အိန္ဒိယနိုင်ငံ၊ နယူးဒေလီမြို့တော်က အာဏာပိုင်တွေဟာ လာမယ့် သီတင်းပတ်ကုန်ရက်အတွင်း ပြည်သူတွေ အိမ်မှာပဲ နေကြဖို့ ဇန်နဝါရီ ၄ ရက်မှာ အမိန့်ထုတ်လိုက်ပါတယ်။

သီတင်းပတ် တပတ်အတွင်း ကိုဗစ်-၁၉ ကပ်ရောဂါ ကူးစက်ခံ လူဦးရေ လေးဆ တိုးလာတာ မြင်ရအပြီး ခုလို အမိန့်ထုတ်တာပါ။ နယူးဒေလီ ဝန်ကြီးချုပ်ဟာ ပါးစပ် နှာခေါင်းစည်းမပါဘဲ ရွေးကောက်ပွဲအတွက် မဲဆွယ်ချီတက်ပွဲမှာ မိန့်ခွန်းပြောအပြီး နောက်တနေ့မှာ ဗိုင်းရပ်စ် ကူးစက်ခံခဲ့ရတယ်လို့ ပြောပါတယ်။

ဥတ္တရာခန်းပြည်နယ် မဲဆွယ်ပွဲမှာ မိန့်ခွန်းပြောခဲ့တဲ့ ဝန်ကြီးချုပ်ဟာ အပျော့စား ရောဂါလက္ခဏာတွေ ခံစားရအပြီး အိမ်မှာ သီးခြားခွဲနေတယ်လို့ ပြောပါတယ်။

လတ်တလော နေ့တွေမှာ သူနဲ့ ထိတွေ့ခဲ့တဲ့ ဘယ်သူမဆို ကိုဗစ်-၁၉ ကူးစက်ခံ ဟုတ်၊ မဟုတ် ဆေးစစ်ကြဖို့ကိုလည်း သူက တိုက်တွန်းပါတယ်။

အိန္ဒိယမှာ ကျန်ခဲ့တဲ့ ၂၄ နာရီအတွင်း ကိုဗစ်-၁၉ ကပ်ရောဂါ ကူးစက်ခံ ၃၇,၀၀၀ ကျော်ခဲ့ပြီး ကူးစက်ခံ သေဆုံးသူဦးရေ ၁၂၄ ယောက် ရှိခဲ့တာပါ။ 

နေ့စဉ် ကူးစက်ခံဦးရေဟာ စက်တင်ဘာ နှောင်းပိုင်းကစပြီး အမြင့်ဆုံးအထိ တိုးလာခဲ့လို့ ဒယ်လ်တာဗီဇမျိုးကွဲနေရာမှာ အင်မတန် ကူးစက်လွယ်တဲ့ အိုမီခရွန် ဗီဇမျိုးကွဲက အစားထိုး နေရာဝင်ယူစပြုနေပြီလို့ ပညာရှင်တွေက သံသယရှိနေကြပါတယ်။

ဒါပေမဲ့ ဆေးရုံတင် လူနာဦးရေကတော့ ထိုးတက်မလာသေးဘူးလို့ အာဏာပိုင်တွေက ပြောပါတယ်။

ဒေလီမြို့တော်မှာ တရက်ကို အသစ်ကူးစက်ခံ ဦးရေ အယောက် ၄၀၀၀ ကျော်ပေမယ့် လူနာအများစုက အပျော့စားလက္ခဏာ ဒါမှမဟုတ် ရောဂါလက္ခဏာ လုံးဝမပြတာမျိုးတွေ ရှိနေပြီး အမြန်နာလန်ထလာကြတယ်။

ဗိုင်းရပ်စ်ကိုတိုက်ဖျက်ဖို့ ပြည်သူတွေ စနေ၊ တနင်္ဂနွေနေ့တွေမှာ အခန်းတွင်းမှာပဲ နေရမယ်လို့ ပြည်နယ် ဒုဝန်ကြီးချုပ်မာနစ်ရှ် စီဆိုဒီယာက ပြောပါတယ်။

