နတ်တလင်း

December 6, 2021

ပခုက္ကူနှင့်နတ်တလင်းမြို့တို့က လျှပ်စစ်ရုံး၊ စည်ပင်ရုံးများ ဗုံးခွဲတိုက်ခိုက်ခံရ

မကွေးတိုင်း၊ ပခုက္ကူမြို့က မြို့နယ်လျှပ်စစ်ရုံး၊ စည်ပင်သာယာရေးအဖွဲ့ရုံးနဲ့ ပဲခူးတိုင်းအနောက်ခြမ်း၊ နတ်တလင်းမြို့က မြို့နယ်လျှပ်စစ်ရုံးတွေ ဒီဇင်ဘာ ၅ ရက်က ဗုံးခွဲတိုက်ခိုက်ခံရတယ်လို့ သိရပါတယ်။

ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့၊ ပြန်ကြားရေးတာဝန်ခံက “ပခုက္ကူမြို့နယ်မှာ စစ်ကောင်စီအတွက် ပြည်သူတွေဆီကနေ အခွန်တွေကို အတင်းအဓမ္မကောက်ခံနေတဲ့ မြို့နယ်လျှပ်စစ်ရုံးနဲ့ စည်ပင်သာယာရေးအဖွဲ့ရုံးတွေကို ဒီဇင်ဘာ ၅ ရက်နေ့ နေ့လယ် ၁ နာရီ လောက်မှာ တချိန်တည်း ဗုံးခွဲတိုက်ခိုက်ခဲ့တာပါ” လို့ အတည်ပြုပြောပါတယ်။

ပြီးခဲ့တဲ့လပိုင်းက မကွေးတိုင်း၊ ချောက်မြို့နယ်၊ စည်ပင်သာယာရေးအဖွဲ့ကလည်း ရေမီတာခမပေးဆောင်တဲ့ ပြည်သူတွေရဲ့ ရေပိုက်လိုင်းတွေကို ဖြတ်တောက်ပြီး ရေမီတာတွေ ဖြုတ်သိမ်းသွားတယ်လို့ ဒေသခံတွေဆီက သိရပါတယ်။

“ကြည့်မြင့်တိုင်ဖြစ်စဉ်ကို လက်တုံ့ပြန်တဲ့အနေနဲ့ကော လျှပ်စစ်ရုံးက ကောင်တွေက စစ်သားတွေခေါ်လာပြီး မြို့နယ်ထဲက မီတာခမဆောင်တဲ့ ပြည်သူတွေကို မီးလိုက်ဖြတ်နေတာတွေ လုပ်နေတဲ့အတွက် ညနေ ၆ နာရီခွဲဝန်းကျင်လောက်မှာ ဗုံးခွဲတိုက်ခိုက်ခဲ့တာပါ” လို့ နတ်တလင်းမြို့၊ နတ်စစ်သည် ပြည်သူ့ကာကွယ်ရေးအဖွဲ့တာဝန်ခံက ပြောပါတယ်။

အဆိုပါ ဗုံးခွဲတိုက်ခိုက်မှုတွေနဲ့ပတ်သက်လို့ အသေးစိတ်သိရှိနိုင်ဖို့ ဗုံးခွဲခံရတဲ့ရုံးတွေကို ဆက်သွယ်မေးမြန်းရာမှာ ဖုန်းလက်ခံဖြေဆိုခြင်းမရှိတဲ့အတွက် ထိခိုက်ပျက်စီးမှုအခြေအနေတွေကို ဒီဗွီဘီက ဆက်လက်စုံစမ်းနေပါတယ်။

48 mins Ago

November 14, 2021

နတ်တလင်းတွင် ၆ တန်းကျောင်းသား ၁ ဦးကို အကြမ်းဖက်စစ်တပ်က အကြောင်းမဲ့ပစ်ခတ်

ပဲခူးတိုင်းအနောက်ပိုင်း၊ နတ်တလင်းမြို့နယ်၊  တောင်ညိုမြို့သစ်မှာ နိုဝင်ဘာ ၁၃ ရက်နေ့ ညနေ ၄ နာရီခန့်က တောင်ညိုရဲစခန်းရှေ့ကနေ ဆိုင်ကယ်နဲ့ဖြတ်သွားတဲ့ ၁၃ နှစ်အရွယ် ၆ တန်းကျောင်းသား ၁ ဦးကို အကြမ်းဖက်စစ်ကောင်စီတပ်သားတွေ အကြောင်းမဲ့ ပစ်ခတ်ခဲ့တာကြောင့် ပြင်းထန်ဒဏ်ရာရရှိသွားတယ်လို့ ဒေသခံတွေဆီက သိရပါတယ်။

အမည်မဖာ်လိုတဲ့ တောင်ညိုဒေသခံတဦးက “ရဲစခန်းရှေ့က ဆိုင်ကယ်စီးသွားတဲ့ကလေးကို စခန်းထဲကနေ သေနတ်နဲ့ပစ်တာ ၂ ချက်ပဲ။ ကလေးရဲ့ ရင်ဘတ်ကို ကျည်မှန်သွားတာ ကလေးက အသက်အန္တရာယ် တော့ စိုးရိမ်ရလို့ ပြည်ဆေးရုံကို ပို့လိုက်ရတယ်” လို့ ပြောပါတယ်။

မောင်ပိုပို ရဲ့ မိဘတွေဟာ တောင်ညိုမြို့သစ်၊ အောင်ဇေယျာ ၇ လမ်းမှာနေထိုင်ကြပြီး အသက် ၁၃ နှစ်အရွယ် မောင်ပိုပိုဟာ အ.ထ.က အောင်ဇေယျာစာသင်ကျောင်း၊ ဆဋ္ဌမတန်းမှာ ပညာသင်ကြားပညာသင်ကြားနေတဲ့ ကျောင်းသား ၁ ဦး ဖြစ်တယ်လို့ သိရပါတယ်။

“ကလေးက ကျောင်းဆင်းပြီး အပြင်ကိုမုန့်ထွက်ဝယ်တာ။ အဲ့တာကို ဘာမှမဆိုင်ဘဲ လှမ်းပစ်တာ” လို့ မောင်ပိုပိုရဲ့ မိသားစုနဲ့နီးစပ်သူက ပြောပါတယ်။

အဆိုပါ အကြောင်းမဲ့ပစ်ခတ်မှုနဲ့ ပတ်သက်ပြီး တောင်ညိုနယ်မြေရဲစခန်းရဲ့ တာဝန်ခံစခန်းမှူးဆီကို အကြိမ်ကြိမ်ဆက်သွယ်မေးမြန်းရာ ဖုန်းလက်ခံဖြေဆိုခြင်းမရှိပါဘူး။

3 weeks Ago
More News
Up