ထိုင်းတွင် မြန်မာလုပ်သား ၃ ဦး ဆိုင်ကယ်နှင့်ဓာတ်တိုင်ဝင်တိုက်၊ ၃ ဦးလုံး ပွဲချင်းပြီး သေဆုံး

January 14, 2020

ထိုင်းတွင် မြန်မာလုပ်သား ၃ ဦး ဆိုင်ကယ်နှင့်ဓာတ်တိုင်ဝင်တိုက်၊ ၃ ဦးလုံး ပွဲချင်းပြီး သေဆုံး 

ထိုင်းနိုင်ငံ အရှေ့မြောက်ပိုင်း နခွန်းရာ့ချ်ဆီမားခရိုင်ထဲမှာ ပြီးခဲ့တဲ့ ရက်ပိုင်းက မြန်မာအလုပ်သမား ၃ ဦး ဆိုင်ကယ်မတော်တဆထိခိုက်မှုဖြစ်ပွါးပြီး အားလုံး ပွဲချင်းပြီး သေဆုံးသွားပါတယ်။  ဇန်နဝါရီ ၁၂ ရက် ညနေ ၆ နာရီခွဲလောက်က နခွန်းဆီမားခရိုင် ဆီချူးမြို့ နောင်ရီရပ်ကွက်ထဲမှာ မော်တော်ဆိုင်ကယ် မတော်တဆထိ ခိုက်မှုဖြစ်ပြီး ထိခိုက်ဒဏ်ရာ ရသူရှိကြောင်းသတင်းရလို့ ကယ်ဆယ်ရေးအဖွဲ့ လူနာတင်ယာဉ်နဲ့ အတူ သွားရောက်စစ်ဆေးခဲ့တယ်လို့ ဆီချူးနယ်မြေရဲ စခန်းမှ ဒုရဲအုပ် ဧကချိုင်း ရစ်ထိမာက သတင်းထောက်တွေကို ပြောပါတယ်။ အခင်းဖြစ်တဲ့နေရာမှာ တကွဲတပြားစီ လဲကျနေတဲ့ လူ ၃ ဦးနဲ့  ဆီချုး-ခွန်ထွတ်လမ်းဘေးရှိ ဓာတ်မီးတိုင်ကို အရှိန်ပြင်းစွာဝင်တိုက်ထားလို့ ကြေမွပျက်စီး နေတဲ့ ဟွန်ဒါ‌ ဆိုင်ကယ်တစ်စီးပါ တွေ့ရတယ်လို့ ဆိုပါတယ် ။  လဲကျသူတွေကို စစ်ဆေးကြည့်ရာမှာတော့ ၃ ယောက်လုံး အဲဒီနေရာမှာတင် ပွဲချင်းပြီး သေဆုံးသွားခဲ့ပြီလို့ ဒုရဲအုပ်ဧကချိုင်းက ဆက်ပြောပါတယ် ။  သေဆုံးသူတွေမှာ ကိုကျော်ဟိန်း (၂၇ နှစ်)၊ ကိုညိုမင်းဦး (၂၇ နှစ်)နဲ့ ကိုစီ (၂၃ နှစ်) တို့ဖြစ်ပြီး အားလုံးဟာ မြန်မာအလုပ်သမားတွေဖြစ်ကြောင်း၊ သူတို့ဟာ ဆီချုးမြို့ ဗာဗာဖက်ခ် - ပလပ်စတိတ်နဲ့ ဂျုံမှုန့် ထုတ်လုပ်ရေးကုမ္ပဏီက အလုပ်သမားတွေဖြစ်ပြီး အဲဒီစက်ရုံမှာ အလုပ်လာလုပ်တာ ၁ နှစ်လောက်ပဲ ရှိသေးတယ်လို့ လုပ်ဖော်ကိုင်ဘက်တွေက ပြောပါတယ်။  အခင်းဖြစ်တဲ့နေ့က ကိုကျော်ဟိန်းဟာ ဈေးမှာပစ္စည်းသွားဝယ်စရာရှိလို့ ဆိုပြီး ထိုင်းအမျိုးသမီး တဦးရဲ့ ဆိုင်ကယ်ကို ငှားရမ်းခဲ့ကြောင်း၊ အဲဒီနောက် အပေါင်းပါ နှစ်ယောက်ကို တင်ပြီးထွက်သွားရာ အမြန်မောင်းတာကြောင့် အရှိန်ပြင်းပြင်းနဲ့ လမ်းဘေးဓာတ်မီးတိုင်ကို ဝင်တိုက်မိတာလို့ ဆီချူးရဲစခန်းက ပြောပါတယ်။  ကိုးကား - ထိုင်းရတ် https://www.thairath.co.th/news/crime/1745946
1 year Ago
Up