ထွေအုပ်ဝန်ထမ်း ၁ ဦး

August 30, 2020

ဂွမြို့နယ် ထွေအုပ်ဝန်ထမ်း ၁ ဦး ကိုဗစ်ကူးစက်ခံရ၍ ဝန်ထမ်းအားလုံး ရုံး Quarantine ဝင်

ရခိုင်ပြည်နယ်၊ ဂွမြို့နယ် အထွေထွေအုပ်ချုပ်ရေးက ဝန်ထမ်းတယောက် ကိုဗစ်-၁၉ ကူးစက်ခံရပြီးနောက် ထွေအုပ်တရုံးလုံးဟာ ရုံးမှာပဲ အသွားအလာ ကန့်သတ်နေထိုင်ပြီး အလုပ်တွေ ဆက်လုပ်နေကြပါတယ်။ ဝန်ထမ်းအမျိုးသမီးဟာ INGO ဝန်ထမ်းအမျိုးသမီး လူနာအမှတ် ၄၁၃ နဲ့ ထိတွေ့ဆက်စပ်ခဲ့ပြီးနောက် သြဂုတ် ၂၈ ရက်ညပိုင်းမှာ ကျန်းမာရေးဌာနထုတ်ပြန်ချက်အရ လူနာအမှတ် ၆၃၄ ဖြစ်လာခဲ့ပါတယ်။ ဂွမြို့နယ် အုပ်ချုပ်ရေးမှူး ဦးသန်းဝင်းက “ကျနော်တို့ရုံးဝန်ထမ်းတွေအားလုံးကို အဲဒီနေ့ညကပဲ အိမ်မပြန်ခိုင်းဘဲ ရုံးမှာပဲ Quarantine ဝင်ခိုင်းလိုက်ပါတယ်။ အားလုံး ၂၄ ယောက်ပါ။ ၂ ယောက်ကတော့ သံတွဲမှာ Quarantine ဝင်နေပါတယ်။ ရုံးမှာလည်း ရုံးအလုပ်တွေ ဆက်လုပ်နေပါတယ်” လို့ ပြောပါတယ်။ သူကိုယ်တိုင်လည်း Quarantine ဝင်နေရသလို Quarantine ဝင်နေသူတယောက်စီအတွက် အစိုးရအဖွဲ့က တရက်ကို ကျပ် ၃၀၀၀ နှုန်းထောက်ပံ့ထားပြီး ရုံးမှာပဲ ချက်ပြုတ်စားသောက်ကြတယ်လို့ သူက ပြောပါတယ်။ ရုံးအလုပ်တွေ လုပ်ရာမှာလည်း ခပ်ခွာခွာနေတာ၊ နှာခေါင်းစည်းနဲ့ လက်အိတ်ဝတ်ဆင်တာတွေလုပ်ထားတယ်လို့ ဆိုပါတယ်။  ထွေအုပ်ဝန်ထမ်း လူနာအမျိုးသမီးဟာ INGO ဝန်ထမ်းအမျိုးသမီးနဲ့ ထိတွေ့ခဲ့ပြီး‌နောက် အတည်ပြုလူနာအဖြစ် မသိရခင်ကာလမှာ ရုံးကိုလည်း ပုံမှန်တက်နေခဲ့တာဖြစ်ပါတယ်။ ဦးသန်းဝင်းက “ဝန်ထမ်းတွေရဲ့ မိသားစုတွေကတော့ Home Quarantine ထားပါတယ်။ ဝန်ထမ်းတွေကိုတော့ ဒီနေ့ပဲ ဓာတ်ခွဲနမူနာယူဖို့ လုပ်နေပါတယ်။ ကျနော်ကတော့ ၂ ကြိမ် စစ်ပြီးပါပြီ။ ပိုးမတွေ့ပါဘူး” လို့ ပြောပါတယ်။ ထွေအုပ်ဝန်ထမ်း လူနာအမျိုးသမီးကို ဂွမြို့နယ်ဆေးရုံမှာ ကုသပေးနေပြီး ကျန်းမာရေးကောင်းသလို ဒီနေ့အထိ ဖျားနာတာမရှိဘူးလို့လည်း ပြောပါတယ်။ သူနဲ့တအိမ်တည်း အတူနေသူကိုလည်း သီးခြားလူနာဆောင်မှာ ထားတယ်လို့ ဂွမြို့နယ် ပြည်သူ့ကျန်းမာရေးဦးစီးဌာနက ဆိုပါတယ်။ INGO ဝန်ထမ်းအမျိုးသမီး လူနာအမှတ် ၄၁၃ ဟာ သံတွဲမြို့ကို သြဂုတ် ၁၁ ရက်နေ့မှာ အဖော် ၃ ယောက်နဲ့အတူ ရောက်လာခဲ့ပြီး မြို့နယ်အထွေထွေအုပ်ချုပ်ရေးအပါအဝင် ဌာနဆိုင်ရာ ၃ ခုနဲ့ အစည်းအဝေးပြုလုပ်ခဲ့တာကြောင့် သံတွဲမြို့နယ်အုပ်ချုပ်ရေးမှူးနဲ့ ထွေအုပ်ဝန်ထမ်း ၃ ယောက် အပါအဝင် သံတွဲမြို့က လူ ၃၀ ကျော်လောက်ကိုလည်း ရောဂါစစ်ဆေးခဲ့ပါတယ်။
1 year Ago

