တနင်္သာရီတိုင်း၊ ကော့သောင်းခရိုင်၊ ဘုတ်ပြင်းမြို့နယ်၊ ခဲချောင်းကျေးရွာအနီး ပြည်ထောင်စု လမ်းမကြီးပေါ် ဖေဖော်ဝါရီ ၁၇ ရက် ညနေ ၅ နာရီမှာ မနိုးရုံးကျေးရွာကာကွယ်ရေးအဖွဲ့က စစ်ဆေးရေးလုပ်နေစဉ် ခရီးသည်တင်ကားတစ်စင်းကို ပစ်ခတ်ခဲ့တာကြောင့် နှစ်ယောက် သေဆုံးသွားတယ်လို့ မနိုးရုံးကျေးရွာကာကွယ်ရေးအဖွဲ့ထံက သိရပါတယ်။

ပစ်ခတ်မှုကြောင့် မိုင်းသွေးနဲ့ အုတ်ဖိုမော်ရွာနေ အသက် ၂၁ နှစ်အရွယ် မပြည့်ဝါဆိုနဲ့ အသက် ၉ နှစ် အရွယ် ပြည့်ဖြိုးအောင်တို့ ကျောချင်းပေါက်ဒဏ်ရာနဲ့ သေဆုံးခဲ့တာပါ။

မနိုးရုံးကျေးရွာကာကွယ်ရေးအဖွဲ့မှ တာဝန်ရှိသူ တဦးက “ကျနော်တို့အဖွဲ့ လမ်းပေါ်မှာ စစ်ဆေးနေချိန် ကားတစ်စင်းက အရှိန်နဲ့ကျော်ပြီးမောင်းသွားတော့ စစ်ကားလို့ထင်ပြီး ပစ်လိုက် မိတာပါ။ ထိခိုက်သွားတဲ့ ကလေး ၂ ယောက်ကို အချိန်မီဆေးရုံကို ပို့ဖို့ ကြိုးစားပေမယ့် လမ်းမှာ တင်ဆုံးသွားပါ။ သေဆုံးသွားတဲ့ ကလေးတွေအပေါ် မှားယွင်း ပစ်ခတ်မှုကြောင့် လွန်စွာစိတ်မကောင်းဖြစ်ရပါတယ်”လို့ ဆိုပါတယ်။

ခရီးသည်ကားလိုင်းနာမည်မှာ ရွှေညီကိုဖြစ်ပြီး ကော့သောင်းဘက်ကနေ မြိတ်ဘက်ကို လာတယ်လို့ သိရပါတယ်။

ခရီးသည်ကားတွင်ပါလာသော အမျိုးသမီးတဦးက “ကားထဲမှာပါလာတဲ့ အဖွားအိုက ကားကို နားခိုင်းပေမယ့် ကားသမားက ပြည်သူ့ကာကွယ်ရေးအဖွဲ့ကို မမြင်ဘဲ အရှိန်နဲ့ မောင်းနေတာပါ။ ပြည်သူ့ကာကွယ်ရေးအဖွဲ့တွေက မသင်္ကာလို့ ပစ်လိုက်တာပါ”လို့ ဆိုပါတယ်။

တနင်္သာရီတိုင်းအတွင်း တိုက်ပွဲ ပိုမိုပြင်းထန်လာတာကြောင့် ပြည်သူတွေအနေနဲ့ စစ်ကောင်စီ ယာဉ်တန်းတွေနဲ့ အနီးကပ်သွားတာမလုပ်ဖို့၊ မော်တော်ယာဉ်တွေ တံခါးမှန်ဖွင့်မောင်းကြဖို့နဲ့ မော်တော်ယာဉ်ကို အမိုးအကာ(တာလပတ်)အပြည့်ဖုံးအုပ်မထားဖို့ ဒေသခံပြည်သူ့ကာကွယ်ရေး တပ်ဖွဲ့တွေက သတိပေးထုတ်ပြန်ထားပါတယ်။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့မရဲစခန်းကို ဒေသခံပြည်သူ့ကာကွယ်ရေးတပ်ဖွဲ့ တွေ ဝင်ရောက် တိုက်ခိုက်ခဲ့တယ်လို့ ဒေသခံကာကွယ်ရေးအဖွဲ့တွေထံကနေသိရပါတယ်။

ပုလဲစစ်ကောင်စီစခန်းကို နိုဝင်ဘာ ၃ ရက် ည ၁၀ နာရီကျော်က  တိုက်ခိုက်ခဲ့တာဖြစ်ပြီး စစ်ကောင်စီဘက်က ၅ ယောက်သေဆုံးခဲ့တယ်လို့ ‌ဒေသခံ PDF ကပြောပေမဲ့ သီးခြားအတည်ပြုနိုင်ခြင်း မရှိသေးပါဘူး။

ဆားလင်းကြီး တွေ့ရာသင်္ချိုင်း ဓားမဆိုင်း အဖွဲ့ခေါင်းဆောင် ဗိုလ်စွမ်းသူမောင်က “တိုက်ပွဲကတော့ ပြင်းထန်တယ်။ ပထမစခန်းကို ဝင်ပစ်တယ်။ အလှစ်ဝင်ပစ်ဝာာဆိုတော့ သူတို့ဘက်က ပြန်ပစ်ချိန် မရဘူး။ အဲအချိန်ပစ်တာ ၅ ဦး သေဆုံး‌တယ်။ ဆုတ်တက်စနစ်နဲ့ ပစ်တာဆိုတော့ ကိုယ်ဘက်ကပစ်ပြီး နောက်ဆုတ်တယ်။ နောက် လက်နက်ကြီးနဲ့ အဝေးပစ် လုပ်ခဲ့တယ်။ ကိုယ်ဘက်ကတော့ အကျဆုံးအထိခိုက် မရှိခဲ့ဘူး”လို့ ပြောပါတယ်။

ဆာလင်းကြီးတွေ့ရာသင်္ချိုင်းဓားမဆိုင်းအဖွဲ့ဟာ NUG အစိုးရရဲ့ ကာကွယ်ရေးဝန်ကြီးဌာနရဲ့ ယင်းမာပင်ခရိုင်၊ တပ်ရင်း-၂၈အဖြစ် တရားဝင် အသိမှတ်ပြုခံထားရတဲ့ အဖွဲ့တဖွဲ့ ဖြစ်ပါတယ်။