နောင်ချို

A d v e r t i s e m e n t With Us

December 12, 2020

နောင်ချိုမြို့နယ်တွင် ကလေးငယ် ၃ ဦးအပါအဝင် ကိုဗစ်-၁၉ လူနာသစ် ၈ ဦး တွေ့ရှိ

ရှမ်းပြည်နယ်မြောက်ပိုင်း နောင်ချိုမြို့နယ်မှာ ဒီဇင်ဘာ ၁၂ နေ့က ကလေးငယ် ၃ ဦး အပါအဝင် ကိုဗစ်-၁၉ လူနာသစ် ၈ ဦး ပိုးတွေ့ခဲ့တယ်လို့ နောင်ချိုမြို့နယ် ပြည်သူ့ကျန်းမာဦးစီးဌာနက အတည်ပြုပြောကြားပါတယ်။ ဒီဇင်ဘာ ၇ ရက်နေ့က ပိုးတွေ့ရှိရတဲ့ နောင်ချိုမြို့ဈေးရပ်နေ ပိုးတွေ့လူနာနဲ့ ထိစပ်မှုရှိသူ ၂၂ ဦးကို ပထမအကြိမ် RDT နဲ့ စစ်ဆေးခဲ့ရာမှ အသက် ၂ နှစ်ခွဲ၊ ၄ နှစ်၊ ၁၀ နှစ် ကလေးငယ်တွေ အပါအဝင် ၈ ဦး ပိုးတွေ့ရှိခဲ့တာလို့ သိရပါတယ်။ နောင်ချိုမြို့မှာ ပိုးတွေ့လူနာ နေ့စဉ် တိုးပွားလာတာကြောင့် အ.မ.က (၂) ကျောင်းမှာ positive centre ဖွင့်ထားရပြီး ပိုးတွေ့လူနာ ၁၆ ဦး ရှိနေပါတယ်လို့ စေတနာမွန် လူမှုကူညီရေးအသင်းက ကိုနေဦးသာက ပြောပါတယ်။ ရှမ်းပြည်နယ်မြောက်ပိုင်းက လူနာ ၁၀၇ ယောက်၊ တောင်ပိုင်းမှာ ၇၈ ယောက်၊ အ ရှေ့ပိုင်းမှာ ၆၈ ယောက်နဲ့ ဆေးရုံတက်ကုသဆဲ လူနာစုစုပေါင်း ၂၅၃ ဦး ရှိပါတယ်။ ဒီဇင်ဘာ ၁၁ နေ့ထိ ရှမ်းပြည်နယ်မှာ  စုစုပေါင်း ပိုးတွေ့လူနာ ၆၄၇ ဦးနဲ့ သေဆုံး ၃ ဦး ရှိခဲ့ပါတယ်။ သတင်း - နန်းစံပယ်၊ ဓာတ်ပုံ-စေတနာမွန်လူမှုကူညီရေးအသင်း
1 month Ago

November 28, 2020

နောင်ချို၊ ဒက္ခိဏသီရိနှင့် တပ်ကုန်းတို့တွင် ကိုဗစ်ရောဂါမရှိကြောင်း ထောက်ခံချက်အတု ကိုင်သူများ ဖမ်းမိ

