ဒေါ်လာဈေး

October 3, 2022

ဒေါ်လာနှင့် ရွှေစျေး ပြန်လည်မြင့်တက်၊ စက်သုံးဆီဈေးနှုန်းကျဆင်း

စက်တင်ဘာ ပထမပတ်က စတင်ပြီး ဆက်တိုက်ကျဆင်းလာခဲ့တဲ့ မြန်မာ့ရွှေဈေးဟာ အောက်တိုဘာ ၁ ရက်နေ့မှာ ၂၃ သိန်းဝန်းကျင်ထိ ကျခဲ့ပြီး ဒီနေ့ညနေပိုင်းမှာတော့ ကျပ် ၂၆ သိန်းဝန်းကျင်အထိ ဈေးပြန်လည်မြင့်တက်လာပြန်ပါတယ်။ 

ရန်ကုန်ဈေးကွက်မှာ ဒီနေ့ ညနေပိုင်းဈေးအရ အခေါက်ရွှေ ၁ ကျပ်သားကို ၂၅,၈၅၀,၀၀၀ ကျပ်၊ ၁၅ ပဲရည် ၁ ကျပ်သားကို ၂,၄၃၃,၀၀၀ ကျပ်ဝန်းကျင်နဲ့ အရောင်းအဝယ်ပြုလုပ်နေကြတယ်လို့ သိရပါတယ်။  

နှစ်ရက်အတွင်း မြန်မာရွှေဈေးက ၁ ကျပ်သားကို ကျပ် ၃ သိန်းဝန်းကျင် ပြန်လည်မြင့်တက်လာခဲ့တာပါ။ 

အလားတူ ဒေါ်လာငွေလဲနှုန်းကလည်း ပြင်ပငွေကြေးဈေးကွက်မှာ ပြီးခဲ့တဲ့ အောက်တိုဘာ ၁ ရက်နေ့က ၁ ဒေါ်လာကို မြန်မာကျပ် ၂,၅၀၀ ဝန်းကျင်ထိ အကျရှိခဲ့ပေမဲ့  တရိပ်ရိပ်နဲ့ ပြန်မြင့်တက်လာပြီး ဒီနေ့ညနေပိုင်း ဈေးအရ ၁ ဒေါ်လာကို ကျပ် ၂,၉၀၀ ဝန်းကျင်ရှိတယ်လို့ နိုင်ငံခြားငွေကြေးလဲလှယ်သူတွေဆီက သိရပါတယ်။ 

ဈေးမတည်ငြိမ်တာကြောင့် ပြင်ပငွေကြေးဈေးကွက်အတွင်းမှာတော့ အများစုက အရောင်းအဝယ်တွေ ရပ်နားထားကြတယ်လို့ သိရပါတယ်။ 

မြန်မာကျပ်ငွေနဲ့ ဒေါ်လာငွေလဲနှုန်း ပြန်လည်ဈေးမာလာခဲ့ပေမဲ့ ပြည်တွင်း စက်သုံးဆီဈေးနှုန်းတွေကတာ့ ဆက်လက်ကျဆင်းနေပါတယ်။ 

စက်သုံးဆီ တင်သွင်း၊ သိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ဒီနေ့ အောက်တိုဘာ ၃ ရက်နေ့ ရန်ကုန်ဈေးကွက်အတွက် လက်လီဈေး 92 Ron တလီတာကို ၁၉၅၀ ကျပ်၊ 95 Ron တလီတာကို ၂၀၂၀ ကျပ်၊ ဒီဇယ်တလီတာကို ၂၃၆၅ ကျပ်နဲ့ ပရီမီယမ်ဒီဇယ် တလီတာကို ၂၄၅၀ ကျပ်သတ်မှတ်ထားပါတယ်။ 

အဲဒီသတ်မှတ်ဈေးအရ  ပြည်တွင်းစက်သုံးဆီဈေးတွေဟာ သီတင်းပတ် နှစ်ပတ်အတွင်း တလီတာကို ကျပ် ၃၀၀ ကျော် ၄၀၀  နီးပါး ပြန်လည်ကျဆင်းလာခဲ့တာ ဖြစ်ပါတယ်။ 

2 months Ago

September 27, 2022

ကမ္ဘာ့ရွှေဈေးနှင့် ဒေါ်လာဈေးအကျကြောင့် ပြည်တွင်းရွှေဈေး ထပ်မံကျဆင်း

ကမ္ဘာ့ရွှေဈေးနဲ့ ပြင်ပဒေါ်လာပေါက်ဈေး ဆက်လက်ကျဆင်းနေတာကြောင့်  ပြည်တွင်းရွှေဈေး ကျပ် ၂၇ သိန်း ဝန်းကျင်ထိ ထပ်မံကျဆင်းလာပါတယ်။

ပြီးခဲ့တဲ့ သီတင်းပတ်မှာ ပြင်ပဒေါ်လာပေါက်စျေးက တစ်ဒေါ်လာကို ၃၂၀၀ ကျပ် ဝန်းကျင်၊ အခေါက်ရွှေဈေးက  တစ်ကျပ်သားကို ကျပ် ၂၈ သိန်း အထက်မှာရှိခဲ့ပါတယ်။ 

