ဒဂုံမြို့သစ်အရှေ့ပိုင်း

November 8, 2022

ဒဂုံမြို့သစ်အရှေ့ပိုင်း စက်မှုဇုန်နှင့် လျှပ်စစ်ရုံးအနီးတွင် ဗုံးပေါက်

ရန်ကုန်မြို့၊ ဒဂုံမြို့သစ်အရှေ့ပိုင်းမြို့နယ် စက်မှုဇုန်နဲ့ မြို့နယ်လျှပ်စစ်ရုံးအနီးမှာ နိုဝင်ဘာ ၈ ရက် ဒီနေ့မနက်ပိုင်းက ဗုံးပေါက်ကွဲခဲ့ပါတယ်။

ဒဂုံမြို့သစ်အရှေ့ပိုင်းမြို့နယ် ၅၂ ရပ်ကွက် ဒဂုံအရှေ့စက်မှုဇုန် ဘူတာလမ်းဘေးမှာ ဒီနေ့မနက် ၈ နာရီက ဗုံးပေါက်ကွဲခဲ့တာဖြစ်ပြီး ထိခိုက်ဒဏ်ရာရသူ မရှိဘူးလို့ ရပ်ကွက်နေသူတယောက်က ပြောပါတယ်။

“ကြားတာက စက်မှုဇုန်မှာ ဗုံးတွေ့လို့ စစ်တပ်က လာဖောက်တာလို့ ပြောတယ်။ ဘူတာလမ်းမှာ စစ်သားတွေ အများကြီးပဲ။ စက်မှုဇုန်မှာလည်း စစ်နေတယ်။”

အလားတူ ဒဂုံမြို့သစ်အရှေ့ပိုင်းမြို့နယ် လျှပ်စစ်ရုံး အနီးမှာလည်း ဒီနေ့မနက် ၉ နာရီက ဗုံးပေါက်ကွဲမှုဖြစ်ခဲ့တယ်လို့ မြို့ခံတယောက်က ပြောပါတယ်။

“ရုံးနားမှာပေါက်တာ၊ အသံကတော့ အကျယ်ကြီးပဲ။ စစ်သားတွေရော ရဲတွေပါ ရောက်နေတာ၊ ထိတဲ့သူရှိတယ်လို့တော့ မကြားဘူး။”

လတ်တလောမှာ စစ်ကောင်စီတပ်တွေ ဒဂုံမြို့သစ်အရှေ့ပိုင်းမြို့နယ် စက်မှုဇုန်နဲ့ EPC ရုံး အနီးတဝိုက်မှာ လမ်းသွားလမ်းလာနဲ့ ဆိုင်ကယ်တွေကို စစ်ဆေးနေတယ်လို့ ဒေသခံတွေဆီက သိရပါတယ်။

မနေ့ည ၈ နာရီကလည်း ဒေါပုံမြို့နယ်၊ ဇေယျာသီရိရပ်ကွက် ယမုံနာလမ်းမပေါ်ရှိ ကမ္ဘောဇ K Pay စင်တာ လုံခြုံရေးကင်းတဲအနီးမှာ ဗုံးပေါက်ကွဲခဲ့ပါသေးတယ်။

ရန်ကုန်က မြို့နယ်တချို့မှာ နိုဝင်ဘာ ၁ ရက်မှ ၈ ရက်နေ့အထိ ပစ်ခတ်မှုနဲ့ ဗုံးပေါက်ကွဲမှု ၁၀ ကြိမ်ဖြစ်ခဲ့ပြီး ၅ ယောက်သေဆုံးကာ ၄ ယောက် ဒဏ်ရာရရှိခဲ့ပါတယ်။

3 months Ago

October 21, 2022

ဒဂုံမြို့သစ်အရှေ့ပိုင်းတွင် စစ်တပ်က ရိုဟင်ဂျာ ၁၀၀ ကျော်ကိုဖမ်းဆီး

ရန်ကုန်မြို့၊ ဒဂုံမြို့သစ်အရှေ့ပိုင်းမြို့နယ်၊ ၁၀ ရပ်ကွက်၊ ဧရာဝတီလမ်းရှိ နေအိမ်တအိမ်ကို စစ်ကောင်စီတပ်၊ ရဲနဲ့ အုပ်ချုပ်ရေးအဖွဲ့တွေ အောက်တိုဘာ ၂၀ ရက် ညပိုင်းက ဝင်ရောက်စစ်ဆေးပြီး ရိုဟင်ဂျာ ၁၀၀ ကျော်ကို ကား ၂ စီးနဲ့အတူ ဖမ်းဆီးခဲ့တယ်လို့ မြို့ခံတယောက်က ဒီဗွီဘီကို ပြောပါတယ်။

“၁၀ ရပ်ကွက်မှာ ညကမိတာ လူ ၁၀၀ ကျော်တယ်။ ယာဥ်မောင်းတွေရော ဖမ်းသွားတယ်။ ကားနှစ်စီးလည်း စခန်းကသိမ်းသွားတယ်။”

အထောက်အထားမဲ့တွေ ရောက်ရှိနေထိုင်တယ်ဆိုတဲ့ သတင်းအရ စစ်တပ်အပါအဝင် ဌာနဆိုင်ရာ အဖွဲ့အစည်းတွေ ဝင်ရောက်စစ်ဆေးခဲ့ရာက ဖမ်းဆီးရမိခဲ့တာဖြစ်တယ်လို့ ရပ်ကွက်နေသူတယောက်က ဒီဗွီဘီကို ပြောပါတယ်။

“၁၂၁ ယောက်မိတယ်၊ ကားလည်းသိမ်းတယ်၊ အိမ်ရှင်လည်း အဖမ်းခံရတယ်ကြားတယ်။ အကုန်လုံး စစ်တပ်က ကားနဲ့တင်သွားတာ။”

ဖမ်းဆီးရခံရသူတွေမှာ အိမ်ရှင်အပါအဝင် ၄ ယောက်၊ ရိုဟင်ဂျာအမျိုးသား ၇၈ ယောက်နဲ့ အမျိုးသမီး ၃၉ ယောက်ဖြစ်ပြီး ရဲစခန်းမှာ စစ်ဆေးမှုတွေ ပြုလုပ်နေတယ်လို့ အုပ်ချုပ်ရေးနဲ့ နီးစပ်သူတယောက်က ဒီဗွီဘီကို ပြောပါတယ်။

“ရဲစခန်းမှာ စစ်မယ်၊ ပြီးရင် လဝကဥပဒေနဲ့ အမှုဖွင့်မယ်၊ တရားရုံးမှာ တရားစွဲမယ်၊ အခုကတော့ ဘာမှမသိရသေးဘူး စစ်နေတုန်း။”

ပြီးခဲ့တဲ့လတွေက တွံတေး၊ တောင်ဒဂုံ၊ မြောက်ဒဂုံ၊ ရွှေပြည်သာ အစရှိတဲ့ မြို့နယ်တွေမှာ ရန်ကုန်ကိုဝင်ရောက်လာတဲ့ ရိုဟင်ဂျာဦးရေ ၃၀၀ နီးပါးလောက် ဖမ်းဆီးခံခဲ့ရပါတယ်။

3 months Ago
More News
Up