ဒေါ်အောင်ဆန်းစုကြည်

January 14, 2022

ရဟတ်ယာဉ်၀ယ်ယူမှုနှင့်ပတ်သက်သည့် အဂတိအမှု ၅ မှုဖြင့် နိုင်ငံအကြီးအကဲများကို ရုံးထုတ်

နိုင်ငံတော်သမ္မတ ဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့အပေါ် စစ်ကောင်စီက စွပ်စွဲထားတဲ့ ရဟတ်ယာဉ်၀ယ်ယူမှုနဲ့ ပတ်သက်တဲ့ အဂတိအမှု ၅ မှုကို ဇန်နဝါရီ ၁၄ ရက် ဒီကနေ့  ဇမ္ဗူသီရိအထူးရုံးမှာ  ရုံးထုတ်စစ်ဆေးခဲ့ပါတယ်။

ဒီနေ့ရုံးထုတ်မှာ အဂတိအမှု ၃ မှုအတွက် ရှေ့နေတွေကို ကိုယ်စားလှယ်လွှဲစာတင်ဖို့ တရားသူကြီးက ပြောဆိုခဲ့ပြီး အမှုတွေအတွက် ခွဲခြားတာ၀န်ယူဖို့ တိုင်ပင်နေဆဲဖြစ်လို့ ကိုယ် စားလှယ်စာမတင်နိုင်သေးကြောင်း စွပ်စွဲခံရသူတွေဘက်က တင်ပြတာကို တရားရုံးက လက်ခံခဲ့တယ်လို့ တရားရုံးနဲ့နီးစပ်သူက ပြောပါတယ်။

သဘာဝဘေးအန္တရာယ် ကာကွယ်ရေးလုပ်ငန်းတွေမှာ အသုံးပြုဖို့ ၂၀၂၁ ခုနှစ်က ရဟတ်ယာဉ်တစ်စီး ဝယ်ယူတာ၊ သက်တမ်းတိုးတာ၊ ပြုပြင်ထိန်းသိမ်းတာတွေနဲ့ပတ်သက်ပြီး နိုင်ငံတော်သမ္မတ ဦး၀င်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ နဲ့ စစ်ကောင်စီက ထပ်မံ တရားစွဲဆိုထားတာဖြစ်ပါတယ်။

ဒါ့အပြင် ဒီနေ့ရုံးချိန်းမှာ နေပြည်တော်ရှိ လရောင်တောစီမံကိန်းအတွက် မြေနေရာချထားမှုနဲ့ ရန်ကုန်ရှိ ဒေါ်ခင်ကြည်ဖောင်ဒေးရှင်း အဆောက်အအုံနဲ့ပတ်သက်တဲ့ အမှုတွေအတွက် ရန်ကုန်တိုင်း စာရင်းစစ်ချုပ် ဒေါ်ခင်မာချိုကို စစ်ဆေးခဲ့တယ်လို့ တရားရုံးနဲ့ နီးစပ်သူ တစ်ဦးက ပြောပါတယ်။

ဒီအမှုတွေနဲ့ပတ်သက်ပြီး လာမယ့် ဇန်နဝါရီ ၂၁ ရက် ရုံးချိန်းမှာ လိုပြသက်သေအဖြစ် ဒေါက်တာသန့် သော်ကောင်းကို စစ်ဆေးမယ်လို့လည်း ဆိုပါတယ်။

နိုင်ငံတော်အတိုင်ပင်ခံပုဂ္ဂိုလ်အပေါ် စစ်ကောင်စီက အမှုပေါင်း ၁၃ မှုနဲ့ တရားစွဲတာဖြစ်ပြီး  ဒီအထဲက စစ်ဆေးပြီး အမှု ငါးခုအတွက် စီရင်ချက်မှတ်ထားတဲ့  ထောင်ဒဏ်က စုစုပေါင်း  ၆ နှစ် ရှိနေပြီဖြစ်ပါတယ်။  

1 week Ago

January 11, 2022

နိုင်ငံတော်အတိုင်ပင်ခံပုဂ္ဂိုလ်ကို စစ်ကောင်စီက ထောင်ဒဏ် ၄ နှစ် ထပ်ချသည့်အ‌ပေါ် ပြင်သစ် ရှုတ်ချ

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အာဏာသိမ်းစစ်ကောင်စီက ထောင်ဒဏ် ၄ နှစ် ထပ်မံချမှတ်ခဲ့တဲ့အပေါ်  ပြင်သစ်နိုင်ငံအနေနဲ့ ရှုတ်ချကြောင်း ထုတ်ပြန်လိုက်ပါတယ်။

