ဒါရိုက်တာ

September 2, 2021

ထင်ရှားသည့် စွယ်စုံရ စာရေးဆရာ၊ သတင်းစာဆရာ၊ ဒါရိုက်တာ မောင်မိုးသူ ကွယ်လွန်

ထင်ရှားတဲ့ စွယ်စုံရ စာရေးဆရာ၊ သတင်းစာဆရာ၊ ဒါရိုက်တာ မောင်မိုးသူဟာ စက်တင်ဘာ ၁ ရက်ညပိုင်းက ကွယ်လွန်သွားခဲ့ပြီ ဖြစ်ပါတယ်။

မောင်မိုးသူကို မန္တလေးမြို့မှာ ၁၉၃၇ ခုနှစ်မှာ မွေးဖွားခဲ့ပြီး ကွယ်လွန်ချိန်မှာတော့ အသက် ၈၄ နှစ်အရွယ် ရှိနေခဲ့ပြီ ဖြစ်ပါတယ်။

ဒါရိုက်တာ မောင်မိုးသူဟာ အမျိုးသားဒီမိုကရေစီအဖွဲ့ချုပ် စတင်ဖွဲ့စည်းချိန်မှာ ဗဟိုကော်မတီဝင်တ ယောက်အနေနဲ့ ပါဝင်ခဲ့ပြီး အနုပညာလောကသားတွေက မောင်မိုးသူ၊ ဦးမိုးသူ၊ ဘကြီးမိုး စတဲ့ နာမည်တွေနဲ့ လူချစ်လူခင်များသူ ဖြစ်ပါတယ်။

မောင်မိုးသူဟာ ကဗျာ၊ ဆောင်းပါး၊ ပင်ကိုယ်ရေးဝတ္ထုတွေအပြင် ဘာသာပြန်ဝတ္ထု တွေနဲ့လည်း ထင်ရှားပြီး အိပ်မက်ကုန်သည်၊ အိပ်ဇိုးဒပ်၊ ကျားကုတ်ကျားခဲ၊ မာဖီးယားနှင့် ပေါ်ပီပန်း၊ အိပ်ဇိုးဆေး၊ ငြိုးသူ့ရန်ဘက်စတဲ့  စာအုပ်တွေကတော့ ပရိသတ်တွေကြား နာ မည်ကြီးတဲ့ စာအုပ်တွေ ဖြစ်ခဲ့ပါတယ်။

ဒါ့အပြင် သုတရသဆောင်းပါးတွေဖြစ်တဲ့ လွယ်အိတ်တစ်လုံးနှင့် ရွာစဉ်လည် (မိုး ဝေနှင့် အခြားမဂ္ဂဇင်းများ) ပင်တိုင် ဆောင်းပါးများ၊ ခေတ်မီမီ ကမ္ဘာကြည့် ကြည့်မြင် (ကလျာမဂ္ဂဇင်းများ)စတဲ့ စာအုပ်တွေကိုလည်း ထုတ်ဝေခဲ့ပါသေးတယ်။

မောင်မိုးသူဟာ မန္တလေး တက္ကသိုလ် နှစ်ပတ်လည် မဂ္ဂဇင်း (မြန်မာစာတည်း)၊ မန်း ခေတ်သတင်းစာ၊ ခေတ်ဂျာနယ်၊ ဓနမဂ္ဂဇင်း၊ ကုမုဒြာ ဂျာနယ်၊ Perfect မဂ္ဂဇင်းတွေမှာ အယ်ဒီတာအဖြစ် ဆောင်ရွက်ခဲ့သလို မန်းတက္ကသိုလ် ကလောင်ရှင်အသင်း အမှုဆောင်၊ အထက်မြန်မာနိုင်ငံ စာရေးဆရာအသင်း အမှုဆောင်၊ မန္တလေးအသင်း အမှုဆောင်၊ မြန်မာနိုင်ငံ ရုပ်ရှင်ကောင်စီ ဗဟို အမှုဆောင်အဖြစ်လည်း တာဝန်ယူခဲ့သူ ဖြစ်ပါတယ်။

