နိုင်ငံသားစိစစ်ရေးကတ်

A d v e r t i s e m e n t With Us

February 18, 2020

ရွှေဘိုခရိုင်တွင် နိုင်ငံသားစိစစ်ရေးကတ်များနှင့် အိမ်ထောင်စုစာရင်းများပေးအပ် 

စစ်ကိုင်းတိုင်းဒေသကြီး ရွှေဘိုခရိုင်မှာ နိုင်ငံသားစိစစ်ရေးကတ် ၄၀၀၀၀ ကျော်နဲ့ အိမ်ထောင်စုလူဦးရေစာရင်း ၁၀၀၀၀ ကျော်ကို ဒေသခံတွေအတွက် လုပ်ပေးခဲ့တယ်လို့ သိရပါတယ်။ ရွှေဘိုမြို့ရန်ကြီးအောင်ခန်းမမှာ လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာနကနေ (၂၀၁၉/၂၀) သစ္စာစီမံချက်နဲ့ ဖေဖော်ဝါရီ ၁၇ ရက် နေ့လည်ပိုင်းက နိုင်ငံသားစိစစ်‌ရေးကတ်နဲ့ အိမ်‌ထောင်စုလူဦး‌ရေစာရင်းတွေ ပေးအပ်ခဲ့တာ ဖြစ်ပါတယ်။ အခမ်းအနားကို စစ်ကိုင်းတိုင်း လူဝင်မှုကြီးကြပ်ရေးနဲ့ လူ့စွမ်းအားအရင်းအမြစ်ဝန်ကြီး ဦးမိုးကျော်သူ၊ တိုင်းဒေသကြီးလဝကညွှန်ကြားရေးမှူး ဦးယဉ်ထွေးတို့နဲ့ ဌာနဆိုင်ရာ တာဝန်ရှိသူတွေ၊ ဆရာဆရာမတွေ၊ ကျောင်းသားကျောင်းသူတွေ တက်ရောက်ခဲ့ကြပါတယ်။ တိုင်း‌ဒေသကြီး လဝက ညွှန်ကြားရေးမှူးဦးယဉ်ထွေးက “ကျောင်းသားကျောင်းသူများနဲ့ ပြည်သူများအနေနဲ့ နိုင်ငံသားစိစစ်ရေးကတ်ကိုအလေးထားတန်ဖိုးထားကြဖို့ နိုင်ငံသားတဦးအနေနဲ့ မရှိမဖြစ်လိုအပ်တဲ့ အရာဖြစ်ပြီး ဒါကိုတန်ဖိုးထားမှုနည်းနေတယ်” လို့ ပြောခဲ့ပါတယ်။ လဝက အနေနဲ့အရင်ကရှိခဲ့တဲ့ အဂတိအရိပ်မည်းတွေကို ကုစားနေတာဖြစ်ပြီး ပြည်သူတွေနဲ့ ပူးပေါင်းပြီးပြုပြင်လာတဲ့အတွက် အခုအခါမှာ အတန်အသင့်ပြည်သူတွေရဲ့ ယုံကြည်မှုရခဲ့တယ်လို့ ဆိုလည်း ပြောပါတယ်။ ရွှေဘိုမြို့နယ် ကျေးရွာအုပ်ချုပ်ရေးမှူးတဦးကတော့ “ကိုယ့်ဘက်က အထောက်အထား ခိုင်လုံတယ်ဆိုရင် လဝကက အခမဲ့လုပ်ပေးပါတယ်။ အဆင်ပြေအောင်လည်း ပွင့်လင်းမြင်သာ ဆွေးနွေးလို့လည်း ရတယ်”လို့ ပြောပါတယ်။ ရွှေဘိုခရိုင်အတွင်းမှာ အခြေခံပညာကျောင်းပေါင်း ၁၀၉ ကျောင်းနဲ့ကျေးရွာအုပ်စု ၁၀၂ အုပ်စုကို ၂၀၁၉ မတ်လကနေ ၂၀၂၀ ဇန်နဝါရီလအထိ နိုင်ငံသားအရည်အချင်းပြည့်မှီသူ အားလုံးကို နိုင်ငံသားစိစစ်ရေး ကတ် ၄၃၇၃၄ ကတ်နဲ့ ရွှေဘို၊ ဝက်လက်၊ ခင်ဦး၊ ရေဦး၊ ဒီပဲယင်း၊ တန့်ဆည် မြို့များမှ အိမ်ထောင်စုလူဦးရေစာရင်း ၁၀၈၀၉ ခုပေးအပ်ခဲ့တာဖြစ်ပါတယ်။ စစ်ကိုင်းတိုင်းမှာ  ၅ နှစ်တာကာလအတွင်း နိုင်ငံသားစိစစ်ရေးကတ် ၁၄ သိန်းခွဲခန့် ပေးအပ်ပြီးပြီလို့ သိရပါတယ်။ သတင်း- အောင်စံလင်း
1 year Ago

