နိပွန်ဖောင်ဒေးရှင်း

November 16, 2021

၉ နှစ်ကြာသည်အထိ အိမ်မပြန်နိုင်ကြောင်း မွတ်ဆလင်ဒုက္ခသည်များ ဂျပန်အထူးကိုယ်စားလှယ်ကို ပြော

မြန်မာနိုင်ငံအမျိုးသား ပြန်လည်သင့်မြတ်ရေးဆိုင်ရာ ဂျပန်အစိုးရရဲ့ အထူးကိုယ်စားလှယ် နိပွန်ဖောင်ဒေးရှင်းဥက္ကဋ္ဌ ဆာဆာကာဝါနဲ့ ဆုံစဉ်မှာ  ရခိုင်ပြည်နယ်က မွတ်ဆလင်ဒုက္ခသည်တွေအနေနဲ့  ၉ နှစ်ကြာတဲ့အထိ အိမ်မပြန်နိုင်သေးတဲ့ အခြေအနေကို တင်ပြခဲ့ကြတယ်လို့ စခန်းတာဝန်ခံက ပြောပါတယ်။

နီပွန်ဖောင်ဒေးရှင်းဥက္ကဋ္ဌ ဆာဆာကာဝါနဲ့အဖွဲ့ဟာ နိုဝင်ဘာ ၁၅ ရက်မနက်က ရခိုင်ပြည်နယ်ကို ရောက်လာပြီး စစ်တွေမြို့ရှိ  အလိုတော်ပြည့်စစ်ဘေးရှောင်စခန်းနဲ့ သက္ကယ်ပြင် မွတ်ဆလင်ဒုက္ခသည်စခန်းတွေကို သွားရောက်လေ့လာခဲ့တာ ဖြစ်ပါတယ်။

ဒါနဲ့ပတ်သက်ပြီး စခန်း တာဝန်ခံ သာလှရွှေက “ဂျပန်ကိုယ်စားလှယ်က ဒုက္ခသည်တွေကို မေးပါတယ်။ ဒီမှာနေတာ ဘယ်လောက်ကြာပြီလဲ။ မြို့ထဲကို သွားလို့ရလား။ ဒုက္ခသည်တွေက ဖြေကြပါတယ်။ ဒုက္ခသည်စခန်းကို ရောက်တာ ၉ နှစ်ရှိပြီ။ ယခုထိ စစ်တွေမြို့ပေါ်ကို သွားလို့မရဘူး၊ သွားရင် လုံခြုံရေးလိုပါတယ်။ အဲလို ဖြေကြားကြပါတယ်။ ဂျပန်ကိုယ်စားလှယ်က ပြန်ပြောခဲ့ပါတယ်။ ဂျပန်မှာ ဟီရိုရှီးမားကို အဏုမြူဗုံးနဲ့ တိုက်ခဲ့စဉ်က  သူဟာ ၆ နှစ်အရွယ်သာရှိသေးတယ်။ သူတို့ ညီအစ်ကို မောင်နှမတွေပဲ ကျန်ခဲ့တယ်တဲ့။ ဘဝတွေဟာ ဘယ်လောက်မှောင်နေပါစေ တစ်နေ့တရက်တော့ လင်းလာမှာပဲ၊ စိတ်မလျှော့ကြနဲ့ ကျန်းမာရေးကို ဂရုစိုက်နေပါလို့ပြောခဲ့ပါတယ် " လို့ ပြောပါတယ်။

စစ်တွေမြို့နယ်မှာ မွတ်ဆလင်ဒုက္ခသည်စခန်း ၁၄ ခုအထိရှိနေပြီး လူဦးရေ တစ်သိန်းလောက် နေထိုင်နေကြတာဖြစ်ပါတယ်။ 

အဆိုပါစခန်းမှာနေထိုင်တဲ့ ဒုက္ခသည်တွေဟာ  စစ်တွေမြို့တွင်းရှိ ရပ်ကွက်တွေက ဖြစ်ကြပြီး ၂၀၁၂ ခုနှစ် ဇူလိုင်လကဖြစ်ပွားခဲ့တဲ့ လူမျိုးရေးပဋိပက္ခတွေကြောင့်  အခုလို ဒုက္ခသည်အဖြစ် နေထိုင်နေကြရတာလည်း ဖြစ်ပါတယ်။