ရှမ်းပြည်နယ် နောင်ချို၊ နေပြည်တော် ဒက္ခိဏသီရိ၊ တပ်ကုန်းမြို့နယ်တို့မှာ ကိုဗစ်-၁၉ ရောဂါမရှိကြောင်း ထောက်ခံချက်အတု ကိုင်ဆောင်ထားသူတွေကို ဖမ်းဆီးမိခဲ့တယ်လို့ သိရပါတယ်။ နိုဝင်ဘာ ၂၅ ရက် မနက်ပိုင်းက တပ်ကုန်းမြို့နယ် ညောင်လွန့်စစ်ဆေးရေးဂိတ်မှာ 9A/6861 Dyna ယာဉ်မောင်း ဦးစိန်ဝင်းထွန်းနဲ့ 8M/7441 Canter ၆ ဘီးယာဉ်မောင်း/ယာဉ်ပိုင်ရှင် ဦးအောင်ဇော်မြင့်တို့အား ပေပင်လေးစစ်ဆေးရေးဂိတ်က စစ်ဆေးပေးတဲ့ RDT စစ်ဆေးချက်လက်မှတ်အား မသင်္ကာလို့ တပ်ကုန်းမြို့နယ်ဆရာဝန်ကြီးက ပျော်ဘွယ်မြို့နယ် ဆရာဝန်ကြီးဆီကို Viber နဲ့ ပေးပို့တိုက်ဆိုင်စိစစ်ချက်အရ အတုတွေ ဖြစ်ကြောင်း စစ်ဆေးပေါ်ပေါက်ခဲ့တယ်လို့ ဆိုပါတယ်။ အဲဒီ ထောက်ခံချက်စာရွက်အလွတ် (အတု) တွေအား ပျော်ဘွယ်မြို့ မြင်းဘက်ရပ်ကွက် တောင်ဂိတ်တာဝန်ကျ ရန်လင်းဦးဆီက ရယူခဲ့ကြောင်း သိရလို့ သွားရောက်ဖမ်းဆီးမိခဲ့ပြီး မေးမြန်းချက်အရ ပျော်ဘွယ်မြို့၊ ရှမ်းပွဲရပ်ကွက်ရှိ "ငွေစတား" ကွန်ပျူတာဆိုင်ရှိ ထက်အောင်ဆီက ဝယ်ယူခဲ့ကြောင်း စစ်ဆေးပေါ်ပေါက်ခဲ့ပါတယ်။ နိုဝင်ဘာလ ၂၆ ရက်က ထက်အောင်အား "ငွေစတား" ကွန်ပျူတာဆိုင်မှာ Samsung တံဆိပ်ပါ မော်နီတာ ၁ လုံး၊ MegaPower System Box ၁ လုံး၊ Epson L-805 ကာလာပရင်တာ ၁ လုံး၊ Canon L-100 ပရင်တာ ၁ လုံး၊ ဆက်စပ်ပစ္စည်းတွေနဲ့အတူ ထပ်မံဖမ်းဆီးရမိခဲ့ပြီး ဥပဒေနဲ့အညီ အရေးယူဆောင်ရွက်နေတယ်လို့ ဆိုပါတယ်။  အလားတူ နိုဝင်ဘာ ၂၇ ရက်နေ့လယ်ကလည်း နောင်ချိုမြို့နယ် ကိုဗစ်-၁၉ ထိန်းချုပ်ကာကွယ်ရေးစစ်ဆေးရေးဂိတ်မှာ တင်ဇော်လေး မောင်းနှင်တဲ့ DD/7838 AD Van ယာဉ်အား စစ်ဆေးရာ မတ္တရာမြို့နယ် ပြည်သူ့ကျန်းမာရေးဌာနက ထုတ်ပေးထားတဲ့ ကိုဗစ်-၁၉ ရောဂါမရှိကြောင်း ထောက်ခံချက်စာရွက်အား တွေ့ရှိခဲ့ပါတယ်။ အဲဒီစာရွက်ကို သူကိုယ်တိုင် အတုပြုလုပ်ကိုင်ဆောင်ထားကြောင်း စစ်ဆေးပေါ်ပေါက်ခဲ့ပြီး ဥပဒေနဲ့အညီ အရေးယူထားတယ်လို့ ဆိုပါတယ်။ နိုဝင်ဘာ ၂၇ ရက် ညနေကလည်း  ဒက္ခိဏသီရိမြို့နယ် စီလမ်းဆုံ ပူးပေါင်းစစ်ဆေးရေးဂိတ်မှာ 6Q-6872 ကွန်တိန်နာယာဉ်နဲ့ သားငယ်တွေ တင်ဆောင်လာသူ ဦးဝင်းအောင်အပါအဝင် အမျိုးသား ၂ ဦးမှာလည်း စစ်ဆေးချက်အရ ကိုဗစ်-၁၉ ဓာတ်ခွဲနမူနာစစ်ဆေးချက် ထောက်ခံချက်စာရွက် အတုဖြစ်နေတာကြောင့် ဥပဒေနဲ့ အညီအရေးယူဆောင်ရွက်သွားမယ်လို့ ရဲတပ်ဖွဲ့က ထုတ်ပြန်ထားပါတယ်။ ကိုဗစ်-၁၉ ကပ်ရောဂါ အလေးထားကာကွယ်ထိန်းချုပ်နေစဉ်ကာလအတွင်း အခုလို အတုအပပြုလုပ်ပြီး မသမာသောနည်းလမ်းနဲ့ ဆောင်ရွက်မှုအားလုံးကို သက်ဆိုင်ရာဌာနတွေနဲ့ ပူးပေါင်းကာ ထိရောက်စွာဖော်ထုတ်အရေးယူသွားမယ်လို့ ဆိုပါတယ်။
2 months Ago
More News
Up