ဓားထောက်လုယက်ခံရ

May 15, 2020

စပါးကွင်းလယ်လူ ဒယ်လီအလီ ဓားထောက်လုယက်ခံရ

တော့တမ်ဟင်အသင်းရဲ့ အင်္ဂလန်လက်ရွေးစင်ကွင်းလယ်ကစားသမား ဒယ်လီအလီဟာ မေ ၁၃ ရက်နေ့ အစောပိုင်းက ဓားထောက်လုယက်မှုတခုနဲ့ ရင်ဆိုင်ခဲ့ရပါတယ်။  လက်နက်ကိုင်အမျိုးသားနှစ်ဦးဟာ လန်ဒန်မြောက်ပိုင်းမှာရှိတဲ့ အသက် ၂၄ နှစ်အရွယ်ကစားသမားရဲ့အိမ်အတွင်းဝင်ရောက်ပြီး လုယက်မှုကျူးလွန်သွားခဲ့တာပါ။  အလီနဲ့ သူ့အစ်ကိုဖြစ်သူတို့ဟာ လက်တွဲဖော်တွေနဲ့အတူ အိမ်ထဲမှာနေထိုင်နေကြတာဖြစ်ပြီး ဒီဖြစ်စဉ်အတွင်း လုယက်သူတွေဟာ အလီကို ထိုးကြိတ်ခြိမ်းခြောက်ကာ နာရီတွေအပါအဝင် ရတနာတွေကို ယူဆောင်သွားခဲ့ကြတယ်လို့ သိရပါတယ်။ အထိုးခံရမှုကြောင့် စပါးကွင်းလယ်လူဟာ မျက်နှာမှာ အသေးစားဒဏ်ရာတွေလည်း ရရှိခဲ့ပါတယ်။  ဒီဖြစ်စဉ်နဲ့ပတ်သက် စီစီတီဗွီမှတ်တမ်းတွေကို  ရဲတပ်ဖွဲ့ထံ ပေးအပ်ထားပြီး ဝိုင်းဝန်းအားပေးခဲ့ကြသူတွေကို ကျေးဇူးတင်တယ်လို့ အလီက တွစ်တာစာမျက်နှာကတဆင့် ပြောကြားလိုက်ပါတယ်။ “သတင်းမေးခဲ့သူတွေအားလုံးကို ကျေးဇူးတင်ပါတယ်။ ဒါဟာ ထိတ်လန့်စရာကောင်းတဲ့ ကိစ္စရပ်ဖြစ်ပေမယ့် ကျနော်တို့အားလုံး အဆင်ပြေပါတယ်။ အားပေးမှုတိုင်းအတွက်လည်း ကျေးဇူးတင်ပါတယ်။” ဒီဖြစ်စဉ်နဲ့ပတ်သတ်လို့ စုံစမ်းစစ်ဆေးမှုတွေဆောင်ရွက်နေဆဲဖြစ်ပြီး တဦးတယောက်ကိုမှ ဖမ်းဆီးနိုင်ခြင်း မရှိသေးပါဘူးလို့ ရဲတပ်ဖွဲ့က ထုတ်ပြန်ကြေညာထားပါတယ်။ စပါးအသင်းကလည်း ဒီဖြစ်စဉ်နဲ့ပတ်သက်တဲ့ ရဲတပ်ဖွဲ့ရဲ့စုံစမ်းမှုတွေကို အကူအညီဖြစ်စေနိုင်မယ့် သတင်းပေးမှုအားလုံးကို ကြိုဆိုနေပါတယ်လို့ ထုတ်ပြန်ကြေညာပါတယ်။  အလီမတိုင်ခင် ပြီးခဲ့တဲ့ မတ်လကလည်း စပါးနောက်ခံလူ ဗာတွန်ဂန်ရဲ့နေအိမ်မှာ ဓားထောက်လုယက်မှုတခု ဖြစ်ပွားခဲ့ပါသေးတယ်။ 
11 months Ago
Up