ဒမ်ဘီလီ

January 14, 2021

တိုက်စစ်မှူး ဒမ်ဘီလီကို အက်သလက်တီကိုက အငှားခေါ်ယူ  

အက်သလက်တီကိုအသင်းဟာ လိုင်ယွန်တိုက်စစ်မှူး မူဆာဒမ်ဘီလီကို အငှားနဲ့ခေါ်ဖို့ အပြီးသတ် ဆောင်ရွက်နိုင်ခဲ့ပြီဖြစ်ပါတယ်။ ဒီစာချုပ်မှာ ပြင်သစ်တိုက်စစ်မှူးအတွက် အပြီးသတ်ခေါ်ယူခွင့်လည်း ပါဝင်ပါတယ်။ ဆီမြွန်နီရဲ့အသင်းဟာ ဒမ်ဘီလီအတွက် အခုသီတင်းပတ်အစောပိုင်းမှာ သဘောတူညီမှု ရရှိ ခဲ့တာဖြစ်ပြီး တနင်္လာနေ့မှာ ဆေးစစ်မှု ခံယူခဲ့တာပါ။  ကလပ်အသင်း ၂ ခုကြား အငှားသဘောတူညီချက်မှာ ဒမ်ဘီလီကို ယူရို ၃၃ ဒသမ ၅ သန်းနဲ့ အပြီး သတ်ခေါ်ယူခွင့်လည်း ပါဝင်ပြီး ဘောနပ်စ်ကြေး ယူရို ၅ သန်း ထပ်ပေးရမှာ ဖြစ်ပါတယ်။  စာချုပ်ရဲ့အစိတ်အပိုင်းတစ်ခုအဖြစ် အငှားခေါ်ယူခွင့်အတွက် တီကိုအသင်းက ယူရို ၁ ဒသမ ၅ သန်း ပေးချေရမှာဖြစ်ပါတယ်။  ဒမ်ဘီလီဟာ ဆဲတစ်အသင်းကနေ လိုင်ယွန်အသင်းကို ယူရို ၂၂ သန်းနဲ့ ၂၀၁၈ နွေရာသီမှာ ရောက်ရှိလာတာဖြစ်ပြီး ပြင်သစ်ကလပ်မှာ ၂ နှစ်ခွဲကစားခဲ့ပါတယ်။  ပြင်သစ်တိုက်စစ်မှူးဟာ လိုင်ယွန်အတွက် ၁၀၈ ပွဲ ကစားပြီး ၄၅ ဂိုးသွင်းယူကာ ၂၀၁၉-၂၀ ရာသီမှလည်း ချန်ပီယံလိဂ် ဆီမီးဖိုင်နယ်အထိရောက်အောင်ကူညီပေးနိုင်ခဲ့ပါတယ်။  ဒါပေမဲ့ ပြီးခဲ့တဲ့လတွေကစလို့ ဒမ်ဘီလီဟာ အသင်းပြောင်းဖို့ ကြိုးစားခဲ့တာဖြစ်ပြီး ဒါကိုလိုင်ယွန် အားကစားဒါရိုက်တာ ဂျူနင်ဟိုကလည်း အတည်ပြုပေးခဲ့ပါတယ်။ ဒမ်ဘီလီဟာ ဒီရာသီမှာ လိုင်ယွန်အသင်းအတွက် ၁၆ ပွဲကစားကာ ၁ ဂိုးသွင်းယူ ပေးခဲ့ပြီး ပြီးခဲ့တဲ့ ၂ ရာသီဆက်တိုက် ဂိုး ၂၀ နဲ့အထက်သွင်းယူ နိုင်ခဲ့သူဖြစ်ပါတယ်။ အက်သလက်တီကိုအသင်းဟာ တိုက်စစ်မှူး ဒီယေဂိုကော်စတာကို ထွက်ခွာခွင့်ပြုခဲ့ တာကြောင့် သူ့နေရာမှာ ဒမ်ဘီလီနဲ့ အစားထိုးခဲ့တာဖြစ်ပြီး လိုင်ယွန်အသင်းဘက်ကတော့ ဒမ်ဘီလီရဲ့နေရာမှာ လက်စတာတိုက်စစ်မှူး ဆူလေမာနီနဲ့ အစားထိုးခဲ့ပါတယ်။  ဆူလေမာနီဟာ လက်စတာကနေ နယူးကာဆယ်၊ ဖင်နာဘာချီနဲ့ မိုနာကိုအသင်းတို့ကို အငှားထွက်ကစားခဲ့ရသူဖြစ်ပြီး လက်ရှိအချိန်မှာ ပြင်သစ်မြေကို ပြန်လည်ရောက်ရှိလာခဲ့ပြီ ဖြစ်ပါတယ်။ ဆူလေမာနီဟာ အခုရာသီမှာလက်စတာအသင်းအတွက် တစ်ပွဲသာ ပွဲထွက်ခွင့်ရ ရှိခဲ့ပြီး ပြီးခဲ့တဲ့ရာသီမို နာကိုအသင်းမှာတာ့ ၁၉ ပွဲကစားကာ ၉ ဂိုးသွင်းယူပေးခဲ့သူဖြစ်ပါတယ်။
5 months Ago

