နုတ်ထွက်

November 27, 2022

ထိုင်ဝမ်သမ္မတချိုင်အင်းဝမ် DPP ပါတီခေါင်းဆောင် ရာထူးမှ နုတ်ထွက်

ထိုင်ဝမ်သမ္မတ ချိုင်အင်းဝမ်ဟာ လက်ရှိအာဏာရ ဒီမိုကရက်တစ်တိုးတက်ရေးပါတီ (DPP) ရဲ့ အကြီးအကဲ ဥက္ကဋ္ဌ အဖြစ်ကနေ နိုဝင်ဘာ ၂၆ ရက်မှာ ရာထူးက နုတ်ထွက်ခဲ့ပါတယ်။

တရုတ်က ထိုင်ဝမ်ကို စစ်ဆင်နွှဲမယ့် အရိပ်နိမိတ် တိုးလာတာကို အာခံတဲ့နည်းနဲ့ သူ့ပါတီ လူထုထောက်ခံမှုရဖို့ ကြိုးစားတဲ့ ဗျူဟာကမအောင်မြင်ခဲ့တဲ့နောက်မှာ ခုလို ပါတီခေါင်းဆောင် ရာထူးက နုတ်ထွက်တာလို့ ရိုက်တာ သတင်းဌာနက သုံးသပ်ပါတယ်။

ထိုင်ဝမ်ကို သူ့ပိုင်နက်အဖြစ် သတ်မှတ်တဲ့ တရုတ်နဲ့ စစ်ရေးတင်းမာမှုတွေကြားမှာ ထိုင်ဝမ်ရဲ့ ဒီမိုကရေစီကို ကမ္ဘာက စောင့်ကြည့်နေတယ်လို့ ချိုင်က ပြောဆိုခဲ့သလို  ထိုင်ဝမ်ရဲ့ ဒေသန္တရ မဲတွေထက် ပိုအဓိပ္ပာယ်ရှိတဲ့ ရွေးကောက်ပွဲဖြစ်တယ်လို့လည်း ပြောဆိုခဲ့ပါတယ်။

အဓိက အတိုက်အခံပါတီ KMT က မြို့တော်တိုင်ပေအပါအဝင် မြို့တော်ဝန် ၂၁ နေရာနဲ့ ခရိုင်အကြီးအကဲနေရာ ၁၃ နေရာအတွက် ဦးဆောင် အနိုင်ရထားတယ်လို့ အခိုင်အမာ ပြောပါတယ်။ 

ဗဟိုအစိုးရဟာ အလွန်လုံ့လဝီရိယရှိပေမယ့် ဒီလိုမျိုး (ရွေးကောက်ပွဲ) ရလဒ်ကို ရင်ဆိုင်ရတဲ့ အတွက် လေးလေးနက်နက် စဉ်းစားစရာတွေ အများကြီးရှိပါတယ်။” လို့ ပါတီဌာနချုပ်မှာ ပါတီခေါင်းဆောင်အဖြစ်ကနေ နုတ်ထွက်ခဲ့တဲ့ ချိုင်က သတင်းထောက်တွေကို ပြောပါတယ်။

DPP ရဲ့ အကြီးတန်း အဖွဲ့ဝင်လည်းဖြစ်တဲ့ ဝန်ကြီးချုပ် စူးဆန်းချန်းကတော့ ရာထူးကနေ နုတ်ထွက်မယ့် ကမ်းလှမ်းချက်ကို ပယ်ချခဲ့တယ်လို့ ချိုင်ကပြောပါတယ်။

ချိုင်ရဲ့ မူဝါဒတွေကို မှန်မှန်ကန်ကန် အကောင်အထည် ဖော်နိုင်စေဖို့ စူးအနေနဲ့ ရာထူးမှာ ဆက်ရှိနေဖို့ တောင်းဆိုထားတယ်လို့လည်း ချိုင်က ပြောပါတယ်။

