ဒေါင်းတို့မျိုးဆက်

A d v e r t i s e m e n t With Us

December 15, 2020

ဒေါင်းတို့မျိုးဆက်သံချပ်အဖွဲ့ဝင် ကိုဇေယျာလွင်ကို ထောင်ဒဏ် ၆ လ ထပ်ချ  

တပ်မတော်က ဆက်သွယ်ရေး ဥပဒေ ပုဒ်မ  ၆၆(ဃ)နဲ့ တရားစွဲထားတဲ့  ဒေါင်းတို့မျိုးဆက်သံချပ်အဖွဲ့ဝင် ကိုဇေယျာလွင်ကို  ထောင်ဒဏ် ၆ လ ထပ်မံချမှတ်လိုက်ပြီး သံချပ်ဖျော်ဖြေတဲ့ အမှုတခုထဲကို ထောင်ဒဏ် အကြိမ်ကြိမ်ချနေတာ စုစုပေါင်း ထောင်ဒဏ် ၆ နှစ်အထိရှိနေပြီ ဖြစ်ပါတယ်။ ကိုဇေယျာလွင်ကို ဧရာ၀တီတိုင်း၊ မအူပင်မြို့နယ်တရားရုံးမှာ ဒီကနေ့ ဒီဇင်ဘာလ ၁၅ ရက်မနက်က  ၆ ကြိမ်မြောက်ရုံးထုတ်စစ်ဆေးချိန်မှာ နှစ်ဖက်ကြားနာမှုတွေပြုလုပ်ခဲ့ပြီး ထောင်ဒဏ် ၆ လ အမိန့်ချမှတ်ခဲ့တာပါ။ "တပ်အနေနဲ့ ခုလိုဖြစ်ရပ် တစ်ခုထဲကို မြို့နယ်တွေခွဲပြီး ပုဒ်မတွေ အမျိုးမျိုးနဲ့ တရားစွဲဆိုတာဟာ ရည်ရွယ်ချက်ရှိရှိနဲ့ နိုင်ငံရေးပိုးကို လိုက်သတ်နေတာလို့ မြင်ပါတယ်၊ အစိုးရအနေနဲ့ ဖြစ်စေ၊ တပ်အနေနဲ့ဖြစ်စေ မမှန် မကန် ပြုမှုတာတွေ ရှိလာရင် ကျနော်တို့ နိုင်ငံရေးတက်ကြွလှုပ်ရှားသူတွေအနေနဲ့ အမြဲတမ်းဝေဖန်ထောက်ပြနေမှာ ဖြစ်ပါတယ်"လို့ ထောင်ဒဏ် ၆ လ ချမှတ်ခံရသူ ကိုဇေယျာလွင်က ပြောပါတယ်။ သံချပ်ထိုးတာတွေနဲ့ပတ်သက်ပြီး ခုလိုတရားစွဲဆိုခံရတဲ့အပေါ် ကြောက်ပြီး နောက်ဆုတ်သွားမှာမဟုတ်ဘဲ သံချပ်တွေဆက်ရှိနေဦးမှာဖြစ်တယ်လို့ ဆိုပါတယ်။ မအူပင်တရားရုံးက ထောင်ဒဏ် ၆ လ ထပ်ချမှတ်ခဲ့လို့ အရင်ကပြစ်ဒဏ်ချမှတ်ခံထားရတဲ့ ထောင်ဒဏ် ၅ နှစ် ၆ လပါ ပေါင်းရင် သံချပ်ထိုးလို့ ပြစ်ဒဏ်ချမှတ်ခံထားရတာ ထောင်ဒဏ် ၆ နှစ်ရှိသွားပြီဖြစ်တယ်လို့ ကိုဇေယျာလွင်က ပြောပါတယ်။ ကိုဇေယျာလွင်ကို ဆေးစစ်တာတွေပြုလုပ်ကာ ဒီဇင်ဘာ ၁၆ ရက်နေ့မှာ အင်းစိန်ထောင်ကို ပို့ဆောင်သွားမှာ ဖြစ်တယ်လို့ သိရပါတယ်။ ဇွန်လ ၁၁ ရက်နေ့ကလည်း မအူပင်မြို့နယ်တရားရုံးမှာဘဲ တပ်မတော်က ပုဒ်မ ၅၀၅(က)နဲ့ တရားစွဲဆိုခံရလို့ ဒေါင်းတို့ မျိုးဆက်သံချပ်အဖွဲ့ဝင် ကိုဇေယျာလွင်၊ ကိုပိုင်ရဲသူနဲ့ ကိုပိုင်ဖြိုးမင်း(ခ)ဒီရေတိုး တို့ ၃ ဦးကို  ထောင်ဒဏ် ၁ နှစ် အမိန့်ချမှတ်ခဲ့ပါတယ်။ ဒေါင်းတို့မျိုးဆက်သံချပ်အဖွဲ့ဟာ ၂၀၁၉ ခုနှစ် သင်္ကြန်ကာလအတွင်း ရန်ကုန်တိုင်းနဲ့ ဧရာ၀တီတိုင်းအတွင်းက မြို့နယ်တွေမှာ သံချပ်တွေလှည့်လည်ဖျော်ဖြေခဲ့တာနဲ့ပတ်သက်ပြီး နိုင်ငံတော် အကြည်ညိုပျက်စေမှုအပါအ၀င် ဆက်သွယ်ရေးဥပဒေတွေနဲ့ အကြိမ်ကြိမ် တရား စွဲခံခဲ့ရတာပါ။ သတင်း - မင်းထက်မုန်း (ပုသိမ်)
3 months Ago

