နိုင်ငံခြားရေးဝန်ကြီးဌာန

October 10, 2021

NUG နှင့် CRPH ကို အသိအမှတ်ပြု ဆက်ဆံနေသည့် နိုင်ငံများကို စစ်ကောင်စီအကြမ်းဖက်အဖွဲ့က ကန့်ကွက်

အမျိုးသားညီညွတ်ရေးအစိုးရ NUG နဲ့ CRPH အဖွဲ့ကို အသိအမှတ်ပြု ဆက်ဆံနေတဲ့ နိုင်ငံခြားသံရုံးတွေ၊  ကုလသမဂ္ဂရုံးတွေနဲ့ သက်ဆိုင်ရာနိုင်ငံတွေက အာဏာပိုင်တွေကို   ပြင်းထန်စွာ ကန့်ကွက်တဲ့အကြာင်း စစ်ကောင်စီအကြမ်းအဖက်အဖွဲ့ရဲ့  နိုင်ငံခြားရေးဌာနက အောက်တိုဘာ ၉ ရက်မှာ ကြေညာ ပါတယ်။ 

ပြည်သူလူထုရဲ့အာဏာအပ်နှင်းချက်အရ တရားဝင်ဖွဲ့စည်းထားတဲ့ အမျိုးသားညီညွတ်ရေးအစိုးရ NUG နဲ့ CRPH  တို့ကို အသိအမှတ်ပြုထောက်ခံတဲ့အကြောင်း ဥရောပပါလီမန်၊ ပြင်သစ်လွှတ်တော်၊ ဂျပန်လွှတ်တော် တို့ကဆုံးဖြတ်ကြေညာထားသလို ကုလသမဂ္ဂမှာလည်း NUG အစိုးရ ကိုယ်စားလှယ် သံမတ်အကြီး ဦးကျော်မိုးထွန်းကိုကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်အဖြစ် ဆက်လက်အသိအမှတ်ပြုခံထားတာပါ။

ဒါအပြင်  အာဆီယံနိုင်ငံတချို့ရဲ့ နိုင်ငံခြားရေးဝန်ကြီးတွေကလည်း NUG အစိုးရနဲ့ ဆက်သွယ်ဆွေးနွေးဖို့အဆင်သင့်ရှိကြောင်းနဲ့ အခုလအတွင်းကျင်းပဖို့ရှိတဲ့ အာဆီယံထိပ်သီးညီလာခံမှာ မြန်မာအာဏာသိမ်းစစ်ခေါင်းဆောင်ကို  မဖိတ်ခေါ်ဖို့အထိ ပြောလာကြတဲ့ အချိန်မှာ စစ်ကောင်စီ ဘက်က ခုလိုထုတ်ပြန်လိုက်တာပါ။  

စစ်ကောင်စီနိုင်ငံခြားရေးရဲ့ ကြေညာချက်မှာတော့ ပြည်ပနိုင်ငံတွေရဲ့ အစိုးရ တာဝန်ရှိသူတွေ၊ လွှတ်တော်အမတ်တွေအနေနဲ့ NUG၊ CRPH နဲ့ ထိတွေ့ဆက်သွယ်တာ၊ အကြမ်းဖက်အုပ်စုတွေကို သက်ဆိုင်ရာနိုင်ငံတွေမှာ ရုံးခန်းဖွင့်လှစ်ခွင့်ပြုတာစတဲ့ လုပ်ရပ်တွေဟာ အကြမ်းဖက်ဝါဒကို အားပေးရာရောက်တဲ့အပြင်  မြန်မာနိုင်ငံမှာ စစ်မှန်ပြီးစည်းကမ်း ပြည့်ဝတဲ့ ပါတီစုံ ဒီမိုကရေစီစနစ် တည်ဆောက်ရေးအတွက်  ကြိုးပမ်းအားထုတ်မှုတွေကို ထိခိုက်စေကာ အချုပ်အခြာအာဏာပိုင်နိုင်ငံတစ်နိုင်ငံရဲ့ ပြည်တွင်းရေးကို ဝင်ရောက် စွက်ဖက် ရာရောက်တယ်လို့ ဖော်ပြထားပါတယ်။

NUG၊ CRPH ဆက်စပ်အဖွဲ့တွေကို ထိတွေ့ဆက်သွယ်ခြင်းမပြုဖို့၊ ထောက်ခံအားပေးခြင်းမပြုဖို့ ထပ်မံသတိပေးတဲ့ အကြောင်းနဲ့ နိုင်ငံတကာအသိုက်အဝန်း အနေနဲ့ အကြမ်းဖက်ဝါဒနဲ့ အစွန်းရောက်ဝါဒတို့ကို လျစ်လျူမရှူဖို့လည်း စစ်ကောင်စီက တိုက်တွန်းထားပါတယ်။

