နှင်းဆီပါတီ

October 25, 2020

နှင်းဆီပါတီဥက္ကဋ္ဌ ဦးကျော်မြင့်၏ ပိုင်ဆိုင်မှု ၁၈ ဘီလီယံနှင့် လွှဲငွေ ၁၁ ဘီလီယံ ထပ်မံစိစစ်တွေ့ရှိ 

နှင်းဆီပါတီဥက္ကဋ္ဌဦးကျော်မြင့်ရဲ့ ပိုင်ဆိုင်မှု ၁၈ ဘီလီယံနဲ့ လွှဲငွေ ၁၁ ဘီလီယံ ထပ်မံစိစစ်တွေ့ရှိရတယ်လို့ သမ္မတရုံးက ပြောပါတယ်။ ထောင်ပြေးမှုနဲ့ ဖမ်းဆီးခံထားရတဲ့ ညီညွတ်သောဒီမိုကရက်တစ်ပါတီ (ခ) နှင်းဆီပါတီရဲ့ ဥက္ကဋ္ဌဖြစ်သူ ဦးကျော်မြင့်ကို ထပ်မံစိစစ်ချက်တွေအရ အခုလို တွေ့ရှိရတာလို့ အောက်တိုဘာ ၂၃ ရက်နေ့က ပြုလုပ်တဲ့ သမ္မတအိမ်တော် ပုံမှန်သတင်းစာရှင်းလင်းပွဲမှာ သမ္မတရုံး ပြောရေးဆို ခွင့်ရှိသူ ဦးဇော်ဌေးက ပြောကြားခဲ့တာပါ။ “အရင်အပတ်က စိစစ်ရေးအဖွဲ့က တွေ့ရှိတာ ပိုင်ဆိုင်မှုက ၂၃ ဘီလီယံလို့ ပြောထားတယ်။ အခု နောက်ထပ် ၁၈ ဘီလီယံ ထပ်တွေ့တော့ စုစုပေါင်း ၄၁ ဘီလီယံ ပိုင်ဆိုင်မှုတွေ့ပါတယ်။ နောက်တစ်ချက် နောက်ဆုံးငွေလွှဲတဲ့ဟာ အားလုံး ၁၆ ဘီလီယံလို့ ပြောထားတယ်။ အခု ၁၁ ဘီလီယံ ထပ်ပြီးတော့ စစ်ဆေးရရှိတယ်။ စုစုပေါင်း ၂၇ ဘီလီယံ၊ ပြောရရင်တော့ ပိုင်ဆိုင်မှုက ၄၁ ဘီလီယံ၊ ငွေလွှဲတာက ၂၇ ဘီလီယံ နောက်ဆုံးအခြေအနေ တွေ့တယ်။” ဒါ့အပြင် မြေနဲ့အဆောက်အဦ ၃ ခုကိုလည်း ငွေကြေးခ၀ါချမှုတိုက်ဖျက်ရေး ဥပဒေအရ ယာယီသိမ်းဆည်းထားတယ်လို့ သိရပါတယ်။ ဦးဇော်ဌေးက “လောလောဆယ် အစိုးရအနေနဲ့ ယာယီသိမ်းဆည်းထားတဲ့နေရာ ၃ နေရာ၊ နံပါတ်တစ်က ပန်းလှိုင်အိမ်ရာက ယာယီသိမ်းဆည်းထားတယ်။ နံပါတ်နှစ်က ပြင်စာမှာရှိတဲ့ မြေနဲ့ အဆောက်အဦ ယာယီသိမ်းထားတယ်။ နောက် မှော်ဘီမှာရှိတဲ့ မြေနဲ့အဆောက်အဦ ဒီသုံးခုကိုတော့ ယာယီသိမ်းထားတယ်” လို့  ပြောပါတယ်။ ဦးကျော်မြင့်ရဲ့ ပိုင်ဆိုင်မှုတွေကို ငွေရေးကြေးရေးစိစစ်တဲ့အဖွဲ့က စိစစ်ကာ စုံစမ်းစစ်ဆေးရေးအဖွဲ့က ဆက်လက်စုံစမ်းပြီး ငွေကြေးခ၀ါချမှုတိုက်ဖျက်ရေးဥပဒေနဲ့ တရားစွဲဖို့ ဆက်လက်ဆောင်ရွက်သွားမယ်လို့ ဆိုပါတယ်။ ဦးကျော်မြင့်ကို မူလက ပုဒ်မ ၂၂၄ နဲ့ တရားစွဲဆိုထားတာဖြစ်ပြီး လ.၀.က အက်နဲ့ ထပ်မံတရားစွဲဆိုထားပါတယ်။
11 months Ago

