ဓားပြတိုက်သူ

August 7, 2020

ပန်းတနော်မြို့နယ် CB ဘဏ်ခွဲ ဓားပြတိုက်သူကို ရဲက ပိတ်ဆို့ရှာဖွေနေ  

ဧရာဝတီတိုင်း၊ ပန်းတနော်မြို့နယ် အလယ်ပိုင်းရပ်ကွက် သီဟလမ်းနဲ့  အနော်ရထာလမ်းဒေါင့်ရှိ CB ဘဏ်ခွဲအတွင်း ဝင်ရောက်ဓားပြတိုက် ငွေတွေယူ ထွက်ပြေးသွားတဲ့  သေနတ်သမား ၁ ဦးကို ပိတ်ဆို့ ရှာဖွေနေတယ်လို့  တိုင်းရဲတပ်ဖွဲ့ ပြောရေးဆိုခွင့်ရှိသူ ဒုရဲမှူးကြီး ထွန်းရွှေက ဒီဗွီဘီကို ပြောပါတယ်။ "ခုတော့ တိုင်းရဲတပ်ဖွဲ့မှူး ကိုယ်တိုင် ပန်းတနော်ကို သွားပြီး တရားခံဖမ်းမိဖို့ ဆောင်ရွက်နေပါပြီ၊ ခုလည်း နယ်မြေ ရဲတပ်ဖွဲ့တွေ ချိတ်ဆက်ပြီး ပိတ်ဆို့ရှာဖွေတာတွေ လုပ်နေပါပြီ"လို့ ပြောပါတယ်။ ဘဏ်ဖွင့်ချိန် ဒီနေ့မနက် ၁၀ နာရီခွဲအချိန်မှာ မိုးကာအင်္ကျီ အဖြူ လက်အိတ်အမဲကို ဝတ်ဆင်လာပြီး နှာခေါင်းစည်း(Mask) တပ်ဆင်လာသူ အသက် ၃၀ အရွယ် အမျိုးသား ၁ ဦးရောက်ရှိလာကာ ပစ္စတိုသေနတ်ကိုင်ဆောင်ပြီး ဘဏ်ဝန်ထမ်းတွေကို ခြိမ်းခြောက်ပြီး ငွေတောင်းခံခဲ့တာဖြစ်ပါတယ်။ သေနတ်သမားက ငွေခြိမ်းခြောက်တောင်းခံခဲ့လို့ ဘဏ်ဝန်ထမ်းတွေက ငွေကျပ် သိန်း ၁၂၀ ကျော်ကို ပေးလိုက်ရတာနဲ့ ပတ်သက်ပြီး အရေးယူပေးဖို့ ရဲတပ်ဖွဲ့ထံသတင်းပေးတိုင်ကြားခဲ့ တာလို့ ဆိုပါတယ်။ လက်ရှိအချိန်မှာ အနုကြမ်းစီးခံရတဲ့ ဘဏ်သို့ ရဲတပ်ဖွဲ့ဝင်တွေ ဒေသခံအာဏာပိုင်တွေနဲ့ တာဝန်ရှိသူတွေရောက်ရှိနေပြီးဘဏ်ရဲ့ CCTV မှတ်တမ်းတွေကို စစ်ဆေးနေကာ တရားခံဖမ်းဆီးရမိရေး ဆောင်ရွက်နေပြီလို့  မျက်မြင်ဒေသခံတွေက ပြောပါတယ်။ " ဖြစ်သွားတာတော့ မသိလိုက်ဘူး၊ ရဲတွေရောက်လာပြီး စစ်ဆေးတာတွေလုပ်မှ သိရတာပါ။ လောလောဆယ်တော့ သူတို့တွေစစ်ဆေးနေပါတယ်။ သေနတ်သမားကတော့ လွတ်သွားတာပေါ့"လို့ အခင်းဖြစ်နေရာကို ရောက်ရှိနေတဲ့ ဒေသခံတစ်ဦး ဒီဗွီဘီ ကိုပြောပါတယ်။ လက်ရှိအချိန်တွင်တော့ ပုသိမ်မြို့ ဒိုက်ထူစစ်ဆေးရေး ဂိတ်မှာ ရန်ကုန်ဘက်မှ ပုသိမ်မြို့ဘက်သို့ ယာဉ်တွေကို စစ်ဆေးမှုများပြုလုပ်နေစဉ် လူ ၅ ဦးကို မင်္သကာသဖြင့် ရဲစခန်းကိုခေါ်ယူစစ်ဆေးတာတွေ ပြုလုပ်နေတယ်လို့ ရဲတပ်ဖွဲ့ထံက သိရပါတယ်။ သတင်း - မင်းထက်မုန်း
1 year Ago

