ဒူးပလာယာခရိုင်

October 17, 2021

ကော့ကရိတ်တိုက်ပွဲသတင်း မှားယွင်းရေးသားချက်အပေါ် ကေအန်ယူ သတိပေး

ကရင်ပြည်နယ် ကော့ကရိတ်မြို့နယ် (ကရင်အမျိုးသားအစည်းအရုံး- ကေအန်ယူထိန်းချုပ်နယ်မြေ၊ ဒူးပလာယာခရိုင်) အတွင်း စစ်ကောင်စီတပ်နဲ့ ဖြစ်ပွားတဲ့ တိုက်ပွဲသတင်းမှာ သတင်းဌာနတချို့က မှားယွင်း​ရေးသားတာတွေ ရှိနေတာကြောင့် ကေအန်ယူ တပ်မဟာ ၆ က ဒီနေ့ သတင်းထုတ်ပြန် အသိပေးလိုက်ပါတယ်။

နယ်မြေကျူးကျော်ဝင်ရောက်လာတဲ့ စစ်ကောင်စီရဲ့တပ်နဲ့ နယ်မြေခံလုံခြုံရေးယူနေတဲ့ ကေအန်အယ်လ်အေ တပ်ရင်း ၁၈၊ ၁၇ တို့နဲ ​တိုက်ပွဲဖြစ်ခဲ့တာဖြစ်ပြီး  သတင်းဌာနတချို့က တိုက်ပွဲအကြောင်း ရေးသားဖော်ပြရာမှာ  KNLA နဲ့အတူ ပူးပေါင်းတပ်ဖွဲ့တွေ၊ Eagles Brigade တပ်ဖွဲ့တွေ ပါဝင်နေတဲ့ ရေးသားချက်တွေဟာ သတင်းမှားသာ ဖြစ်တယ်လို့ ဆိုပါတယ်။

ဒူးပလာယာခရိုင်နယ်မြေအတွင်း တပ်မဟာ ၆  ကေအန်အယ်လ်​အေတပ်ဖွဲ့​​မှအပ တခြားမည်သည့် လက်နက်ကိုင်အဖွဲ့အစည်းကိုမျှ အခြေချနေထိုင်ခွင့် မပြုကြောင်းကို အတိအလင်း အသိပေးထားပြီး ဖြစ်ပါတယ်။

လက်ရှိ မြေပြင်မှာဖြစ်တဲ့ တိုက်ပွဲအတွင်း အကြမ်းဖက်စစ်တပ်ရဲ့ နယ်မြေ ကျူးကျော် ဝင်ရောက်လာတဲ့အတွက် ကေအန်အယ်လ်အေနဲ့ ဖြစ်ပွားတဲ့ တိုက်ပွဲတွေသာဖြစ်လို့ သတင်းမီဒီယာတချို့က တခြားသောအဖွဲ့တွေ ပူးပေါင်းပါဝင်နေတဲ့ ဖော်ပြရေးသားချက်ဟာ လက်ရှိ အခြေအနေတွေကို ပိုမိုရှုပ်ထွေးစေတဲ့အပြင် ဒေသခံပြည်သူတွေကို စိုးရိမ်မှု မြင့်တက်စေပါတယ်။

ကော့ကရိတ်မြို့နယ် ရွာသစ်ကျေးရွာသား တစ်ဦးက “ဒေသခံတွေ သိထားတာက တပ်မဟာ ၆ နယ်မြေမှာ ဘယ်အဖွဲ့အစည်းမှ အဝင်မခံဘူး။ သတင်းတွေမှာ ပူးပေါင်းအဖွဲ့တွေ၊ ခွဲထွက်တွေ ဖော်ပြနေတာ လက်တွေ့မြေပြင်မှာ ကေအန်ယူပဲ ကျနော်တို့ သိတယ်” လို့ ပြောပါတယ်။

ဒူးပလာယာခရိုင်အတွင်း အမှန်တကယ် အခြေချလှုပ်ရှားခြင်း မရှိတဲ့ အဖွဲ့အစည်းနာမည်တွေကို ရေးသားဖော်ပြခြင်း မပြုလုပ်ဖို့ သတိပေးထုတ်ပြန်ထားပါတယ်။ ဘယ်သတင်းဌာနတွေက မှားယွင်းဖော်ပြတယ်ဆိုတာတော့ ထုတ်ပြန်ချက်မှာ မပါရှိပါဘူး။

တပ်မဟာ ၆ ခရိုင်တာဝန်ရှိသူကို ဒီဗွီဘီက ဆက်သွယ်မေးမြန်းဖို့ ကြိုးစားရာမှာ ဆက်သွယ်မေးမြန်းခွင့် မရခဲ့ပါဘူး။

3 months Ago

October 4, 2021

PDF များ နယ်မြေထဲ မလှုပ်ရှားရန်နှင့် အန်စီအေ စာချုပ်မပျက်သေးဟု ဒူးပလာယာခရိုင် ကေအန်ယူဥက္ကဋ္ဌ သတိပေး