ရုပ်ရှင်ဘက်မှာတော့ မောင်မိုးသူဟာ ရေပွက်ပမာ၊ ရန်ကုန်သားနှင့် မန္တလေးသူ၊ မုန်းရစ်လေဦး၊ ချစ်လိုက်တာ မသည်းအူရယ် အပါအဝင် ဇာတ်ညွှန်းပါင်းများစွာ ရေးသားခဲ့ပြီး ဒါရိုက်တာအနေနဲ့လည်း ရုပ်ရှင်ကားပေါင်းများစွာ ရိုက်ကူးခဲ့သူ ဖြစ်ပါတယ်။

သူရိုက်ကူးခဲ့တဲ့ ရုပ်ရှင်တွေထဲမှာတော့ ကျနော့်နာမည် ကျော်ကျော် (ကျော်ဟိန်း၊ တင်တင်ညို)၊ မှုန်နံ့သာ ခြယ်ကာသပါလို့ (တွံတေးသိန်းတန်၊ တင်တင်ညို)၊ သက်ထားဆိုသော မိန်းမချော (ထွန်းဝေ၊မြတ်မွန်)၊ ဆောင်းမှာတွေ့သော မိန်းကလေး (ညွန့်ဝင်း၊ တင်တင်ညို)၊ မမလေး ပန်စရာ (ကောလိပ်ဂျင်နေဝင်း၊ ချိုပြုံး၊ မြင့်မြင့်ခိုင်)၊ တကယ် ချစ်ရဲ့လား (ဇော်လင်း၊ စန္ဒာ)၊ ကျမမှာ ချစ်သူရှိတယ် (ကောလိပ်ဂျင်နေဝင်း၊ ကျော်စွာဝင်း၊ ချော)စတဲ့ ရုပ်ရှင်တွေကတော့ ထင်ရှားပါတယ်။

ဒါ့အပြင် မောင်မိုးသူဟာ နိုင်ငံရေးဘက်မှာလည်း ထဲထဲဝင်ဝင် ပါဝင်ဆောင်ရွက်ခဲ့ပြီး ၁၉၅၈-၅၉ ခုနှစ် မန္တလေးတက္ကသိုလ် ကျောင်းသားသမဂ္ဂ အမှုဆောင်အဖြစ်တာဝန်ယူခဲ့ပြီး ၁၉၅၈ ခုနှစ် အိမ်စောင့်အစိုးရ တက်လာချိန်မှာ ဖမ်းဆီးထိန်းသိမ်းခံခဲ့ရပါတယ်။

မြန်မာပြည်သူတရပ်လုံးပါဝင်တဲ့ ရှစ်လေးလုံးလူထုအုံကြွမှုကြီးမှာတော့ မောင်မိုးသူဟာ သတင်းစာဆရာကြီး ဦးဝင်းတင်၊ စာရေးဆရာ မောင်သောကတို့ ဦးဆောင်တဲ့ စာရေးဆရာများသမဂ္ဂများအဖွဲ့ အတွင်းရေးမှူးအဖြစ်တာဝန်ယူခဲ့ပါတယ်။

အမျိုးသားဒီမိုကရေစီအဖွဲ့ချုပ် စတင်ဖွဲ့စည်းချိန်မှာတော့ ဗဟိုကော်မတီဝင်အဖြစ် တာဝန်ထမ်းဆောင်ပြီး ပြန်ကြားရေးတာဝန်ယူခဲ့ကာ ၁၉၈၉ ခုနှစ် ဒေါ်အောင်ဆန်းစုကြည်ကို နေအိမ်အကျယ်ချုပ် ဖမ်းဆီးချိန်မှာ မောင်မိုးသူလည်း ဖမ်းခံခဲ့ရပြီး ထောင် ၃ နှစ် ကျခဲ့ပါတယ်။

မောင်မိုးသူဟာ စစ်အာဏာရှင်စနစ်ကို ဆန့်ကျင်ခဲ့တာတွေကြောင့် ခေတ်အဆက်ဆက် ထောင်ဒဏ်ချမှတ်ခံခဲ့ရတဲ့ နိုင်ငံရေးသမားတယောက်လည်း ဖြစ်ပါတယ်။

2 months Ago

November 20, 2020

ဗြိတိန်စစ်သတင်းထောက်အကြောင်းရုပ်ရှင်ကို ဒါရိုက်တာအဖြစ် အန်ဂျလီနာဂျိုလီ ရိုက်ကူးမည် 

