နော်အုန်းလှ

December 10, 2020

 နော်အုန်းလှကို ဆွီဒင်အခြေစိုက်အဖွဲ့က နိုင်ငံသားအခွင့်အရေး ကာကွယ်လှုပ်ရှားသူဆု ချီးမြှင့်

နိုင်ငံရေးတက်ကြွလှုပ်ရှားသူ နော်အုန်းလှကို ဆွီဒင်နိုင်ငံရှိ အဖွဲ့အစည်းတစ်ခုက ၂၀၂၀ ပြည့်နှစ်အတွက် နိုင်ငံသား အခွင့်အရေးများကာကွယ်လှုပ်ရှားသူဆု " Civil Rights Defender of the Year Award "    ပေးအပ်ချီးမြှင့်လိုက်ပါတယ်။ ဒီမိုကရေစီနှင့် ငြိမ်းချမ်းရေးအမျိုးသမီးအဖွဲ့ရဲ့ ဥက္ကဋ္ဌဖြစ်သူ နော်အုန်းလှကို ဆွီဒင်အခြေစိုက် နိုင်ငံသားအခွင့်အရေးများအတွက် ကာကွယ်လှုပ်ရှားသူများ Civil Rights Defenders အဖွဲ့က ဆုရွေးချယ်ပေးအပ်ကြောင်း ဒီကနေ့ ဒီဇင်ဘာ ၁၀ ရက်မှာ ကျရောက်တဲ့ အပြည်ပြည်ဆိုင်ရာလူ့အခွင့်အရေးနေ့မှာ ကြေညာခဲ့တာပါ။  နော်အုန်းလှဟာ သူ့ရဲ့ နှစ်ပေါင်း ၃၀ ကျော် နိုင်ငံရေးဖြတ်သန်းမှုကာလမှာ မြန်မာနိုင်ငံအတွင်း အဓိကရုဏ်းတွေ၊ တိုင်းရင်းသားနဲ့ လူမျိုးရေးခွဲခြားတာတွေ ကျယ်ကျယ်ပျံ့ပျံ့ရှိနေတဲ့အထဲက တရားမျှတမှု ပေါ်ပေါက်ဖို့နဲ့ တာဝန်ယူမှု တာဝန်ခံမှုတွေ ရှိလာဖို့ လှုပ်ရှားရုန်းကန်ကြိုးစားခဲ့တာတွေကို အသိအမှတ်ပြုတာကြောင့် ဆုချီးမြှင့်တာလို့ Civil Rights Defenders အဖွဲ့က ထုတ်ပြန်ပါတယ်။ အခုလိုဆုရရှိခဲ့တာနဲ့ ပတ်သက်ပြီး နော်အုန်းလှက “ဒီဆုကို   လက်ခံရရှိတဲ့အတွက်  ကျမတို့နိုင်ငံမှာ  လူ့အခွင့်အရေးနဲ့ပတ်သတ်လို့   နိုင်ငံတကာကစောင့်ကြည့်နေတယ်။ ဆက်လုပ်ရမှာတွေရှိသေးတယ်ဆိုတာကို  မီးမောင်းထိုးပြလိုက်တဲ့ သဘောပါပဲ” လို့ပြောပါတယ်။ မြန်မာ့နိုင်ငံရေးမှာ  နှစ်ပေါင်း ၃၀ ကျော်တက်ကြွလှုပ်ရှားနေသူ နော်အုန်းလှဟာ   ပြည်ပအဖွဲ့ အစည်းက ပေးအပ်တဲ့ဆုကိုပထမဆုံး လက်ခံရရှိတာဖြစ်ပါတယ်။ ဒီဆုကို လက်ခံဖို့ လာမယ့်နှစ်မှာ ဆွီဒင်နိုင်ငံကို သွားရောက် မှာဖြစ်တယ်လို့လည်း နော်အုန်းလှက ပြောပါတယ်။ နော်အုန်းလှက “ စက်တင်ဘာလ ကတည်းက  ကြေညာဖို့  စီစဉ်ခဲ့ပေမယ့်  ကိုဗစ်ကြောင့်လို့   ဆွီဒင်ဘက်က ပြောပါတယ်။ ၂၀၂၁ မှာတော့    ဆွီဒင်နိုင်ငံမှာ  ဒီဆုကို  လက်ခံရယူသွားဖို့ စီစဉ်ထားတယ်။ လက်ရှိကတော့   ကိုဗစ်ကြောင့်  ရွှေ့ထားရတာပါ” လို့ပြောပါတယ်။ ဆွီဒင်နိုင်ငံ အခြေစိုက် နိုင်ငံသားအခွင့်အရေးများအတွက် ကာကွယ်ရေးလှုပ်ရှားသူများအဖွဲ့အနေနဲ့ Civil Rights Defender of the Year Award ဆုကို ၂၀၁၇ ခုနှစ်က  စတင်ချီးမြှင့်ခဲ့ပြီး   အရင်က  ဘယ်လာရုစ်၊ တူရကီနဲ့ တောင်ပိုင်း ဆူဒန် နိုင်ငံတို့က  တက်ကြွလှုပ်ရှားသူတွေကိုလည်း ဒီဆု ချီးမြှင့်ဖူးပါတယ်။  
12 months Ago

