ထွန်းလင်း

September 13, 2021

နွားကို ပလာတာမကျွေးနဲ့

သမ္မတဦးဝင်းမြင့်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် ပြည်သူ ရွေးကောက်ခံ နိုင်ငံ့ခေါင်းဆောင်များကို မင်းအောင်လှိုင်က ဖမ်းဆီးပြီးနောက် စစ်တပ်ထွက်ကုန် ဒုသမ္မတမြင့်ဆွေသည် မည်သူခန့်မှန်းမသိသော ယာယီသမ္မတဖြစ်ခဲ့သည်။

ဆက်လက်ပြီး ယာယီသမ္မတ  ဦးဆောင်ကာ ရွေး ကောက်ခံဘက်ခြမ်းက ကာလုံအဖွဲ့ဝင်များ မပါသောကာလုံအစည်းအဝေးခေါ်။ အာဏာအရပ်ရပ်ကို မင်းအောင်လှိုင်ထံသို့ လွှဲအပ်။ ယင်းကို  များစွာသော မြန်မာဒီမိုကရေစီပြည်သူများကရော နိုင်ငံတကာအသိုင်းအဝိုင်းကပါ စစ်တပ်က လက်နက်ဖြင့် အာဏာသိမ်းခြင်းဟု ရှုမြင်ခဲ့ကြသည်။

အာဏာသိမ်းပြီးမကြာမီမှာပင် ကုလသမဂ္ဂကရော အမေရိကန်၊ ဗြိတိန်စသည့် နိုင်ငံတကာအ သိုင်းအဝိုင်းကပါ ပြင်းပြင်းထန်ထန်ကန့်ကွက်ခဲ့ကြသည်။ သူ့ထက်ကဲသောအမေရိကန်က စစ်အုပ်စုကို ပစ်မှတ်ထားသော စီးပွားရေးပိတ်ဆို့မှုများ စတင်ရန် ဒုံးစိုင်းတော့သည်။

အာဏာသိမ်းစစ်ကောင်စီကမူ ဘယ်သူဘာပြောပြော ဂရုမစိုက်။ ၂၀၀၈အခြေခံဥပဒေနှင့်အညီ အာဏာလွှဲပြောင်းခြင်းသာဖြစ်ကြောင်း မျက်စိစုံမှိတ်ရွတ်ဆို၊ ဒီမိုကရေစီအင်အားစုထဲက သူတို့မျက်စိကျနေသူများကို မြန်မြန်ဆန်ဆန်ဖမ်းဆီးကာ ထောင်ထဲထည့်ပစ်ခဲ့သည်။ မည်သူကမှ မတားဆီးလိုက်နိုင်သော အာဏာသိမ်းမှု။

တစ်နိုင်ငံလုံးအနှံ့ အာဏာသိမ်းမှုကို ဆန့်ကျင်သော ပြင်းထန်သည့်ဆန္ဒပြပွဲကြီးများ ဖြစ်လာသည်။ ပထမ၊ ဆန္ဒပြပွဲများကို အကြမ်းဖက်ဖြိုခွင်းခြင်းမရှိ။ မင်းတို့ကြိုက်သလောက်ပြ ငါတို့လည်း အာဏာပြန်မပေးနိုင်ဘူးဆိုသည့်အပေါက်မျိုး။ ပြီးတော့ ဆန္ဒပြပွဲများသည် အချိန်တန်လျှင် ပြီးသွားလိမ့်မည်ဟုလည်း မင်းအောင်လှိုင်နှင့် အပေါင်းအပါတို့က ထင်မှတ်ခဲ့ကြသည်။

သို့သော် ၊ သူတို့ထင်သလို အချိန်တန်သော်လည်း ပွဲမပြီးမှန်းသိလာသည့်အခါကျတော့ ရှစ်လေးလုံး ကာလ နည်းဟောင်းကိုပြန်သုံးပြီး ရပ်ကွက်များထဲသို့ လူတချို့စေလွှတ်ကာ အထိတ်တလန့်ဖြစ်စေ အောင်ဖန်တီး၊ ကောလာဟလမျိုးစုံထုတ်လွှင့်ကာ ပြည်သူတို့၏ စိတ်ကို ကယောက်ကယက်ဖြစ်စေ။ ထိုသို့သောနည်းဖြင့် ပြည်သူတို့၏ မထိန်းနိုင်သောဒေါသကြောင့် အကြမ်းဖက်မှုများဖြစ်စေလိုခြင်း။ ထို့နောက် အကြမ်းဖက်မှုများကို အကြမ်းဖက်ဖြေရှင်းရကြောင်း အကြောင်းပြကာ အရုပ်ဆိုး အကျည်းတန်စွာဖြင့် ကားလိပ်ချပစ်ရန်ရည်ရွယ်ခဲ့သည်။

ပါးနပ်သောပြည်သူတို့က အာဏာရှင်တို့ထောင်ထားသောထောင်ချောက်ကိုရှောင်က ကိုယ့်အလုပ် ကိုယ်ဆက်လုပ်လေတော့ စစ်ကောင်စီကဆန္ဒပြပွဲများကို အကြမ်းဖက်ဖြိုခွင်းတော့သည်။ ထုံးစံအတိုင်း၊ ပထမ လက်မရဲသေးရာမှ နောက်တော့ ပြည်သူတို့၏ခေါင်းကိုမှန်အောင် သွေးအေးအေးဖြင့် ပစ်ရဲလာခဲ့သည်။