အထူးကိုယ်စားလှယ် မစ္စတာဆာဆာကာဝါကတော့ ဒုက္ခသည်စခန်းမှာ ရောက်နေသူတွေကို အစားအသောက်နဲ့ ပညာရေးဆိုင်ရာ အကူအညီပေးဖို့ ကိစ္စရပ်တွေ ပြောဆိုသွားတယ်လို့ သိရပါတယ်။ 

ဂျပန်ကိုယ်စားလှယ်အဖွဲ့ဟာ ရခိုင်နိုင်ငံရေးပါတီကြီးတခုဖြစ်တဲ့   ရခိုင်အမျိုးသားပါတီ ANP ပါတီတာဝန်ရှိသူတွေနဲ့လည်း  တွေ့ဆုံခဲ့ပါတယ်။

တွေ့ဆုံရာမှာ  ရခိုင်ပြည်နယ် ငြိမ်းချမ်းရေးကိစ္စ၊  စစ်ရှောင်တွေ နေရပ်မပြန်နိုင်သေးတဲ့ အခြေအနေတွေ၊ အလုပ်ကိုင် အခွင့်အလမ်း မရှိတာနဲ့ ကုန်စည်စီးဆင်းမှု အခက်အခဲတွေကို တင်ပြခဲ့တယ်လို့လည်း ANP ပါတီက ပြောပါတယ်။ 

ဦးသာထွန်းလှ ANP ပါတီ ဥက္ကဋ္ဌ ဦးသာထွန်းလှက “ ဒီအပစ်အခတ်ရပ်စဲထားတဲ့  အခြေအနေက ရခိုင်မှာ တနှစ်ပြည့်ပြီဆိုတော့  နောက်ထပ်လည်း ထိပ်တိုက်ရင်ဆိုင်တိုက်ပွဲတွေ မဖြစ်ဖို့  သူလည်း ကြိုးပမ်းအားထုတ်နေတယ်ဆိုတဲ့ အကြောင်းပြောတယ်။ နောက်တခုက ရခိုင်မှာ စစ်ဘေးရှောင် တိုက်ပွဲရှောင် ပြည်သူတွေအခက်အခဲကို နိပွန်ဖောင်ဒေးရှင်းအနေနဲ့ တစုံတရာ အကူအညီပေးဖို့  ရခိုင်ပြည်နယ်ကိုလာ လေ့လာတာလို့ ပြောပါတယ်။ အဓိက တိုက်ပွဲတွေ ထပ်မဖြစ်ဖို့  အတွက်လည်း ဝိုင်းဝန်းကူညီ ဆောင်ရွက်ကြဖို့ အဲဒါကို သူအဓိက ပြောသွားတာဖြစ်တယ်။” လို့ ပြောပါတယ်။

မစ္စတာဆာဆာကာဝါဟာ  ရခိုင်သို့ ဒုတိယအကြိမ်နေ့ချင်းပြန်ခရီးရောက်လာခြင်းဖြစ်ပြီး ညနေပိုင်းစစ်တွေက မထွက်ခွာမီ စစ်တွေရှိ မီဒီယာတွေနဲ့ သတင်းစာရှင်းလင်းပွဲပြုလုပ်ခဲ့ပါတယ်။

မစ္စတာဆာဆာကာဝါဟာ ရခိုင်ခရီးစဉ်မသွားခင် နေပြည်တော်မှာ အာဏာသိမ်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့လည်း တွေ့ဆုံဆွေးနွေးခဲ့ပါတယ်။

2 weeks Ago

November 15, 2021

နိပွန်ဖောင်ဒေးရှင်းဥက္ကဋ္ဌ ရခိုင်ပြည်နယ်သို့ ဒုတိယအကြိမ်သွားရောက်၊ ဒုက္ခသည်များနှင့် တွေ့ဆုံ

