ထိုင်းကျန်းမာရေးဌာနပြော

January 29, 2020

ချင်းမိုင်တွင် တရုတ်ခရီးသွား ၁ ဦး ရုတ်တရက် သေဆုံး၊ ဝူဟန်ဗိုင်းရပ်စ် မဟုတ်ဟု ထိုင်းကျန်းမာရေးဌာနပြော

ထိုင်းမြောက်ပိုင်း၊ ချင်းမိုင်ခရိုင်၊ မဲ့လိမ်းမြို့နယ်ထဲမှာ တရုတ်နိုင်ငံက လာတဲ့ ခရီးသွားဧည့်သည် အမျိုးသမီးတဦး ဒီကနေ့မနက်က  ရုတ်တရက် သေဆုံးသွားပါတယ်။  မယ့်လိမ်းမြို့နယ်၊ မဲ့လိုမ်းရပ်ကွက်ရှိ ဥယျာဉ်ဟိုတယ် (Resort) တခုမှာ တရုတ်ပြည်က လာတဲ့ ခရီးသွားဧည့်သည် ၁ ဦး ရုတ်တရက် သေဆုံးသွားကြောင်း ဒီမနက် ၁၁ နာရီ လောက်က အရေးပေါ်ဖုန်းလိုင်းကနေ သတင်းရလို့ ကျန်းမာရေးဝန်ထမ်းတွေနဲ့အတူ ကူးစက်ရောဂါက ကာကွယ်ရေးဝတ်စုံတွေ ဝတ်ဆင်ပြီး သွားရောက်စစ်ဆေးခဲ့တယ်လို့ မဲ့လိမ်းမြို့နယ် ရဲစခန်းမှူး မာနွတ် ဆွတ်ဆဝဒီက သတင်းထောက်တွေကို ပြောပါတယ်။  အဆိုပါဧည့်သည်မှာ အသက် ၃၂ နှစ်ရွယ်ရှိ အမျိုးသမီးတဦးဖြစ်ပြီး မနေ့ကမှ တရုတ်ပြည်အလယ်ပိုင်း ကွမ်ကျိုးမြို့ကနေ ချင်းမိုင်ကို ရောက်ရှိလာကြောင်း  ဒီမနက်မှာတော့ သူ တည်းခိုရာ ပန်းခြံဟိုတယ် (Resort) ထဲမှာပဲ သေဆုံးခဲ့တာလို့ စခန်းမှူးက ဆက်ပြောပါတယ်။  အဆိုပါ အမျိုးသမီးရဲ့ ခရီးသွားဖော်က သူနဲ့အတူ ကွမ်ကျိုးကနေ ၅ ယောက် ခရီးတူတူ ထွက်ခွာလာကြောင်း၊ သေဆုံးသူမှာ ဒီမတိုင်ခင်က ဘာရောဂါမှမရှိသလို ကိုယ်ပူခြင်း၊ ချောင်းဆိုးခြင်း၊ နှာစေးခြင်းတွေ တစုံတရာ မရှိကြောင်း၊ မနေ့ညကတော့ အရက်သောက်တာ နည်းနည်းများပြီး ည ၁၀ နာရီလောက်မှာ အိပ်ရာဝင်ကာ ဒီနေ့မနက်မှာတော့ သူ့အခန်းထဲမှာပဲ သေဆုံးနေတာလို့ ဆိုပါတယ်။  သူရဲ့အလောင်းကို နခွန်းဖိင်းဆေးရုံသို့ ပို့ဆောင်သွားပြီး ဆရာဝန်တွေက စစ်ဆေးမှုတွေ ပြုခဲ့ပါတယ် ။  အဲဒီနောက် ခရိုင်ကျန်းမာရေးဌာနက ပြောရေးဆိုခွင့်ရှိသူ ဒေါက်တာ ကျဒူးချိုင် မဏီလတ်က တရုတ်ခရီးသည်အမျိုးသမီးဟာ ကိုရိုနာဗိုင်းရပ်စ် ရောဂါလက္ခဏာ မရှိတာကြောင့် အဆိုပါရောဂါနဲ့ သေဆုံးတာမဟုတ်ကြောင်း ဒီကနေ့ မွန်းလွဲပိုင်းမှာပဲ ထုတ်ပြန်ပြောဆိုလိုက်ပါတယ်။  ဒါပေမဲ့ သေဆုံးရတဲ့အကြောင်းရင်းကိုတော့ ဆက်လက်ရှာဖွေစစ်ဆေးသွားမယ်လို့ ဆိုပါတယ်။  ချင်းမိုင်မှာ နိုင်ငံတကာလေဆိပ်ရှိပြီး တရုတ်ခရီးသွားတွေ အများအပြား လာရောက်လည်ပတ်လေ့ရှိတဲ့ မြို့တမြို့လည်း ဖြစ်ပါတယ်။ ထိုင်းမှာ ကိုရိုနာဗိုင်းရပ်စ် ကူးစက်ခံရသူ ၁၄ ဦးထိ တွေ့ရှိခဲ့ပေမယ့် ကနေ့ထိ နိုင်ငံ့ ဝင်ပေါက်ပိတ်ခြင်းမရှိဘဲ ဝင်လာသမျှ ဧည့်သည်တွေ လက်ခံနေလို့ ထိုင်းအစိုးရဟာ  ဝေဖန်ခံနေရပါတယ်။   ကိုးကား - ချန်နယ်လ် ၃ ထိုင်းတီဗွီသတင်း ၊  cm 108 Chiang Mai News
1 year Ago
Up