ပြည်သူကိုဗြောင်ကျကျသတ်ဖြတ်သည့်အခါတိုင်းတွင် ကုလသမဂ္ဂ၊ အနောက်အုပ်စုနှင့် အရှေ့တိုင်း နိုင်ငံအချို့က ပြင်းပြင်းထန်ထန်ကန့်ကွက်ခဲ့သည်ချည်းဖြစ်ပြီး အိမ်နီးချင်း တရုတ်နှင့် တရုတ်အလိုကျ အာဆီယံနိုင်ငံအချို့တို့က မသိချင်ယောင်ဆောင်ခဲ့ကြသည်။ ကုလသမဂ္ဂနှင့် အနောက်အုပ်စုတို့၏ အာဏာသိမ်းမှုအပေါ် ကန့်ကွက်မှုများသည် စစ်ကောင်စီအတွက် သိသာသော သံတမန်ရေးဖိအားနှင့် စီးပွားရေးပိတ်ဆို့မှုများကြောင့် ထိခိုက်မှုများရှိခဲ့တာသေချာသည်။ သို့သော် ၊စစ်ကောင်စီအတွက်ပြာယာခတ်သွားစေလောက်သည့် ထိခိုက်မှုမျိုးမဟုတ်တာလည်းသေချာသည်။

လူငယ်တို့၏ဦးခေါင်းကို သွေးအေးအေးဖြင့် ပစ်ရဲခတ်ရဲ ပြီးနောက်ပိုင်းတွင်  ပို၍လက်ရဲဇက်ရဲရှိလာ ကာ ပြည်သူတို့၏ ဓနဥစ္စာကို ဗြောင်ဖျက်ဆီး ၊ဗြောင်လုယက်ခြင်းနှင့် ဖမ်းမိသူအချို့ကို စစ်ကြောရေးတွင် အသေရိုက်သတ်ခြင်းအထိ မလုပ်ရဲတာဘာမှမရှိကြောင်း ကမ်း ကုန်အောင်သက်သေပြတော့သည်။

မြန်မာ့အရှုပ်အထွေးအပေါ် အမြင်လည်းမတူ အထိုင်လည်းမတူသော အနောက်အုပ်စုနှင့် တရုတ် တို့က ကိုယ့်မျှော်လင့်ချက်နှင့်ကိုယ် အာဆီယံကို ထိုးအပ်ခဲ့ကြသည်။ မြန်မာ့အရေး အာဆီယံမှ တစ်ဆင့် ဖြေရှင်းခြင်းဖြင့် ရှေ့ဆက်ရန် တစ်သံတည်းထွက်ခဲ့ကြသည်။

မြန်မာ့အရေး အာဆီယံခေါင်းဆောင်များတွေ့ဆုံဆွေးနွေးခြင်းသည် အာဏာသိမ်းပြီး ၃ လခန့်အကြာ၌ အထမြောက်ခဲ့သည်။ ထို့နောက်ဧပြီ ၂၄ ရက်တွင်  အာဆီယံခေါင်းဆောင်များ အစည်းအဝေးမှ မြန်မာ့အရေး ကိုင်တွယ်ဖြေရှင်းမည့် ဘုံသဘောတူညီချက် ၅ ရပ် ထွက်ပေါ်လာသည်။ အနောက်အုပ်စုနှင့် တရုတ်၏ လက်ခုပ်သံကို ရခဲ့သည်။ မူ ၅ ချက်သည် အကြမ်းဖက်မှုများ မလုပ်ကြရန်နှင့် တွေ့ဆုံဆွေးနွေးခြင်းနည်းဖြင့် အာဏာမသိမ်းခင်ကရှိခဲ့သော စစ်တစ်ပိုင်းဒီမိုကရေစီသို့  ပြန်သွားရန်ရည်ရွယ်သည်။ မူ၅ချက်ထဲက တစ်ချက်ဖြစ်သော မြန်မာနိုင်ငံဆိုင်ရာ အာဆီယံအထူးသံတမန်ခန့်အပ်ခြင်းကို နောက်ထပ် ၃လ ကျော်အကြာ အာဏာသိမ်းပြီးနောက် ၆ လ အကြာ သြဂုတ် ၂ ရက်တွင် ခန့်အပ်နိုင်ခဲ့သည်။ အာဆီယံအထူးသံခန့်အပ်သည့်အချိန်တွင် စစ်ကောင်စီက ပစ်သတ်သဖြင့် မြန်မာပြည်သူ ၁၀၀၀ နီးပါး ကျဆုံးခဲ့ ပြီဖြစ်သည်။

ထို့နောက် ဇွန် ၁၅ ရက်နေ့တွင် ပေါက်မြို့နယ်၊ ကင်းမတစ်ရွာလုံးကို စစ်ကောင်စီတပ်ဖွဲ့က မီးရှို့ခဲ့ရာ ထွက်မပြေးနိုင်၍ ရွာထဲကျန်ခဲ့သော အဘိုးအဘွားလင်မယား မီးလောင်သေဆုံးခဲ့သည်။ မင်းအောင်လှိုင်က အာဆီယံမူ ၅ ချက်ကို ထိုသို့  လူမဆန်ဆုံးနည်းလမ်းဖြင့် ဆုတ်ဖြဲပြခဲ့ခြင်းဖြစ်ပြီး နိုင်ငံတကာကပြင်းထန်စွာ ကန့်ကွက်ကြောင်း ထုတ်ပြန်ခဲ့သည်။ အာဆီယံကမူ ကင်းမရွာ လူမဆန်မှုသည် အာဆီယံမူ ၅ ချက်နှင့်မညီဟု ဖြောင်းဖြောင်းဖျဖျ မှတ်ချက်ပေးခြင်းပင်မရှိခဲ့ပေ။

