ထိုင်းနိုင်ငံ

September 27, 2021

ပွဲစားခဘတ် ၁၆,၀၀၀ စီပေးပြီး ထိုင်းနိုင်ငံကိုဝင်လာသည့် မြန်မာ ၁၂ ဦး ဖမ်းဆီးခံရ

ထိုင်းနိုင်ငံဘက်ကို တရားမဝင် နယ်စပ်ဖြတ်ကျော်ဝင်ရောက်လာတဲ့ မြန်မာနိုင်ငံသား ၁၂ ယောက်ကို မောင်ခရိုင်နယ်စပ် ကျေးရွာတရွာအနီးမှာ စက်တင်ဘာ ၂၆ ရက် ညနေပိုင်းက ဖမ်းမိခဲ့တယ်လို့ ဘန်ကောက်ပို့စ်သတင်းမှာ ဖော်ပြပါတယ်။

စစ်သားတွေ၊ ရဲတွေနဲ့ ဒေသခံတွေ ပူးပေါင်းပါဝင်တဲ့ ကင်းလှည့်တပ်ဖွဲ့ဟာ သူတို့ကို ညနေ ၄ နာရီလောက်က ပုန်းအောင်းနေရာ သစ်တောထဲမှာ တွေ့ရှိခဲ့ရတာလို့ ဆိုပါတယ်။

ဖမ်းမိသူတွေထဲမှာ မြန်မာအမျိုးသား ၅ ယောက်နဲ့ အမျိုးသမီး ၇ ယောက်ပါဝင်ပြီး သူတို့ ဟာ ပဲခူး၊ မြဝတီနဲ့ ရန်ကုန်မြို့တွေကနေ ဘန်ကောက်ထိ ရောက်ရှိဖို့ တယောက်ကို ပွဲ စားခဘတ်ငွေ ၁၆,၀၀၀ စီ ပေးခဲ့ကြရတယ်လို့ ဆိုပါတယ်။

လတ်တလောမှာတော့ သူတို့အားလုံးကို မောင်ခရိုင်ရဲစခန်းဆီ ပို့ဆောင်ထားပြီး ဉပဒေအရ လိုအပ်တဲ့ စစ်ဆေးမှုတွေ ဆက်လက်လုပ်ဆောင်နေကာ နေရပ်ပြန်ပို့နိုင်ဖို့ ဆက်လက် လုပ်ဆောင်သွားမယ်လို့ ဆိုပါတယ်။

13 hours Ago

ထိုင်းနိုင်ငံတွင် အိမ်ခြေ ၁၄,၀၀၀ နီးပါး ရေဘေးသင့်

ထိုင်းနိုင်ငံမှာ စက်တင်ဘာ ၂၃ မှ ၂၆ နေ့အတောတွင်း တိန့်မူအမည်ရှိ မုန်တိုင်းဝင်ရောက်ခဲ့ တာကြောင့် ခရိုင်ပေါင်း ၁၄ ခုမှာ ရေကြီးရေလျှံမှုတွေဖြစ်ပွါးခဲ့ပြီး အိမ်ခြေပေါင်း ၁၄၀၀၀ နီးပါး ရေဘေးသင့်ခဲ့တယ်လို့ ထိုင်းနိုင်ငံသဘာဝဘေးအန္တရယ်ကာကွယ်ရေးနဲ့ ကယ်ဆယ်ရေးဌာနက ယမန်နေ့ညက ထုတ်ပြန်ပါတယ်။ 

အဆိုပါ ခရိုင် ၁၄ ခုမှာ ထိုင်းမြောက်ပိုင်း၊ အရှေ့မြောက်ပိုင်းနဲ့ အလယ်ပိုင်းရှိ ချင်းမိုင်၊ လမ်းပွန်း၊ လမ်းပန်း၊ တာ့ခ်၊ ဆုခိုထိုင်း၊ ဖိကျစ်၊ ခွန်ကဲန်၊ ချိုင်းယဖွန်း၊ နခွန်းရာ့ချ်ဆီမား၊ ဥဘွန်းရာ့ချ်ဌာနီ၊ နခွန်းဆဝမ်၊ ချိုင်းယားနတ်၊ ဆင်းဘူးရီး၊ အယုဒ္ဓယ ခရိုင်တို့ဖြစ်ကြပြီး အဲဒီထဲက မြို့နယ်ပေါင်း ၅၅ မြို့နယ်၊  ၁၇၈ အုပ်စု၊  ၈၃၉ ရပ်ကွက်/ကျေးရွာ၊ မြူနီစီပါယ်ဧရိယာ ၁ ခု နဲ့ အိမ်ခြေပေါင်း  ၁၃၉၃၀ အိမ် ရေဘေးသင့်ခဲ့တယ်လို့ ဆိုပါတယ်။