June 18, 2020

ကျောက်ဖြူမြို့နယ်တွင် ထွေအုပ်ဝန်ထမ်း ၁ ဦး အသတ်ခံရ 

ရခိုင်ပြည်နယ်၊ ကျောက်ဖြူမြို့နယ်၊ စိုင်ခြုံကျေးရွာမှာတာဝန်ကျနေတဲ့ ကျောက်ဖြူမြို့ အထွေထွေအုပ်ချုပ်ရေးမှူးရုံးဝန်ထမ်း ဦးစိုးမင်းထွန်းကို ဇွန် ၁၆ ရက် ညက အမည်မသိလူတစ်စုက  နေအိမ်ကနေ ဖမ်းဆီးခေါ်ဆောင်သွားပြီး သတ်ပစ်ခဲ့တယ်လို့ ကျောက်ဖြူမြို့မရဲစခန်းက သိရပါတယ်။ ဇွန်လ ၁၇ ရက်မနက်မှာတော့ ကျောက်ဖြူမြို့၊ တောင်ရင်းရပ်ကွက် လေယာဉ်ကွင်းအနီးရှိ တောင်ရှည်ကျေးရွာကို သွားတဲ့ရေနုတ်မြောင်းအနီးမှာ ဦးစိုးမင်းထွန်းကို  ဒဏ်ရာတွေနဲ့ သေဆုံးနေတာတွေ့ရတယ်လို့ ကျောက်ဖြူမြို့မရဲစခန်းမှူး ဒုရဲမှူး ကျော်ဇောက ဒီဗွီဘီကို ပြောပါတယ်။ “သူကတော့ စိုင်ခြုံကျေးရွာမှာကျနေတဲ့ ရ.ယ.က စာရေးတစ်ဦးပေါ့။ ဦးစိုးမင်းထွန်းလို့ခေါ်တယ်။ ဇွန်လ ၁၆ ရက် ည ၁၂ နာရီခွဲအချိန်လောက်မှာ စိုင်ခြုံကျေးရွာမှာ ရှိတဲ့သူရဲ့ နေအိမ်ကို လူတစ်စုရောက်လာပြီးတော့ အတင်းအားဓမ္မဖမ်းဆီးခေါ်ဆောင်သွားတယ်။ မနက်ကျတော့ တောင်ရင်းရပ်ကွက် တောင်ရှည်ကျေးရွာသွားတဲ့လမ်းမှာ ထားခဲ့တာပေါ့၊ ဒဏ်ရာတွေကတော့ ဦးခေါင်းတွေ၊ လက်တွေနဲ့ ဝမ်းဗိုက်တွေမှာ ဒဏ်ရာတွေနဲ့ အသတ်ခံရပြီး သေနေတာကိုတွေ့ရတယ်” လူသတ်တရားခံတွေဟာ ဘယ်သူတွေလဲဆိုတာနဲ့ ဘာကြောင့်ခုလို သတ်ဖြတ်ခဲ့တယ်ဆိုတာကိုတော့ မသိရသေးပါဘူး။  ဦးစိုးမင်းထွန်းဟာ ကျောက်ဖြူမြို့နယ်က အထွေထွေအုပ်ချုပ်ရေး ဝန်ထမ်း တစ်ဦးဖြစ်တဲ့ အကြောင်းနဲ့ အသတ်ခံရပြီးသေဆုံးခဲ့တာဖြစ်တယ်လို့ ကျောက်ဖြူမြို့နယ်အုပ်ချုပ်ရေးမှူး ဦးစိုးမိုးကျော်ကလည်း အတည်ပြုပြောပါတယ်။ ဦးစိုးမင်းထွန်း အသတ်ခံရတာနဲ့ပတ်သက်ပြီး ဇနီးဖြစ်သူက တရားလိုပြုလုပ် တိုင်ကြားခဲ့တာကြောင့် ကျောက်ဖြူမြို့မရဲစခန်းမှာ ရာဇသတ်ကြီးပုဒ်မ-၃၀၂/၃၄ နဲ့ အမှုဖွင့်လှစ်ကာ ဒီအမှုနဲ့ပတ်သက်ပြီး စုံစမ်း စစ်ဆေးနေပါတယ်။ သတင်း- နောင်နောင်
1 year Ago
Up