ဆက်လက်ပြီး ၂၀၂၀ ရွေးကောက်ပွဲရလဒ်ကို မဲလိမ်မဲခိုးမဲမသမာခြင်းကြောင့်ဆိုသည့် အကြောင်းပြ ချက်ဖြင့်ပယ်ဖျက်ကြောင်းကြေညာခဲ့သည်။ ဘယ်သူတွေက ဘယ်လို မဲမသမာမှုကျူးလွန်ခဲ့ကြောင်း အချက်အလက်ခိုင်လုံစွာမပြနိုင်ဘဲ ပယ်ဖျက်ခြင်းဖြစ်သည်။ အာဏာသိမ်းပြီးနောက်ပိုင်း မြို့နယ်ရွေး ကောက်ပွဲကော်မရှင်ဥက္ကဋ္ဌများကို  ဖမ်းဆီးခဲ့ပြီးနောက် ပြန်လွှတ်ပေးခဲ့သည့်အတွက် စစ်ကောင်စီပြောသည့် မဲမသမာမှုသည် ရွေးကောက်ပွဲကော်မရှင်များ နှင့်မဆိုင်သည့်သဘော။ ဆိုတော့ပြည်သူများကပဲ ရွေးကောက်ပွဲကော်မရှင်များကိုလည်းဂရုမစိုက်၊ ရွေးကောက်ပွဲစောင့်ကြည့်အဖွဲ့နှင့် ပါတီကိုယ်စားလှယ်များကိုလည်း ဂရုမစိုက်ဘဲ ပြည်သူ စိတ်ကြိုက်ထင်သလိုမဲ မသမာမှုကျူးလွန်ခဲ့လေခြင်းလေလား။ ပြည်သူတို့ရယ်ကြမောကြရသည်။

အာဏာသိမ်းခြင်း ၆ လ ပြည့်၊ သြဂုတ် ၁ ရက်ရောက်တော့ စစ်ကောင်စီကိုလည်းမဖျက်၊ စစ်ကောင်စီကအသက်သွင်းသော အရပ်သားဆန်မှုအဖြစ် အိမ်စောင့်အစိုးရဖွဲ့စည်းခဲ့ကာ ကျနော်သည် ကာကွယ်ရေးဦးစီးချုပ်၊ စစ်ကောင်စီဥက္ကဋ္ဌ ဗိုလ်ချုပ်မှူးကြီးဖြစ်သလို ဝန်ကြီးချုပ်လည်းဖြစ်ကြောင်း မင်းအောင်လှိုင်က နိုင်ငံတော်ကို ကိုယ်သိမ်းကိုယ်ခန့်စနစ်ဖြင့် ကြိုးစားပမ်းစားနှစ်ကိုယ်ခွဲအမှုတော်ထမ်းမည့်နှယ်ကြေညာခဲ့သည်။ ထို့နောက်၏ အရေးပေါ်ကာလ သည် ၂၀၂၃ ခုနှစ်သြဂုတ်အထိဖြစ်ကြောင်းလည်းပြောသည်။

ပြောရလျှင် ကိုယ့်သဘောနှင့်ကိုယ် အာဏာသိမ်းသည်။ ကိုယ့်ဟာကိုယ်စစ်ကောင်စီဥက္ကဋ္ဌခန့်၊ဝန် ကြီးချုပ်လည်းခန့်ပြီး အရေးပေါ်ကာလကိုလည်း ကိုယ့်သဘောနှင့်ကိုယ်သတ်မှတ်ကာ အာဆီယံကိုရော ကမ္ဘာကိုပါ ငါ့ဘာသာထင်ရာလုပ်မည်ဟု စိန်ခေါ်လိုက်ခြင်းဖြစ်သည်။ တကယ်တော့ ၂၀၂၀ ရွေးကောက်ပွဲရလဒ်ကို ပယ်ဖျက်ခြင်း၊ အရေးပေါ်ကာလသတ်မှတ်ခြင်းနှင့် ပြီးမှ ရွေးကောက်ပွဲပြန်ကျင်းပပေးမည်ဟု ဆိုခြင်းသည် အာဆီယံ မူ ၅ ချက်၏ ရည်ရွယ်ချက်နှင့် ဘာမှမဆိုင်။ မင်းအောင်လှိုင်ပြောကြားခဲ့သည့် ၎င်း၏အစီအစဉ်သည် အာဆီယံ၏မူ ၅ ချက်ကို လုံးဝလက်မခံကြောင်း အပြတ်၏ပြောကြားခဲ့ခြင်းဖြစ်သည်။

နိုင်ငံတကာက မင်းအောင်လှိုင်၏ အစီအစဉ်ကိုလက်မခံကြောင်းပြောကာ ကန့်ကွက်ခဲ့သော်လည်း မင်းအောင်လှိုင်၏ ခြေလှမ်းများကို ရှေ့ဆက်မတိုးအောင် တားဆီးနိုင်စွမ်းမရှိခဲ့ပေ။ အာဆီယံအထူးသံဆိုလျှင် မင်းအောင်လှိုင်လုပ်သမျှနှင့် အာဆီယံမူ ၅ ချက်သည် တစ်လမ်းစီ ဖြစ်နေသော်လည်း တုတ်တုတ်မျှမလှုပ်ခြင်းနည်းဖြင့် မင်းအောင်လှိုင်ငြိုငြင်မှာ စိုးရိမ်နေသလား အောက်မေ့ရသည်။