July 27, 2020

ဥပဒေနှင့်မညီဘဲ အရေးယူခံခဲ့ရသည့်အပေါ် နော်အုန်းလှ အယူခံတင်သွင်း

ပြီးခဲ့တဲ့နှစ်က ကရင့်အာဇာနည်နေ့အခမ်းအနားပြုလုပ်မှုကြောင့် ငြိမ်းစုစီပုဒ်မနဲ့ အရေးယူခံ ခဲ့ရတဲ့ အပေါ်မှာ ကျေနပ်မှုမရှိတဲ့အတွက် ပြည်ထောင်စုတရားလွှတ်တော်ချုပ်မှာ အယူခံ တင်သွင်းထားတယ်လို့ ကရင်အမျိုးသမီးအစည်းအရုံး ဥက္ကဋ္ဌ နော်အုန်းလှက ပြောပါတယ်။ ၂၀၁၉ ခုနှစ် ဩဂုတ်လ ၁၂ ရက်နေ့က ပြုလုပ်ခဲ့တဲ့ ၆၉ နှစ်မြောက် ကရင့် အာဇာနည်နေ့ အခမ်းအနားနဲ့ပတ်သက်ပြီး နော်အုန်းလှအပါအဝင် ၃ ဦးဟာ ငြိမ်းစုစီပုဒ်မ ၂၀ နဲ့ အမှုဖွင့်ခံခဲ့ရပြီး ထောင်ဒဏ် ၁၅ ရက်စီ ပြစ်ဒဏ်ချမှတ်ခံခဲ့ရတာပါ။ ဒီပြစ်ဒဏ်ကို ခံယူခဲ့ ပေမယ့်လည်း ကျေနပ်မှုမရှိတဲ့အတွက် ပြည်ထောင်စု တရားလွှတ်တော်ချုပ်မှာ အယူခံ တင်သွင်းရတာဖြစ်တယ်လို့ နော်အုန်းလှက ပြောပါတယ်။  “ဒီအမှုကို ပြည်ထောင်စုကနေ ပလပ်မယ်။ တခုခုလုပ်မယ်ဆိုလည်း အန်တီတို့က ဆက်သွားမှာပါ။ ဘာလို့လဲ ဆိုတော့ စာချွှန်လွှာကျန်သေးတယ်။ အဆုံးထိလုပ်မှာ။ ဒါတွေက အန်တီတို့တိုင်းပြည်မှာ ဥပဒေနဲ့အညီ မဆောင်ရွက်တဲ့အတွက် လုပ်ရခြင်းဖြစ်တယ်။ ဥပဒေနဲ့အညီ လုပ်တဲ့ နိုင်ငံသားပြည်သူတွေကို ဥပဒေနဲ့အညီမလုပ်တာက တာဝန်ရှိတဲ့သူတွေ ဖြစ်တဲ့အတွက် အန်တီတို့လက်မခံပါဘူး။”လို့ ဇူလိုင် ၂၇ ရက်က ပြည်ထောင်စု တရားလွှတ်တော်ချုပ်ရုံးရှေ့မှာ ပြောပါတယ်။ နော်အုန်းလှအနေနဲ့ အယူခံကို ပြီးခဲ့တဲ့ မေလက တင်သွင်းထားတာဖြစ်ပြီး အယူခံအတွက် လျှောက်လဲချက်ကို ဇူလိုင် ၃၁ ရက်နေ့မှာ တင်သွင်းရမှာဖြစ်ပါတယ်။ ဇူလိုင် ၃၁ ရက်နေ့ဟာ အများပြည်သူ ရုံးပိတ်ရက်ဖြစ်တာကြောင့်လျှောက်လဲချက် တင်သွင်းခြင်းနဲ့ပတ်သက်ပြီး ဘယ်နေ့မှာ ပြောင်းလဲ လုပ်ဆောင်မယ်ဆိုတာကိုတော့ မသိရသေးဘူးလို့ နော်အုန်းလှ က ပြောပါတယ်။ တက်ကြွလှုပ်ရှားသူတဦးဖြစ်တဲ့ ကရင်အမျိုးသမီးအစည်းအရုံး ဥက္ကဋ္ဌ နော်အုန်းလှဟာ လာမယ့် ၂၀၂၀ ရွေးကောက်ပွဲမှာ ရန်ကုန်တိုင်းဒေသကြီးကနေ ကရင်တိုင်းရင်းသားရေးရာ ဝန်ကြီးနေရာအတွက် ကိုယ်စားလှယ်လောင်းအဖြစ်  ဝင်ရောက်ရွေးချယ်ခံမှာဖြစ်ပါတယ်။ ဖြိုးသက်ပိုင်မြင့်(နေပြည်တော်)    
1 year Ago
Up