နမ္မတီးမြို့နယ်အနီး

August 11, 2017

နမ္မတီးမြို့နယ်အနီး တိုက်ပွဲဖြစ်၊ ရွာသားရာချီထွက်ပြေး ပိတ်မိနေသူများရှိနေ

ကချင်ပြည်နယ် နမ္မတီးမြို့နယ်နဲ့ ၁၃ မိုင်လောက်ဝေးတဲ့ ကေအိုင်အေ ထိန်းချုပ်နယ်မြေ ကဆုန့်ရွာမှာ ဒီနေ့မနက်ပိုင်းက အစိုးရတပ်နဲ့ ကေအိုင်တပ်ဖွဲ့အကြား တိုက်ပွဲဖြစ်ပွားခဲ့တဲ့အတွက် ရာနဲ့ချီတဲ့ ရွာသားတွေ ထွက်ပြေးတိမ်းရှောင်နေရပါတယ်။ မနက် ၁၀ နာရီက မြန်မာ့တပ်မတော်က အင်အား ၃၀၀ လောက်နဲ့ဝင်ရောက်လို့ တိုက်ပွဲဖြစ်ပွားခဲ့တာလို့ ဒေသခံတွေကို သွားရောက်ကူညီနေတဲ့ နမ္မတီးမြို့က ဦးလဂျာက ပြောပါတယ်။ “ဒီမနက် ၁၀ နာရီလောက် ကေအိုင်အေ ထိန်းချုပ်ရာရွာဖြစ်တဲ့ ကဆုန့်ရွာမှာ မြန်မာ့တပ်မ တော်က ၀င်လာတယ်။ ကေအိုင်အေက အငိုက်မိသွားတဲ့သဘောပေါ့။ အဲမှာ ရွာထဲဝင်လာတဲ့ အခါကျမှ ရွာလုံခြုံရေးတပ်ဖွဲ့တွေနဲ့ စစ်ဖြစ်တယ်။ သူတို့အင်အားများတဲ့အခါကျတော့ ရွာထဲကို အကုန်လုံး စစ်တပ်က ၀င်ရောက်သွားတာပေါ့။ ၀င်ရောက်သွားတော့ တွေ့တွေ့သမျှ ယောက်ျားတွေကိုပစ်တယ်။ အဲလို တိုက်ပွဲဖြစ်လာတဲ့အခါကျတော့ ရွာသားတွေက အခုကျနော်တို့ မိုးကောင်းမြို့နယ် နမ္မတီးလမ်းခွကျေးရွာ နှစ်ခြင်းအသင်းတော်နဲ့ ကက်သလစ် အသင်းတော်မှာ ဒုက္ခသည်တွေ ၆၀၀ ကျော် ရောက်နေပြီ။ ” အဆိုပါ ကဆုန့်ရွာမှာ အိမ်ခြေ ၃၀၀ ကျော်ရှိပြီး ရွာရဲ့ဘုရားကျောင်းမှာ လူ ၁၀၀ လောက်ပိတ်မိနေတယ်လို့ လည်းပြောပါတယ်။ ထွက်ပြေးတိမ်းရှောင်လာသူတွေထဲမှာ သေနတ်ဒဏ်ရာ ထိမှန်ဒဏ်ရာရလာသူ  တယောက်လည်းပါလာပါတယ်။ ထွက်ပြေးလာတဲ့ ကဆုန့်ရွာသား ကိုလောရာကတော့ သူတယောက်ထဲထွက်ပြေး လွတ်မြောက်လာပြီး မိသားစုဝင်တွေကျန်နေခဲ့ကြောင်းနဲ့ သေနတ်ဒဏ်ထိမှန် သေဆုံးတဲ့ ရွာသားတွေ ရှိတယ်လို့လည်း ဒီဗွီဘီကို ပြောပါတယ်။ “ကျနေ်ာတို့ကဆင်းလာမယ်ဆိုပြီး အစည်းအဝေးလုပ်နေတဲ့အချိန်မှာ မိုင်းသံကြားပြီးတော့မှ လူလည်းမမြင်ရ၊ ဘာလည်းမမြင်ရ၊ အခုထွက်ပြေးလာတာ ကျနော်တယောက်ပါပဲ။ ကျနော့်မိသားစုတွေက ဟိုမှာပဲ အကုန်လုံးကျန်ခဲ့တယ်။ ထိခိုက် ဒဏ်ရာကတော့ ဒီမှာတယောက်ပါခဲ့တယ်။ ဟိုမှာ နှစ်ယောက်သုံးယောက်ကတော့ ဆုံးသွား တယ်ထင်တယ်။ သူတို့က ရွာသူရွာသားတွေကို ပစ်တာကိုး။ သူတို့စစ်သားအချင်းချင်းမပစ်ဘဲနဲ့ ရွာသူရွာသားတွေ ဘုရားကျောင်းမှာ စုနေတဲ့အချိန်မှာ အထဲမှာပစ်တာ။ ” ရွာသားတွေအနေနဲ့ စစ်တပ်ဝင်ရောက်မှုကြောင့် ထွက်ပြေးတိမ်းရှောင်ဖို့ ဘုရားကျောင်းမှာ စုနေချိန် စစ်တပ်အရင်ဝင်သွားပြီး ပစ်ခတ်မှုဖြစ်ပွားခဲ့တာလို့ပြောပါတယ်။ ဒုက္ခသည်တွေရောက်ရှိတဲ့နေရာကို ကချင်နှစ်ခြင်းခရစ်ယာန်အဖွဲ့ချုပ် တာဝန်ရှိသူတွေ အပါအ၀င် အဖွဲ့စည်းတချို့လည်းရောက်ရှိကူညီနေပါတယ်။
4 years Ago
Up