ရခိုင်ပြည်နယ်မှာ မြန်မာစစ်တပ်နဲ့ ရက္ခိုင့်တပ်တော် (အေအေ) တို့အကြား တိုက်ပွဲတွေရပ်တန့်ရေး အဓိကကြားဝင်ညှိနှိုင်းပေးခဲ့တဲ့ နိပွန်ဖောင်ဒေးရှင်းဥက္ကဋ္ဌ ယိုဟီဆာဆာကာဝါနဲ့ အဖွဲ့ဟာ နိုဝင်ဘာလ ၁၅ ရက် ဒီကနေ့  ရခိုင်ပြည်နယ်ကို  ဒုတိယအကြိမ်အဖြစ် ရောက်ရှိလာပါတယ်။

မြန်မာနိုင်ငံ အမျိုးသား ပြန်လည်သင့်မြတ်ရေးဆိုင်ရာ ဂျပန်အစိုးရရဲ့ အထူးကိုယ်စားလှယ်လည်း ဖြစ်တဲ့ နိပွန်ဖောင်ဒေးရှင်းဥက္ကဋ္ဌ ယိုဟီဆာဆာကာဝါဟာ ဒီနေ့ မနက် စစ်တွေမြို့သို့ ရောက်ရှိလာပြီး ရခိုင်ပြည်နယ်ကောင်စီရုံးမှာ ကောင်စီ တာဝန်ရှိသူတွေနဲ့ဆုံခဲ့သလို  စစ်ကောင်စီဧည့်ဂေဟာမှာ  သတင်းမီဒီယာတွေနဲ့  ၁ဝ မိနစ်လောက် တွေ့ဆုံခဲ့ပါသေးတယ်။

ဒီလို တွေ့ဆုံစဥ် ရခိုင်ပြည်နယ်ငြိမ်းချမ်းရေးအတွက် တာဝန်ရှိသူတွေနဲ့ ဆွေးနွေးသွားမှာဖြစ်ကြောင်း  ရခိုင်ပြည်နယ်ရှိ နိုင်ငံရေးပါတီ ၄ ခုရဲ့ ထိပ်ပိုင်းခေါင်းဆောင်တွေနဲ့ပါ တွေ့ဆုံသွားမှာဖြစ်ကြောင်း မြန်မာနိုင်ငံအတွက်  ကိုဗစ်-၁၉ ကာကွယ်ဆေး ဒေါ်လာ ၃ သန်းဖိုး လှူဒါန်းသွားမှာဖြစ်ကြောင်း  မစ္စတာဆာဆာကာဝါက သတင်းထောက်တွေကို  ပြောပါတယ်။

ဒီနောက် မွတ်ဆလင်ဒုက္ခသည်စခန်းတစ်ခုဖြစ်တဲ့ သက်ကယ်ဒုက္ခသည်စခန်းနဲ့ ရခိုင်ဒုက္ခသည်စခန်းဖြစ်တဲ့ အလိုတော်ပြည့် ဒုက္ခသည်စခန်းတွေကို သွားရောက်ခဲ့ပြီး ဒုက္ခသည်တွေနဲ့ တွေ့ဆုံခဲ့ပါတယ်။

ဂျပန်အစိုးရရဲ့ အထူးကိုယ်စားလှယ် မစ္စတာ ဆာဆာကာဝါဟာ နိုဝင်ဘာလ ၁၂ ရက်နေ့ကတည်းက  မြန်မာနိုင်ငံကိုရောက်ရှိနေတာဖြစ်ပြီး နိုဝင်ဘာလ ၁၃ ရက်နေ့က  နေပြည်တော်မှာ အာဏာသိမ်း စစ်ခေါင်းဆောင်  ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့ပါတယ်။

တွေ့ဆုံရာမှာ နှစ်နိုင်ငံချစ်ကြည်ရင်းနှီးမှုတိုးမြှင့်ရေးဆိုင်ရာ ကိစ္စရပ်တွေ၊  မြန်မာနိုင်ငံရဲ့ နိုင်ငံရေးဖြစ်ပေါ် ပြောင်းလဲမှု အခြေအနေ၊ ပြည်တွင်းငြိမ်းချမ်းရေး ရရှိရေးအတွက် ငြိမ်းချမ်းရေး လုပ်ငန်းစဉ်တွေ အကောင်အထည်ဖော် ဆောင်ရွက်နေမှုအခြေအနေနဲ့ ဂျပန်နိုင်ငံက ကူညီဆောင်ရွက်ပေးနေတဲ့ အခြေအနေတွေကို ဆွေးနွေးခဲ့ကြတယ်လို့ စစ်ကောင်စီ ပြန်ကြားရေးက သတင်းထုတ်ပါတယ်။

