မန်ယူဂိုးသမားဒီဂီယာဟာ လိဒ်ယူနိုက်တက်နဲ့ကစားတဲ့ပွဲမှာ လိဂ်ပွဲစဉ် ၄၀၀ ပြည့်မြောက်ခဲ့ပြီး ဗြိတိန်နဲ့ အိုင်ယာလန်သားမဟုတ်တဲ့ဂိုးသမားတွေထဲမှာ အသင်းတစ်သင်းအတွက် ပွဲ ၄၀၀ အထိကစားနိုင်ခဲ့တဲ့ ပထမဆုံးဂိုးသမားဖြစ်လာပါတယ်။
ဒီဂီယာဟာ ၂၀၁၁ ခုနှစ်က စပိန်ကလပ် အက်သလက်တီကိုမက်ဒရစ်ကနေ ပေါင် ၁၉ သန်းနဲ့ပြောင်းရွှေ့လာခဲ့ပြီး အဲဒီကတည်းက မန်ယူအသင်းရဲ့ ပထမဦး စားပေး ဂိုးသမားဖြစ်လာခဲ့တာပါ။
ဗြိတိန်နဲ့ အိုင်ယာလန်နိုင်ငံသားမဟုတ်တဲ့ ကစားသမားတွေထဲမှာဆိုရင်တော့ ဒီဂီယာထက် ပရီးမီးယားလိဂ်ပွဲပိုများတဲ့ ကစားသမားက ၅ ဦးသာရှိပြီး သူတို့က အသင်းတစ်သင်းထဲမှာ ကစားခဲ့တာတော့ မဟုတ်ပါဘူး။
အဲဒီကစားသမားတွေက သြစတြေးလျဂိုး သမားရှဝါဇာက ၅၁၄ ပွဲ၊ ပြင်သစ်နောက်ခံလူ ဒစ္စတင်က ၄၆၉ ပွဲ၊ အမေရိကန်ဂိုးသမား ဖရီဒယ်က ပွဲ ၄၅၀၊ ချက်ဂိုးသမား ပီတာချက်က ၄၄၃ ပွဲနဲ့ ဖင်လန်ဂိုး သမား ဂျက်ကယ်လိုင်နမ် က ၄၃၆ ပွဲ ကစားခဲ့တာပါ။
ဒီဂီယာဟာ အသက် ၃၂ နှစ်၊ ၉၇ ရက်နဲ့ ပွဲ ၄၀၀ ကစားခဲ့တာဖြစ်လို့ ပရီးမီးယား လိဂ်ပွဲ ၄၀၀ ပြည့်မြောက်ခဲ့တဲ့ အသက်အငယ်ဆုံးဂိုးသမားအဖြစ်လည်း မှတ်တမ်းဝင်ခဲ့ပါတယ်။
အာဆင်နယ်အသင်းနဲ့ပွဲစဉ်မှာ ကွင်းလယ်လူ ကတ်စမီရိုလွဲချော်မှာက ကြီးမားတဲ့ထိုးနှက်ချက် ဖြစ်ကြောင်း မန်ယူဂိုးသမားဒီဂီယာက ပြောပါတယ်။
ကတ်စမီရိုဟာ ခရစ္စတယ်ပဲလေ့နဲ့ တစ်ဂိုးစီသရေကျခဲ့တဲ့ပွဲစဉ်မှာ အဝါကတ်ပြသခံခဲ့ရပြီး စုစုပေါင်း ၅ ဝါပြည့်သွားလို့ အာဆင်နယ်နဲ့ ပွဲစဉ်ကို လွဲချော်မှာပါ။
အဲဒီအခြေအနေဟာ မန်ယူနိုက်တက်အတွက်ကြီးမားတဲ့ထိုးနှက်ချက်ဖြစ်လာနိုင်ပြီး ပွဲစဉ်ဇယားရေးဆွဲမှုအပေါ်ဝေဖန်သွားခဲ့ပါတယ်။
“ကျနော်တို့ ထိပ်တိုက်တွေ့မယ့် ပွဲစဉ် မတိုင်ခင်မှာ အာဆင်နယ်အသင်းကျတော့ ကျနော်တို့လို ကြားရက်ပွဲစဉ် မကစားရတာက နားမလည်နိုင်စရာပါပဲ။ အခုတော့ ကျနော်တို့ရဲ့ အကောင်းဆုံးကစားသမားတစ်ယောက်လွဲချော်သွားပါပြီ။ ပွဲကြီးပွဲကောင်း တစ်ပွဲမှာ သူ့ကို သတိရနေရမှာဖြစ်ပြီး ကျနော်တို့အတွက် ကြီးမားတဲ့ဆုံးရှုံးမှုဖြစ်တယ်”လို့ ဂိုးသမား ဒီဂီယာကပြောပါတယ်။
မန်ယူအသင်းဟာ ဇယားထိပ်က အာဆင်နယ်ထက် တစ်ပွဲပိုကစားထားပေမယ့် ၈ မှတ်ကွာဟနေ ဆဲပါ။
တနင်္ဂနွေနေ့မှာကစားမယ့်အာဆင်နယ်နဲ့ ပွဲစဉ်က အသင်းရဲ့ ချန်ပီယံဆုဖလားကို စိန်ခါ်နိုင်ခွင့်အတွက် အဆုံးအဖြတ် ဖြစ်လာနိုင်ပါတယ်။
