နိုင်ငံတဝန်း

August 13, 2022

၇ လအတွင်း နိုင်ငံတဝန်း ယာဥ်တိုက်မှု ၃၅၃၃ မှု ဖြစ်ပွား၊ သေဆုံးသူ ၁၇၃၀ ရှိ

ပြည်နယ်နဲ့တိုင်းဒေသကြီးတွေမှာ ၂၀၂၂ ခုနှစ် ဇန်နဝါရီလကနေ ဇူလိုင်လအတွင်း ယာဥ်တိုက်မှု ပေါင်း ၃၅၃၃ မှုဖြစ်ပွားခဲ့ပြီး လူအယောက် ၁၇၃၀ သေဆုံးကာ ၄၈၀၁ ဦး ဒဏ်ရာရခဲ့တယ်လို့ မြန်မာနိုင်ငံ ယာဥ်ထိန်းရဲတပ်ဖွဲ့က သိရပါတယ်။

ယာဥ်တိုက်မှု ၃၅၃၃ မှုအနက် ရန်ကုန်တိုင်းက ယာဥ်တိုက်မှု အများဆုံးဖြစ်ကာ ၅၇၇ မှု၊ ဧရာဝတီတိုင်းက ၄၇၉ မှုနဲ့ ဒုတိယအများဆုံးဖြစ်ပြီး ချင်းနဲ့ ကယားပြည်နယ်မှာတော့ ယာဥ်တိုက်မှုနည်းပါးတယ်လို့ ယာဥ်ထိန်းရဲတပ်ဖွဲ့ တာဝန်ရှိသူတဦးက ပြောပါတယ်။

"အရင်နှစ်ထက်စာရင် ဒီနှစ်က နည်းတယ်။ အမှုကတော့ ၃၄၀ လောက် လျော့သွားတယ်။ ဒဏ်ရာရတာ သေတာတွေတော့ လျော့သွားတယ်။"

အရင် ၂၀၂၁ ခုနှစ် ဇန်နဝါရီလကနေ သြဂုတ်လအတွင်း နေပြည်တော်အပါအဝင် ပြည်နယ်နဲ့တိုင်းအသီးသီးမှာ ယာဥ်တိုက်မှုပေါင်း ၄၁၅၈ မှု၊ သေဆုံးသူ ၂၀၇၅ ဦးနဲ့ ဒဏ်ရာရရှိသူ ၅၄၆၀ ဦးရှိတယ်လို့ ယာဥ်ထိန်းရဲတပ်ဖွဲ့စာရင်းအရ သိရပါတယ်။

၂၀၂၁ ခုနှစ် ၇ လတာအတွင်း ယာဥ်တိုက်မှုမှာတော့ ရန်ကုန်တိုင်းမှာ ၅၅၇ မှုဖြစ်ခဲ့ပြီး ပဲခူးတိုင်းက  ၅၃၂ မှုနဲ့ ဒုတိယအများဆုံးဖြစ်တယ်လို့ တာဝန်ရှိသူတဦးက ပြောပါတယ်။

4 months Ago

August 7, 2022

နိုင်ငံတဝန်း နေရပ်စွန့်ခွာထွက်ပြေးရသူ ၁ ဒသမ ၂ သန်းကျော်ရှိလာ၊ ဇူလိုင်လအတွင်း အများဆုံး စံချိန်တင်

မြန်မာနိုင်ငံတဝန်းမှာ အမျိုးသမီးနဲ့ ကလေးငယ်တွေ အပါအဝင် နေရပ်စွန့်ခွာ ထွက်ပြေးတိမ်းရှောင်ရသူ ဦးရေဟာ ၁ ဒသမ ၂ သန်းကျော် ရှိလာခဲ့ပြီဖြစ်ကာ ပြီးခဲ့တဲ့ ဇူလိုင်လအတွင်းမှာတော့ ပြည်တွင်းနေရပ် စွန့်ခွာသူဦးရေ အများဆုံးစံချိန်တင်ခဲ့တယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ပါတယ်။

အဲဒီထဲမှာတော့ ပြီးခဲ့တဲ့ ၂၀၂၁ ခုနှစ် အာဏာသိမ်းယူမှုအပြီး ဖြစ်ပေါ်လာတဲ့ ပဋိပက္ခနဲ့ မလုံခြုံမှုတွေကြောင့် ပြည်တွင်းနေရပ်စွန့်ခွာသူ ၈၆၆,၀၀၀ ယောက်နဲ့ အဲဒီမတိုင်မီ ပဋိပက္ခတွေကြောင့် ပြည်တွင်းနေရပ်စွန့်ခွာသူ ၃၄၆,၀၀၀ ယောက်ပါဝင်တယ်လို့ ဆိုပါတယ်။

