ဒုအုပ်ချုပ်ရေးမှူး

July 19, 2021

ဗန်းမောက်မြို့နယ် ဒုအုပ်ချုပ်ရေးမှူးနှင့် ဒုရဲမှူး ဖမ်းဆီးခံရ

စစ်ကိုင်းတိုင်း၊ ဗန်းမောက်မြို့နယ် ဒုမြို့နယ်အုပ်ချုပ်ရေးမှူး ဦးလွင်မောင်မောင်နဲ့ ဒုရဲမှူးသန်းစိုးတို့ကို အမည်မသိ လက်နက်ကိုင်အဖွဲ့က ဇူလိုင် ၁၈ ရက် ညပိုင်းမှာ ဖမ်းဆီးသွားပါတယ်။

ဗန်းမောက်မြို့နယ်မှာရှိတဲ့ ရွှေမျှောလုပ်ကွက်တွေ ပြန်အပ်တာကို သွားရောက်စစ်ဆေးပြီး အပြန်မှာ အမည်မသိ လက်နက်ကိုင်အဖွဲ့က ဖမ်းဆီးသွားတာဖြစ်ပြီး ဝန်ထမ်း ၄ ယောက်လည်း ဖမ်းဆီးခံရတယ်လို့  လုပ်ကွက်စစ်ဆေးမှုပါဝင်သူ တစ်ယောက်က ပြောပါတယ်။ 

ဗန်းမောက် ကသာ-အင်းတော်-မံစီ လမ်းပိုင်းတစ်နေရာမှာ သေနတ်ပစ်ဖောက်ပြီး ဖမ်းဆီးခေါ်ဆောင်သွားတာဖြစ်ပြီး သဘာဝပတ်ဝန်းကျင်ထိန်းသိမ်းရေးဦးစီးဌာနက ဦးကျော်စိုးဟာလည်း ပစ်ခတ်မှုကြောင့် ဘယ်ဘက်ရင်အုံ  သေနတ်မှန်ပြီး ဒဏ်ရာရသွားပါတယ်။

အခုနောက်ဆုံးရရှိတဲ့ သတင်းအရ ဒုရဲမှူးသန်းစိုးနဲ့ သူ့ရဲ့ ကားမောင်းတဲ့သူက ထွက်ပြေးလွတ်မြောက်လာပြီး  ဒုမြို့နယ်အုပ်ချုပ်ရေးမှူးနဲ့ သဘာဝပတ်ဝန်းကျင်ထိန်းသိမ်းရေး ဝန်ထမ်းတို့ကတော့ ပြန်လွတ်လာတာ မရှိသေးဘူးလို့ ဒေသခံတစ်ဦးက ပြောပါတယ်။

3 months Ago

June 26, 2020

ကျွန်းလှမြို့နယ် ဒုအုပ်ချုပ်ရေးမှူးနှင့် ရဲအရာရှိ ၄ ဦးကို အဂတိလိုက်စားမှုဖြင့် အရေးယူ  

