နိုင်ငံ့ဝန်ထမ်း

April 9, 2021

စစ်အုပ်စုက ခန့်အပ်သူများအား နိုင်ငံ့ဝန်ထမ်းအဖြစ် အသိအမှတ်မပြုကြောင်း CRPH ထုတ်ပြန်

အာဏာသိမ်းစစ်အုပ်စုက ခန့်အပ်တဲ့ ဘယ်သူ့ကိုမဆို နိုင်ငံ့ဝန်ထမ်းအဖြစ် အသိအမှတ်ပြုမှာ မဟုတ်ဘူးလို့ ပြည်ထောင်စုလွှတ်တော်ကိုယ်စားပြုကော်မတီ(CRPH)က ထုတ်ပြန်ထားပါတယ်။

       ဒါဟာ ဒုတိယသမ္မတ မန်းဝင်းခိုင်သန်း ဦးဆောင်ကျင်းပတဲ့ ပြည်ထောင်စုအစိုးရအဖွဲ့ အစည်းအဝေး အမှတ်စဉ် ၃/၂၀၂၁ ဆုံးဖြတ်ချက်အရ ဧပြီ ၉ ရက် ရက်စွဲနဲ့ ထုတ်ပြန်လိုက်တာ ဖြစ်ပါ တယ်။

အခုအချိန်ဟာ တရားမဝင်အာဏာသိမ်းစစ်ကောင်စီမှ နိုင်ငံတော်အာဏာကို လက် နက်အားကိုးနဲ့ အကြမ်းဖက်လုယူထားတဲ့ အချိန်ဖြစ်တဲ့အတွက် နိုင်ငံ့ဝန်ထမ်းကောင်း အရာထမ်း၊ အမှုထမ်းတွေဟာ ပြည်သူ့အာဏာဖီဆန်မှုလုပ်ငန်းစဉ်(CDM)နဲ့ ရဲဝံ့ စွန့်စား စွာ အာခံတော်လှန်နေတဲ့ အခါသမယဖြစ်တယ်လို့ ဆိုပါတယ်။

နိုင်ငံ့ဝန်ထမ်းကောင်း အာဇာနည်တွေရဲ့ ထိရောက်အောင်မြင်တဲ့ ပြည်သူ့အာဏာ ဖီဆန်မှုလုပ်ငန်းစဉ်(CDM)ကြောင့် တရားမဝင်အာဏာသိမ်းစစ်ကောင်စီဟာ နိုင်ငံ့အုပ် ချုပ်ရေးယန္တရားကို ပုံမှန်လည်ပတ်နိုင်ခြင်းမရှိဘဲ အကျပ်အတည်းဆိုက် အထိနာနေတယ် လို့ ထုတ်ပြန်ချက်ထဲမှာ ဖော်ပြပါတယ်။

တရားမဝင်အာဏာသိမ်းစစ်ကောင်စီဟာ သူတို့အာဏာတည်မြဲရေးအတွက် CDM လှုပ်ရှားမှု ဆောင်ရွက်နေကြတဲ့ ဝန်ထမ်းတွေကို လုပ်ငန်းခွင် ပြန်လည်ဝင်ရောက် တာဝန်ထမ်းဆောင်စေဖို့ နည်းလမ်းမျိုးစုံနဲ့ ဖိအားပေး ခြိမ်းခြောက် အရေးယူနေပေမယ့်  ထိရောက်အောင်မြင်မှုမရှိတဲ့အတွက် ဝန်ထမ်းသစ်တွေ ရွေးချယ်လေ့ကျင့် ခန့်ထားနိုင်ဖို့ အလုပ်လျှောက်လွှာတွေခေါ်ယူကာ အပူတပြင်း ဆောင်ရွက်နေကြတာ ဖြစ်ပါတယ်။

CRPH အနေနဲ့ အာဏာသိမ်းစစ်ကောင်စီမှ တရားမဝင်အာဏာလုယူလိုက်တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်နေ့ကစပြီး နိုင်ငံ့ဝန်ထမ်းရွေးချယ်လေ့ကျင့်ခန့်ထားခြင်း ဆိုင်ရာလုပ်ငန်းစဉ်တွေ အားလုံးကို ခြွင်းချက်မရှိ ရပ်ဆိုင်းထားကြောင်းလည်း ထုတ်ပြန် ချက်နဲ့အတူ အသိပေးထားတာ ဖြစ်ပါတယ်။

ဒါကြောင့်မို့ CRPH အနေနဲ့ စစ်အုပ်စုဩဇာခံ ပြည်ထောင်စု ရာထူးဝန်အဖွဲ့နဲ့ သက် ဆိုင်ရာ ဝန်ကြီးဌာနအကြီးအကဲတွေက ရွေးချယ်ခန့်အပ်တဲ့ ဘယ်သူ့ကိုမှ နိုင်ငံ့ ဝန်ထမ်းအဖြစ် အသိအမှတ်မပြုတဲ့အပြင် အကြမ်းဖက်စစ်အုပ်စုရဲ့ အပေါင်းပါတွေအဖြစ် သတ်မှတ်အရေးယူ ဆောင်ရွက်သွားမယ်လို့လည်း ကြေညာထားတာ ဖြစ်ပါတယ်။