1 day Ago

November 2, 2022

ပူတာအို နမ်ဟော့အကျဥ်းထောင်တွင် နုတ်ထွက်သည့်ဝန်ထမ်း ၃၀ ခန့်ရှိလာ

ကချင်ပြည်နယ်၊ ပူတာအိုခရိုင် နမ်ဟော့အကျဥ်းထောင်မှာ စစ်ကောင်စီက အာဏာသိမ်းပြီးချိန်ကနေ ဒီနေ့အထိ ဒေသခံ အကျဥ်းဦးစီးဌာနဝန်ထမ်းတွေ နုတ်ထွက်တာ အယောက် ၃၀ လောက် ရှိပြီလို့ နုတ်ထွက်သူဝန်ထမ်းတယောက်က ပြောပါတယ်။

“နုတ်ထွက်သူ ၂၀ ကျော် ၃၀ ဦးခန့်ရှိပြီ။ ပူတာအိုအကျဥ်းဦးစီးဌာန ဝန်ထမ်းတွေ နုတ်ထွက်နေကြတာက အပြင်ထွက်ခွင့်မပေးတာ နှစ်ချီကြာပြီဖြစ်လို့ပါ။ အပြင်တခါထွက်ဖို့က ဝန်ထမ်းအချင်းချင်းတောင် အဆင့်ဆင့်သွားရတယ်။ သူတို့လက်မှတ်ရမှ အပြင်ထွက်ခွင့်ရတာ။ သတင်းအမှောင်ချတဲ့ သဘောလို့မြင်တယ်။ အပြင်မှာ ဘာဖြစ်နေလဲ မသိရဘူး။ နုတ်ထွက်သူတချို့က CDM လုပ်ကြတယ်။ တချို့က ကျောင်းတက်မယ်၊ စတဲ့အကြောင်းပြချက်နဲ့ပါ။”

ပူတာအို နမ်ဟော့အကျဥ်းထောင်မှာ နုတ်ထွက်သူများလို့ ကျန်ရှိတဲ့ ဝန်ထမ်းတွေက နေ့မနား ညမနား ဂျူတီကျနေပြီး တာဝန်ထမ်းရတယ်လို့ နုတ်ထွက်ခဲ့တဲ့ အကျဥ်းဦးစီးဌာနဝန်ထမ်းနဲ့ နီးစပ်သူတဦးက ပြောပါတယ်။

“ပူတာအိုအကျဥ်းထောင်မှာတော့ ဒေသခံလူငယ်တွေ အများကြီး ဝန်ထမ်းလုပ်ကြတယ်။ စစ်ကောင်စီ အာဏာသိမ်းကတည်းက တချို့က နုတ်ထွက်ပြီး ကျန်တဲ့ ဒေသခံဝန်ထမ်းတွေလည်း နုတ်ထွက်ကုန်ကြတာပါ။ ခုတော့ အကြီးပိုင်းနဲ့ ဝန်ထမ်းတချို့လောက်ပဲ ကျန်တော့တယ်။ ကျန်တဲ့သူတွေ နေ့ညမနား တာဝန်ထမ်းဆောင်ရတယ်လို့ ကြားတယ်။”

ပူတာအို နမ်ဟော့အကျဥ်းထောင်မှာ ဒုတပ်ကြပ်ရာထူးကစပြီး ထောင်ပိုင်အထိ အောက်ပြည်ကလာတဲ့သူတွေပဲ ဖြစ်နေပြီး ပူတာအို‌ဒေသခံတွေက တပ်သားအဆင့်သာ ဖြစ်တယ်လို့ သိရပါတယ်။

ပူတာအို နမ်ဟော့အကျဥ်းထောင်မှာ စစ်ကောင်စီ အာဏာသိမ်းမှုကို ဆန့်ကျင်တဲ့ ဒေသခံ ရဝမ်လူငယ် ၈ ယောက် အခုချိန်ထိ မတရား ထောင်ချခံနေရတာ ဖြစ်ပါတယ်။

4 weeks Ago
More News
Up