မင်းအောင်လှိုင်သည် မည်သူ့ကိုမှဂရုမစိုက်။ သူ့လမ်းသူဖောက်ပြီး သူဆူးညှောင့်ခလုတ်ဟု ထင်သ မျှကိုအငြိုးတကြီးရက်စက်ခဲ့သည်။ အာဏာသိမ်းမှု ၇ လကျော်အတွင်း (စက်တင်ဘာ ၁၁ ရက်နေ့အထိ) စစ်ကောင်စီသတ်၍ သေသောပြည်သူ ၁၀၈၀ ဦး ။ ၎င်းတို့ ဖမ်းလိုသူကို မမိသဖြင့် ဓားစားခံအဖြစ်အဖမ်းခံရသူမှာစက်တင်ဘာ ၈ ရက်နေ့ အထိ ၁၇၇ ဦး ရှိပြီး အယောက် ၄၀ ကိုပြန်လွှတ်ပေးခဲ့သည်။ ထိုသို့ဓားစားခံအဖြစ် အဖမ်းခံရသူများထဲတွင် အသက် ၁၈ နှစ် အောက်ကလေး ၁၅ ဦးရှိပြီး ၉ ဦးကိုသာ ပြန်လွှတ်ပေးသေးကြောင်း နိုင်ငံရေးအကျဉ်းသားများ ကူညီစောင့် ရှောက်ရေးအသင်း(AAPP)က ထုတ်ပြန်ထားသည်။

ထို့ပြင် ယခုနောက်ဆုံးပေါ် ဂန့်ဂေါမြို့နယ်၊ မြင်သားရွာမှ ကျည်သင့်သေဆုံးနေသော လူငယ်လေး များအားအလောင်းတန်းစီထားသည့်ဓာတ်ပုံ၊ မြင်သားရွာနှင့် နှမ်းခါးရွာမှ လူနေအိမ်များအား စစ်ကောင်စီတပ်က  မီးလောင်တိုက်သွင်းခဲ့သည့်ဓာတ်ပုံများမှာ မင်းအောင်လှိုင်၏ သရုပ်သကန်ကို ဖော်ပြနေပေသည်။

သို့သော် ၊ စက်တင်ဘာ ၇ ရက်နေ့  ခုခံတော်လှန်စစ်စတင်ပြီဖြစ်ကြောင်း အမျိုးသားညီညွတ်ရေးအစိုး၏ရကကြေညာပြီး နောက်တွင် နိုင်ငံရေးနည်းဖြင့်သာ တွေ့ဆုံ ဆွေးနွေးအဖြေရှာကြရန်ဆိုသည့် လူကြီး လူကောင်းနိုင်ငံရေး ပေတံ ရှည်ရှည်လျားလျား အသံထွက်ညံခဲ့သည်။

ယခုအာဏာသိမ်းခြင်း ၇ လကျော်အတွင်း နိုင်ငံတကာ၏ တောင်းဆိုမှုနှင့် ကန့်ကွက်မှုမှန်သမျှကို ဂရုမစိုက်ဘဲ သူလုပ်ချင်တာကိုသာလုပ်ပြီး သူသတ်ချင်ရာသတ်နေသော မင်းအောင်လှိုင်ထံမှ တွေ့ဆုံဆွေးနွေးရေးမျှော်လင့်ရန် တောင်းဆိုခြင်းသည် မြန်မာပြည်သူများအတွက် အကြီးအကျယ်အံ့အားသင့်ရပါသည်။

မြန်မာပြည်သူတို့သည် ငြိမ်းချမ်းစွာဆန္ဒပြတောင်းဆိုခြင်းနှင့် တွေ့ဆုံဆွေးနွေးအဖြေရှာရေးမူကို ကိုင် စွဲခဲ့သည်မှာ ရှစ်လေးလုံးအရေးတော်ပုံကြီးကတည်းက စတင်ခြင်းဖြစ်ပြီး ဦးသိန်းစိန်သမ္မတ ဖြစ်ပြီးနောက် တစ်ကြိမ်သာ ဖြောင့်ဖြောင့်မှန်မှန်တွေ့ဆုံဆွေးနွေးခွင့်ရခဲ့ပြီး နှစ်ဖက်အကျိုးရှိ၊ နှစ်ဖက်ကြည်ဖြူသော စစ်တစ်ပိုင်းဒီမိုကရေစီလမ်းပေါ် လျှောက်ခဲ့ကြခြင်းဖြစ်သည်။

ထိုလမ်းကို လက်နက်အားကိုးဖြင့်ဖျက်ခဲ့သူမှာ မင်းအောင်လှိုင်ဖြစ်သည်။ ဒီးမော့ဆိုမြို့နယ်(ငွေ တောင် ခလရ ၁၀၂ ၀င်းထဲ ဟုယူဆ) အတွင်း မျက်နှာတစ်ခုလုံးစုတ်ပြတ်သတ်နေ အောင်ရိုက်နှက်ခံထားရပြီး ဒူးထောက်လျက်ပင် လက်သုံးချောင်းထောင်နေသည့် အရွယ်မရောက်သေးသော ကလေးနှစ်ဦး၏ ဓာတ်ပုံသည် ယနေ့မြန်မာပြည်သူတို့၏ဘဝကို ကိုယ်စားပြုသည်။ လက်ရှိမြန်မာပြည်သူတို့သည် အငတ်ဘေးသင့်နေသမျှကို မသိချင်ယောင်ဆောင်ကာ ကိုဗစ်နှင့်စစ်ကောင်စီရန်ကြောင့် အသက်မသေရေးအပေါ်သာ အဓိက အာရုံစိုက်နေရသည်။

ဆိုတော့၊ အာဏာသိမ်းမှု ၇ လကျော်အတွင်း ဘယ်ကမ္ဘာကိုမှ လူမထင်၊ အမှန်အလုပ်ဖြစ်နိုင်မည့် တွေ့ဆုံဆွေးနွေးရေးလမ်းတစ်စပင် မရှိခဲ့သောအခြေအနေမှသည် စားပွဲဝိုင်းပေါ်သို့ရောက်အောင်  နောက်ဘယ်နှနှစ်ကြာ မြန်မာပြည်သူတို့ စောင့်ဆိုင်းရမည်နည်း။ ၂၄ နာရီပြည့် မူးယစ်ရမ်းကားနေသူတစ်စုကို နိဗ္ဗာန်ရောက် ကြောင်းတရားဟောပြရုံဖြင့် တရားထူးရလိမ့်မည်ဟု ထင်မှတ်နေခြင်းသည် သိပ်မိုက်မဲလွန်းကျပေမည်။

