ထိုင်း-မြန်မာနယ်စပ်

November 23, 2021

ထိုင်း-မြန်မာနယ်စပ်တွင် မူးယစ်ဆေးသယ်ဆောင်သူများနှင့် ထိုင်းစစ်တပ် ပစ်ခတ်မှုဖြစ် ၆ ဦး သေဆုံး၊ စိတ်ကြွဆေးပြား ၂ သန်းဖမ်းမိ

ထိုင်း-မြန်မာနယ်စပ် ချင်းရိုင်းခရိုင်မှာ နိုဝင်ဘာ ၂၃ ရက် ဒီမနက်က မူးယစ်ဆေးသယ်ဆောင်သူတွေနဲ့ ထိုင်းစစ်တပ် ပစ်ခတ်မှုဖြစ်ပြီး   မူးယစ်သယ်တဲ့အဖွဲ့က ၆ ဦးသေဆုံးကာ စိတ်ကြွဆေးပြား ၂ သန်းနီးပါးဖမ်းမိခဲ့သလို ချင်းမိုင်ခရိုင် မြန်မာနယ်စပ်မှာလည်း နောက်ထပ် စိတ်ကြွဆေးပြား ၂ သိန်းဖမ်းမိခဲ့တယ်လို့  Maesai Press  သတင်းအရ သိရပါတယ်။ 

ထိုင်းကွန်မန်ဒိုအမှတ် (၂) တပ်ဖွဲ့ဝင်နဲ့ စစ်တိုင်းဒေသ (၃) လက်အောက်ခံ အထူး တိုက်ခိုက်ရေး တပ်ဖွဲ့ဝင်တွေဟာ ဒီမနက် ၄ နာရီလောက်က ချင်းရိုင်ခရိုင် မယ်ဖှာ့လုံမြို့နယ် မယ်ဖှာ့လုံ ကျေးရွာ အုပ်စုတွင်း လုံခြုံရေးယူနေစဉ် မြန်မာနယ်စပ်နဲ့ မီတာ ၁၀၀ လောက်အကွာ ဖာခေါင်ဘွန်တောင် အနီးကနေ လူ ၁၀ ဦးခန့် အထုပ်အပိုးတွေနဲ့ ဝင်ရောက်လာတာတွေ့တယ်လို့  ထိုင်းစစ်တပ် တာဝန်ရှိသူမှ သတင်းထောက်ကို ပြောပါတယ်။ 

သူတို့ကို စစ်ဆေးဖို့အတွက် ရပ်တန့်ခိုင်းရာမှာ တဘက်ကနေ သေနတ်နဲ့စတင်ပစ်ခတ်ခဲ့ကြောင်း ၊ ဒါကြောင့် တာဝန်ရှိသူဘက်က ပြန်ပစ်ရာမှာ ၁၅ မိနစ်လောက်  အပြန်အလှန်ပစ်ခတ်မှု ဖြစ်ခဲ့တယ်လို့ ဆိုပါတယ်။ 

ပစ်ခတ်မှုအပြီးမှာ သေနတ်ဒဏ်ရာနဲ့သေဆုံး သူ ၆ ဦး၊ အနီးနားမှာ ၉၉၉ အမှတ်တံဆိပ် စိတ်ကြွဆေးပြား တစ်အိတ်ကို ၂ သိန်းစီထည့်ထားတဲ့ အိတ်ပေါင်း ၉ လုံး (စုစုပေါင်း စိတ်ကြွဆေးပြား ၁၈၀၀၀၀၀) ၁ သန်း ၈ သိန်းကို သိမ်းဆည်းရမိတယ်လို့ ဆိုပါတယ်။ 

သေဆုံးသူတွေရဲ့အလောင်းကို လိုအပ်သလိုစစ်ဆေးဖို့ ဆေးရုံခေါ်ဆောင်သွားပြီး နောက်ထပ်ကွင်း ဆက်တွေဖမ်းမိဖို့ ဆက်လက်စုံစမ်းနေတယ်လို့ ဆိုပါတယ်။ 

အလားတူ ချင်းမိုင်ခရိုင် မယ့်အိုင်းမြို့နယ် ထာ့ဒွန်းအုပ်စု ထာ့ဒွန်း‌ကျေးရွာအနီးမှာလည်း ပိုင်ရှင်မဲ့ စိတ်ကြွဆေးပြား ၂ သိန်းဖမ်းမိတယ်လို့  Maesai Press သတင်းမှာ ဖော်ပြပါတယ်။ 

