ဓားပြတိုက်

December 21, 2021

မူဆယ်မြို့တွင် ဓားပြတိုက်ပြီး သေနတ်ပစ်ဖောက်၊ လူ ၁ ဦး ဒဏ်ရာရ

ရှမ်းပြည်နယ်မြောက်ပိုင်း မူဆယ်မြို့မှာ ဒီဇင်ဘာ ၂၀ ရက် ညပိုင်းက ဓားပြတိုက်ပြီး သေနတ် ၃ ချက်ပစ်ဖောက်ခဲ့လို့  ငွေလဲလုပ်ကိုင်နေသူ အမျိုးသားတယောက် ထိခိုက်ဒဏ်ရာရသွားပါတယ်။ 

မူဆယ်မြို့ စည်ပင်သာယာဈေးကြီးအနီး နာရီစင်နားမှာ ငွေလဲလုပ်ငန်းလုပ်နေတဲ့ ဦးအားလုံတို့ ဇနီးမောင်နှံဟာ မနေ့ည ၆ နာရီကျော် ၇ နာရီ လောက်မှာ အိမ်ပြန်မလို့ လုပ်နေတုန်း အာရာဖတ်ကားတစ်စီးက သူတို့ရှေ့မှာ ပိတ်ရပ်ကာ ငွေတွေ လုယူသွားတယ်လို့  အခင်းဖြစ်ရာနေရာအနီးမှာနေထိုင်တဲ့ မူဆယ်မြို့ခံတယောက်က ပြောပါတယ်။

“ဦးအားလုံတို့က နာရီစင်နားက တိုင်းရွှေလီဟိုတယ်ရှေ့မှာ ခုံလေးချပြီးတရုတ်ငွေနဲ့ မြန်မာငွေလဲတဲ့အလုပ်လုပ်တယ်။ မနေ့ညနေက မိုးချုပ်လာတော့ သူတို့လည်း အလုပ်သိမ်းတာပေါ့။ အိမ်ပြန်မလို့လဲလုပ်ရော အာရာဖတ်ကားတစ်စီးက သူတို့ရှေ့မှာပိတ်ရပ်တယ်။ အနောက်မှာလည်း နောက်ထပ်ကား ၂ စီးလိုက်လာတယ်။ သူတို့တဖွဲ့တည်း ဟုတ်မဟုတ်တော့မသိဘူး။ လူ ၃-၄ ယောက် သေနတ်ကိုင်ပြီးကားပေါ်ကဆင်းလာတယ်။ ပြီးတော့ သူတို့ဆီက ငွေထုတ် နှစ်ထုတ်ယူသွားတယ်။ သေနတ် သုံးချက်လည်းဖောက်တယ်၊ ဦးအားလုံက ပခုံး မှာသေနတ်ရှပ်ထိသွားတယ်တဲ့၊ ဘယ်လိုလုပ်ထိသွားလဲဆိုတာတော့အသေးစိတ်မသိဘူး၊ အခုဆေးရုံ မှာ။”

အခင်းဖြစ်တဲ့နေရာဟာ ခါတိုင်းဆို ညဈေးတန်းရှိလို့လူစည်ကားပေမဲ့ မနေ့ကတော့  ကိုဗစ်-၁၉ ကာလပိတ်ထားတာကြာလို့ လူရှင်းနေသလို မိုးလည်းချုပ်ခါက လူသိပ်မသိကြောင်း၊ အဲဒီနားမှာ နယ်မြေရဲတပ်ဖွဲ့လုံခြုံရေး ရဲကင်းရှိပေမဲ့ ရဲတွေလည်း လာမထိုင်တာကြာပြီမို့ သူခိုးဓားပြတွေ အတင့်ရဲနေတာလို့ ဒေသခံကပြောပါတယ်။