February 14, 2020

မုံရွာခရိုင်အတွင်း ကျောင်းသား ၃၀၀၀၀ ကျော်ကို နိုင်ငံသားစိစစ်ရေးကတ်များ ပေးအပ်

စစ်ကိုင်းတိုင်းဒေသကြီး မုံရွာမြို့နယ်မှာ လူဝင်မှုကြီးကြပ်ရေးနှင့် ပြည်သူ့အင်အားဆိုင်ရာ ဦးစီးဌာနကနေ သစ္စာစီမံချက်နဲ့ စာသင်ကျောင်းပေါင်း ၉၀ ကျော်က ကျောင်းသားကျောင်းသူ ၃၁၀၀၀ ကျော်ကို ဖေဖော်ဝါရီ ၁၄ ရက်မနက်ပိုင်းက နိုင်ငံသားစိစစ်‌ရေးကတ်တွေ ပေးအပ်ခဲ့ပါတယ်။  ဒီအခမ်းအနားကို စစ်ကိုင်းတိုင်းအစိုးရအဖွဲ့ဝင် လူ့စွမ်းအားအရင်းအမြစ်ဝန်ကြီး ဦးမိုးကျော်သူ၊ ဌာနဆိုင်ရာတာဝန်ရှိသူတွေ၊ ဆရာဆရာမတွေ၊ ကျောင်းသားကျောင်းသူတွေ တက်ရောက်ခဲ့ကြ ပါတယ်။ လူ့စွမ်းအား အရင်းအမြစ်ဝန်ကြီး ဦးမိုးကျော်သူက  "လူဝင်မှုကြီးကြပ်ရေးရုံးတွေအနေနဲ့ စစ်ကိုင်းတိုင်းအတွင်း အရင်အစိုးရ အဆက်ဆက်က ကျင်လည်ကျက်စားခဲ့တဲ့ အဂတိတရားတွေကို အခုအစိုးရလက်ထက်မှာ ပြောင်းလဲခြင်းနဲ့အတူ စနစ်သစ်၊ ဆောင်ရွက်မှုအသစ်၊ ခံယူချက်အသစ်တွေနဲ့ အဂတိနည်းနိုင်သမျှနည်းအောင် လုပ်ဆောင် ပေးထားတာကိုလည်း မျက်ဝါးထင်ထင်တွေ့မြင်နေရပြီမို့ ဒီကောင်းမွန်တဲ့ စနစ်သစ်တွေ အုတ်မြစ်ချ ခိုင်မြဲအောင် ဝန်ထမ်းပြည်သူပူးပေါင်းပြီး ထိန်းသိမ်းသွားကြဖို့ လိုပါတယ်" လို့ ပြောပါတယ်။ လဝက အနေနဲ့ နိုင်ငံသားအရည်အချင်းပြည့်မီသူတိုင်း နိုင်ငံသားစိစစ်ကေးကတ်ပြား ရရှိရေးကို စီမံချက်တွေရေးဆွဲကာ မြို့နယ်အလိုက် ရပ်ကွက်၊ ကျေးရွာတွေထိ သွားရောက်ပြီး လုပ်ဆောင်နေတာဖြစ်ပါတယ်။  ဒီနေ့ပေးအပ်ရာမှာတော့ မုံရွာခရိုင်အတွင်းက စာ‌သင်ကျောင်းပေါင်း ၉၁ ကျောင်းက ‌အသက် ၁၀ နှစ်ပြည့်ပြီးတဲ့ ကျောင်းသားကျောင်းသူ ၃၁၈၅၃ ယောက်ကို ထုတ်ပေးခဲ့တာပါ။ ဒါ့အပြင် မုံရွာ၊ ဘုတလင်၊ ချောင်းဦး၊ အရာတော်မြို့နယ်တွေက အိမ်ထောင်စု ၁၁၂၆၆ စုကိုလည်း အိမ်ထောင်စု လူဦးရေစာရင်း ထုတ်ပေးခဲ့ပါသေးတယ်။  စစ်ကိုင်းတိုင်း လဝကအနေနဲ့ ၂၀၁၈ ခုနှစ်အတွင်း လူဦးရေ ၂၅၈၄၇၆ ဦးကို နိုင်ငံသား စိစစ်ရေးကတ်နဲ့ အိမ်ထောင်စု ၅၉၄၄၉ စုကို လူဦးရေစာရင်းတွေ ပေးအပ်ခဲ့ပါတယ်။ ၂၀၁၅-၁၆ ကနေ ဒီနေ့အထိ ၅ နှစ်တာကာလအတွင်း လူဦးရေ ၁၄၄၀၁၁၃ ကို နိုင်ငံသားစိစစ်ရေးကတ် ပေးအပ်ခဲ့တယ်လို့ သိရပါတယ်။  ဒါ့အပြင် လဝကအနေနဲ့ လာမယ့်ရွေးကောက်ပွဲမှာလည်း မဲပေးခွင့်ရှိသူတွေ မဲပေးခွင့် မဆုံးရှုံးရအောင် ဆက်စပ်ဌာနဆိုင်ရာတွေနဲ့ ပူးပေါင်းလုပ်ဆောင်သွားမယ်လို့ တိုင်းလဝက ဦးစီးမှူး ဦးယဉ်ထွေးက ပြောဆိုခဲ့ပါတယ်။
1 year Ago
Up