February 12, 2020

မြောက်ဒဂုံ စီဘီဘဏ်ကို သေနတ်အတု၊ ဗုံးအတုဖြင့် ဓားပြတိုက်သူ ဖမ်းဆီးရမိ

ရန်ကုန်၊ ဒဂုံမြို့သစ်(မြောက်ပိုင်း)မြို့နယ်ရှိ စီဘီဘဏ်ဝန်ထမ်းတွေကို သေနတ်နဲ့ ခြိမ်းခြောက် ဗုံးအတုထားခဲ့ပြီး ငွေကျပ်သိန်း ၆၀၀  ဓားပြတိုက်ပြေးသွားသူကို ဖမ်းဆီးရမိပြီ ဖြစ်တယ်လို့ မြန်မာနိုင်ငံ ရဲတပ်ဖွဲ့က သတင်းထုတ်ပြန်ပါတယ်။  ဖေဖော်ဝါရီ ၇ ရက်မနက်က ဒဂုံမြို့သစ်(မြောက်ပိုင်း)မြို့နယ်၊ အမှတ်(၃၅)ရပ်ကွက်၊ ပင်လုံလမ်းနဲ့ အဏ္ဏဝါလမ်းသွယ်ထောင့်ရှိ စီဘီဘဏ်ကို အမျိုးသားတစ်ဦးက ဝင်ရောက်လာပြီး ဘဏ်ဝန်ထမ်းတွေကို သေနတ်နဲ့ ခြိမ်းခြောက်ကာ ဗုံးလို့ ယူဆရတဲ့ အရာဝတ္ထုကို ချထားခဲ့ပြီး ငွေကျပ်သိန်း ၆၀၀ လောက် လုယူကာ ကားနဲ့ ထွက်ပြေးလွတ်မြောက်သွားတာ ဖြစ်ပါတယ်။ ဒီအမှုကို ရန်ကုန်တိုင်းဒေသကြီးရဲတပ်ဖွဲ့က စုံစမ်းဖော်ထုတ်ခဲ့ရာ တာဝန်သိပြည်သူတွေရဲ့ သတင်းပေးချက်အရ ပြစ်မှုကျူးလွန်သူ ဒဂုံမြို့သစ်(မြောက်ပိုင်း)မြို့နယ်၊ အင်ကြင်းမြိုင်လမ်း၊ အမှတ်(၃၃)ရပ်ကွက်နေ တရားခံ စိုးကျော်ကျော်(၄၇-နှစ်)ကို ဖေဖော်ဝါရီ ၁၁ ရက် ည ၆ နာရီခွဲ မှာ ပြစ်မှုကျူးလွန်ရာမှာ အသုံးပြုတဲ့ Probox ကားအပါအဝင် လုယက်သွားတဲ့ မြန်မာငွေကျပ်သိန်း ၃၇၀ ကျော်၊ လုယူငွေတွေနဲ့ လဲလှယ်ထားတဲ့ အမေရိကန်ဒေါ်လာ ၇၀၀၀ နဲ့တကွ ဖမ်းဆီးရမိခဲ့တယ်လို့ ရဲသတင်းမှာဖော်ပြပါတယ်။ တရားခံ စိုးကျော်ကျော်ဟာ အရေးကြီးငွေလိုအပ်နေတဲ့အတွက် ပြစ်မှုကျူးလွန်ခဲ့ခြင်းဖြစ်ကာ ဘောစေ့နဲ့ ပစ်ရတဲ့ သတ္တုကိုယ်ထည် သေနတ်အတု၊ ဗုံးအတုတို့နဲ့ ပြစ်မှုကျူးလွန်ခဲ့တာ ဖြစ်ကြောင်းနဲ့ ပြစ်မှုကျူးလွန်စဉ် အသုံးပြုခဲ့တဲ့ ယာဉ်နံပါတ်အတုတို့ကို ရှာဖွေ ဖော်ထုတ်သိမ်းဆည်းရမိခဲ့တယ်လို့ ရဲသတင်း ထုတ်ပြန်ချက်အရ သိရပါတယ်။
2 years Ago
Up