ထာ့ဒွန်းကျေးရွာအနီး ပါကွီတောလမ်းတနေရာမှာ ဒီမနက်စောစောက ရွာသားအသွင် ဝတ်ဆင်ထားတဲ့ လူတချို့ကို  အဝေးကလှမ်းမြင်ရကြောင်း၊ ထိုင်းစစ်တပ် တပ်ဖွဲ့ဝင်တွေက စစ်ဆေးဖို့သွားရာမှာ လူကိုမတွေ့ရတော့ဘဲ တောထဲမှာပစ်ထားတဲ့ အထုပ်တွေ ၊ ဝါးခြင်းကျားထဲ ထည့်ထားတဲ့ အထုပ်တွေ ပစ်ထားတာတွေ့ရပြီး အထဲမှာ စိတ်ကြွဆေးစုစုပေါင်း ၂ သိန်းဖမ်းဆီးရမိတယ်လို့ ဆိုပါတယ် ။ 

တာဝန်ရှိသူတွေမှ အနီးအနားတဝိုက် ပိုက်စိပ်တိုက်ရှာဖွေရာမှာ ရွာစွန်က အိမ်တစ်လုံးထဲမှာ မသင်္ကာဖွယ် လူ ၃ ယောက်ရောက်ရှိနေလို့ ခေါ်ယူစစ်ဆေးနေတယ်လို့ သတင်းမှာ ဖော်ပြပါတယ်။

Ref- Maesai Press

2 weeks Ago

November 18, 2021

ထိုင်း-မြန်မာနယ်စပ်နေ ဒုက္ခသည်များအတွက် ကိုဗစ်-၁၉ ကာကွယ်ဆေး သန်းချီ အမေရိကန် ပေးပို့မည်

ဖေဖေါ်ဝါရီလ စစ်တပ်အာဏာသိမ်းပြီးကတည်းက မြန်မာဒုက္ခသည်တွေ စုပြုံရောက်ရှိနေတဲ့ ထိုင်း-မြန်မာနယ်စပ်ကို Johnson & Johnson ကုမ္ပဏီထုတ် ကိုဗစ်-၁၉ ကာကွယ်ဆေး သန်းနဲ့ချီ ဒီဇင်ဘာလမှာ ပေးပို့ အမေရိကန် အစိုးရက စီစဉ်နေပါတယ်။ 

အမေရိကန်ဟာ ပဋိပက္ခဖြစ်ပွားရာဒေသတွေဆီ ပိုလျှံနေတဲ့ တကြိမ်ထိုး ကာကွယ်ဆေးတွေ တင်ပို့ဖို့ သဘောတူညီချက်ကို လက်မှတ်ရေးထိုးထားပြီး ပထမဆုံး ပို့မယ့်နေရာတွေကတော့ ဆယ်စုနှစ်များစွာကြာနေပြီး လတ်တလောမှာလည်း ပဋိပက္ခတွေကနေ ထွက်ပြေးလာတဲ့ လူပေါင်းထောင်ချီခိုလှုံနေကြတဲ့ ဒုက္ခသည်စခန်းတွေက လူတစ်ဦးချင်းစီဆီကို ကိုဗစ်ကာကွယ်ဆေး အရောက်ပို့သွားမှာဖြစ်တယ်လို့ အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ပြောကြားခဲ့ပြီး တပတ်အကြာမှာ ခုလို သတင်းထွက်ပေါ်လာတာပါ။ 

ကမ္ဘာ့နိုင်ငံတွေအနေနဲ့ သူတို့ရဲ့ နိုင်ငံတကာကာကွယ်ဆေးလှူဒါန်းမှုတွေကို ဝင်ငွေနည်းနဲ့ ဝင်ငွေအလယ်အလတ်ရှိတဲ့ နိုင်ငံတွေဆီ အရှိန်မြှင့်ပေးပို့ကြဖို့နဲ့ ကမ္ဘာတဝန်း သွားလာရခက်တဲ့ ဒေသတွေဆီ ကာကွယ်ဆေးတွေ ပို့ဆောင်ရာမှာ လွယ်ကူချောမွေ့စေဖို့  နိုင်ငံခြားရေးဝန်ကြီး ဘလင်ကင်က  တခြားနိုင်ငံတွေက နိုင်ငံခြားရေးဝန်ကြီးတွေနဲ့ တွေ့ဆုံစဉ် တိုက်တွန်းခဲ့ပါတယ်။

ကိုဗစ်-၁၉ ကာကွယ်ဆေးအရင်းအမြစ်တွေကို WHO က ဦးစီးလုပ်ဆောင်နေတဲ့  နိုင်ငံတကာစနစ်ဖြစ်တဲ့ COVAX  အစီအစဉ်ကနေတဆင့် ဆေးဝါးဖြန့်ဝေမှုကို စီမံခန့်ခွဲမှာ ဖြစ်ပါတယ်။ 

ထိုင်း-မြန်မာနယ်စပ်ကို ကာကွယ်ဆေးပမာဏ ဘယ်လောက်ပေးပို့မယ်၊ ဘယ်အဖွဲ့ အစည်းတွေက မြေပြင်မှာဖြန့်ဝေကူညီမယ် ဆိုတာတော့ မသိရသေးပါဘူး။

3 weeks Ago
More News
Up