ထိုးစစ်

November 12, 2021

မတူပီ CDF က အကြမ်းဖက်စစ်အုပ်စုကို ထိုးစစ်ဆင်တိုက်ခိုက်

ချင်းပြည်နယ် မတူပီမြို့နယ်  ဒီလောင်ကုန်းကျေးရွာ(က) နဲ့ (ခ) ၂ ရွာကြားမှာ နိုဝင်ဘာ ၁၀ ရက်နေ့မနက်ပိုင်းက အကြမ်းဖက်စစ်အုပ်စုကို မတူပီ CDF တပ်ဖွဲ့က ထိုးစစ်ဆင်တိုက်ခိုက်ခဲ့ရာ စစ်ကောင်စီတပ်သား ၆ ယောက်သေဆုံးပြီး အများအပြား ဒဏ်ရာရရှိသွားတယ်လို့ မတူပီ CDF တပ်ဖွဲ့ကနေ သိရပါတယ်။

မတူပီ CDF တပ်ဖွဲ့ရဲ့ ပြန်ကြားရေးတာဝန်ခံက “အဲဒါက ကျနော်တို့က ထိုးစစ်ဆင်ပြီး သွားတိုက်တာဖြစ်ပြီးတော့ စစ်ကောင်စီတပ်သား ၆ ယောက်သေဆုံးပြီးတော့ အများအပြားဒဏ်ရာရသွားတယ်ဗျ။ ကျနော်တို့ CDF မတူပီဘက်ကတော့ အကြမ်းဖက်စစ်တပ်က ထောင်ထားတဲ့မိုင်းကို နင်းမိပြီးတော့ ရဲဘော်တစ်ယောက် ထိခိုက်ဒဏ်ရာရရှိခဲ့တယ်” လို့ ပြောပါတယ်။

မတူပီ CDF တပ်ဖွဲ့နဲ့ အကြမ်းဖက်စစ်ကောင်စီတပ်တွေဟာ ပြီခဲ့တဲ့ အောက်တိုဘာလအတွင်း ထိတွေ့တိုက်ပွဲ ၅ ကြိမ်လောက် ဖြစ်ပွားခဲ့ရာ စစ်ကောင်စီဘက်က ၅၀ ကျော်လောက် သေဆုံးပြီးတော့ CDF မတူပီ ရဲဘော်တစ်ယောက် ထိခိုက်ဒဏ်ရာရရှိခဲ့တယ်လို့ ဆိုပါတယ်။

စစ်ကောင်စီဘက်က သေဆုံးဒဏ်ရာရရှိတာနဲ့ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

မတူပီမြို့နယ်ထဲမှာ နှစ်ဘက်တိုက်ပွဲတွေကြောင့် စစ်ဘေးရှောင်ပြည်သူ ၄၀၀၀ နီးပါးရှိနေပြီး တောထဲတွေနဲ့ နီးစပ်ရာဆွေမျိုးသားချင်းတွေရှိတဲ့ ကျေးရွာတွေမှာ တိမ်းရှောင်နေကြရကာ စားနက်ရိက္ခာနဲ့ ဆေးဝါး အကူညီတွေ အရေးပေါ်လိုအပ်နေတယ်လို့ ပြောပါတယ်။

မတူပီ CDF တပ်ဖွဲ့အနေနဲ့ တော်လှန်ရေးကာလအတွင်းမှာ လက်နက်အင်အားကွာခြားတဲ အခက်ခဲတွေနဲ့ အခက်ခဲတွေ အများကြီး ရှိနေပေမယ့် ဒေသကာကွယ်ရေးတပ်ဖွဲ့တွေအနေနဲ့ ပြည်သူကို ကာကွယ်မယ်လို့ ရည်ရွယ်ထားတာကြောင့် တိုင်းပြည်နဲ့လူမျိုးအတွက်အ သက်ပေးကာကွယ်မှာဖြစ်ပြီး ပြည်သူတွေအနေနဲ့ အကြောက်တရားမရှိဘဲ ဒေသကာကွယ်ရေးတပ်ဖွဲ့တွေကို အားပေးကူညီကြဖို့ တိုက်တွန်းထားပါတယ်။

3 weeks Ago

August 24, 2021

အကြမ်းဖက်စစ်ကောင်စီ၏ ထိုးစစ်ဆင်မှုကို တိုင်းရင်းသားလက်နက်ကိုင်များ ပြန်လည်ခုခံမည်

အကြမ်းဖက်စစ်ကောင်စီတပ်တွေက တိုင်းရင်းသားလက်နက်ကိုင်တွေကို ထိုးစစ်ဆင်ဖို့ပြင်ဆင်နေတာကို ပြည်လည်ခုခံသွားမယ်လို့ ကရင်အမျိုးသားအစည်းအရုံး KNU Concerned Group ဦးဆောင်သူ နော်စီဖိုးရာစိန်ပြောကြားလိုက်ပါတယ်။

ကရင်အမျိုးသားအစည်းအရုံး (KNU) နဲ့ ကချင်လွတ်မြောက်ရေးတပ်မတော်(KIA)တို့ အခြေစိုက်တဲ့ဒေသတွေကို ထိုးစစ်ဆင်ဖို့ စစ်ကောင်စီက ဩဂုတ်လ ဒုတိယအပတ်မှာ စတင်ပြင်ဆင်နေတာပါ။

