နတ္တလင်း

January 14, 2023

နတ္တလင်း တာပွန်စစ်ဆေးရေးဂိတ်တွင် ဆိုင်ကယ်ရပ်မပေးသဖြင့် ဒေသခံတဦး ပစ်သတ်ခံရ

ပဲခူးတိုင်းအနောက်ပိုင်း၊ နတ်တလင်းမြို့နယ် တာပွန်ကျေးရွာထိပ်က စစ်ဆေးရေးဂိတ်ကို ဖြတ်သွား တဲ့ ဒေသခံအမျိုးသားတဦးအား ဆိုင်ကယ်ရပ်မပေးလို့ဆိုပြီး စစ်ကောင်စီတပ်နဲ့ရဲတွေက ပစ်ခတ်ခဲ့တာကြောင့် သေဆုံးသွားတယ်လို့ ဒေသခံတွေက ပြောပါတယ်။ 

ပစ်ခတ်ခံခဲ့ရတဲ့သူ  သရက်ကုန်းရွာက ကိုဝင်းဇော်ထွန်းဖြစ်ပြီး  ပထမနှစ်ကျောင်းသားကနေထွက်ကာ ပေါင်းတည်မြို့က ချေးငွေလုပ်ငန်းမှာ အလုပ်လုပ်နေသူဖြစ်တယ်လို့ ဆိုပါတယ်။ 

“သရက်ကုန်းရွာကနေ နတ်တလင်းမြို့ကိုအသွားမှာ တာပွန်စစ်ဆေးရေးဂိတ်ကို ဖြတ်တဲ့အခါမှာ  ဆိုင်ကယ်လိုင်စင် စစ်မှာဖြစ်တာကြောင့် ဆိုင်ကယ်လိုင်စင်သက်တမ်းတိုးထားတာ မရသေးတဲ့အတွက် အဖမ်းခံရမှာကိုကြောက်ပြီး မရပ်တော့ဘဲ ဖြတ်မောင်းသွားတာကို ဂိတ်မှာစောင့်နေတဲ့ စစ်ကောင်စီအဖွဲ့ထဲက ခြေထောက်မသန်တဲ့ ဂန်းရှော့ (ကျော်မင်း) ဆိုတဲ့ အငြိမ်းစား၊ စစ်ထွက်က  G3 နဲ့လှမ်းပစ်တာ  ၄ ချက်တောင်။ အလောင်းကတော့ အခုထိ လမ်းမပေါ်မှာပဲ မြင်မကောင်းဘူး။ ပစ်တဲ့ကောင်တော့ ဘာမှမဖြစ်သလိုဘဲ ထော့ကျိုးထော့ကျိုးနဲ့ အဲ့ဒိဂိတ်ထဲမှာ သွားလာနေတာပဲ” လို့ ဂိတ်အနီးနေ မျက်မြင်တွေ့ရှိသူတယောက်က ပြောပါတယ်။

ဒါ့အပြင် စစ်ကောင်စီတပ်နဲ့ရဲတွေက ကို၀င်းဇော်ထွန်းရဲ့ အလောင်းကို ဗုံးတွေနဲ့တွဲ ဓာတ်ပုံရိုက်ပြီး ညနေပိုင်းမှာ နတ္တလင်းဆေးရုံကို သယ်ယူသွားတယ်လို့ မိသားစု၀င်တွေနဲ့နီးစပ်သူတဦးက ပြောပါတယ်။

တာပွန်ရဲစခန်းဟာ နေ့ညမရွေး ဆိုင်ကယ်တွေကို ဖမ်းဆီးနေပြီး တစီးကို ငွေကျပ် နှစ်သိန်းနဲ့ ရွေးခိုင်းတာ၊ မရွေးနိုင်ပါက ထောင်ဒဏ် ၁ လကျခံရတာတွေကြောင့်  ဒေသခံတွေဟာ ဆိုင်ကယ် အဖမ်းခံရမှာ ကြောက်နေကြတယ်လို့ ဆိုပါတယ်။

2 weeks Ago

October 27, 2022

စစ်ကောင်စီလက်ထက် ဦးဝီရသူ ပထမဆုံးတရားပွဲကျင်းပပြီး သေနတ်‌ဖောက်အောင်ပွဲခံ

ပဲခူးတိုင်း၊ နတ်တလင်းမြို့နယ်၊ ဆင်သေကုန်းကျေးရွာမှာ အောက်တိုဘာ ၂၇ ရက် ဒီနေ့ကျင်းပတဲ့ ကထိန်ပွဲမှာ  မဘသ ဆရာတော်  ဦးဝီရသူက  စစ်အာဏာသိမ်းပြီးနောက် ပထမဆုံးအကြိမ်အဖြစ် တရားဟောပွဲကျင်းပပြီး ဒေသခံရဲတပ်ဖွဲ့က သေနတ် ၅ ချက်ဖောက် အောင်ပွဲခံခဲ့တယ်လို့ ဒေသခံတွေထံက သိရပါတယ်။

