နမ္မတူမြစ်

November 30, 2018

နမ္မတူမြစ်တွင်း မျောပါသွားသည့် ကိုရီးယားသူကို တပတ်ကျော်ကြာထိ ရှာမတွေ့သေး

ရှမ်းပြည်မြောက်ပိုင်း သီပေါမြို့နယ် မိုးတေကျေးရွာအုပ်စုထဲမှာ ပြီးခဲ့တဲ့အပတ်က ကိုရီးယားနိုင်ငံက ကမ္ဘာလှည့်ခရီးသည်တဦး နမ္မတူမြစ်ထဲပျောက်ဆုံးသွားခဲ့ပြီး တာဝန်ရှိသူတွေ နေ့စဉ်နဲ့အမျှ ရှာဖွေကယ်ဆယ်ရေးတွေ လုပ်ဆောင်နေပေမယ့် ဒီနေ့ထိ ရှာလို့မတွေ့သေးပါဘူး။ အသက် ၄၅ နှစ်အရွယ် ကိုရီးယားနိုင်ငံသူ Miss Houng Hee Young Heo ဆိုသူမှာ ပြီးခဲ့တဲ့ နိုဝင်ဘာ ၂၃ ရက် မနက် ၉ နာရီခွဲလောက်က နမ္မတူမြစ်ထဲ ဘောကျွတ်ကွင်းနဲ့ စုန်ဆင်း ကစားစဉ် ရေစီးနဲ့အတူ ပျောက်ဆုံးသွားခဲ့တာလို့ သီပေါမြို့နယ်ရဲတပ်ဖွဲ့မှ ဒုရဲမှူး မြင့်ကျော်က ဒီဗွီ ဘီကို ပြောပါတယ်။ “ပျောက်သွားတဲ့နေရာက သီပေါနဲ့ နမ္မတူမြို့နယ်အစပ်၊ နမ္မတူမြစ်ရဲ့ မိုးတေချောင်းအပိုင်းမှာပေါ့။ သူက ချောင်းထဲကို ဘောကျွတ်ကွင်းနဲ့ ကူးခတ်နေတုန်း ရေစီးသန်လာပြီး မျောပါသွားတာ။ သတင်းရရချင်း ကျနော်တို့ ရှာဖွေရေးကယ်ဆယ်ရေး လုပ်ပါတယ်။ ရဲတပ်ဖွဲ့ပါတယ်၊ မီးသတ်တပ်ဖွဲ့၊ လ၀က၊ ကြက်ခြေနီ၊ ထွေအုပ်၊ ဟိုတယ်နဲ့ ခရီးသွားလုပ်ငန်းအေဂျင်စီ၊ ဟိုတယ်နဲ့ ခရီးညွှန်ကြားမှုအဖွဲ့၊ အဖွဲ့ပေါင်းစုံပူးပေါင်းပြီး လိုက်ရှာကြပါတယ်။ အခု ကိုရီးယားကောင်စစ်ဝန် အဖွဲ့လည်းရောက်နေတယ်၊ ရေနစ်သူရဲ့ အကိုလည်းရောက်လာပါပြီ။ နေ့ခင်းပိုင်းကို တောက်လျှောက်ရှာနေပါတယ်။ ညပိုင်းလည်း စက်လှေသမားတွေကို မှာထားတယ်ဗျ။ ချောင်း ကတော်တော်ရှည်တော့ အခက်အခဲရှိတယ်။ သူက ဒုဌ၀တီမြစ်ထဲစီးသွားတာ။ မိုးတေကနေ ဖြတ်ဆင်းလာရင် ရွာတွေလည်း အများကြီးပဲ။ တွေ့ရင်အကြောင်းကြားဖို့ ရှိသမျှရွာတွေအကုန် အကြောင်းကြားထားပါတယ်။ သူ့အကိုက တရားလိုလုပ်ပြီးတော့ ကျနော်တို့ရဲစခန်းမှာ လူပျောက်မှုနဲ့ အမှုဖွင့်ထားပါတယ်။” နိုဝင်ဘာ ၂၃ ရက်နေ့က ရေထဲဆင်းသွားတဲ့ နိုင်ငံခြားသားက ၅ ဦးရှိကြောင်း၊ ဘယ်လ်ဂျီယံ နိုင်ငံသား ၂ ဦး၊ ပြင်သစ် ၁ ဦး၊ အီတလီ ၁ ဦးနဲ့ ပျောက်ဆုံးကိုရီးယားသူ ၁ ဦးဖြစ်တယ်လို့ ဆိုပါတယ်။ သီပေါကို လာလည်တဲ့ ကမ္ဘာလှည့်ခရီးသည်တွေအနေနဲ့ သီပေါမြို့ပေါ်တ၀ိုက်သာ လည်ပ တ်ခွင့်ရှိပြီး အခု ကိုရီးယားသူပျောက်ဆုံးတဲ့နေရာမှာ သီပေါနဲ့ မိုင်ပေါင်း ၄၀ ခန့်ကွာဝေးတဲ့ သက်ဆိုင်ရာက တားမြစ်ထားတဲ့နေရာတွေဖြစ်ကြောင်း၊ သူတို့အစီအစဉ်နဲ့ သူတို့သွားကြတာမို့ ထိန်းချုပ်မရဘူးလို့ ဒုရဲမှူးက ပြောသွားပါတယ်။  
3 years Ago