ကုလသမဂ္ဂနဲ့ အာဆီယံအပါအဝင် နိုင်ငံတကာအသိုက်အဝန်းက မြန်မာနိုင်ငံမှာ အကြမ်းဖက်မှု တွေရပ်တန့်ဖို့တောင်းဆိုနေပေမဲ့ စစ်ကောင်စီတပ်တွေကတော့ မြန်မာနိုင်ငံတဝန်း အထူးသဖြင့် ကချင်၊ ချင်း၊ ကယား ပြည်နယ်နဲ့  စစ်ကိုင်းတိုင်းနဲ့ မကွေးတိုင်းတွေမှာ ရွာတွေကို မီးရှို့ ၊ ပြည်သူတွေကို ဖမ်းဆီးသတ်ဖြတ် အကြမ်းဖက်မှုတွေ နေ့စဉ် ဆက်လက်ပြုလုပ်နေပါတယ်။ 

မြန်မာနိုင်ငံမှာ တရားမဝင် အာဏာသိမ်းကာလ ၈ လကျော်အကြာ  စစ်ကောင်စီတပ်တွေရဲ့ အကြမ်းဖက်  ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူပေါင်း ၁၁၆၁ ယောက်ထိ ရှိလာခဲ့ပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ထားတယ်။

PHOTO-MOFA

2 months Ago

February 22, 2021

နိုင်ငံခြားရေးဌာနက CDM ဝန်ထမ်းများကို ပုဒ်မ ၅၀၅(က) ဖြင့် ဖမ်းဆီးတရားစွဲ

CDM လှုပ်ရှားမှုမှာ ပါဝင်တဲ့ နိုင်ငံခြားရေးဝန်ကြီးဌာန ဝန်ထမ်း ၁၁ ယောက်ကို  အာဏာသိမ်းစစ်အစိုးရက ဖမ်းဆီးထားပြီး  ရာဇသတ်ကြီးပုဒ်မ ၅၀၅(က)နဲ့ နေပြည်တော် ဒက္ခဏသီရိမြို့နယ်တရားရုံးမှာ  တရားစွဲဆိုထားတယ်လို့ မိသားစုဝင်တွေက ပြောပါတယ်။

နိုင်ငံခြားဝန်ထမ်း ၁၁ ယောက်ဟာ  CDM မှာ ပါဝင်ဆောင်ရွက်လိုတာကြောင့် မူလဝန်ထမ်းအိမ်ရာကနေ တခြားတစ်နေရာကို ဖေဖော်ဝါရီ ၈ ရက်ကတည်းက ပြောင်းရွှေ့နေထိုင်ခဲ့ပြီး ဖေဖော်ဝါရီ ၁၈ ရက်နေ့မှာ အဖမ်းခံခဲ့ရတာပါ။

စတင်အဖမ်းခံရစဉ်မှာ ဘယ်နေရာမှာ ချုပ်နှောင်ထားမှန်းမသိခဲ့ရဘဲ ဖေဖော်ဝါရီ ၂၀ ရက်နေ့မှ ဒက္ခိဏသီရိမြို့နယ်ရဲစခန်းမှာ ချုပ်နှောင်ထားတာကို မိသားစုက သိရှိခဲ့ရတာ ဖြစ်ပါတယ်။

ဖမ်းဆီးခံထားရတဲ့ နိုင်ငံခြားရေးဝန်ကြီးဌာနက ဝန်ထမ်းရဲ့ မိသားစုဝင်တစ်ဦးက “ဒီအမှုသည် အဲဒီလောက် ၅၀၅(က) တပ်ရလောက်တဲ့ အမှုမဟုတ်ဘူး။ မိဘတွေဘက်ကလည်း သူတို့ ဒီလောက်လေး လုပ်တာလောက်ပဲလို့ ယူဆပြီးတော့ အဲဒီလောက် ကြီးလိမ့်မယ် မထင်ခဲ့ဘူးပေါ့နော်။ အခုဟာက အဲဒီလိုကြီး တပ်လိုက်တယ်ဆိုတော့ တော်တော်လည်း အံ့အားသင့်တယ်။ နားမလည်နိုင်လောက်အောင်လည်း ဖြစ်တယ်ပေါ့နော်” လို့ ပြောပါတယ်။

ရာဇသတ်ကြီးပုဒ်မ ၅၀၅(က)နဲ့ အမှုဖွင့်ဖမ်းဆီးခံထားရတဲ့ နိုင်ငံခြားရေးဝန်ထမ်း ၁၁ ယောက်ကတော့ အမျိုးသား ၃ ယောက်နဲ့  အမျိုးသမီး ၈ ယောက်တို့  ဖြစ်ပြီး မတ်လ ၅ ရက်နေ့မှာ ဒက္ခိဏသီရိမြို့နယ်တရားရုံးမှာ ရုံးထုတ်စစ်ဆေးမယ်လို့ ဆိုပါတယ်။ 

CDM မှာ ပါဝင်ဆောင်ရွက်တဲ့အတွက် ဖမ်းဆီးခံထားရတဲ့ အဆိုပါဝန်ထမ်းတွေအတွက် ရှေ့နေတွေဆီ အကူအညီလှမ်းတောင်းခဲ့ပေမယ့်လည်း အကူအညီတစ်စုံတရာ မရသေးဘူးလို့လည်း မိသားစုဝင်တွေက ပြောပါတယ်။

9 months Ago
More News
Up