နိုက်ဂျာနိုင်ငံတောင်ပိုင်း၊ နီယာမေမြို့တော်ရဲ့ အရှေ့ဘက် မိုင် ၃၇၀ ကျော်အကွာမှာ ရှိတဲ့ မာရာဒီမြို့က မူလတန်းကျောင်းမှာ နိုဝင်ဘာ ၈ ရက်က သက်ကယ်မိုး စာသင်ဆောင် မီးလောင်လို့ မူလတန်းကျောင်းသား ၂၅ ယောက်ထက်မနည်း သေဆုံးခဲ့တယ်လို့ ဝန်ကြီးများကောင်စီက ကြေညာပါတယ်။
ကလေးနောက်ထပ် ၁၄ ယောက် ဒဏ်ရာရခဲ့ပြီး ငါးယောက်က အသည်းအသန် အခြေအနေမှာ ရှိနေတယ်လို့ ကြေညာချက်က ပြောပါတယ်။
ကျောင်းမှာ စာသင်တာကို ရပ်ဆိုင်းထားပြီး မာရာဒီမြို့မှာ ၃ ရက်ကြာ ဝမ်းနည်းခြင်း ကာလ ကြေညာထားပါတယ်။
မာရာဒီပြည်နယ်အုပ်ချုပ်ရေးမှူးက ကျောင်းကို လာရောက် စစ်ဆေးပြီး ဒဏ်ရာရသူတွေကို ကြည့်ဖို့ ဒေသန္တရ ဆေးရုံဆီ သွားခဲ့ပါတယ်။ ဒါဟာ အနောက်အာဖရိကနိုင်ငံအတွင်း ဒီနှစ်ထဲမှာ စာသင်ခန်း မီးလောင်လို့ ကလေးသေဆုံးတဲ့ ဒုတိယ ဖြစ်ရပ်ပါ။
ဧပြီလက နီယာမေမြို့တော်မှာ စာသင်ခန်းမီးလောင်လို့ မူကြိုကလေး အယောက် ၂၀ သေဆုံးခဲ့ပါတယ်။
ဒီဖြစ်ရပ် နှစ်ခုအပြီးမှာ မူကြိုကျောင်း စာသင်ခန်းတွေကို မြက်ခြောက်အမိုးနဲ့ ဆောက်ထားတဲ့ တဲထဲမှာ စာမသင်ဖို့ ဝန်ကြီးများ ကောင်စီက တနင်္လာနေ့မှာ ပြောခဲ့ပါတယ်။