နိုဝင်ဘာ ၁၄ ရက်မှာတော့ စစ်ကောင်စီ ကျန်းမာရေးဝန်ကြီး ဒေါက်တာသက်ခိုင်ဝင်းနဲ့လည်း တွေ့ဆုံခဲ့ပြီး မြန်မာနိုင်ငံအတွက် ကိုဗစ်-၁၉ ရောဂါနဲ့ ပတ်သက်လို့ လူသားချင်း စာနာမှုအကူအညီ ပေးအပ်မယ့်ကိစ္စ၊ ကိုဗစ်-၁၉ ရောဂါကာ ကွယ်၊ ထိန်းချုပ်၊ ကုသရေးဆိုင်ရာ ဆေးနဲ့ ဆေးပစ္စည်းတွေ၊ ဆေးရုံ၊ ဆေးခန်းတွေ ဆောက်လုပ်လှူဒါန်းမယ့် ကိစ္စတွေ ဆွေးနွေးခဲ့ပါတယ်။

ဂျပန် အစိုးရရဲ့ အထူးကိုယ်စားလှယ် နိပွန်ဖောင်ဒေးရှင်းဥက္ကဋ္ဌ ဆာဆာကာဝါနဲ့အတူ  နိပွန်ဖောင်ဒေးရှင်း အမှုဆောင်အရာရှိချုပ် ယူဂျီမိုရီနဲ့ အဖွဲ့ဝင်တွေလည်း လိုက်ပါလာတာဖြစ်ပါတယ်။

မစ္စတာဆာဆာကာဝါဟာ  ရခိုင်ပြည်နယ်ကို ဒုတိယအကြိမ် နေ့ချင်းပြန်ခရီးရောက်လာခြင်းဖြစ်ပြီ ဒီနေ့ညနေ စစ်တွေမှ မထွက်ခွာမီ စစ်တွေရှိ မီဒီယာတွေနဲ့  သတင်းစာရှင်းလင်းပွဲ ပြုလုပ်ဖို့ အစီအစဉ် ရှိပါတယ်။

နိပွန်ဖောင်ဒေးရှင်းဥက္ကဋ္ဌ ဆာဆာကာဝါဟာ ၂၀၂၀ နိုဝင်ဘာ ၈ ရက်ရွေးကောက်ပွဲ အပြီးမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တွေ့ဆုံခဲ့သလို ရွေးကောက်ပွဲ ရွှေ့ဆိုင်းထားတဲ့ ရခိုင်ပြည်နယ်က မြို့နယ်တချို့ကို သွားရောက်ခဲ့ပြီး  ရခိုင်နိုင်ငံရေးပါတီတွေနဲ့ လည်းတွေ့ဆုံခဲ့ပါတယ်။ 

အခု ခရီးစဉ်မှာတော့ ဖမ်းဆီးခံနေတဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ တွေ့ဆုံနိုင်ခြင်းမရှိသလို ဘယ်အဖွဲ့အစည်းတွေနဲ့ တွေ့ဆုံမယ်ဆိုတာတော့ မသိရသေးပါဘူး။ 

နိပွန်ဖောင်ဒေးရှင်းဟာ မြန်မာပြည်တွင်း ငြိမ်းချမ်းရေးဆွေးနွေးပွဲတွေဖြစ်မြောက်ရေး  တိုင်းရင်းသားလက်နက်ကိုင်တွေအဖွဲ့တွေနဲ့လည်း သွားရောက်တွေ့ဆုံ ကြားဝင်ညှိနှိုင်းကူညီ ဆောင်ရွက်ပေးနေတဲ့ အဖွဲ့ဖြစ်ပါတယ်။

2 weeks Ago
Up