ကိုယ့်ဝေဒနာကိုယ်သာ အသိဆုံးဖြစ်သည်။ တွေ့ဆုံဆွေးနွေးမှုသည် မင်းအောင်လှိုင်ပြောသည့် အရေးပေါ်ကာလ ၂၀၂၃ ခုနှစ်ရောက်သည့်တိုင် အလုပ်ဖြစ်မည်မဟုတ်ကြောင်း မြန်မာပြည်သူတို့ကောင်း ကောင်းသိသည်။ အသတ်ခံ၊ ထောင်ကျခံ၊ အငတ်ခံကာ မင်းအောင်လှိုင်လုပ်ပေးမည့် ရွေးကောက်ပွဲကို ထိုင်စောင့် ၊မင်းအောင်လှိုင်စိတ်ကြိုက်အစိုးရအဖွဲ့နှင့် အချိန်မရွေးအာဏာပြန်သိမ်းခွင့်တွင် ပြည်သူတို့လည်စင်းခံ၏ရမည့်ဘဝမျိုး မြန်မာပြည်သူတို့ လုံးဝမလိုချင်တော့ပြီ။

ခုခံတော်လှန်စစ်သည် ကိုယ့်ဘဝပေးကိုယ်သိသောမြန်မာပြည်သူတို့၏ စိတ်ချလက်ချ ရွေးချယ်မှု ဖြစ်ပြီး ပြည်သူတို့၏ ရွေးချယ်မှုကို အမျိုးသားညီညွတ်ရေးအစိုးရက စက်တင်ဘာ ၇ ရက်တွင် အသိအမှတ်ပြုပေးလိုက်ခြင်းသာဖြစ်သည်။ တိုင်းရင်းသားလက်နက်ကိုင်များအားလုံးနှင့် နိုင်ငံတကာ အသိုင်းအဝိုင်းအနေနှင့် မြန်မာပြည်သူတို့၏ ခုခံတော်လှန်စစ်ကို စိတ်ရောကိုယ်ပါ ပံ့ပိုးကူညီပေးကြရန် မေတ္တာရပ်ခံလိုပါသည်။

စစ်ကောင်စီကို စားပွဲဝိုင်းနိုင်ငံရေးအကြောင်း ပြောဆိုစည်းရုံးခြင်းသည် နွားကိုပလာတာကျွေးသလို ဖြစ်နေကြောင်း မြန်မာပြည်သူတို့ကောင်းကောင်းသိသည်။

ထွန်းလင်း

1 month Ago

August 27, 2021

မြန်မာမှာ ဒီမိုကရေစီမရှိလေ တရုတ်ခံတွင်းတွေ့လေ

ဘောင်းဘီဝတ်မှသည် ခေါင်းပေါင်းစွပ်လိုက်သော ၂၀၁၀ ရွေးကောက်ပွဲအပြီး ပြည်ခိုင်ဖြိုးအစိုးရတက်လာ။ စစ်တစ်ပိုင်းဒီမိုကရေစီ စတင်အသက်ဝင်လာရုံရှိသေး ပြည်သူတို့၏ တူညီသောဆန္ဒသည် တာကျိုးကျသည့်ပမာ အလုံးအရင်းဖြင့်ထွက်ပေါ်လာခဲ့သည်။

ယင်းမှာ စစ်အစိုးရနှင့် တရုတ်အစိုးရတို့ လက်ဝါးချင်းရိုက်ထားသော မြစ်ဆုံရေကာတာစီမံကိန်းကို တညီတညွတ်တည်းအပြင်းအထန် ကန့်ကွက်ကြခြင်းဖြစ်သည်။ အနည်းငယ်မျှ ပြောရေးဆိုခွင့်ရလာချိန်တွင် ပထမဆုံးသော မြန်မာပြည်သူတို့၏ တစ်သံတည်းသောဆန္ဒ။ ဦးသိန်းစိန်အတွက်သမ္မတလုပ်ရတာမလွယ်ကြောင်း စစချင်းဆောက်နဲ့ထွင်းသလို ခေါင်းမီးတောက်ခဲ့ရခြင်းလည်းဖြစ်သည်။

နောက်ဆုံး သူ့သက်တမ်းအတွင်း မြစ်ဆုံစီမံကိန်းကို ရပ်ဆိုင်းထားမည်ဟု တရားဝင်ထုတ်ဖော်ပြော ကြားလိုက်သည့်အခါ တရုတ်အစိုးရအတွက်လည်း သောက်သောက်လဲရေရောထားသည့် မြန်မာ့စစ်တစ်ပိုင်း ဒီမိုကရေစီသည်ပင် ခရာမှုတ်သံထွက်လာပြီးမကြာခင် စတင်အာခံလေပြီဟု ထိထိမိမိသိရှိတော့သည်။

ဦးသိန်းစိန်၏ မြစ်ဆုံဆုံးဖြတ်ချက်သည် တရုတ်ဘာလုပ်လုပ် ခြွင်းချက်မရှိလက်ခံတော့မည်မဟုတ် ကြောင်း တရုတ်အစိုးရထံသို့ လိပ်မူတပ်ကာပြောပြလိုက်သလိုပင်။ ထို့ကြောင့် နှစ်များစွာကြာ ဘာလုပ်လုပ်တင့်တယ်နေသော အေးရာအေးကြောင်း မြန်မာပေါ်လစီကို ပြန်လည်သုံးသပ် ရတော့မည်ဖြစ်ကြောင်း တရုတ်တို့ အိပ်ချင်မူးတူးလက်ခံလိုက်ရသည်။

