ဓာတ်ခွဲနမူနာ ၃၃၅ ခု

June 7, 2020

ဓာတ်ခွဲနမူနာ ၃၃၅ ခု စစ်ဆေးချက်အရ ကိုဗစ်-၁၉ အတည်ပြုလူနာသစ် မတွေ့

ဇွန် ၆ ရက်နေ့အတွက် အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)က ဒုတိယသုတ်အဖြစ် ဓာတ်ခွဲနမူနာ ၃၃၅ ခုကို စစ်ဆေးခဲ့ရာမှာ ကိုဗစ်-၁၉ ရောဂါ အတည်ပြုလူနာသစ် မတွေ့ဘူးလို့ ကျန်းမာရေးဝန်ကြီးဌာန ဒီနေ့မနက် ၈ နာရီမှာ ထုတ်ပြန်ပါတယ်။ မနေ့ညက ပထမအသုတ်အဖြစ် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်)က ဓာတ်ခွဲနမူနာ ၁,၁၃၈ ခု၊ ဆေးသုတေသနဦးစီးဌာနက ဓာတ်ခွဲနမူနာ  ၁၆၁  ခု၊ ပြည်သူ့ကျန်းမာရေး ဓာတ်ခွဲမှုဆိုင်ရာဌာန (မန္တလေး) က ဓာတ်ခွဲနမူနာ ၂၇၇ ခုနဲ့  ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) က ဓာတ်ခွဲနမူနာ ၂၃ ခု စုစုပေါင်း  ၁,၅၉၉ ခု ကို စစ်ဆေးပြီးစီးခဲ့ရာမှာ လူနာသစ် ၄  ဦး တွေ့ရှိခဲ့တယ်လို့ ဆိုပါတယ်။ လူနာသစ် ၄ ဦးဟာ အိန္ဒိယနိုင်ငံက ပြန်လာသူတွေဖြစ်ပြီး မြောက်ဥက္ကလာပမြို့နယ်နေ အသက် ၃၂ နှစ်အရွယ် အမျိုးသမီးတစ်ဦး၊ ပျဉ်းမနားမြို့နယ်မှာ နေထိုင်ကြသူတွေဖြစ်တဲ့ အသက် ၆၉ နှစ်အရွယ် အမျိုးသမီးတစ်ဦး၊ အသက် ၇၂ နှစ်အရွယ်အမျိုးသားတစ်ဦးနဲ့ အသက် ၃၈ နှစ်အရွယ် အမျိုးသားတစ်ဦးတို့ ဖြစ်ကြပါတယ်။ မြန်မာနိုင်ငံမှာ ဇွန် ၇ ရက် မနက် ၈ နာရီအထိ ကိုဗစ်-၁၉ အတည်ပြုလူနာစုစုပေါင်း ၂၄၀ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ  ၁၅၆ ဦးရှိပြီး  ဒီအထဲက ၁၃၆ ဦးကို ဆေးရုံမှ ဆင်းခွင့်ပြုခဲ့ပြီးဖြစ်တယ်လို့ ကျန်းမာရေးဌာန ထုတ်ပြန်ချက်အရ သိရပါတယ်။ ကမ္ဘာတဝန်းမှာတော့ ဒီနေ့မနက် ၈ နာရီခွဲအထိ ကိုဗစ်-၁၉ အတည်ပြုလူနာ ၆ ဒသမ ၉ သန်းကျော်နဲ့ သေဆုံးသူ ၄ သိန်းကျော်၊ ရောဂါပြန်လည်သက်သာလာသူ ၃ ဒသမ ၄ သန်းကျော် ရှိတယ်လို့ သိရပါတယ်။
1 year Ago
Up