August 12, 2020

ဒမ်ဘီလီကို ခေါ်ယူရန်  မန်ယူနိုက်တက် စီစဉ်

မန်ချက်စတာယူနိုက်တက်အသင်းဟာ ဂျေဒန်ဆန်ချိုကို ခေါ်ယူဖို့ အခုထိလက်မလျော့ပသေးပေမဲ့ သူ့နေရာမှာ ကစားသမားတစ်ဦး အစားထိုးဖို့ကို ကြိုတင်ပြင်ဆင်ထားပြီး ဖြစ်တယ်လို့ Metro သတင်းမှာ ဖော်ပြပါတယ်။  ဆန်ချိုဟာ ယူနိုက်တက်နည်းပြ ဆိုးလ်ရှားရဲ့ ဦးစားပေးပစ်မှတ်ဖြစ်ပေမဲ့ သူ့ကို ခေါ်ယူဖို့ ကြိုးစားရာမှာ ဒေါ့မွန်အသင်းရဲ့ တင်းခံမှုတွေနဲ့ ရင်ဆိုင်နေရပါတယ်။ ဒေါ့မွန်အသင်းဘက်က ဆန်ချိုကို ခေါ်ယူဖို့ သြဂုတ် ၁၀ အတွင်း အပြီးသတ်ဖို့ ရက်သတ်မှတ်ထားပေမဲ့ မန်ယူနိုက်တက်ဘက်က အပြီးမသတ်နိုင်ခဲ့ပါဘူး။ လက်ရှိအချိန်မှာ ဆန်ချိုဟာ ဒေါ့မွန်အသင်းရဲ့ ရာသီကြိုလေ့ကျင့်ရေးအဖြစ် ဆွစ်ဇာလန်ကို ရောက်ရှိနေပြီး ဒေါ့မွန်အားကစား ဒါရိုက်တာကတော့ ဆန်ချိုကို ရောင်းမှာမဟုတ်တော့ဘူးဆိုတဲ့ သဘောမျိုး ပြောခဲ့ပါတယ်။  ဒေါ့မွန် ဒါရိုက်တာ ဇော့က “ဆန်ချိုကို နောက်ရာသီမှာလည်း အသင်းမှာ ဆက်ရှိနေဖို့ ကျနော်တို့ ပြင်ဆင်ထားပါတယ်။ ဒါဟာ နောက်ဆုံး ဆုံးဖြတ်ချက်ဖြစ်ပြီးတော့ မေးခွန်းအားလုံးရဲ့ အဖြေလို့လည်း ထင်ပါတယ်” လို့  ပြောပါတယ်။  ဒေါ့မွန်အသင်းဟာ ပြီးခဲ့တဲ့နွေရာသီမှာ ဆန်ချိုရဲ့ စာချုပ်ကို တစ်နှစ် သက်တမ်းတိုးခဲ့ပြီး ဖြစ်တယ်လို့လည်း ဇော့က ဆက်လက်ပြောဆိုပါတယ်။ ဒီလိုအခြေအနေမျိုးမှာ ယူနိုက်တက်အသင်းအနေနဲ့ ဆန်ချိုကို တကယ်မခေါ်ယူနိုင်ခဲ့ဘူး ဆိုရင် ဘာစီလိုနာအသင်းရဲ့ တောင်ပံကစားသမား အူစမန်ဒမ်ဘီလီကို ပြောင်းလဲ ကြိုးစားသွားနိုင်တယ်လို့ သတင်းတွေမှာ ရေးသားထားပါတယ်။  ပြင်သစ်လက်ရွေးစင် ဒမ်ဘီလီဟာ ဒဏ်ရာပြဿနာတွေ၊ စည်းကမ်းချိုးဖောက်မှုတွေနဲ့ စပိန်မြေမှာ ပုံမှန်ပွဲထွက်ခွင့်ရဖို့ ရုန်းကန်နေရသူ ဖြစ်ပါတယ်။ ဒမ်ဘီလီဟာ နိုဝင်ဘာလကစလို့ ပွဲထွက်ခွင့် ပျောက်ဆုံးခဲ့သူဖြစ်ပြီး ဖေဖော်ဝါရီလမှာလည်း ခွဲစိတ်ကုသမှု ခံယူခဲ့ရပါတယ်။ ဒါ့အပြင် ဒီကစားသမားဟာ လစ္စဘွန်းကို ချန်ပီယံလိဂ်ပြိုင်ပွဲ အတွက် သွားတဲ့ ဘာစီလိုနာ လူစာရင်းမှာလည်း မပါဝင်ခဲ့ပါဘူး။ ဒမ်ဘီလီရဲ့ ကစားသမားဘဝဟာ အတက်အကျများခဲ့ပေမယ့် သူဟာ ဆန်ချိုမတိုင်ခင် ဒေါ့မွန်အသင်းမှာ တောက်ပခဲ့ဖူးတဲ့ ကစားသမား ဖြစ်ပါတယ်။ သူဟာ ယူနိုက်တက်အသင်းက ခေါ်ယူဖို့ မသေချာသေးပေမယ့် အလွတ်တန်း ဆွေးနွေးမှုတွေ လုပ်ဆောင်ခဲ့ပြီး ဖြစ်တယ်လို့လည်း သတင်းတွေမှာ ဖော်ပြထားပါတယ်။  ပြီးခဲ့တဲ့ ရာသီအတွင်း ဂရင်းဝုဒ်၊ ရက်ရှ်ဖို့ဒ် စတဲ့ကစားသမားတွေ အသင်းမှာ တောက်ပခဲ့ပေမယ့်လည်း ဆိုးလ်ရှားကတော့ တောင်ပံတိုက်စစ်ကစားသမားတစ်ဦးကို ဆက်လက်ရှာဖွေနေဆဲဖြစ်ပြီး စောင့်ကြည့်နေတဲ့ ကစားသမားတွေထဲမှာ ဘိုင်ယန်မြူးနစ်အသင်းရဲ့ ကိုးမန်းနဲ့ ဂျူဗင်တပ်စ်အသင်းရဲ့ ကော်စတာတို့ ပါဝင်နေတယ်လို့ သိရပါတယ်။
10 months Ago
More News
Up