အထူးသဖြင့် နိုင်ငံနှင့်ချီ တရုတ်ဆန့်ကျင်ရေးစိတ် မည်မျှပြင်းထန်စေကာမူ တရုတ်အစိုးရအတွက် မှုစရာမလိုသော်လည်း သိက္ခာကျရသည်။ မြန်မာပြည်သူတို့၏ သဘောထားကို ရိုးရိုးသားသားလက်ခံမိသည့်အခါတိုင်း မြစ်ဆုံစီမံကိန်းအပေါ် မြန်မာပြည်သူတို့ အပြင်းအထန် ကန့်ကွက်ခြင်း၏အနောက်တွင် တရုတ်ဆန့်ကျင်ရေးစိတ်ဓာတ် လှိုင်းတံပိုးကြီးစွာရှိနေကြောင်း ကောင်းကောင်းသိခဲ့သည်။

မြစ်ဆုံစီမံကိန်းကန့်ကွက်မှုတွင် မြန်မာပြည်သူတို့အတွက် အကျိုးစီးပွားအနည်းငယ်သာရှိသည့် တဇောက်ကန်းမမျှတမှု၊ စီမံကိန်းနှင့်ပတ်သက်ပြီး ပွင့်လင်းမြင်သာမှုလုံးဝမရှိခြင်းနှင့် စီမံကိန်းကြောင့်ဖြစ်ပေါ်လာနိုင်သည့် နောက်ဆက်တွဲဆိုးကျိုးများကို မြန်မာပြည်သူတို့ အနည်းနှင့်အများဆိုသလို သိရှိဆန့်ကျင်ကြခြင်းဖြစ်သော်လည်း တရုတ်အစိုးရအပေါ် ဒဏ်ခတ်လိုသည့်စိတ်က ပိုပဓာနကျမည်ဟုထင်၏။

ဘာ့ကြောင့်ဒဏ်ခတ်လိုကြသနည်း။ မြန်မာပြည်သူတို့၏ ဒီမိုကရေစီဆန္ဒကြီးမှုကို လုံးဝလျစ်လျူရှု ကာ စစ်အစိုးရအပေါ် တရုတ်အစိုးရအကာအကွယ်ပေးမှုကြောင့်ဖြစ်သည်။ ပြည်သူ့သွေးဖြင့်ခြေဆေးကာ အာဏာတည်ခဲ့သော စစ်အစိုးရစတင်လိုက်သည်နှင့် တစ်ပြိုင်နက် တရုတ်အစိုးရက ခြေမြန်လက်မြန်အသိအမှတ်ပြုပြရုံတင်မက ကုလသမဂ္ဂစင်မြင့်ထက်တွင် အသက်ရှူမမှန်တော့သည့် စစ်အစိုးရကို ဗီဒိုအာဏာဖြင့် အသက်ဆက်စေခြင်းနှင့် အနောက်အုပ်စု၏ စီးပွားရေးပိတ်ဆို့မှုဒဏ်ကို ကြံ့ကြံ့ခံနိုင်ရန်အတွက် တရုတ်အစိုးရက ဗြောင်ကျကျ အထောက်အကူပေးခဲ့ခြင်းသည် မြန်မာပြည်သူတို့အတွက် အနာကြီးနာခဲ့ရသည်။

စစ်အစိုးရ၏အသက်ကို တရုတ်တို့ ဘာ့ကြောင့်ထောက်ကူခဲ့သနည်း။ တရုတ်နှင့် နယ်နိမိတ်ရှည် လျားစွာထိစပ်နေသော မြန်မာသည် တရုတ်နှင့် အခြေခံဖွဲ့စည်းပုံတူသည့် အာဏာရှင်နိုင်ငံဖြစ်နေခြင်းက တရုတ်အတွက်တစ်ရန်ငြိမ်းပြီးသားဖြစ်သလို မြန်မာနိုင်ငံ၏ အားသာချက်မှန်သမျှကို ထင်သလို ကုပ်ခွစီးအချောင်နှိုက်နိုင်ခြင်းကြောင့်ဖြစ်သည်။ ပြောရလျှင် တရုတ်အစိုးရသည် ၎င်းတို့အကျိုးစီးပွားအတွက် စစ်အစိုးရအသက်ဆက် နိုင်အောင် ထောက်ကူခဲ့ခြင်းဖြစ်သည်။ တရုတ်တို့စတိုင်အတိုင်း နည်းနည်းပေးပြီး များများယူခြင်းဒဏ်ကို မြန်မာပြည်သူတို့ လိမ့်နေအောင်ခံခဲ့ရသည်။ မြန်မာ့အိမ်ဦးခန်းထက် တရုတ်တို့ချေးတက်ပါခြင်းကို မမြင်ချင် ယောင်ဆောင်နေခဲ့ရခြင်းအပေါ် မြန်မာပြည်သူတို့ အသဲနာခဲ့ရသည်။ ထို့ကြောင့် အခွင့်ပေါ် သည်နှင့် တရုတ်ဆန့်ကျင်ရေးအမြင် သည်းထန်လာခဲ့ခြင်းဖြစ်သည်။