ပြင်သစ်နိုင်ငံခြားရေးဌာန ပြောရေးဆိုခွင့်ရှိသူရဲ့ ထုတ်ပြန်ကြေညာချက်မှာတော့ ခုလို အတုအယောင်တရားစီရင်မှုဟာ အလွန်စိုးရိမ်စရာကောင်းနေပြီဖြစ်တဲ့ နိုင်ငံရေးအခြေအနေကို ပိုမိုပြီးဆိုးရွားစေတယ်လို့ ဆိုပါတယ်။

ဥရောပသမဂ္ဂနဲ့ အဖွဲ့ဝင်နိုင်ငံတွေက ဒီဇင်ဘာ ၆ ရက်မှာ သတိပေးထားပြီးဖြစ်တဲ့အတိုင်း မြန်မာနိုင်ငံရဲ့ အကျပ်အတည်းမှ လွတ်မြောက်ရေးလမ်းစဟာ ပဋိပက္ခမှာ ပါဝင်သူအားလုံး ပါဝင်တဲ့ နိုင်ငံရေးတွေ့ဆုံဆွေးနွေးမှု၊ ကယား၊ ကရင်နဲ့ ချင်းပြည်နယ်တွေမှာ စစ်တပ်က အရပ်သားတွေအပေါ် ကျူးလွန်တဲ့တိုက်ခိုက်မှုတွေကို ချက်ချင်းရပ်ဆိုင်းဖို့နဲ့  ၂၀၂၁ ခုနှစ်  ဖေဖော်ဝါရီ ၁ ရက်ကစ ဖမ်းဆီးထားတဲ့ နိုင်ငံရေးအကျဉ်းသားအားလုံးကို ခြွင်းချက်မရှိ လွှတ် ပေးဖို့တို့ ဖြစ်တယ်လို့လည်း ကြေညာချက်ထဲမှာ ဖော်ပြပါတယ်။

ဒါ့အပြင် အားလုံးပါဝင်တဲ့ နိုင်ငံရေးဆွေးနွေးမှု အကောင်အထည်ဖော်ရေး အပါအဝင် အာဆီယံ သဘောတူညီချက်ငါးချက်ကို အကောင်အထည်ဖော်ဖို့လည်း ပြင်သစ်နိုင်ငံအနေနဲ့ အပြည့်အဝ ထောက်ခံအားပေးနေတယ်လို့ ဆိုပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စစ်ကောင်စီက တရားစွဲထားတဲ့ အမှု ၃ မှုအတွက် မနေ့က ဇန်နဝါရီ ၁၀ ရက်မှာ နေပြည်တော်ရှိ ဇမ္ဗူသီရိမြို့နယ် အထူးတရားရုံးမှာ   ထောင်ဒဏ် ၄ နှစ် ထပ်မံ ချမှတ်လိုက်တာပါ။

စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီ ၁ ရက်မှာ ဒေါ်အောင်ဆန်းစုကြည် နေအိမ်အတွင်းကနေ တရားမဝင် စကားပြောစက် ၁၀ လုံးနဲ့ Jammer ၁ စုံတို့ကို တွေ့ရှိတယ် ဆိုပြီး ဆက်သွယ်ရေးဥပဒေ ပုဒ်မ ၆၇၊ ပို့ကုန်သွင်းကုန်ဥပဒေပုဒ်မ ၈ တို့နဲ့ တရားစွဲဆိုထားတာပါ။

ပြီးခဲ့တဲ့ဒီဇင်ဘာ ၆ ရက်ကလည်း  ဒေါ်အောင်ဆန်းစုကြည်အပေါ် စွဲဆိုထားတဲ့အမှုတွေထဲ ပုဒ်မ ၅၀၅ (ခ) အမှုနဲ့ သဘာဝဘေးအမှုတို့အတွက် စစ်ကောင်စီတရားရုံးက  ထောင်ဒဏ် ၄ နှစ်စီချမှတ်ခဲ့ပြီး ထောင်ဒဏ် ၂ နှစ်စီ လျှော့ပေါ့ပေးခဲ့ပါတယ်။

လတ်တလောမှာတော့ အမိန့်ချတဲ့ အမှုသုံးခုအတွက် ထောင်ဒဏ် ၄ နှစ်နဲ့ဆိုပါက ဒေါ် အောင်ဆန်းစုကြည်အနေနဲ့ အမှုငါးခုအတွက် ကျခံရမယ့် စုစုပေါင်းထောင်ဒဏ်ဟာ ၆ နှစ်ရှိပြီ ဖြစ်ပါတယ်။ နိုင်ငံတော်အတိုင်ပင်ခံပုဂ္ဂိုလ်အပေါ် စစ်ကောင်စီက အမှုပေါင်း ၁၃ မှုနဲ့ တရားစွဲတာဖြစ်ပြီး ဒေါ်အောင်ဆန်းစုကြည်ကတော့ အပြစ်မရှိကြောင်း ငြင်းဆိုထားပါတယ်။

2 weeks Ago
More News
Up