အိန္ဒိယနိုင်ငံမှာ ၂၀၂၀ ဇန်နဝါရီကစပြီး ကပ်ဘေးဆိုက်ကတည်းက ခုထိ ကူးစက်ခံ ၃၄ ဒသမ ၉၆ သန်း ရှိပြီး ကူးစက်ခံ ၄၈၀,၀၀၀ ကျော် သေဆုံးခဲ့ပြီးပါပြီ။

အိန္ဒိယ နယူးဒေလီမြို့မှာ ကိုဗစ်ကူးစက်မှု နေ့စဉ်မြင့်မားလာနေပေမဲ့ ဆရာဝန်လုံလောက်မှုမရှိတာ ကျန်းမာရေးကုသမှု မနိုင်မနင်းဖြစ်နေတာတွေကြောင့် ဝန်ထမ်းအရေအတွက် ပိုတိုးပေးဖို့ ဆရာဝန်တွေက ဆန္ဒပြတောင်းဆိုခဲ့ပါတယ်။ 

နယူးဒေလီမြို့ ဆေးရုံကြီးနှစ်ရုံရှေ့မှာ ဆရာဝန်တွေ ဦးဆောင်ပြီး ဆန္ဒပြခဲ့ကြသလို ရွှေ့ပြောင်း အလုပ်သမားတွေကလည်း ထိခိုက်လာမယ့် သူတို့လုပ်အားခတွေကို တောင်းဆိုပါတယ်။ 

အစိုးရက ဒီဇင်ဘာ ၂၈ ရက်မှာ ကန့်သတ်မှုအသစ်တွေနဲ့ ညမထွက်ရ  အမိန့်ထုတ်ပါတယ်။

ဆန္ဒပြဆရာဝန်တဦးက  “ကိုဗစ်ကူးစက်မှုက ပြန်မြင့်လာပြီး နောက်နှစ်လဆိုရင် တတိယလှိုင်း ဝင်တော့မယ်။ လက်ရှိဆရာဝန်အရေအတွက်နဲ့ မနိုင်ဘူး။ အရည်ချင်းရှိတဲ့ ဆရာဝန်အသစ်တွေ အများကြီး လိုနေတယ်။ ရှေ့တန်းကနေ ထိထိရောက်ရောက် ကာကွယ်ကုသပေးဖို့ဆိုလျှင် ကျန်းမာရေး ဝန်ထမ်း ၄၅,၀၀၀ လောက် အသစ်ခန့်ပေးရပါမယ်” လို့ ပြောပါတယ်။

ဒေလီမြို့တော်ဝန်ကက သတင်းစာရှင်းလင်းပွဲလုပ်ရာမှာ နယူးဒေလီရဲ့ ကူးစက်မှုနှုန်းက အဝါရောင်အဆင့် ဖြစ်လာတာကြောင့် ရုပ်ရှင်ရုံ၊ အားကစားရုံ၊ စားသောက်ဆိုင်တွေ၊ ဘားတွေနဲ့ spas ဆိုင်တွေ ပိတ်ရမှာဖြစ်ပြီး မြို့ထဲသွားလာရေး metro စနစ်ကို ၅၀ ရာခိုင်နှုန်း လျော့ချပစ်မယ်လို့ ပြောပါတယ်။ 

ရွှေ့ပြောင်းအလုပ်သမားတွေကတော့ အဲဒီကန့်သတ်မှုတွေနဲ့ ညမထွက်ရအမိန့်တွေ ထုတ်လိုက်ပါက ပုံမှန်ဝင်ငွေ မရှိတာကြောင့် သူတို့အခက်အခဲတွေကို ဖြေရှင်းပေးပါလို့ ပြောပါတယ်။

နယူးဒေလီမှာ ပြီးခဲ့တဲ့ရက်ပိုင်းအတွင်း ကိုဗစ်-၁၉ ကူးစက်နှုန်း စိုးရိမ်စရာကောင်းအောင်  ပြန်မြင့်တက် လာနေသလို အိုမီခရွန် ကူးစက်ခံရသူ ၁၉ ဦးရှိပြီး လောလောဆယ် သေဆုံးမှုတော့ မရှိသေးပါ။