တရုတ်ဆိုသည်မှာ ကမ္ဘာ့အဆင့်အင်အားကြီးသူဖြစ်သည်။ အင်အားကြီးသူတို့၏ထုံးစံအတိုင်း နိုင်ငံ ငယ်များကိုမလောက်လေးမလောက်စားအဆင့်ပါဟု ထည့်မတွက်ချင်သည့်ရောဂါရှိသည်။ ထို့ကြောင့် တရုတ်တို့စိတ်ကြီးဝင်နေသည့်အချိန်တိုင်းတွင် မြန်မာ့အရေးကို ခပ်ပေါ့ပေါ့ပင် သဘောထားခဲ့သည်။ မြန်မာပြည်သူတို့၏ မြစ်ဆုံစီမံကိန်းကန့်ကွက်ဆန္ဒပြပွဲများကို အနောက်အုပ်စု၏ သွေးထိုးလှုံ့ဆော်မှုကြောင့်ဟု အလွယ်တကူဖွင့်ဆိုသည်။ ထို့ပြင် တရုတ်နယ်စပ်တွင် တရုတ်လွှမ်းမိုးမှုသြဇာရှိသော မြန်မာတိုင်းရင်းသားလက်နက်ကိုင်တချို့ကို ကောင်းကောင်းကိုင်ထားနိုင်ခြင်းကလည်း တရုတ်အတွက်ယပ်ခတ်မပျက်စေသော ဆေးနည်းတဖုံဖြစ် ခဲ့သည်။

ထို့ကြောင့် မြန်မာ့အရေးကို မိုက်ခရိုစကုပ်ပေါ်တင်ကာ အကယ်ဒမစ်ဆန်စွာ သိပ္ပံနည်းကျ စောင့် ကြည့်အကဲခတ်ရမည့် ကျွမ်းကျင်သူများရှိရန်မလိုဟု တရုတ်ကယူဆသည်။ ထိုသို့ဆို၍ မြန်မာ့အရေးကိစ္စ ကြီးငယ်ပေါ်သည့်အခါတိုင်း ကိုယ့်ဘာသာထင်သလို ဆုံးဖြတ်နေခြင်းမျိုးတော့မဟုတ်။ မြန်မာနိုင်ငံဆိုင်ရာတရုတ်သံရုံးနှင့် နီးစပ်သောတရုတ်တန်းမှ ပုဂ္ဂိုလ်များကိုခေါ်မည်။ မြန်မာ-တရုတ်ချစ်ကြည်ရေးအသင်းမှ ပုဂ္ဂိုလ် အချို့ကိုခေါ်မည်။ ၎င်းတို့၏ အမြင်ကို စနည်းနာမည်။

ယင်းသည်ကိုယ့်သဘောနှင့်ကိုယ်ဆုံးဖြတ်ခြင်းထက် ပိုမိုစိတ်ချရသော ချဉ်းကပ်နည်းဖြစ်သော် လည်း ပြဿနာက ၎င်းတို့ခေါ်ယူ စနည်းနာသူများအားလုံးမှာ တရုတ်အကျိုးစီးပွားနှင့် မကင်းသူများ ဖြစ်နေခြင်းပင်။

ပြောရလျှင် မြန်မာ့အရေးနှင့်ပတ်သက်သည့် တရုတ်အစိုးရ၏ သဘောထားတစ်စုံတစ်ရာကို မြန်မာ အကြောင်းသူတို့ထက်ပိုသိသော မြန်မာနိုင်ငံသားများထံ စနည်းနာခြင်းမတိုင်မီကတည်းကပင် ကြိုတင်ဆုံးဖြတ်ထားပြီးဖြစ်ပြီး စနည်းနာခြင်းဆိုသည်မှာ လုပ်ရိုးလုပ်စဉ်အရ လုပ်ဆောင်ခြင်းမျှသာဖြစ်သည်။ ပြောရလျှင်၎င်းတို့ ဆုံးဖြတ်ထားပြီးသားကိစ္စကို ၎င်းတို့ စနည်းနာမည့်ပုဂ္ဂိုလ်များအား ခေါင်းညိတ်ခိုင်းသည့်သဘော ဖြစ်သည်။

တရုတ်အစိုးရ၏ ယင်းသို့သောသဘောထားကို သဘောထားအမြင်စနည်းနာခံရသူတို့က ကောင်း ကောင်းသိကြသည်။ တရုတ်အကြိုက်ပြောတတ်ဆိုတတ်ရန်လိုကြောင်း အံတိုပြီးသားဖြစ်သည်။ ထို့ကြောင့်တရုတ်တို့၏ စကားအသွားအလာကိုကြည့်ကာ ဘာပြောရမည်မှန်း သေချာသဘောပေါက်ကြသည့်အတိုင်း ရေလိုက်ငါးလိုက် ပြောကြဆိုကြသည်။

တရုတ်အစိုးရက အမှန်အတိုင်းမသိချင်။ ၎င်းတို့ကလည်းအမှန်အတိုင်းမပြော။ တရုတ်အစိုးရ၏ မြန်မာ့အရေးဆုံးဖြတ်ချက်မှာ မှားလို့လည်းဘာမှမဖြစ်သဖြင့် ထိုသို့သော မမှန်မကန် ဆက်ဆံရေးသည် အခိုင်အမာအသားကျခဲ့သည်။

ထို့ကြောင့် ပြည်ခိုင်ဖြိုးအစိုးရလက်ထက်၊ တရုတ်ဆန့်ကျင်ရေးအမြင် အောတိုက်ထွက်ပေါ်လာသည့် အချိန်ကျမှသာ မျက်ပြူးဆန်ကာဖြစ်ကာ ပြည်ခိုင်ဖြိုးအစိုးရ၊ ပြည်ခိုင်ဖြိုးပါတီနှင့်သာမက ပါတီစုံနှင့်ထိတွေ့ ဆက်ဆံရေး၊ မြန်မာဒီမိုကရေစီအင်အားစုများနှင့် ဆက်ဆံရေးကိုပါ ဝရုန်းသုန်းကားအားထည့်လာခဲ့ခြင်းဖြစ်သည်။ ထို့ပြင် မြန်မာပြည်သူများကြား တရုတ်ပုံရိပ် ကောင်းလာစေရေးအတွက် မြန်မာမီဒီယာများနှင့်ဆက်ဆံရေးကိုလည်း တရုတ်အစိုးရက လုံ့လစိုက်ခဲ့သည်။