August 9, 2018

နမ္မတူမြစ်ပေါ်ရှိ ရေကာတာစီမံကိန်း ရပ်တန့်ပေးရန် သီပေါလူမှုအဖွဲ့များ တောင်းဆို

နမ္မတူမြစ်(ခေါ်) မြစ်ငယ်မြစ်ပေါ်မှာ ရေကာတာတည်ဆောက်နေတာကို ရပ်တန့်ပေးဖို့ ရှမ်းပြည်နယ်၊ သီပေါမြို့ နယ် လူမှုအခြေပြုအဖွဲ့  ၁၁ ဖွဲ့ကပူးတွဲ တောင်းဆိုလိုက်ပါတယ်။ မြစ်ငယ်မြစ်ပေါ် တည်ဆောက်နေတဲ့ အထက်ရဲရွာ ရေကာတာစီမံကိန်းဟာ တ၀က်လောက် ပြီးစီးနေပြီး ရေကာတာကြောင့် သဘာဝဂေဟစနစ်တွေ ထိခိုက်ပျက်စီးမယ့်အပြင် ကျေးရွာတွေ ရေနစ်မြုပ် ပျက်စီးမယ့် အန္တရာယ်ရှိနိုင်တာကြောင့် ကန့်ကွက်တာလို့ ထုတ်ပြန်ထားပါတယ်။ အထက်ရဲရွာ ရေကာတာတည်ဆောက်မှုကြောင့် သီပေါမြို့နယ် တာလုံ(အရှေ့) ကျေးရွာနဲ့ တာလုံ(အနောက်)ကျေးရွာနှစ်ရွာ ရေအောက်ရောက်နိုင်တာကြောင့် ရွှေ့ပြောင်းပေးဖို့ တာဝန်ရှိသူတွေက လွန်ခဲ့တဲ့ နှစ်တွေကတည်းက အသိပေးထားပါတယ်။ ဒါပေမယ့်  ဒေသခံတွေကတော့ ဘိုးဘွား စဉ်ဆက်ကတည်းက နေလာတဲ့ ရွာဖြစ်လို့ မပြောင်းရွှေ့ချင်ကြဘူးလို့ တာလုံရွာသူ နန်းငယ်ငယ်က ပြောပါတယ်။ “အဲဒီရေကာတာပြီးရင် ကျမတို့ ရွာက နစ်မြုပ်သွားမှာ ဖြစ်တယ်။ ရေကာတာက အခုဆိုရင် ၂ဝ၂ဝ- ၂ဝ၂၁ ခုနှစ်လောက် ကျမတို့ ပြောင်းရွှေ့မှာဖြစ်တယ်။ အဲဒါကြောင့်မို့ ကျမတို့ကန့်ကွက်တယ်။ ဘယ်နေရာပြောင်းခိုင်းလဲဆိုတော့ မရှိသေးဘူး။ ကျမတို့လည်း မပြောင်းချင်ဘူးပေါ့နော်။ ရှေ့ကတည်းက နေထိုင်လာတဲ့နေရာမှာပဲနေချင်တယ်။ ကျမတို့ ဆုံးရှုံးမှုတွေကလည်း အများကြီးပဲ။ ကျမတို့က ပညာတတ်တွေလည်း မဟုတ်ဘူး။ ကျမတို့က ခြံတွေပဲ လုပ်ကိုင်စားသောက်နေကြရတာ။ ကျမတို့ အဖိုးမဖြတ်နိုင်ဘူး။ ” ရေကာတာကြောင့် တာလုံကျေးရွာမှာ လူဦးရေ ၆၈၃၊ ကဗ္ဗလာဥယျာဉ်ခြံမြေ ၁၈၄ ဧက၊ လယ်မြေ ၁၇၄ ဧကအပြင် တောင်ယာစိုက်ခင်းတွေ၊ စေတီပုထိုးနဲ့ ဘုန်းကြီးကျောင်းတွေ၊ စာသင်ကျောင်းတွေ ရေအောက်နစ်မြှုပ်သွားနိုင်တယ်လို့လည်း ကြေညာချက်မှာ ဖော်ပြပါတယ်။ ဒါ့အပြင် ပြီးခဲ့တဲ့ ဖေဖော်ဝါရီလတုန်းက တည်ဆောက်နေဆဲ အထက်ရဲရွာ ရေကာတာ ဆောက်လုပ်ရေးလုပ်ငန်း အားနည်းချက်တွေကြောင့်  မြေပြိုမှုတွေဖြစ်ပေါ်ခဲ့တယ်လို့လည်း ထောက်ပြထားပါတယ်။ အထက်ရဲရွာရေအားလျှပ်စစ်စီမံကိန်းကို နိုင်ငံတော်အစိုးရဲ့ ရင်းနှီးမြှုပ်နှံမှုနဲ့ လျှပ်စစ်နှင့် စွမ်းအင်ဝန်ကြီးဌာန၊ ရေအားလျှပ်စစ်အကောင်အထည်ဖော်ရေးဦးစီးဌာန၊ အမှတ်(၃) တည်ဆောက်ရေးက ဆောင်ရွက်နေတဲ့  စီမံကိန်းဖြစ်ပါတယ်။ ဒီစီမံကိန်း နည်းပညာပိုင်းနဲ့  စီမံကိန်းလုပ်ငန်းတွေ အကောင်အထည်ဖော်နိုင်ရေး ဆွစ်ဇာလန်နိုင်ငံရှိ ကုမ္ပဏီတခုက လုပ်ဆောင်ပေးနေတာဖြစ်ပါတယ်။ လျှပ်စစ်ဓာတ်အား ကီလိုဝပ် ၁၄ဝ၉ ထွက်ရှိမယ့် ဒီအထက်ရဲရွာ ရေကာတာစီမံကိန်းကို ၂ဝ၁ဝ ပြည့်နှစ်က စတင်ဆောင်ရွက်ခဲ့တာဖြစ်ပြီး ၂ဝ၂ဝ-၂ဝ၂၁ခုနှစ်လောက်မှာ စီမံကိန်း ပြီးစီးဖို့ လျာထားပါတယ်။ ဒီစီမံကိန်းစတင်ကတည်း ဒေသခံတွေက အကြိမ်ကြိမ် ကန့်ကွက်မှုတွေ ရှိနေသလို အခုချိန်ထိလည်း ကန့်ကွက်မှုတွေ ဆက်ပြီးလုပ်ဆောင်နေပါတယ်။ သီပေါလူမှုအဖွဲ့အစည်းတွေအနေနဲ့ကတော့ လျှပ်စစ်ဓာတ်အားရရှိဖို့ အတွက် ရေကာတာ စီမံကိန်းနဲ့မလုပ်ဘဲ တခြားနည်းလမ်းတခုနဲ့ နိုင်ငံတော်အစိုးရက လုပ်ဆောင်ဖို့လည်း တိုက်တွန်းထားပါတယ်။
3 years Ago
Up