ထိုင်းတောင်ပိုင်း

February 25, 2021

ထိုင်းတောင်ပိုင်းတွင် ကလေးငယ် ၂ ဦး အပါအဝင် မြန်မာ ၁၆ ဦး ဖမ်းဆီးခံရ

ထိုင်းနိုင်ငံတောင်ပိုင်း စူရတ်ဌာနီခရိုင်ထဲမှာ ယမန်နေ့ညက မှန်လုံကားနဲ့ ခရီးထွက်လာတဲ့ မြန်မာနိုင်ငံသား ၁၆ ဦး ဖမ်းဆီးခံခဲ့ရတယ်လို့ ချနယ်လ် ၇ ထိုင်းတီဗွီသတင်းမှာ ဖော်ပြပါတယ်။

နယ်မြေထဲမှာ ရွှေ့ပြောင်းအလုပ်သမားတွေကို ခရိုင်ကျော်ရွှေ့လျားသယ်ဆောင်မှုတွေ ရှိနေကြောင်း ကြိုတင် သတင်းရတဲ့အတွက် ခရိုင်လဝက ရဲတပ်ဖွဲ့ နဲ့ အုပ်ချုပ်ရေးရုံးဘက်က တာဝန်ရှိသူတွေဟာ ဖေဖော်ဝါရီလ ၂၄ ရက် ည ၇ နာရီလောက်က  စူရတ်ဌာနီခရိုင် ထာ့ချန်းမြို့နယ် ခလောင်းဆိုင်းအုပ်စု အဝေးပြေးကားလမ်းဘေးရှိ ဓာတ်ဆီဆိုင်ထဲမှာ ဝင်နားနေတဲ့ မှန်လုံကား ၂ စီးကို ဝင်ရောက်စစ်ဆေးခဲ့ပါတယ်။ 

စစ်ဆေးချက်အရ အဆိုပါကား ၂ စီးပေါ်မှာ  ၅ လသားကလေးအရွယ်ပါ မိခင် ၁ ဦး ၊ ၁၂ နှစ်သား ကလေးငယ် ၁ ဦး ၊ နောက်ထပ် အမျိုးသား ၁၂ ဦး အမျိုးသမီး ၂ ဦးတို့ လိုက်ပါစီးနင်းခဲ့ပြီး အားလုံးမှာ မြန်မာအလုပ်သမားတွေဖြစ်ကာ သက်သေအထောက်အထားမပြည့်စုံဘူးလို့ ဆိုပါတယ်။

သူတို့ထဲမှာ ၈ ဦးက ပတ်စပို့ရှိပေမယ့် အိုဗာစတေး ( နေထိုင်ခွင့်ရက်လွန် ) နေကြပြီး ၇ ဦး ကတော့ ဘာအထောက် အထား မှမရှိလို့  ထိုင်းနိုင်ငံထဲ တရားမဝင် ဝင်ရောက်နေထိုင်မှု ၊ ကိုဗစ်-၁၉ ဥပဒေအရ  ခရိုင်ကျော်ခရီးသွားလာခွင့်ကို ချိုးဖောက်မှုတွေနဲ့ အရေးယူခံရမယ်လို့ စူရတ်ဌာနီ ရဲတပ်ဖွဲ့က ပြောပါတယ်။ 

ဒါ့အပြင် သူတို့တွေကို တင်ဆောင်လာတဲ့ ထိုင်းနိုင်ငံသား ၂ ဦးဟာလည်း တရားမဝင်အလုပ်သမားတွေကို ခိုလှုံခွင့်ပြုမှု ၊ တရားမဝင်သူတွေအဖမ်းမခံရအောင် ကူညီကာကွယ်ပေးမှုတွေနဲ့ အရေးယူခံရမယ်လို့ ဆိုပါတယ်။ 

ကားသမား ၂ ဦး ထွက်ဆိုချက်အရ သူတို့ဟာ အဆိုပါ မြန်မာနိုင်ငံသားတွေကို ဟတ်ယိုင် ၊ ကရပီ ၊ ဖူးကစ် ၊ ဖန်ငါး နဲ့ စူရတ်ဌာနီ စတဲ့နေရာအသီးသီးကနေ တင်ဆောင်ခဲ့ကြောင်း ၊ တချို့က  မလေးရှားက ပြန်လာကာ ဘန်ကောက် နဲ့ စမွတ်ဆာခွန်းမှာ အလုပ်လာလုပ်မယ့်သူတွေရှိသလို  တချို့က နေရပ်မြန်မာပြည်ပြန်မယ့်သူတွေလည်းပါတယ်လို့ ဆိုပါတယ်။ 

