ဓာတ်ခွဲနမနူနာ

August 27, 2020

မြောက်ဦး၊ ဘူးသီးတောင်နှင့် ဒဂုံမြို့သစ်တောင်ပိုင်းတို့တွင် ပြည်တွင််းကူးစက်ခံ လူနာသစ် ၆ ဦး တွေ့ရှိ

မြောက်ဦး၊ ဘူးသီးတောင်နဲ့ ဒဂုံမြို့သစ်တောင်ပိုင်းတို့မှာ ပြည်တွင်း ကူးစက်ခံရတဲ့ ကိုဗစ်-၁၉ လူနာသစ် ၆ ဦး တွေ့ရှိတယ်လို့ ကျန်းမာရေးနဲ့အားကစားဝန်ကြီးဌာနက ဒီနေ့မနက် ၈ နာရီ ထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၈၄၅ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) က ၁၆၂ ခုနဲ့ ကျောက်ဖြူမြို့ ပြည်သူ့ဆေးရုံကြီးက ၂၄ ခုတို့အား စစ်ဆေးခဲ့ပြီး ကိုဗစ်-၁၉ လူနာသစ် ၆ ဦး တွေ့ရှိခဲ့တာပါ။ လူနာသစ် ၆ ဦးမှာ ရခိုင်ပြည်နယ် မြောက်ဦးမြို့က ၃ ဦး၊ ဘူးသီးတောင်မြို့က ၂ ဦးနဲ့  ဒဂုံမြို့သစ်တောင်ပိုင်းက ၁ ဦးတို့ဖြစ်ပြီး ပြည်ပခရီးသွားရာဇဝင်မရှိဘဲ အသွားအလာကန့်သတ်ထားသူတွေနဲ့ စောင့်ကြည့်လူနာတွေဖြစ်တယ်လို့ သိရပါတယ်။ ရခိုင်ပြည်နယ်က ၅ ဦးကတော့ ကိုဗစ်-၁၉ အတည်ပြုလူနာတွေနဲ့ ထိတွေ့မှုရှိခဲ့ပြီး ဒဂုံမြို့သစ်တောင်ပိုင်းက ၁ ဦးကတော့ ထိတွေ့မှုမရှိဘဲ စစ်တွေကို ခရီးသွားရာဇဝင်ရှိခဲ့တယ်လို့ ဆိုပါတယ်။ သူတို့အားလုံးကို သက်ဆိုင်ရာမြို့နယ် ဆေးရုံတွေမှာ ဆေးကုသမှု ခံယူစေမယ်လို့ ဆိုပါတယ်။ မနေညက ဓာတ်ခွဲနမူနာ ၁,၂၆၅ ခုစစ်ဆေးရာမှာလည်း ပြည်ပခရီးသွားရာဇဝင်မရှိတဲ့ ရခိုင်ပြည်နယ် စစ်တွေမြို့နယ်က ၃ ဦး၊ ကျောက်တော်မြို့နယ်က ၂ ဦးနဲ့ စစ်ကိုင်းတိုင်းကလေးမြို့က အမေရိကန်ပြန် အသက် ၃၃ နှစ်အရွယ် အမျိုးသမီး ၁ ဦးတို့ ဖြစ်ကြပါတယ်။ ဩဂုတ် ၂၇ ရက် မနက် ၈ နာရီအထိ  မြန်မာနိုင်ငံမှာ ကိုဗစ်-၁၉  ရောဂါဓာတ်ခွဲ အတည်ပြုလူနာ ၅၈၆ ဦး၊ သေဆုံးသူ ၆ ဦး၊  နှစ်ကြိမ်ဆက်တိုက် ပိုးမတွေ့ရှိလို့ ရောဂါပိုးကင်းစင်လာသူ ၃၄၅ ဦး၊ ဆေးရုံးမှ ဆင်းခွင့်ပြုခဲ့သူ ၃၃၉ ဦးနဲ့ စောင့်ကြည့်လူနာအသစ် ၄၇ ဦးရှိပါတယ်။ ရခိုင်ပြည်နယ်ထဲမှာတော့ ဩဂုတ် ၁၆ ရက်ကနေ ဒီနေ့မနက်အထိ ကိုဗစ်-၁၉ လူနာ ၁၈၄ ဦး တွေ့ရှိထားပါတယ်။
8 months Ago

August 21, 2020

စစ်တွေမြို့တွင် ပြည်ပခရီးသွားရာဇဝင်မရှိသည့် ကိုဗစ်-၁၉ လူနာသစ် ၁၀ ဦး တွေ့ရှိ

ရခိုင်ပြည်နယ်၊ စစ်တွေမြို့မှာ ပြည်ပခရီးသွားရာဇဝင်မရှိတဲ့ ကိုဗစ်-၁၉ လူနာသစ် ၁၀ ဦး တွေ့ရှိတယ်လို့ ကျန်းမာရေးနဲ့အားကစားဝန်ကြီးဌာနက ဒီနေ့ည ၈ နာရီ ထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) က ဓာတ်ခွဲနမူနာ ၃၇၆ ခု၊ ဆေးသုတေသနဦးစီးဌာနက  ၂၅၆ ခုနဲ့ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) က ၁၁၂ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) က ၁၈၄ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (စစ်တွေ) က ၃၆ ခု၊ စုစုပေါင်း ဓာတ်ခွဲနမူနာ ၉၆၄ ခုအား ဒီနေ့ ညနေ စစ်ဆေးပြီးစီးခဲ့ပြီး အတည်ပြုလူနာသစ် ၁၀ ဦး တွေ့ရှိခဲ့တာပါ။ လူနာသစ် ၁၀ ဦးမှာ ကိုဗစ်-၁၉ အတည်ပြုလူနာတွေနဲ့ ထိတွေ့ခဲ့သူ ၅ ဦး၊ ထိတွေ့မှုမရှိခဲ့သူ ၅ ဦးတို့ဖြစ်ပြီး သူတို့အားလုံးဟာ အသွားအလာ ကန့်သတ်ထားသူတွေနဲ့ စောင့်ကြည့်လူနာတွေဖြစ်တယ်လို့ ဆိုပါတယ်။ သူတို့ကို စစ်တွေဆေးရုံမှာ ဆေးကုသမှု ခံယူစေမယ်လို့ ကျန်းမာရေးဝန်ကြီးဌာနက ထုတ်ပြန်ပါတယ်။ မြန်မာနိုင်ငံမှာ ဒီနေ့ည ၈ နာရီအထိ ကိုဗစ်-၁၉ အတည်ပြုလူနာ ၄၁၉ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ ၃၃၇ ဦးအနက် ဆေးရုံမှ ဆင်းခွင့်ပြုခဲ့ပြီးသူ ၃၃၁ ဦးနဲ့ စောင့်ကြည့်လူနာအသစ် ၄၅ ဦးရှိပါတယ်။ ကမ္ဘာတဝန်းမှာတော့ ဒီနေ့ညအထိ ကိုဗစ်-၁၉ အတည်ပြုလူနာ ၂၂ ဒသမ ၉ သန်းကျော်၊ သေဆုံးသူ ၇၉၇၀၀၀ ကျော်နဲ့ ရောဂါပိုးကင်းစင်လာသူ ၁၅ ဒသမ ၅ သန်းကျော် ရှိပြီလို့ သိရပါတယ်။
8 months Ago
Up