တရုတ်အစိုးရအပေါ်မြန်မာပြည်သူတို့၏ သဘောထားသိပ်မမာထန်တော့ခြင်းမှာ အမျိုးသားဒီမိုက ရေစီအဖွဲ့ချုပ်အစိုးရလက်ထက်ကျမှသာ စတင်ခဲ့သည်။ အထူးသဖြင့် ဒေါ်အောင်ဆန်းစုကြည်နှင့် တရုတ်အစိုးရကြားဆက်ဆံရေးကောင်းမွန်ခြင်းမှသည် အစပျိုးခဲ့ခြင်းဖြစ်သည်။

မြန်မာပြည်သူတို့အပေါ် ဒေါ်အောင်ဆန်းစုကြည်၏ သြဇာကြီးမှုကို တရုတ်အစိုးရ ကောင်းကောင်း သိခဲ့သည်။ အမျိုးသားဒီမိုကရေစီအဖွဲ့ချုပ်အစိုးရသည် ပြည်ခိုင်ဖြိုးအစိုးရမဟုတ်သလို စစ်အစိုးရလည်းလုံး၀ မဟုတ်ကြောင်း တရုတ်တို့ သေချာသိခဲ့သည်။

တရုတ်တို့လိုချင်သည်မှာ အမျိုးသားဒီမိုကရေစီအဖွဲ့ချုပ်အစိုးရကဲ့သို့ ဒီမိုကရေစီအမြင်ထက်သန်ပြီး ကိုယ့်တိုင်းပြည်အကျိုးစီးပွားကိုသာ ရှေ့ရှုသောအစိုးရမျိုးမဟုတ်။ အရှေ့တောင်အာရှတွင် ဒီမိုကရေစီနိုင်ငံတော်ကြီးအဖြစ် တရိပ်ရိပ်ကြီးပွားတိုးတက်လာမည့် မြန်မာနိုင်ငံတော်မျိုးမဟုတ်။ တရုတ်၏အလိုတော်မှာ သူတို့အလိုကျပြုမူကာ သူတို့အပေါ်မှီခိုခြင်းဖြင့် သူတို့ကြည်ဖြူသလောက် ဖွံ့ဖြိုးလာသည့်မြန်မာနိုင်ငံပုံစံမျိုး  ဖြစ်သည်။ အလွန်ဆုံးအဆင့် မော်စီတုံးနှင့် ဗမာပြည်ကွန်မြူနစ်ပါတီဥက္ကဋ္ဌ သခင်ဗသိန်းတင်လို အစ်ကိုကြီး လုပ်သမျှ မလုပ်ခင်ကတည်းက မှန်နေပြီး ခေါင်းညိတ်ထောက်ခံပစ်လိုက်မည်ဆိုသည့် ဆက်ဆံရေးမျိုး။

ထို့ကြောင့်ပင် လောဘမသတ်နိုင်သော တရုတ်အစိုးရသည် စစ်ကောင်စီက မဟုတ်မမှန်လိမ်လည် အာဏာသိမ်းမှန်းသိလျက် ဘာကိုမှမစဉ်းစားနိုင်ဘဲ ပြေးထောက်ခံလိုက်ခြင်းဖြစ်သည်။ ဒါကိုနောက်တစ်မျိုးဆိုရသော် မြန်မာပြည်သူတို့၏ ဒီမိုကရေစီဆန္ဒကို ဒုတိယအကြိမ်မြောက် ထပ်မံစော်ကားလိုက်ခြင်းလည်း ဖြစ်သည်။

တရုတ်အစိုးရအတွက်မူ ၎င်းတို့၏ စိတ်ဆန္ဒနှင့် အကျိုးစီးပွားအရ စစ်ကောင်စီဘက်မှ ပုံအောလိုက် ခြင်းဖြစ်သော်လည်း စစ်ကောင်စီရှုံးလည်း တရုတ်မရှုံးသဖြင့် အပြုံးပျက်စရာအကြောင်းမရှိပေ။ တရုတ်သည် အင်အားကြီးသည်။ တရုတ်သြဇာကြီးသေ ာတိုင်းရင်းသားလက်နက်ကိုင်အချို့ရှိနေသည်။ ထို့ပြင်တရုတ်တွင် သူတို့ဘဝင်မကျလျှင် ထုတ်သုံးရဲသည့် အောက်လမ်းနည်းလည်းရှိသည်။ ထို့ကြောင့် မြန်မာနိုင်ငံတွင်း အာဏာရှင်စစ်ကောင်စီကို ပြတ်ပြတ်သားသားနှိမ်နင်းကာ ဒီမိုကရေစီအစိုးရတစ်ရပ်တက်လာ ခဲ့သည့်တိုင် မြန်မာ-တရုတ်ဆက်ဆံရေးတွင် တရုတ်သည်အပေါ်စီးရမြဲရနေမှာ သေချာသည်။ ယင်းသည် မြန်မာအပေါ်တရုတ်တို့ထင်သလို ပြုမူရဲသည့် သော့ချက်ဖြစ်သည်။

ပြောရလျှင် မြန်မာမျက်ဖြူဆိုက်လေ တရုတ်တို့ကြိုက်လေဖြစ်သည်။ မနေချင်သဖြင့် နေရာသစ် တစ်နေရာရွှေ့သလို ပြောင်းရွှေ့၍မရဘဲ ကမ္ဘာတည်သရွေ့ တရုတ်နှင့်အိမ်နီးချင်းဖြစ်နေမှုမှာ မြန်မာတို့အတွက် ပထဝီကပေးသည့် ကံဆိုးမှုတစ်ရပ်ပင်ဖြစ်သည်။

ထွန်းလင်း

2 months Ago
Up