အော်စကာဆုရှင် ဟောလိဝုဒ်နာမည်ကျော်မင်းသမီးတလက်ဖြစ်တဲ့ အန်ဂျလီနာဂျိုလီက နာမည်ကြီးစစ်သတင်းထောက်တဦးအကြောင်း ရုပ်ရှင်ကားမှာ ဒါရိုက်တာအနေနဲ့ တာဝန်ယူရိုက်ကူးသွားဖို့ ရှိနေပါတယ်။ ဒီကားကတော့ ဗြိတိန်ဝါရင့် စစ်ဓာတ်ပုံသတင်းထောက် ဒွန်မက်ကာလ်လင်းရဲ့ ကိုယ်တိုင်ရေး အတ္ထုပ္ပတ္တိစာအုပ်-Unreasonable Behaviour ကို ရုပ်ရှင်ကားတကား အနေနဲ့ ရိုက်ကူးသွားမှာဖြစ်ကာ ဟောလိဝုဒ်သရုပ်ဆောင်မင်းသား တွမ်ဟာဒီရဲ့ ထုတ်လုပ် ရေးကုမ္ပဏီ-Hardy Son & Baker banner ကနေ ထုတ်လုပ်ရိုက်ကူးမှာ ဖြစ်ပါတယ်။ ဗြိတိန်နိုင်ငံအနောက်မြောက်ပိုင်း ဆမ်းမားဆက်ဒေသမှာ နေထိုင်တဲ့ ဒွန်မက်ကာလ်လင်း ဟာ အသက် ၈၅ နှစ်အရွယ် ရှိနေပြီဖြစ်ပြီး သူ့ရဲ့ ဖြတ်သန်းခဲ့တဲ့ ဘဝတလျှောက် ဗီယက်နမ်စစ်ပွဲ၊ ဖောက်ကလန်စစ်ပွဲမှသည် ပဋိပက္ခနဲ့ ထင်ရှားတဲ့ အဖြစ်အပျက်တွေနဲ့ သမိုင်းတွင် ကျန်ရစ်စေမယ့် အထင်ကရမှတ်တမ်းဓာတ်ပုံတွေကို အန္တရာယ်တွေအကြား သက်စွန့်ဆံဖျား ရိုက်ယူနိုင်ခဲ့သူဖြစ်ပြီး မှတ်တမ်းစာအုပ်ပေါင်းများစွာလည်း ရေးသားထုတ်ဝေခဲ့သူ ဖြစ်ပါတယ်။ ၁၉၅၉ ခုနှစ်က စတင်ခဲ့တဲ့ သူ့ရဲ့ သတင်းထောက်သက်တမ်းတလျှောက် လုပ် ဆောင်ခဲ့မှုတွေအတွက် ထူးချွန်ဆုပေါင်းများစွာ ချီးမြှင့်ခံခဲ့ရပြီး ၁၉၆၄ ခုနှစ်မှာတော့ ဆိုက်ပရပ်စ်အငြင်းပွားမှုပြဿနာ သတင်းမှတ်တမ်းပုံရိပ်တွေအတွက် World Press Photo of the Year ဆုကို ချီးမြှင့်ခံခဲ့ရတာ ဖြစ်ပါတယ်။ ဒွန်မက်ကာလ်လင်းအကြောင်း မှတ်တမ်းရုပ်ရှင်တချို့လည်း အရင်က ရိုက်ကူးခဲ့ဖူးကြပြီး ၂၀၁၂ ခုနှစ်မှာ ထွက်ရှိခဲ့တဲ့ McCullin ရုပ်ရှင်ကတော့ BAFTA awards ထူးချွန်ဆု ဆန်ကာတင်စာရင်းမှာ ပါဝင်ခဲ့ပါတယ်။ ခုတခါမှာတော့ နာမည်ကြီးသရုပ်ဆောင်မင်းသမီး အန်ဂျလီနာဂျိုလီရဲ့ ရိုက်ကူး တင်ဆက်မှုနဲ့ ဒီရုပ်ရှင်ကားထဲမှာရော ဘယ်လိုတင်ဆက်ပုံတွေနဲ့ ထူးထူးခြားခြား ထွက်ရှိ လာဦးမလဲဆိုတာကိုတော့ စောင့်မျှော်ကြည့်ရှုကြရမှာ ဖြစ်ပါတယ်။
11 months Ago
Up