October 24, 2020

ယင်းမာပင်တွင် ပြည်ခိုင်ဖြိုးပါတီအောင်နိုင်ရေးအတွက် ဝန်းရံမည်ဟု နှင်းဆီပါတီပြော

စစ်ကိုင်းတိုင်း​ ယင်းမာပင်မြို့နယ်မှာ ပြည်​ထောင်စုကြံ့ခိုင်​ရေးနှင့်ဖွံ့ဖြိုး​ရေးပါတီ ရွေး​ကောက်ပွဲအောင်နိုင်​ရေးအတွက် အားဖြည့်ဝန်းရံသွားမယ်လို့ ဖျက်သိမ်းခံရတဲ့ နှင်းဆီပါတီရဲ့ မြို့နယ် ပြောရေးဆိုခွင့်ရှိသူက ပြောပါတယ်။  ပြည်ခိုင်ဖြိုးပါတီထဲ ​ပါတီဝင်အဖြစ် မ​ဆောင်ရွက်​သေးပဲ ​လော​လောဆယ် ပြည်ခိုင်ဖြိုးပါတီ ​အောင်နိုင်​ရေးအတွက် အားဖြည့်ဝန်းရံတာလို့  ယင်းမာပင်မြို့နယ် နှင်းဆီပါတီ ခေါ် ညီညွတ်​သောဒီမိုကရက်တစ်ပါတီ (UDP) ရဲ့ ​ပြော​ရေးဆိုခွင့်ရှိသူ EC အဖွဲ့ဝင် ဦးသီဟ​ကျော် ​ပြောပါတယ်။ "ကျ​နော်တို့ပါတီက ၂၀၂၀ ​ရွေး​ကောက်ပွဲမှာ ဝင်​ရောက်ယှဥ်ပြိုင်ခွင့်မရှိလို့ ကြံခိုင်​ရေးနှင့်ဖွံ့ဖြိုး​ရေးပါတီကို ဝန်းရံတဲ့အ​နေထားပါ။ ပါတီဝင်ခြင်း​​​တော့ မရှိ​သေးပါဘူး။ ကျ​နော်တို့ပါတီက အစည်းလိုက်​လေးပဲ လက်တွဲသွားမယ်။ ကျ​နော်တို့ပါတီ ဘယ်လိုဆက်လက်​ဆောင်ရွက်သွားမယ်ဆိုတာလည်း ညွှန်ကြားထားခြင်းမရှိ​သေးဘူး။ ၂၀၂၀ အလွန် ပါတီရှင်သန်ခွင့်ရရင် ကျ​နော်တို့အဖွဲ့အစည်းအတိုင်း ပါဝင်သွားဖို့ရှိပါတယ်။ ယင်းမာပင်မြို့နယ်မှာ ကျ​နော်တို့ပါတီဝင် ၁ သောင်းကျော် ရှိမယ်။" ယင်းမာပင်မြို့နယ် ပြည်​ထောင်စုကြံ့ခိုင်​ရေးနှင့်ဖွံဖြိုး​ရေးပါတီ ဥက္ကဋ္ဌ ဦးသန်းနိုင်က "သူတို့က ​လော​လောဆယ် ဝန်းရံအားဖြည့်မယ်​ပေါ့။ ၂၀၂၀ ပြီးမှ သူတို့ပါတီကို ပြန်ဖွဲ့ခွင့်၊ မဖွဲ့ခွင့်ကို အ​​ခြေ​အနေကြည့်ပြီးမှ ဆုံးဖြတ်မယ်​ပြောတယ်။ ​ရွေး​ကောက်ပွဲမှာ ပါတီကိုပဲ ဝန်းရံအား​ပေးမှာပါ" လို့ ​ပြောပါတယ်။ ညီညွတ်​သောဒီမိုကရက်တစ်ပါတီ (UDP) ကို ​အောက်တိုဘာ ၁၇ ရက်​နေ့မှာ ပြည်​ထောင်စု​ရွေး​ကောက်ပွဲ​ကော်မရှင်က တရားဝင်နိုင်ငံ​ရေးပါတီက​နေ ပယ်ဖျက်ထားတာဖြစ်ပြီး ပါတီဥက္ကဋ္ဌကိုလည်း ​​ထောင်​ပြေးမှုနဲ့ စွဲချက်တင်စစ်​ဆေး​နေပါတယ်။
11 months Ago
More News
Up