December 12, 2020

ဒေါင်းတို့မျိုးဆက် သံချပ်အဖွဲ့ဝင် ကိုဇေယျာလွင်ကို မအူပင်တရားရုံးတွင် ၄ ကြိမ်မြောက် ရုံးထုတ်

ဧရာ၀တီတိုင်း၊ မအူပင်မြို့နယ်တရားရုံးမှာ တပ်မတော်က ၆၆ (ဃ)နဲ့ တရားစွဲခံထားရတဲ့ ဒေါင်းတို့မျိုးဆက်သံချပ်အဖွဲ့ဝင် ကိုဇေယျာလွင်ကို ဒီဇင်ဘာလ ၁၁ ရက်နေ့က ၄ ကြိမ်မြောက် ရုံးထုတ်စစ်ဆေးခဲ့တယ်လို့ သိရပါတယ်။ ၄ ကြိမ်မြောက်ရုံးထုတ်စစ်ဆေးချိန်မှာ နှစ်ဖက်ကြားနာမှုတွေ ပြုလုပ်ခဲ့ပြီး လာမယ့် ၅ ကြိမ်မြောက် ရုံးချိန်းကို  ဒီဇင်ဘာ ၁၄ ရက်နေ့ ပြန်လည်စစ်ဆေးဖို့ ပြန်လည်ချိန်းဆိုခဲ့ပါတယ်။ ဒေါင်းတို့မျိုးဆက် သံချပ်အဖွဲ့က ကိုဇေယျာလွင်ကို ၄ ကြိမ်မြောက် ရုံးထုတ်စစ်ဆေးအပြီး မအူပင်မြို့မရဲစခန်းအချုပ်ကို ပြန်လည်ခေါ်ဆောင်သွားခဲ့ပါတယ်။ မအူပင် မြို့နယ်တရားရုံးမှာ တပ်မတော်က ပုဒ်မ ၅၀၅(က)နဲ့ တရားစွဲဆိုခံရလို့ ဒေါင်းတို့မျိုးဆက် သံချပ်အဖွဲ့ဝင် ၃ ဦးဖြစ်တဲ့ ကိုဇေယျာလွင်၊ ကိုပိုင်ရဲသူနဲ့ ကိုပိုင်ဖြိုးမင်း(ခ) ဒီရေတို တို့ကို ဇွန်လ ၁၁ ရက်နေ့က ရုံးထုတ်ခဲ့ပြီး ထောင်ဒဏ် ၁ နှစ် အမိန့်ချမှတ်ခဲ့ပါတယ်။ ဒေါင်းတို့မျိုးဆက် သံချပ်အဖွဲ့ဟာ ၂၀၁၉ ခုနှစ် သင်္ကြန်ကာလအတွင်း ရန်ကုန်တိုင်းနဲ့ ဧရာ၀တီတိုင်းအတွင်းက မြို့နယ်တွေမှာ သံချပ်တွေ လှည့်လည်ဖျော်ဖြေခဲ့တာနဲ့ပတ်သက်ပြီး နိုင်ငံတော်အကြည်ညိုပျက်စေမှု အပါအ၀င် ဆက်သွယ်ရေးဥပဒေတွေနဲ့ တရားစွဲခံခဲ့ရတာပါ။ သတင်း - မင်းထက်မုန်း(ပုသိမ်)၊ ဓာတ်ပုံ - အောင်မြသန်း (မအူပင်)
3 months Ago
Up