိုရီးယားအစိုးရကတော့ ကိုရိုနာဗိုင်းရပ်စ် ကူးစက်ခံရမှုကို အတည်မပြုထားပေမယ့် ရောဂါလက္ခဏာရှိသူတွေကို တလကြာ ခွဲထား စောင့်ကြည့်ဖို့ သတ်မှတ်ထားပါတယ်။ မြောက်ကိုရီးယားခေါင်းဆောင် ကင်ဂျုံအန်းကတော့ ပိုပြီး တင်းကျပ်တဲ့ အစီအမံတွေနဲ့ အစည်းအဝေး ကျင်းပခဲ့တယ်လို့ နိုင်ငံပိုင် မီဒီယာက ပြောသွားပါတယ်။
1 year Ago

January 18, 2020

တရုတ်-မြန်မာ နှစ်နိုင်ငံ နားလည်မှုစာချွန်လွှာ ၃၃ ခု လက်မှတ်ရေးထိုး

တရုတ်အမျိုးသားရုပ်မြင်သံကြား၊ အသံလွှင့်ဌာနနဲ့ မြန်မာ ပြန်ကြားရေးဝန်ကြီးဌာနတို့အကြား ပူးပေါင်းဆောင်ရွက်ရေး၊ ရန်ကုန်မြို့ပြဖွံ့ဖြိုးတိုးတက်ရေး စီမံကိန်းသစ် စတာတွေ အပါအဝင် သဘောတူစာချုပ်နဲ့ နားလည်မှုစာချွန်လွှာ ၃၃ ခုကို မြန်မာနဲ့ တရုတ် အစိုးရတို့ ဒီနေ့ လက်မှတ်ရေးထိုး လဲလှယ်ခဲ့ကြပါတယ်။ နေပြည်တော်က သမ္မတ အိမ်တော်မှာ ဇန်နဝါရီ ၁၈ ရက်နေ့က တရုတ်-မြန်မာ နှစ်နိုင်ငံခေါင်းဆောင်တွေ တွေ့ဆုံမှုအပြီး သဘောတူစာချုပ် ၅  ခု၊ နားလည်မှု၊ လဲလှယ်မှု စာချွန်လွှာ ၁၅ ခု၊ စာလွှာ ၉ ခု၊ သဘောတူညီချက် ၄ ခု တို့ကို နှစ်နိုင်ငံ သက်ဆိုင်ရာ ဝန်ကြီးနဲ့ တာဝန်ရှိသူ အသီးသီးတို့က လက်မှတ်ထိုးခဲ့ကြတာပါ။ သဘောတူစာချုပ်တွေကတော့ မြန်မာနိုင်ငံက ဆန်ကို တရုတ်ကို တင်ပို့ဖို့ စစ်ဆေးတာနဲ့ ပိုးမွှား ကင်းစင်ရေး၊ မြန်မာနိုင်ငံ အပူပေးစနစ်နဲ့ ပြုပြင်ထုတ်လုပ်ထားတဲ့ ပိုးအိမ်ခြောက်တွေ တင်ပို့တာ၊ အတိုးမဲ့ချေးငွေနဲ့ လူစီးရထားတွဲတွေ ဝယ်ယူရေး၊ ကျောက်ဖြူ အထူးစီးပွားရေးဇုန်၊ ရေနက်ဆိပ်ကမ်းစီမံကိန်းဆိုင်ရာ သဘောတူစာချုပ်နဲ့ အစုရှယ်ယာတွေနဲ့ဆိုင်တဲ့ သဘောတူစာချုပ်၊ မြန်မာနိုင်ငံက တရုတ်ကို တင်ပို့မယ့် ကျွဲ၊ နွားတွေအတွက် ထိန်းသိမ်းစောင့်ကြည့်ရေးနဲ့ ကျန်းမာရေး လိုအပ်ချက်ဆိုင်ရာ သဘောတူစာချုပ်တို့ ဖြစ်ပါတယ်။ တရုတ်အမျိုးသားရုပ်မြင်သံကြား၊ အသံလွှင့်ဌာနနဲ့ မြန်မာ ပြန်ကြားရေးဝန်ကြီးဌာနတို့အကြား ပူးပေါင်းဆောင်ရွက်ရေး၊ အမှတ်-၂ စက်မှုသင်တန်းကျောင်း (မန္တလေး) အဆင့်မြှင့်တင်ရေးစီမံကိန်း အကောင်အထည် ဖော်မှုဆိုင်ရာ သဘောတူညီချက်၊ နှစ်နိုင်ငံ သံရုံး မြေနဲ့ အဆောက်အအုံ အပြန်အလှန်ထောက်ပံ့ခြင်းဆိုင်ရာ သဘောတူညီချက်၊ ကွမ်းလုံတံတားစီမံကိန်း အကောင်အထည် ဖော်မှုဆိုင်ရာ သဘောတူညီချက်တွေကိုလည်း လက်မှတ်ရေးထိုးခဲ့ကြပါတယ်။ ပြီးတော့ ကချင်ပြည်နယ်ထဲက နေရပ်စွန့်ခွာသူတွေကို ပြန်လည်နေရာချထားဖို့ စီမံကိန်း ဖြစ်နိုင်ခြေလေ့လာမှုဆိုင်ရာစာလွှာ၊ ရန်ကုန်မြို့တော်အတွက် မြို့ပြဖွံ့ဖြိုးတိုးတက်ရေး စီမံကိန်းသစ် စာလွှာ၊ ရန်ကုန်တိုင်းနဲ့ ယူနန်ပြည်နယ်တို့အကြားချစ်ကြည်ရေးဆက်ဆံမှု တည်ထောင်ရေးဆိုင်ရာ နားလည်မှု စာချွန်လွှာ၊ နှစ်နိုင်ငံ ဘောလုံး အဖွဲ့ချုပ်တွေ ပူးပေါင်းဆောင်ရွက်ရေး စတာတွေကိုလည်း တာဝန်ရှိသူတွေက လက်မှတ်ထိုး လဲလှယ်ခဲ့ကြပါတယ်။ ဓာတ်ပုံ - Ko Latt VJ
1 year Ago
Up