စစ်ကိုင်းတိုင်း၊ ကျွန်းလှမြို့နယ် အထွေထွေအုပ်ချုပ်ရေး ဦးစီးဌာန ဒုမြို့နယ် အုပ်ချုပ်ရေးမှူး ဦးစိုးကိုကိုနဲ့ ကျွန်းလှမြို့နယ် ရဲတပ်ဖွဲ့မှူး ရဲမှူး အောင်မျိုးဦး အပါအဝင် ရဲအရာရှိ ၄ ဦးကို  အဂတိလိုက်စားမှု တိုက်ဖျက်ရေးဥပဒေနဲ့ အမှုဖွင့်လှစ် အရေးယူလိုက်တယ်လို့ ကော်မရှင်က ဒီကနေ့ ထုတ်ပြန်ပါတယ်။ ကျွန်းလှမြို့နယ် သဖန်းဆိပ်ဆည် ရေဝပ်ဧရိယာအတွင်း တရားမဝင် ရွှေမျောတွေနဲ့ ပတ်သက်ပြီး အဂတိလိုက်စားတဲ့ ဌာနဆိုင်ရာ တာဝန်ရှိသူတွေကို စုံစမ်းစစ်ဆေးအရေးယူ ဆောင်ရွက်ပေးဖို့ စစ်ကိုင်းတိုင်းဒေသကြီးအစိုးရအဖွဲ့က အဂတိလိုက်စားမှု တိုက်ဖျက်ရေး  ကော်မရှင်သို့ လွှဲပြောင်း ပေးပို့ခဲ့တဲ့အမှု ဖြစ်ပါတယ်။ အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးရေး အဖွဲ့ ဖွဲ့စည်းစစ်ဆေးခဲ့ရာ ဒုမြို့နယ်အုပ်ချုပ်ရေးမှူး ဦးစိုးကိုကိုဟာ တရားမဝင် ရွှေမျောလုပ်ကိုင်သူတွေထံက ငွေကျပ် ၃၀၀,၀၀ဝ ကိုလည်းကောင်း၊ ရဲမှူး အောင်မျိုးဦးက ငွေကျပ် ၅၅၀,၀၀ဝ ကို နှစ်ကြိမ်ခွဲပြီး လည်းကောင်း၊ ဒုတိယရဲမှူး သန်းထိုက်က ငွေကျပ် ၇၅၀,၀၀ဝကို သုံးကြိမ်ခွဲ၍လည်းကောင်း၊ တရားမဝင် ရွှေမျောလုပ်ကိုင်သူ ၇ ဦး တို့ထံမှ ငွေကျပ် ၂၉၀,၀၀ဝကို သုံးကြိမ်ခွဲ၍လည်းကောင်း၊ ဒုတိယရဲအုပ် မျိုးလွင်က  ငွေကျပ် ၂၅၀,၀၀ဝကို သုံးကြိမ်ခွဲ၍လည်းကောင်း၊ ရဲအုပ် ရဲလင်းက  ငွေကျပ် ၂၀၀,၀၀ဝကို လည်းကောင်း လက်ခံရယူခဲ့ကြတာ တွေ့ရှိခဲ့ပါတယ်။  ရာထူး တာဝန်ကို အလွဲသုံးစားပြုပြီး အဂတိလိုက်စားမှုကျူးလွန်ခဲ့ကြခြင်းဖြစ်ကြောင်း စစ်ဆေး ပေါ်ပေါက်သလို့ အဆိုပါ ပုဂ္ဂိုလ်  ၅ ဦးအပေါ် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၆ အရ ကျွန်းလှမြို့မရဲစခန်းမှာ ဇွန်လ ၂၆ ရက်က  ပထမသတင်းပေး တိုင်ကြားချက် ဖွင့်လှစ်၍ တရားစွဲဆို အရေးယူနိုင်ရေး ဆောင်ရွက်နေတယ်လို့သိရပါတယ်။ လတ်ရှိ ကန့်ဘလူခရိုင်၊ ကျွန်းလှမြို့ ဒုမြို့နယ်အုပ်ချုပ်ရေးမှူးနဲ့ မြို့နယ်ရဲတပ်ဖွဲ့ တာဝန်ရှိသူတွေကို မြန်မာနိုင်ငံရဲတပ်ဖွဲ့ကနေ ခေါ်ယူထိန်းသိမ်းလိုက်တယ်လို့ သိရပါတယ်။ အခုလို ထိန်းသိမ်းတာဟာ တရားမဝင် သစ်မှောင်ခိုကိစ္စ၊ ရွှေမျောကိစ္စတွေနဲ့ ဆက်စပ်မှု ရှိနိုင်တယ်လို့ ဒေသခံ ကျွန်းလှမြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်လင်းက  ပြောပါတယ်။ "သစ်ကိစ္စတို့၊ သဖန်းဆိပ်ဆည်ထဲမှာ တရားမဝင်ရွှေမျောကိစ္စတို့လို့တော့ ခန့်မှန်းရတာပေါ့။ အခုဖမ်းထားတာတော့ ၅ ယောက်လောက်ကြားတယ်။ ဒုမြို့နယ်အုပ်ချုပ်ရေးမှူးကိုတော့ မနက်က ခေါ်ယူထိန်းသိမ်းတယ်လို့ ကြားတယ်။ မြို့နယ်ရဲမှူး၊ စခန်းမှူး၊  နယ်ထိန်းခေါင်းဆောင်နဲ့ ခရိုင်ရဲတစ်ယောက်ကတော့ ညကတည်းက ခေါ်ယူထိန်းသိမ်းထားတယ်လို့ သိရတယ်။ အသေးစိပ်တော့ မသိရသေးပါဘူး။" မြန်မာနိုင်ငံအဂတိလိုက်စားမှု တိုက်ဖျက်ရေးကော်မရှင်တာဝန်ရှိသူတွေက မတ်လကုန်ပိုင်းနဲ့ ဇွန်လဆန်းပိုင်းမှာ စုစုပေါင်း ၁၀ ရက်ခန့်အကြာ တာဝန်ရှိသူတွေကို လာရောက်စစ်ဆေးခဲ့ ပါသေးတယ်။ အခုလို ဖမ်းဆီးလိုက်တဲ့ ကိစ္စနဲ့ပတ်သက်ပြီး တိုင်းရဲတပ်ဖွဲ့က ပြောရေးဆိုခွင့်ရှိသူ ဒုတိယရဲမှူးကြီး ဘဝင်းကို  ဆက်သွယ်မေးမြန်းရာမှာတော့ "ဟုတ်တယ်လို့တော့ သတင်းကြား တယ်။ အသေးစိတ်တော့ မသိရသေးဘူးဆိုတော့ ပြောလို့အဆင်မပြေသေးဘူး။"လို့ ပြောပါတယ်။ ၂၀၁၇  ဖေဖော်ဝါရီလကလည်း တရားမဝင်သစ်ကိစ္စနဲ့ပတ်သက်လို့ ကျွန်းလှမြို့နယ်က ပေပင်ချောင်ရဲကင်းစခန်းမှူးတစ်ဦး၊ မြို့နယ်သစ်တောဦးစီးဌာန တောအုပ်တစ်ဦးနဲ့ တရားမဝင်သစ်လုပ်ငန်းလုပ်ကိုင်သူတစ်ဦးတို့ကို အဂတိတိုက်ဖျက်ရေးဥပဒေပုဒ်မ ၅၆/၆၃/ကျင့် ၅၁၂ တို့အရ အမှုဖွင့် အရေးယူခဲ့ဖူးပါတယ်။
1 year Ago
Up