လီဗာပူး ကွင်းလယ်ကစားသမား ကော်တင်ဟိုဟာ ဒဏ်ရာကြောင့် လာမယ့် သြဂုတ် ၁၉ ရက်နေ့ ကစားမယ့် ပရီးမီးယားလိဂ်ပွဲစဉ်မှာ ပါဝင်နိုင်မှာ မဟုတ်သေးပါဘူး။ ကော်တင်ဟိုဟာ နောက်ကျောဒဏ်ရာကြောင့် ခရစ္စတယ်ပဲလေ့စ်အသင်းနဲ့ ပွဲစဉ်ကို လွဲချော်တာဖြစ်ပါတယ်။ သူ့အနာဂတ်နဲ့ပက်သက်လို့ ထင်ကြေးတွေ အမျိုးမျိုးထွက်ပေါ်နေပါတယ်။ ဘာစီလိုနာအသင်းကတော့ ဘရာဇီး ကွင်းလယ်ကစားသမားကို ခေါ်ယူနိုင်ဖို့ နီးစပ်နေပြီလို့ ပြောဆိုထားပါတယ်။ အသက် ၂၅ နှစ်အရွယ် ကော်တင်ဟိုကလည်း အသင်းပြောင်းရွှေ့ခွင့်ပြုဖို့ လီဗာပူးအသင်းဆီ စာရေးသား တောင်းဆိုထားပါတယ်။ လီဗာပူးနည်းပြ ဂျာဂန် ကလော့ကတော့ အခြေအနေတွေက ခက်ခဲတဲ့ အနေအထားတရပ် ဖြစ်တယ်လို့ ပြောဆိုထားပါတယ်။

လီဗာပူး ကွင်းလယ်ကစားသမား ကော်တင်ဟိုဟာ ခြေကျင်းဝတ်ဒဏ်ရာကြောင့် မန်စီးတီးနဲ့ ကစားမယ့် နှစ်သစ်အကြိုညမှာ ပါဝင်နိုင်မှာ မဟုတ်သေးဘူးလို့ နည်းပြ ဂျာဂန် ကလော့ပ်က အတည်ပြု ပြောဆိုပါတယ်။ အသက် ၂၄ နှစ်အရွယ် ဘရာဇီးလက်ရွေးစင်ဟာ ခြေကျင်းဝတ်ဒဏ်ရာကြောင့် ပရီးမီးယားလိဂ် ၆ ပွဲကို လွဲချော်ထားပါတယ်။ ကွင်းလယ်ကစားသမား ကော်တင်ဟိုဟာ ဒီနှစ်ရာသီထဲမှာ လီဗာပူးနဲ့ ဘရာဇီးအသင်းမှာ ခြေစွမ်းပြ ကစားနေသူလည်း ဖြစ်ပါတယ်။ လီဗာပူးနည်းပြက နောက်တန်းကစားသမားတဦးဖြစ်တဲ့ မာတစ်လည်း မန်စီးတီးနဲ့ပွဲမှာ ပါနိုင်မှာ မဟုတ်သေးဘူးလို့ ပြောပါတယ်။ လတ်တလောမှာတော့ လီဗာပူးအသင်းက အမှတ် ၄၀ နဲ့ အမှတ်ပေးဇယား အဆင့် ၂ မှာ ရှိနေပြီး မန်စီးတီးက ၃၉ မှတ်နဲ့ အဆင့် ၃ မှာ ရပ်တည်နေပါတယ်။