နန်းရဲ့ ရှမ်းဝတ်စုံက

January 25, 2018

နန်းရဲ့ ရှမ်းဝတ်စုံက လူတွေ တအားသဘောကျပါတယ် - အလှမယ် နန်းမွေခမ်း

တရုတ်နိုင်ငံ နန်ကျင်းမြို့မှာ ကျင်းပပြီးစီးသွားတဲ့ Miss All Nations အလှမယ်ပြိုင်ပွဲမှာ မြန်မာနိုင်ငံကိုယ်စားပြုအနေနဲ့ သွားရောက်ယှဉ်ပြိုင်ပြီး ဆုနှစ်ခုရရှိခဲ့တဲ့ ရှမ်းတိုင်းရင်းသူ နန်းမွေခမ်းဟာ ဒီကနေ့ ညနေ ၃ နာရီလောက်က ရန်ကုန်အပြည်ပြည်ဆိုင်ရာလေဆိပ်ကို ပြန်လည်ရောက်ရှိလာပါတယ်။ ဆုနှစ်ခုရလာတဲ့ သူမကို  ရန်ကုန်ရှမ်းစာပေနဲ့ယဉ်ကျေးမှုအသင်းက ရှမ်းလူငယ်မောင်မယ် တွေ၊ ပံ့ပိုးကူညီသူ၊ ဆွေမျိုးနဲ့ ခင်မင်ရင်းနှီးသူတွေ သွားရောက်ကြိုဆိုခဲ့ကြပါတယ်။ သူမဟာ Miss All Nations ပြိုင်ပွဲကနေ Miss Eco Toursim နဲ့ Miss Miao Yu ဆိုတဲ့ ဆုနှစ်ခုရခဲ့တာပါ။ ဆုနှစ်ခုရတဲ့တာဟာ သူမအနေနဲ့  ဘာသာစကား ၅ မျိုးတတ်ကျွမ်းတာကြောင့်ရော၊  တမူ ထူးခြားတဲ့ ရှမ်းတိုင်းရင်းသားဝတ်စုံတွေကြောင့်လည်းပါမယ်လို့ ယူဆကြောင်း ဒီဗွီဘီကို ပြောပါ တယ်။ “Miss Eco Tourism  ဆုမှာ နန်းက ဘာသာစကား ၅ မျိုးတတ်တော့ ဆက်သွယ်ရေး ကောင်းလို့ ပေးတာလို့ ယူဆပါတယ်ရှင့်။ နန်းက မြန်မာ၊ ရှမ်း၊ အင်္ဂလိပ်၊ တရုတ်နဲ့ ထိုင်းစကားတွေပါ ပြောတတ်ပါတယ်။ Miss Miao Yu  ဆိုတာကတော့ တရုတ်သမိုင်းထဲက လှပတဲ့ မိန်းကလေးတဦးရဲ့ နာမည်ဖြစ်ပါတယ်။ နန်းက တိုင်းရင်းသူတယောက်ဖြစ်လို့ ဒီဆုရ တယ်လို့ ထင်ပါတယ်။ ပွဲမှာ ၀တ်ထားတဲ့ နန်းရဲ့ ရှမ်းဝတ်စုံကလည်း လူတွေတအား သဘောကျ ပါတယ်ရှင့်။  ဓာတ်ပုံတွေအများကြီး တွဲရိုက်ကြတယ်။” သူမဟာ အဲဒီပြိုင်ပွဲမှာ ဂုံရှမ်းရိုးရာ နန်းတွင်းဝတ်စုံဝတ်ပြီး ရှမ်းရိုးရာခမောက်ကြီးကို ဆောင်းကာ ရိုးရာအကနဲ့ ပြိုင်ခဲ့ပါတယ်။ ရှမ်းဝတ်စုံကို  ကျိုင်းတုံမှ ဒီဇိုင်နာ ကိုကျော်ရဲအောင်က စပွန်စာလုပ်ပြီး ခမောက်ကိုတော့ တောင်ကြီးမှ စိုင်းခေးလျိုက အထူးချုပ်လုပ်ပေးခဲ့တာပါ။ နန်းမွေခမ်းဟာ Best in Talent ထိပ်ဆုံး ခြောက်ဦး စာရင်းဝင်အဖြစ် ရွေးချယ်ခံရပြီး Miss All Nations ပြိုင်ပွဲကြီးရဲ့ ထိပ်ဆုံးလက်ရွေးစင် ၁၁ ဦး စာရင်းမှာလည်း ပါဝင်ခဲ့ပါတယ်။ ဒီလို တရုတ်နိုင်ငံကို သွားရောက်ယှဉ်ပြိုင်ရဖို့ သူဟာ ရှမ်းပြည်နယ်မှ miss Shan State နဲ့ မြန်မာနိုင်ငံမှ Miss Golden Land အလှမယ်ဆုတွေ ရခဲ့တာပါ။ နန်းမွေခမ်းမှာ ရှမ်းပြည်မြောက်ပိုင်း မူဆယ်ခရိုင် နမ့်ခမ်းမြို့မှ ဦးစိုင်းလှကျော်နဲ့ ဒေါ်နန်းဆိုင်ဆာတို့ရဲ့ သမီးဖြစ်ပြီး အသက် ၂၅ နှစ်ရှိပြီဖြစ်ကာ လားရှိုးတက္ကသိုလ်မှ သမိုင်းဘာသာ အဓိကနဲ့ ဘွဲ့ရပြီးဖြစ်ပါတယ်။
3 years Ago
Up