KNU တပ်မဟာ အားလုံးနီးပါးကို ထိုးစစ်ဆင်ဖို့ စစ်ကောင်စီက ကြိုးစားနေပေမယ့် တော်လှန်ရေးခရီးကိုရှေ့ဆက်သွားမယ်လို့ KNU Concerned Group ဦးဆောင်သူ နော်စီဖိုးရာစိန်က ဩဂုတ်လ ၂၄ရက်နေ့က ပြုလုပ်တဲ့အမျိုးသားညီညွတ်ရေးအစိုးရ NUG ရဲ့သတင်းစာရှင်း လင်းပွဲမှာပြောပါတယ်။

နော်စီဖိုးရာစိန်က "တိုင်းရင်းသားတန်းတူရေး ကိုယ်ပိုင်ပြဋ္ဌာန်းခွင့်ရရေး ဖက်ဒရယ်ပြည်ထောင်စုထူထောင်နိုင်ရေးရည်ရွယ်ချက်တွေနဲ့ တော်လှန်ရေးကိုဆောင်ရွက်နေတာ ဖြစ်ပါတယ်။ စစ်အာဏာသိမ်းအဖွဲ့ဟာ အင်အားတွေရှိနေသေးပေမယ့် စိတ်ဓာတ်ကတော့ မရှိတော့ဘူး။ အစိုးရလုပ်ငန်းတွေကိုလည်းမလုပ်နိုင်တော့ဘူး။ တိုင်းရင်းသားဒေသတွေမှာ ထိုးစစ်တွေများလာတယ်။ ကျမတို့ကတော့ တော်လှန်ရေးခရီးစဉ်ကိုသွားရမှာဖြစ်ပါတယ်။ ပြည်သူနဲ့အတူတကွသွားမယ်ဆိုရင်အောင်မြင်မယ်လို့ပြောချင်ပါတယ်။”လို့ ပြောပါတယ်။ 

အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီးဌာန ဒုတိယဝန်ကြီး ဦးမိုးဇော်ဦးကလည်း "စစ်ကောင်စီက ထိုးစစ်ဆင်ဖို့ပြင်ဆင်လာတာကြောင့် တိုင်းရင်းသားဒေသတွေက ပြည်သူတွေအတွက် စိုးရိမ်ရတဲ့အခြေအနေဖြစ် ပါတယ်။ တိုင်းရင်းသားလက်နက်ကိုင်တွေက စစ်ကောင်စီကို ခုခံနေသလို အမျိုးသားညီညွတ်ရေးအစိုးရရဲ့ PDF တွေကလည်း တိုင်းရင်းသားတွေကို ကူညီသွားမှာဖြစ်တယ်”လို့  ပြောပါတယ်။ 

စစ်ဘေးသင့်ဖြစ်လာနိုင်တဲ့ ပြည်သူတွေကိုလည်း လူသားချင်းစာနာထောက်ထားတဲ့ အကူအညီတွေပေးနိုင်ဖို့ စီစဉ်ဆောင်ရွက်နေတယ်လို့လည်း  ဆိုပါတယ်။

"တိုင်းရင်းသားဒေသတွေမှာ စစ်ရေးအရထိုးနှက်ဖို့ပြင်ဆင််နေတာက စစ်ကောင်စီပဲဖြစ်ပါတယ်။ ကျနော်တိုမှာ မလွှဲသာလို့ ခုခံဖို့ပြင်ဆင်ရမှာဖြစ်ပါတယ်။ ခုခံတဲ့အခါမှာလည်း ကျနော်တို့အစိုးရအနေနဲ့၊ ကျနော်တို့ PDF တွေအနေနဲ့ စစ်သည်တွေလိုက်နာရမယ်ကျင့်ဝတ်တွေ နိုင်ငံတကာစည်းမျဉ်းအတိုင်းလိုက်နာဖို့ ဆောင်ရွက်ထားပါတယ်။ အရပ်သားတွေမထိခိုက်ဖို့က အရေးတကြီးစဉ်းစားရတာဖြစ်ပါတယ်။ လူသားချင်းစာနာထောက်ထားမှုဆိုင်ရာ အကူအညီတွေပေးနိုင်ဖို့လည်း ပြင်ဆင်ထားပါတယ်။"လို့ ဦးမိုးဇော်ဦးက ပြောပါတယ်။ 

အမျိုးသားညီညွတ်ရေးအစိုးရဟာ  သံတမန်ရေးရာတိုက်ပွဲတွေ၊ ဘဏ္ဍာရေးဆိုင်ရာတိုက်ပွဲတွေ၊ ဆက်သွယ်ရေးဆိုင်ရာ တိုက်ပွဲတွေ ဆက်တိုက်ဆောင်ရွက်နေတယ်လို့ နိုင်ငံခြားရေးဒုဝန်ကြီး ဦးမိုးဇော်ဦးကပြောပါတယ်။

တစ်နိုင်ငံလုံးတိုက်ပွဲခေါ်မယ့် D Day ကို ရက်တိတိကျကျမသတ်မှတ်ရသေးပေမယ့် တော်လှန်ရေးဆောင်ရွက်နေတဲ့ရက်တိုင်းဟာ တိုက်ပွဲနေ့တွေပဲဖြစ်တယ်လို့ NUG ခေါင်းဆောင်တွေက ပြောထားပါတယ်။

Photo Credit- KNU Info

3 months Ago
More News
Up