မြန်မာနိုင်ငံမှာ ဖေဖော်ဝါရီ ၁ ရက်နေ့  မနက်အစောပိုင်းက နိုင်ငံတော် သမ္မတ ဦးဝင်းမြင့်၊  နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အစိုးရခေါင်းဆောင် ပိုင်းတချို့ကို စစ်တပ်ကဖမ်းဆီးလိုက်ကာ နိုင်ငံတော်အာဏာသိမ်းယူလိုက်ပြီးနောက် တနေ့မှာပဲ ပြည်သူတွေဟာ ညစဉ်သံပုံးတီးဆန့်ကျင်တာတွေ၊ ဖယောင်းတိုင်မီးထွန်းဆု တောင်းပွဲတွေ၊ လူမဲ့သပိတ်၊ လမ်းမပေါ်က ကားဟွန်းတီးသပိတ်စတဲ့ နည်းလမ်းအမျိုးမျိုး အသုံးပြုကာ အကြမ်းမဖက်တဲ့နည်းတွေနဲ့ ဆန္ဒပြနေကြတာပါ။

တဆက်တည်းမှာပဲ စစ်တပ်ရဲ့ အာဏာသိမ်းလုပ်ရပ်ကို ကန့်ကွက်ရှုတ်ချတဲ့အနေ နဲ့ ဆေးလောကသားတွေက စတင်ကာ  အာဏာဖီဆန်ရေးလှုပ်ရှားမှု(Civil Disobedience Movement)ကို လုပ်ဆောင်နေကြတာ ဖြစ်ပြီး လက်ရှိမှာတော့ တခြား ကဏ္ဍအသီးသီးက ပြည်သူ့ဝန်ထမ်းတွေ၊ အနုပညာရှင်တွေ၊ ပြည်သူတွေကပါ ပူးပေါင်း ပါဝင်လှုပ်ရှားနေကြတာပါ။

နောက်ပိုင်းမှာတော့ နိုင်ငံတဝန်း စစ်အာဏာရှင်ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေခဲ့တာ ဖြစ်ပါတယ်။

1 month Ago

February 9, 2021

နိုင်ငံ့ဝန်ထမ်းများ နိုင်ငံရေးဆောင်ရွက်၍ မရဟု အာဏာသိမ်း စစ်ခေါင်းဆောင်ပြော

နိုင်ငံ့ဝန်ထမ်းတွေအနေနဲ့ နိုင်ငံတော်ကပေးတဲ့ လစာနဲ့ ခံစားခွင့် ရယူထားပြီး နိုင်ငံရေး ဆောင်ရွက်လို့ မရဘူးလို့ အာဏာသိမ်းစစ်အစိုးရ ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားလိုက်ပါတယ်။
အာဏာသိမ်းအစိုးရရဲ့ နိုင်ငံတော်စီမံအုပ်ချုပ်ရေးကောင်စီနဲ့ တိုင်းနဲ့ ပြည်နယ်အုပ်ချုပ်ရေးကောင်စီ၊ ကိုယ်ပိုင်အုပ်ချုပ်ခွင့်ရတိုင်း၊ သို့မဟုတ် ဒေသ စီမံအုပ်ချုပ်ရေးအဖွဲ့တွေနဲ့ ဒီကနေ့ နေပြည်တော်မှာ ညှိနှိုင်းအစည်းအစည်းအဝေးကျင်းပရာမှာ ပြောဆိုခဲ့တာပါ။
“နိုင်ငံ့ဝန်ထမ်းများအနေဖြင့် ပါတီနိုင်ငံရေးကင်းရှင်းရန် လိုအပ်ကြောင်း၊ နိုင်ငံတော်မှပေးသည့် လစာနှင့်ခံစားခွင့်များကို ရယူထားပြီး နိုင်ငံရေးဆောင်ရွက်၍ မရပါကြောင်း၊ မိမိတို့ နိုင်ငံထက် ဒီမိုကရေစီ ပိုမိုရင့်ကျက်သည့် နိုင်ငံများတွင်လည်း ဒီမိုကရေစီ နိုင်ငံရေးယဉ်ကျေးမှုအရ နိုင်ငံ့ဝန်ထမ်းများသည် နိုင်ငံရေးတွင် ပါဝင်ဆောင်ရွက်ခြင်းမရှိသည်ကို တွေ့ရှိရကြောင်း၊ မိမိတို့ နှစ်သက် သည့် ပါတီများကို လွတ်လပ်စွာမဲပေးနိုင်သော်လည်း လုပ်ငန်းတာဝန်ထမ်းဆောင် နေသည့် အချိန်တွင် နိုင်ငံရေးပါဝင်ဆောင်ရွက်၍ မရကြောင်း၊” ဗိုလ်ချုပ်မှူးကြီး မင်းအောင်လှိုင်က ပြောပါတယ်။
ဒါ့အပြင် နိုင်ငံ့ဝန်ထမ်းတွေ တာဝန်ထမ်းဆောင်မှုအပေါ် နည်းလမ်းအမျိုးမျိုးနဲ့ ခြိမ်းခြောက်လာမှုတွေကို ဖော်ထုတ်အရေးယူရမယ်လို့လည်း ပြောပါတယ်။
စစ်တပ်အာဏာသိမ်းတာကို ဆန့်ကျင်ကန့်ကွက်တဲ့အနေနဲ့ မြန်မာနိုင်ငံတဝန်းမှာ ပြည်သူလူထုတွေက ဆန္ဒပြပွဲတွေ နေရာအနှံ့ ပြည်လုံးကျွတ်ပြုလုပ်နေကြပြီး ကျန်းမာရေးဝန်ထမ်းတွေ၊ ဆရာဆရာမတွေနဲ့ ရှေ့နေတွေ၊ မီးရထားဝန်ထမ်းတွေ၊ အစိုးရဌာနဆိုင်ရာ ဝန်ထမ်းတွေလည်း အာဏာဖီဆန်ရေးလှုပ်ရှားမှာ ပူးပေါင်းပါဝင်နေကြပါတယ်။

Photo-DSINFO

3 months Ago
More News
Up