ပြည်သူ့ကာကွယ်ရေးတပ်ဖွဲ့ (PDF) တွေအနေနဲ့ သူ့ရဲ့နယ်မြေထဲမှာ မလှုပ်ရှားကြဖို့ ဒူးပလာယာခရိုင် ကရင်အမျိုးသားအစည်းအရုံး (ကေအန်ယူ) ဥက္ကဋ္ဌ ပဒိုစောရွှေမောင်းက သတိပေးလိုက်ပါတယ်။

အမျိုးသားညီညွတ်ရေးအစိုးရ (NUG) နဲ့ PDF တာဝန်ခံတွေကို လိပ်မူပြီး အောက်တိုဘာ ၄ ရက်  ဒီနေ့ ရက်စွဲနဲ့ စာပေးပို့လိုက်တာဖြစ်ပြီး PDF တွေဟာ သူတို့လှုပ်ရှားမှု နယ်မြေထဲမှာ ကေအန်ယူရဲ့ မူဝါဒနဲ့ ဆန့်ကျင်တဲ့ လုပ်ရပ်တွေကို ပြောင်ပြောင်တင်းတင်း ထင်ရာမြင်ရာလုပ်နေတယ်လို့ လည်း ဆိုပါတယ်။

ဒီလုပ်ဆောင်တာတွေကြောင့် အပြစ်မဲ့ပြည်သူတွေ ဆုံးရှုံးနစ်နာပြီး ကေအန်ယူဒေသထဲမှာ ဘယ်အဖွဲ့အစည်းမှ ကေအန်ယူရဲ့ မူဝါဒသဘောထားနဲ့ ဆန့်ကျင်တဲ့ အကြမ်းဖက်လုပ်ရပ်တွေ မလုပ်ဖို့ သတိပေးထားပါတယ်။

ပြီးတော့ တနိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (အန်စီအေ) လည်း အခုထိ မပျက်သေးတာကြောင့် စာချုပ်ပါ လမ်းညွှန်ချက်တွေနဲ့အညီ ဆက်လက်ဆောင်ရွက်ကြဖို့လည်း ပဒိုစောရွှေမောင်းက လုပ်ဖော်ကိုင်ဖက်တွေကို ဒီနေ့ တိုက်တွန်းလိုက်ပါတယ်။

လာမယ့် အောက်တိုဘာ ၁၅ ရက်နေ့မှာ အန်စီအေ ၆ နှစ်ပြည့်မှာဖြစ်ပြီး တန်းတူရေးနဲ့ ကိုယ်ပိုင်ပြဋ္ဌာန်းခွင့်တွေ အာမခံချက်ရှိတဲ့ ဖက်ဒရယ်ပြည်ထောင်စုကို အတူတကွတည်ဆောက်ကြ ဖို့ တိုင်းရင်းသား လက်နက်ကိုင်အဖွဲ့အစည်းတွေ၊ မြန်မာ့တပ်မတော်နဲ့ မြန်မာအစိုးရတို့ ကတိပြု လက်မှတ်ထိုးခဲ့ကြတယ်လို့ ဆိုပါတယ်။

အဲဒီစာချုပ်ကို နိုင်ငံတကာက အသိသက်သေအဖြစ်ပါဝင်ပြီး ဘယ်အဖွဲ့အစည်းကမှ မဖျက်သေးတာကြောင့် အခုထိ မပျက်မယွင်းရှိနေတယ်လို့ ဆိုပါတယ်။

ဒါကြောင့် စာချုပ်လက်မှတ်ထိုးထားကြတဲ့ အဖွဲ့အစည်းတွေဟာ တဖက်နဲ့တဖက် တဖွဲ့နဲ့တဖွဲ့ သစ္စာရှိရှိ ကတိပြုထားကြတဲ့အတိုင်း တည်တည်ကြည်ကြည်ရှေ့ဆက်ရပ်တည်ဆောင်ရွက်ကြဖို့ အထူးလိုအပ်တယ် လို့လည်း သူ့ရဲ့စာမှာ ဖော်ပြထားပါတယ်။

ကေအန်ယူတပ်မဟာ ၆ နယ်မြေ ဒူးပလာယာခရိုင်ထဲမှာ အောက်တိုဘာ ၂ ရက်နေ့က မြန်မာစစ်တပ် တပ်ရင်းမှူးပါတဲ့ အဖွဲ့ မိုင်းခွဲတိုက်ခိုက်ခံထားရသလို ပြီးခဲ့တဲ့ စက်တင်ဘာလတုန်းကလည်း မြန်မာစစ်တပ်နဲ့ ကေအန်ယူရဲ့ ကရင်အမျိုးသား လွတ်မြောက်ရေးတပ်မတော် (KNLA) တို့ တိုက်ပွဲ ဖြစ်ခဲ့ပါသေးတယ်။

ဒါ့အပြင် ဒူးပလာခရိုင်ဥက္ကဋ္ဌဟာ  အမျိုးသားညီညွတ်ရေးအစိုးရက ထုတ်ပြန်တဲ့ အရေးပေါ်အခြေအနေကို ရုပ်သိမ်းပေးဖို့လည်း တောင်းဆိုခဲ့ဖူးပါတယ်။

4 months Ago
Up