သူတို့နဲ့အတူ တရားမဝင်အလုပ်သမားတွေကို တင်ဆောင်လာတဲ့ နောက်ထပ်ကား ၁ စီးရှိသေးကြောင်း ၊ ဒါပေမဲ့ အဲဒီကားကတော့ ထွက်ပြေးလွတ်မြောက်သွားတယ်လို့  တာဝန်ကျ ရဲဝန်ထမ်းက ပြောပါတယ်။ 

1 month Ago

January 26, 2021

ထိုင်းတောင်ပိုင်းတွင် ရထားစီး မြန်မာရွေ့ပြောင်းလုပ်သား ၅ ဦး ဖမ်းဆီးခံရ

ထိုင်းတောင်ပိုင်၊ နခွန်းဆီထမရတ်ခရိုင်ထဲမှာ ရထားစီးပြီး ဘန်ကောက်သွားမယ့် မြန်မာ ရွေ့ပြောင်းလုပ်သား  ၅ ဦး ဖမ်းဆီးခံလိုက်ရတယ်လို့ matichon ထိုင်းသတင်းမှာ ဖော်ပြပါတယ်။ 

အသက် ၂၅ မှ ၃၀ ကြားရှိ  မြန်မာလုပ်သား ၅ ဦးဟာ ပြီးခဲ့တဲ့ ဇန်နဝါရီလ ၂၄ ရက် ညက နခွန်းဆီထမရတ်ဘူတာကနေ ဘန်ကောက်ကို ရထားနဲ့သွားဖို့  ကိုဗစ်-၁၉ ရောဂါ ကာကွယ်ရေး အပူချိန်တိုင်းစက် ဖြတ်ကျော်စဉ် ၂ ဦးမှာ  ကိုယ်ပူချိန်မြင့်နေတာကိုတွေ့ရတဲ့အတွက် တာဝန်ရှိ သူတွေက ခေါ်ယူ စစ်ဆေးခဲ့တယ်လို့ ဆိုပါတယ်။ 

သူတို့ကို စစ်ဆေးမေးမြန်းရာမှာတော့ ထိုင်းစကားနားမလည်ကြတဲ့အပြင် နေထိုင်ခွင့်လက်မှတ် အထောက်အထားတစုံတရာမရှိတဲ့အတွက် မီးရထားဆိုင်ရာ တာဝန်ရှိသူတွေက သက်ဆိုင်ရာကို ဆက်လက်အကြောင်းကြားခဲ့ပါတယ်။

မကြာခင် လဝက၊ အုပ်ချုပ်ရေးပိုင်းနဲ့ ကျန်းမာရေးဌာနက တာဝန်ရှိသူတွေ ရောက်လာကြပြီးသူတို့ ၅ ဦးကို ကိုဗစ်-၁၉ ရောဂါပိုးစစ်ဆေးတဲ့အပြင် မီးရထားလက်မှတ်ရလာပုံကို စစ်ဆေးခဲ့ပါတယ်။ 

သူတို့ကို ထိုင်းအမျိုးသားတစ်ယောက်က လက်မှတ်ဝယ်ပေးခဲ့တာကြောင့်   လူကုန်ကူးမှုနဲ့ ပတ်သက်ခြင်းရှိမရှိ ဆက်လက်စုံစမ်းစစ်ဆေးသွားမယ်လို့ တာဝန်ရှိသူက ပြောပါတယ်။ 

နောက်ဆက်တွဲသတင်းတွေအရ အဆိုပါ မြန်မာလုပ်သား ၅ ဦးမှာ ကိုဗစ်-၁၉ ပိုးမတွေ့ရပေမဲ့  ကူးစက်ရောဂါကာကွယ်ရေးဥပဒေချိုးဖောက်မှု ၊ နိုင်ငံထဲတရား မဝင်နေထိုင်မှုနဲ့ ခွင့်ပြုချက်မရဘဲ နယ်မြေရွေ့ပြောင်း သွားလာမှုတွေနဲ့ အရေးယူခံရမယ်လို့ ဆိုပါတယ်။ 

ထိုင်းနိုင်ငံမှာ ကိုဗစ်-၁၉ ဒုတိယလှိုင်းကို ရွှေ့ပြောင်းလုပ်သားအများဆုံးနေထိုင်တဲ့ ဆမွတ်ဆာခွန်းခရိုင်မဟာချိုင်မှာ စတင်တွေ့ရှိတာကြောင့် ရွှေ့ပြောင်းလုပ်သားတွေ နယ်မြေထွက်ခွာ ရွှေ့လျားသွားလာမှုကို ကန့်သတ်ထားသလို မီးရထားစီးခွင့်ကိုလည်း ပိတ်ပင်ထားပါတယ်။ 

ကိုးကား- 77 Kaoded/ Matichonကိုးကား -  https://www.77kaoded.com/news/kitdanai/2064412

2 months Ago
More News
Up