ရေကြီးမှုကြောင့် တောင်ပြိုလမ်းပိတ်၊ တံတားကျိုး၊ လမ်းမကြီးရော လမ်းသွယ်တွေပါ ပိတ်ဆို့ကာ လူနေအိမ်တွေ၊ ကားနဲ့ဆိုင်ကယ်တွေ၊ စိုက်ခင်းတွေ ပျက်စီးဆုံးရှုံးမှုတွေရှိခဲ့ပါတယ်။ 

ဒီကနေ့ စက်တင်ဘာ ၂၇ ရက်မှာတော့ ချင်းမိုင်၊ လမ်းပန်း၊ လမ်းပွန်း နဲ့ တာ့ခ်ခရိုင်တွေမှာ ရေတွေကျသွားပြီဖြစ်ပေမဲ့ ထိုင်းနိုင်ငံအထက်ပိုင်းက ရေတွေဟာ အလယ်ပိုင်းကို ဆင်းလာမှာဖြစ်တဲ့အတွက် စက်တင်ဘာ ၂၇ မှ ၃၀ ရက်နေ့အတွင်း ထိုင်းအလယ်ပိုင်းဒေသနေပြည်သူတွေ ရေဘေးအတွက် ကြိုတင်ပြင်ဆင်ထားဖို့ ထိုင်းအမျိုးသား မိုးလေဝသနဲ့ ဇလဗေဒဌာနက သတိပေးထားပါတယ်။ 

အထူးသဖြင့် မယ်နန်ချောင်ဖရာမြစ်ကမ်းတလျှောက်ရှိ ဥထိုင်းဌာနီ၊ ချိုင်းယားနတ်၊ ဆင်းဘူးရီး၊ အန်ထောင်း၊ ဆုဖန်းဘူးရီး ၊ လုပ်ပူရီ ၊ အယုဒ္ဓယ၊ ပထုန်ဌာနီ၊ နွန်ထပူရီ၊ ဘန်ကောက်၊ စမွတ်ဆခွန်း၊ စမွတ်ပရကန်စတဲ့  ၁၂ ခရိုင်နေပြည်သူတွေအနေနဲ့ ရေဘေးအတွက် ကြိုတင်ပြင်ဆင်ကာကွယ်ထားကြဖို့ သတိပေးချက်ထုတ်ပြန်ထားပါတယ်။ 

ရေဘေးသင့်အရေးပေါ်အကူအညီလိုအပ်ပါက အရေးပေါ်လိုင်း ဖုံးနံပါတ် ၁၇၈၄ ကို ၂၄ နာရီ ခေါ်ဆိုဆက်သွယ်နိုင်ပြီး Line ID @1784DDPM  မှာလည်း ဆက်သွယ်နိုင်တယ်လို့ ဆိုပါတယ်။ ကိုးကား -  https://www.khaosod.co.th/around-thailand/news_6641633

14 hours Ago

September 25, 2021

ထိုင်းနိုင်ငံကို တရားမဝင် ဝင်ရောက်လာသည့် မြန်မာရွှေ့ပြောင်းလုပ်သား ၁၂ ဦး ဖမ်းဆီးခံရ

ကရင်ပြည်နယ်၊ မြဝတီမြို့တစ်ဘက်ကမ်း မဲဆောက်မြို့ မယ်တော်ဆေးခန်းအနီးမှာ မြန်မာနိုင်ငံမှ ထိုင်းနိုင်ငံကို တရားမဝင်ဝင်ရောက်လာတဲ့ ရွှေ့ပြောင်းအလုပ်သမား ၁၂ ဦးကို စက်တင်ဘာ ၂၄ ရက်ညက ဖမ်းဆီးရမိတယ်လို့ ထိုင်းအာဏာပိုင်တွေထံက သိရပါတယ်။

မြန်မာ-ထိုင်းနယ်စပ် မြဝတီမြို့ကတဆင့် သောင်ရင်းမြစ်ကို စက်လှေနဲ့ကူးကာ မယ်တော်ဆေးခန်းအနီး ကြံခင်းမှာ ခိုလှုံနေချိန် ထိုင်းပြည်သူတချို့က  သတင်းပေးတိုင်ကြားရတဲ့အတွက် အမျိုးသား ၆ ဦး၊ အမျိုးသမီး ၃ ဦးနဲ့ ကလေး ၃ ဦးကို ဖုန်း ၇ လုံး၊ ထိုင်းဘတ် ၅၀၀ တန် ၂၀ ရွက်နဲ့အတူ  ဖမ်းဆီးရမိခဲ့တယ်လို့ သိရပါတယ်။

မြန်မာနိုင်ငံမှာ စစ်အာဏာသိမ်းမှုနောက်ပိုင်း မိသားစုစားဝတ်နေရေးအခက်ခဲကြောင့် ရွှေ့ပြောင်းမြန်မာအလုပ်သမားတွေဟာ  ထိုင်းနိုင်ငံနဲ့ မလေးရှားနိုင်ငံတို့ကို ရရာနည်းလမ်းတွေနဲ့ သွားကြရာမှာ မကြာခဏ ဖမ်းဆီးခံနေရတာဖြစ်ပါတယ်။

2 days Ago
More News
Up