ဒါ့အပြင် အာဏာသိမ်းယူပြီးကတည်းက လူ ၄၁,၉၀၀ ဦးဟာ အိမ်နီးချင်းနိုင်ငံတွေကို ထွက်ပြေးတိမ်းရှောင်နေကြရတယ်လို့ အစီရင်ခံစာမှာ ဖော်ပြပါတယ်။  

အခုရက်ပိုင်းတွေအတွင်းမှာပဲ အကြမ်းဖက်စစ်ကောင်စီတပ်တွေနဲ့ ပြည်သူ့ကာကွယ်ရေးတပ်ဖွဲ့တွေ၊ တိုင်းရင်းသားလက်နက်ကိုင်အဖွဲ့အစည်းတွေကြားမှာ တိုက်ပွဲတွေ နိုင်ငံတဝန်းမှာ ဆက်လက်ဖြစ်ပွားခဲ့တဲ့အတွက် အရပ်သားကာကွယ်စောင့်ရှောက်ရေးနဲ့ လူသားချင်းစာနာမှုဆိုင်ရာ အခြေအနေတွေလည်း ပိုမိုဆိုးရွားလာနေတယ်လို့ ဆိုပါတယ်။ 

နိုင်ငံအနောက်မြောက်ဘက် စစ်ကိုင်းတိုင်းဒေသကြီးမှာ ပြီးခဲ့တဲ့ရက်သတ္တပတ်တွေအတွင်း ပြင်းထန်တဲ့တိုက်ပွဲတွေ မြင်တွေ့ခဲ့ရပြီး ဇူလိုင်လအတွင်း ပြည်တွင်းနေရပ်စွန့်ခွာသူဦးရေအများဆုံး စံချိန်တင်ခဲ့ကြောင်းနဲ့ အလားတူ နိုင်ငံအရှေ့တောင်ဘက် ပဲခူးတိုင်းဒေသကြီးအရှေ့ဘက်ခြမ်းမှာ ဇွန်လကုန်ကစပြီး တပ်မတော်နဲ့ ကရင်အမျိုးသားလွတ်မြောက်ရေးတပ်မတော်တို့ကြားမှာ တိုက်ပွဲတွေပြင်းထန်စွာ ဖြစ်ပွားခဲ့တာကြောင့် လူထောင်ပေါင်းများစွာ နေရပ်စွန့်ခွာထွက်ပြေးခဲ့ရတယ်လို့ ဆိုပါတယ်။

ဒါ့အပြင် အာဏာသိမ်းအကြမ်းဖက်စစ်ကောင်စီဟာ အစားအသောက်နဲ့ ဆေးဝါးပစ္စည်းများအပါအဝင် မရှိမဖြစ်လိုအပ်တဲ့ ကုန်ပစ္စည်းတွေ သယ်ဆောင်ခွင့်ကို ကန့်သတ်ထားတာကြောင့် နေရပ်စွန့်ခွာ ထွက်ပြေးရသူတွေအပါအဝင် နိုင်ငံအရှေ့တောင်ပိုင်း တနံတလျားက ထိခိုက်ခံစားရသူတွေဆီ လူသားချင်းစာနာမှုဆိုင်ရာအကူအညီတွေ သွားရောက်အကူအညီပေးဖို့ အခက်အခဲတွေ ရှိနေတယ်လို့ UNOCHA က ပြောပါတယ်။

ရခိုင်ပြည်နယ်မှာတော့ တပ်မတော်နဲ့ ရက္ခိုင့်တပ်တော်ကြားမှာ တင်းမာမှုတွေ မြင့်တက်နေတာကြောင့် ရခိုင်ပြည်နယ်မြောက်ပိုင်းမှာ နေရပ်စွန့်ခွာမှုအသစ်တွေဖြစ်ပေါ်နေပြီး ထိခိုက်ခံစားရသူတွေဆီကို အကူအညီတွေပေးဖို့ ကန့်သတ်ချက်တွေရှိနေတယ်လို့ ဆိုပါတယ်။

4 months Ago
More News
Up