စစ်အာဏာသိမ်းမှု၊ ကိုဗစ်ကူးစက်ရောဂါ၊ တရုတ်နယ်စပ်တံခါးလည်းပိတ်ထားမှုတွေကြောင့် မူဆယ်မှာ ဒေသခံတွေ အရောင်းအဝယ်မဖြစ် စီးပွားရေးကျပ်တည်းနေကြပြီး လုယက်မှု၊ ခိုးမှုတွေလည်း မကြာခဏရှိနေပေမဲ့ သက်ဆိုင်ရာက ဖမ်းဆီးအရေးယူနိုင်ခြင်းမရှိပါဘူး။ 

မူဆယ်မြို့နယ်ထဲမှာ ပြည်သူ့စစ်၊ TNLA ပလောင်တပ်၊  KIA ကချင်တပ်၊ SSPP ရှမ်းတပ်စတဲ့လက်နက်ကိုင်အဖွဲ့တွေ လှုပ်ရှားနေပေမဲ့ အခွန်လာကောက်တာကလွဲလို့ ပြည်သူ တွေရဲ့ လုံခြုံရေးကို မစောင့်ရှောက်ပေးနိုင်ကြောင်း၊ ဒါကြောင့် သတိဝီရိယနဲ့ နေ နေကြရတယ်လို့ မူဆယ်ဒေသခံက ပြောပါတယ်။

4 weeks Ago

October 23, 2021

မတ္တရာမြို့နယ်၌ စစ်ကောင်စီတပ်က ပြည်သူ ၁ ဦး၏ နေအိမ်ကို ဝင်ရောက် ဓားပြတိုက်

မန္တလေးတိုင်း၊ မတ္တရာမြို့နယ်မှာ အကြမ်းဖက်စစ်တပ်က ပြည်သူတယောက်ရဲ့ နေအိမ်ကို  အောက်တိုဘာ ၂၂ ရက်နေ့က ဝင်ရောက် အိမ်ရှင်မိသားစုကို ရိုက်နှက်ပြီး  ငွေတွေ ဓားပြတိုက်သွားတယ်လို့ ဒေသခံတွေက ပြောပါတယ်။

ကျောက်ဆည်လေးရွာက ရွာသားတယောက်ဆီကနေ  မနေ့ညပိုင်းက ငွေကျပ် ၃ သိန်းကို ဓားပြတိုက်သွားခဲ့တာပါ။

ဒေသခံတယောက်က “မတ္တရာ မန္တလေးလမ်းဘေး မြင့်ကုမ္ပဏီဘက်ကနေပြီး ကားတစီး၊ ဆိုင်ကယ် ၈ စီးနဲ့ ရွာကို ရောက်လာတယ်။ ရှပ်တားဘောင်အောက်က ကိုမောင်မြင့်အိမ်ကို ဝင်ပြီး ဝါ ရောင်းရငွေ ၃ သိန်းကို ယူသွားတယ်။ ကိုမောင်မြင့်ရဲ့ သမက်ကိုလည်း ရိုက်နှက်ခဲ့တယ်” လို့  ပြောပါတယ်။

ဓားပြတိုက်ခံရတဲ့ အိမ်ဟာ နိုင်ငံရေးနဲ့ပတ်သက်တာမရှိဘဲ  ဝါစိုက်ပျိုးတဲ့ လုပ်ငန်း လုပ်ကိုင်ကြသူတွေဖြစ်ပြီး ဝါပေါ်ချိန်(ဝါရောင်း)တာကို သတင်းရလို့ လာပြီး ဓားပြတိုက်သွားတာလို့ပဲ ထင်တယ်လို့ ဒေသခံတယောက်က ပြောပါတယ်။

စစ်ကောင်စီတပ်တွေက ည ၈ နာရီကျော်လောက်က လာရောက်ခဲ့ကြတာဖြစ်ပြီး ဖမ်းဆီးတာတော့ မရှိဘဲ ငွေတွေယူပြီးနောက် စစ်သားတွေ ပြန်သွားကြတယ်လို့ ဒေသခံတွေက ပြောပါတယ်။

3 months Ago
More News
Up