ဒဂုံတက္ကသိုလ်ကျောင်းသားများသမဂ္ဂ

February 5, 2021

ဆန္ဒထုတ်ဖော်ပွဲများတွင် ပြည်သူများ ပူးပေါင်းပါဝင်ရန် ဒဂုံတက္ကသိုလ်ကျောင်းသားသမဂ္ဂ ဖိတ်ခေါ်

စစ်အာဏာသိမ်းခြင်းကို ကန့်ကွက်တဲ့ ဆန္ဒထုတ်ဖော်ပွဲတွေမှာ ပြည်သူတွေ ပူးပေါင်းပါဝင်ဖို့ ဒဂုံတက္ကသိုလ် ကျောင်းသားသမဂ္ဂက ဖိတ်ခေါ်လိုက်ပါတယ်။

အာဏာသိမ်းပြီး ရက်သတ္တပတ်ကာလအတွင်းမှာပဲ စစ်အာဏာသိမ်းတာကို ကန့်ကွက် ဆန္ဒထုတ်ဖော်ပွဲတွေနဲ့ လှုပ်ရှားမှုတွေ ဆက်တိုက်ဆိုသလို ပေါ်ပေါက်လာခဲ့ပါတယ်။  

အဲဒီဆန္ဒထုတ်ဖော်ပွဲတွေကို ဆရာဝန်တွေ၊ ကျန်းမာရေးဝန်ထမ်းတွေ၊ တက္ကသိုလ်ဆရာ၊ ဆရာမတွေနဲ့ ကျောင်းသားသမဂ္ဂအဖွဲ့တွေ စတဲ့ အဖွဲ့အစည်းတွေက လုပ်ဆောင်ခဲ့ကြတာပါ။  

ဒါကြောင့် ဖမ်းဆီးခံခေါင်းဆောင်တွေ ပြန်လွှတ်ပေးရေး၊ ဒီမိုကရေစီရရှိရေးနဲ့  စစ်အာဏာသိမ်းတာကို ကန့်ကွက်ဆန္ဒထုတ်ဖော်ပွဲတွေမှာ ပြည်သူတွေပါ ပူးပေါင်းပါဝင်ပေးဖို့ လိုအပ်တယ်လိုတယ်လို့ ဦးဆောင်သူတွေက ဆိုပါတယ်။

ဒါ့အပြင် ဒီလိုလှုပ်ရှားမှုတွေကို ကျောင်သားတွေက ဦးဆောင်သွားမှာဖြစ်ပြီး  မကြာခင်ကာလအတွင်းမှာ နိုင်ငံတစ်ဝှမ်းမှာရှိတဲ့ လမ်းမကြီးသီးသီးမှာ ပေါ်ပေါက်လာတော့မယ်လို့ ဒဂုံတက္ကသိုလ်ကျောင်းသားသမဂ္ဂ ဥက္ကဋ္ဌ ကိုမင်းထက်ဟန်က ပြောပါတယ်။

စစ်အာဏာသိမ်းတာကို  ကန့်ကွက်တဲ့ ဆန္ဒထုတ်ဖော်ပွဲကို ဖေဖော်ဝါရီ ၅ ရက်နေ့က ဒဂုံတက္ကသိုလ် ဘွဲ့နှင်းသဘင်အဆောက်အအုံမှာ ကျင်းပခဲ့ပါတယ်။ 

ဒဂုံတက္ကသိုလ် ဆရာဆရာမတွေ၊ ကျောင်းသားသမဂ္ဂတွေနဲ့ ကျောင်းဝန်ထမ်းတွေက  ပြည်သူ့ဆန္ဒကို အလေးထားပါ၊ တပ်မတော်အနေနဲ့ ပြည်သူက အာဏာအပ်နှင်းထားတဲ့  အစိုးရထံကနေ အာဏာသိမ်းယူခြင်းကို လုံးဝ (လုံးဝ) ဆန့်ကျင်ကန့်ကွက် ရှုတ်ချပါသည် ဆိုသည့်  ဗီနိုင်းဆိုင်းပုဒ်များကိုင်ဆောင်ပြီး ဆန္ဒထုတ်ဖော်ခဲ့ကြပါတယ်။

ဒါ့အပြင် တက္ကသိုလ် ဆရာ၊ ဆရာမတွေအနေနဲ့လည်း  ဆိုရှယ်မီဒီယာတွေကနေ ဆန္ဒထုတ်ဖော်တာမျိုး မဟုတ်ဘဲ လက်တွေ့လုပ်ဆောင်ဖို့ကိုလည်း  ဦးဆောင် ဆရာ၊ ဆရာမတွေက တိုက်တွန်းထားပါတယ်။

ပြည်သူလူထုကြားမှာလည်း စစ်အာဏာရှင်စနစ်ကို ကန့်ကွက်တဲ့ သံပုံးတီးတာတွေ၊ ကားဟွန်းတီးတာတွေနဲ့ ဖမ်းဆီးခေါင်းဆောင်တွေကို ပြန်လွှတ်ပေးရေး စတဲ့ ကြွေးကြော် ဆန္ဒထုတ်ဖော်ပွဲတွေ လုပ်ဆောင်လာကြပါတယ်။

သူဇာလင်း 

10 months Ago
Up