ဆင်သေကုန်းကျေးရွာမှာ ကိုကျော်မင်းဦးနဲ့ မခင်ညိုတို့ရဲ့ ရှင်ပြုသိက္ခာထပ် ကထိန်အလှူပွဲ ကို ဒီမနက်ပိုင်းမှာ ပြုလုပ်ခဲ့ပြီးနောက် ဦးဝီရသူက တရားဟောခဲ့ကာ  တရားဟောတဲ့အထဲမှာ ၉၆၉ အယူဝါဒတွေနဲ့  ၉၆၉ အဓိပ္ပါယ်ကိုတွေ ရှင်းလင်းပြောကြားခဲ့တယ်လို့ဆိုပါတယ်။

နတ္တလင်းမြို့နေသူတယောက်က “မနေ့ နေ့လယ်က ရဲကားတစီးက ရဲ နဲ့ စစ်ကောင်စီစစ်သားတွေ အပြည့်နဲ့။ သူ  (ဦးဝီရသူ) က အိမ်စီးကားနဲ့ သူ့ကားပေါ်မှာ မိုက်ကယ်ကျော်မြင့်ပါ ပါလာတယ်၊ ရွာကိုလိုက်ပို့တာ။  ၂၇ ရက်နေ့ ကထိန်က မနက်ပိုင်းပြီးတော့ ၉၆၉ တရားပွဲ ဆက်လုပ်တယ်။ လုပ်တဲ့နေရာကလည်း ဆင်သေကုန်းရွာက (၉၆၉)ကျောင်းမှာ၊ အဲ့ဒိရွာကတရွာလုံးအစိမ်းတွေ၊ NLD အောင်နိုင်ရေး လုပ်တုန်းကလည်း  ခဲတွေနဲ့ထွက်ပေါက်လို့ ပြဿနာတက်ကြသေးတာ။ အဲ့ဒိ(၉၆၉)ကျောင်းက ဘုန်ကြီးတွေက အနီဆို အသေမုန်းတာ၊ အခုလည်း အမုန်းတရားတွေ အဆိပ်အတောက်တွေပဲ ပြောခဲ့မှာပဲ။ အရင်ကတည်းက  သူတရားဟောခဲ့တဲ့ နေရာတွေမှာ ဘာသာရေးပဋိပက္ခတွေ တောက်လျှောက်ဖြစ်နေတာဆိုတော့ အခုလည်း စိုးရိမ်နေရတယ်။ ရွာထဲမှာကလည်း အနီတွေလည်း ရှိတယ်ဆိုတော့၊ သူတို့အတွက်လည်း စိုးရိမ်နေရတာ”လို့ ပြောပါတယ်။

ကထိန်ပွဲကို ပတ်ဝန်းကျင်ကျေးရွာတွေက သံဃာတချို့နဲ့ဒေသခံ ၂၅ လောက် တက်ရောက်ခဲ့ကြပါတယ်။

ဦးဝီရသူဟာ အန်အယ်လ်ဒီ အစိုးရလက်ထက်က အမုန်းတရားတွေကို ဟောကြားတာကြောင့် တရားဟောခွင့်ပိတ်ပင်ခံခဲ့ရပါတယ်။

အမျိုးသားရေးဆရာတော်အဖြစ် လူသိများတဲ့ မန္တလေး မစိုးရိမ်တိုက်သစ် ဆရာတော် ဦးဝီရသူကို ၂၀၁၉ ခုနှစ် ဧပြီလ ၂၉ ရက်နေ့က မြိတ်မြို့မှာ ပြုလုပ်ခဲ့တဲ့ ဟောပြောပွဲနဲ့ မေလ ၅ ရက်နေ့က ရန်ကုန်မြို့တော်ခန်းမရှေ့မှာ ကျင်းပခဲ့တဲ့ ဟောပြောပွဲတွေမှာ အစိုးရအဖွဲ့နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ပုဂ္ဂိုလ်ရေး ထိုးနှက်တဲ့ စကားလုံးတွေသုံးပြီး ဟောပြောခဲ့တာကြောင့် ရာဇသတ်ကြီးပုဒ်မ ၁၂၄(က)နဲ့ ဖမ်းဝရမ်းထုတ်ခဲ့ပါတယ်။ 

ဦးဝီရသူဟာ ဝရမ်းပြေးအဖြစ် ထွက်ပြေးတိမ်းရှောင်နေရာက တနှစ်ကျော်အကြာ  ၂၀၂၀ ရွေးကောက်ပွဲ ကျင်းပခါနီး  နိုဝင်ဘာ ၂ ရက်နေ့က ရန်ကုန် အနောက်ပိုင်းခရိုင်၊ ရဲတပ်ဖွဲ့မှူးရုံးမှာ  လာရောက်အဖမ်းခံခဲ့ပါတယ်။

ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်မှာတော့ ဦးဝီရသူကို  စစ်တပ်က အင်းစိန်ထောင် သီးသန့်ရိပ်သာဆောင်မှာ VVIP အဖြစ်ထားရှိကာ  မေလကစပြီး တပ်မတော်ဆေးရုံသို့ ပို့ဆောင်ခဲ့ပြီးနောက်  စက်တင်ဘာ ၆ ရက်မှာ ပြန်လွှတ်ပေးခဲ့ပါတယ်။

3 months Ago
More News
Up