ဒီနေ့ စက်တင်ဘာ ၂၇ ရက်  မွန်းလွဲပိုင်းမှာတော့ ပြင်ပဒေါ်လာပေါက်စျေးက တစ်ဒေါ်လာကို ၃၀၈၀ ကျပ် ၊ အခေါက်ရွှေဈေးက  တစ်ကျပ်သားကို ကျပ် ၂၇ သိန်း ဝန်းကျင်ထိ ကျဆင်းလာခဲ့တာဖြစ်ပါတယ်။

သီတင်းပတ်တစ်ပတ်အတွင်း  တစ်ဒေါ်လာကို မြန်မာငွေ ကျပ် ၁၀၀ ကျော် ၊ ရွှေဈေးက တစ်ကျပ်သားကို ကျပ်တစ်သိန်းကျော် ပြန်လည် ကျဆင်းခဲ့တာပါ။

ကမ္ဘာ့ရွှေစျေးကလည်း ပြီးခဲ့တဲ့သီတင်းပတ်က တစ်အောင်စကို  ၁၆၇၅ ဒေါ်လာ ဝန်းကျင်မှာရှိခဲ့ပြီးတော့  ဒီနေ့ နေ့လည်ပိုင်းမှာ တစ်အောင်စကို ၁၆၃၄ ဒေါ်လာထိ ကျဆင်းလာခဲ့ပြီး တစ်ပတ်အတွင်း  တစ်အောင်စကို ဒေါ်လာ ၄၀ ဝန်းကျင် ကျဆင်းခဲ့ပါတယ်။

“အဓိကကတော့ ဒေါ်လာဈေး ပြန်ကျနေလို့ပါ။ အပြင်ဒေါ်လာဈေး ကျလို့ ရွှေဈေးကျတာပါ။ ကမ္ဘာ့ရွှေဈေး ကျနေတာလည်း ပါပါတယ်။ ဒီနှစ်ခု ဆုံသွားတာပါ။ ဒေါ်လာဈေး အရင်ဒေါ်လာဈေး ပြန်မဖြစ်ရင်တော့ ရွှေဈေးလည်း အရင်ရွှေဈေး ပြန်ဖြစ်ဖို့ မလွယ်ပါဘူး”လို့ ရွှေဆိုင်ပိုင်ရှင်တစ်ဦးက ပြောပါတယ်။

ဒီနေ့ နေ့ခင်းပိုင်း ရန်ကုန်မြို့အတွင်းက ရွှေအရောင်းဆိုင်တွေမှာတော့ အခေါက်ရွှေ တစ်ကျပ်သားကို ၂၇၀၀၀၀၀ ကျပ်၊ ၁၅ ပဲရည် တစ်ကျပ်သားကို ၂၅၄၁၀၀၀ ကျပ်နဲ့ အရောင်းအဝယ် ပြုလုပ်နေကြပါတယ်။

ပြီးခဲ့တဲ့ သြဂုတ် ၃၁ ရက်နေ့ကတော့ အခေါက်ရွှေတစ်ကျပ်သားကို ကျပ် ၃၅ သိန်းအထက်ထိ စံချိန်တင် ရောက်ရှိခဲ့ပြီး၊ ပြင်ပ ဒေါ်လာငွေလဲနှုန်းက ၄၅၀၀ ကျပ်ဝန်းကျင်ထိ မြင့်တက်ခဲ့ပါတယ်။ 

စံချိန်တင်ထိုးတက်နေတဲ့ ရွှေနဲ့ ဒေါ်လာဈေးကို ထိန်းညှိဖို့ ငွေကြေးဈေးကွက်အတွင်းကို ဒေါ်လာသန်း ၂၀၀ ကျော် ထည့်သွင်းခဲ့ပြီး၊ ရွှေဒင်္ဂါးပြားတွေ ထုတ်ရောင်းပေးတဲ့ အစီအစဉ်ကို စစ်ကောင်စီက ဆောင်ရွက်ခဲ့ပြီးတဲ့နောက် ပြင်ပဈေးကွက်မှာ ဒေါ်လာဈေးအထိုက်အလျောက် ပြန်လည်ကျဆင်းလာပြီး၊ ရွှေဈေးလည်းလိုက်ပါကျဆင်းလာတာ ဖြစ်ပါတယ်။

ပြီးခဲ့တဲ့ သြဂုတ် ၃၁ ရက် စျေးကွက်ပေါက်ဈေးနဲ့ ယှဥ်ရင် တစ်လနီးပါးအတွင်း အခေါက်ရွှေ တစ်ကျပ်သားကို ကျပ်  ၈ သိန်းကျော်၊ အမေရိကန်တစ်ဒေါ်လာကို ၁၅၀၀ ကျပ် ဝန်းကျင်ထိ   ပြန်လည်ကျဆင်းခဲ့တာဖြစ်ပါတယ်။

2 months Ago
More News
Up